Monthly Archives: සැප්තැම්බර් 2011

2011 සැප්තැම්බර් 29: අපි දුවමූ….. අපි පනිමූ….. නොහොත් රාජ්‍ය සේවකයන්ට ආණ්ඩුව ගානේ ව්‍යායාම කරවීම…..


අපේ ආණ්ඩුවේ ඉන්න උදවිය ඇල්කෙමියාගේ දිනපොත බලනවද මන්දා…..ඔන්න මම කාළයක් තිස්සේ කිය කිය හිටපු තවත් දෙයක් පළ දරන්න හදනවා…… ඒ තමයි රාජ්‍ය සේවකයන්ට ආණ්ඩුව ගානේ ව්‍යායාම කරවීම

ක්‍රමාණුකූලව ව්‍යායාම් කිරීමේ ආදීනව මම දිනපොතේ සඳහන් කළේ එක දිනක් නෙවෙයි.. බොහෝ සටහන්වල ව්‍යායාම කිරීමෙන් ලැබෙන ප්‍රයෝජන, වාසි ආදිය මම සඳහන් කරලා තියෙනවා. මෙම කාරණය ඇත්තෙන්ම පැසසිය යුතු කටයුත්තක්… රාජ්‍ය හෝ පෞද්ගලික අංශයේ සේවකයන් වේවා මේ සියල්ලන්ම දුවන්නේ එකම රටාවකට… උදේ සේවා ස්ථානයට පැමිණෙන ඔවුන් උදේ ආහාරය ලෙස එක්කෝ පාන් පෙති කීපයක් හෝ වෙනත් පහසු “කොට කෑම” ස්වල්පයක් ගිලදමා තමන්ගේ රාජකාරි පටන් ගන්නවා.. බොහෝ දෙනෙක් පුටු උඩ ඉඳගෙන හෝ එකතැන සිටගෙක කරන වැඩ තමයි කෙරෙන්නේ… මේ නිසාම බොහෝ දෙනෙකුගේ ඇඟ වෙහෙසා යමක් කෙරෙනවා අඩුයි… දිවා ආහාරය වුවත් සමබල ආහාරයක් ගැනෙන්නේ නැති තරම්.. පිෂ්ඨය අධික ආහාර වේලකට හිමිකම් කියන ශ්‍රී ලාංකිකයා ඊට අමතරව තෙලෙනුත් බැදිලයි එන්නේ… මේ නිසා ඔවුන්ගේ ආහාර වේල් සහ ආහාර රටා බෙහොමයක් සෞඛ්‍ය සම්පන්න නැහැ… ඒ වගේමයි සවසට ගෙදර බලා යන මේ දෙගොල්ලන්ටම වැඩ රාජකාරි බොහොමයි… බස් එකේ දාඩිය දාගෙන ගියා කියලා ඒක ව්‍යයාමයක් නෙවෙයි… ඉතින් මේ මහන්සිය පිටින්ම නින්දට යන ඔවුන් බොහොමයක් කායික තෙහෙට්ටුවට අමතරව සමහර විට සේවා ස්ථානයේ කාර්ය බහුලතාවය නිසා මානසිකවත් තෙහෙට්ටු වෙලයි ඉන්නේ….  සති අන්තයත් බොහෝ විට අතිකාල වැඩ හෝ දරුවන්ගේ වැඩ… මේ නිසා බොහෝ දෙනෙකුට ව්‍යායාමයක් නොකෙරෙන තරම්.. මේ නිසාම අවුරුදු 30 පණින විට බොහෝ දෙනාගේ “ටයර් – එසේත් නැත්නම් Love handle”  එන්න පටන් ගන්නවා.. ඒ පිටතට පෙනෙන දේ.. නමුත් ඇඟ ඇතුලේ අධික රුධිර පීඩනය, දියවැඩියාව ආදී රෝග ලක්‍ෂණ ගිණි කන්දක් වගේ පැසවනවා… එක්කෝ හදිසි හෘදයාබාධයක් හෝ දැඩි දියවැඩියා ලක්‍ෂණ මතු වීම වැනි බොහෝ කල් ගියපසු එහි ආදීනව කෙනෙකුට දැනෙනවා… ඉන් පසුවයි නිසි ලෙස ව්‍යායාම කරන්නට මතක් වෙන්නේ…

මෙයට හොඳම උදාහරණය මගේ ඥාති බාප්පා කෙනෙක්.. ඔහු මහ බැංකුවේ උසස් නිලධාරියෙක්. තරුණ කාළයේ හොඳට මස් මාළු කෑ… ඉඳහිට මඳපමණට ගත් බොහොම සැහැල්ලු විනෝදකාමී පුද්ගලයෙක් වුන ඔහු බොහෝ දුම් පානය කළ තැනැත්තෙක්.. ඔහුව දුම් පානයෙන් මුදවා ගන්නට මා කෙතරම් උත්සාහ කළත්, එය ගඟට කැපූ ඉණි වුනා… මීට වසර තුනකට පමණ පෙර ඔහුට හදිසි හෘදයාබාධයක් වැළඳී බයිපාස් සැත්කම් 4 ක් එකවර කිරීමට සිදු වුවා… මේ සියල්ලට අනතුරුව දැන් ඔහු දිනපතා සැතපුම් කිහිපයක් ඇවිදීම, නිවසේ ව්‍යායාම් කිරීමේ යන්ත්‍රයක් තබාගෙන ව්‍යායාම කිරීම ආදි සියල්ල කරන අතර දුම් පානය සහ මත්පැන් පානය නතරකර තිබෙනවා.. මේ සිද්ධිය බොහෝ දෙනෙකුට පොදු කාරණයක්…

දැන් මේ කරන්න යන රාජ්‍ය සේවකයන්ට ව්‍යායාම කරවීම අගය කළ යුතු කටයුත්තක් වුනත් කොයිතරම් ප්‍රායෝගික ද යන්න විමසා බැලිය යුතු වෙනවා. මුලින් පැය 2 ක් ව්‍යායාම කරවන්නයි බලාපොරොත්තුව… මේ පැය දෙක කෙසේ යොදා ගැනීමට අදහස් කරනවා දැයි අප තවම නොදන්නා නමුත්, ව්‍යායාම නොකළ කෙනෙකු හදිසියේම පැය දෙකක් එකවර මහන්සි කරවීම ප්‍රවේශමෙන් කළ යුත්තක් වෙනවා. ඒ වගේම අදාල ආයතනවල ඵලදායීතාවයට හානි නොවන පරිදි මෙය සිදු කළ හැකිනම් හරිම අගෙයි… අපේ රාජ්‍ය ආයතන බොහොමයක් තැන තැන විසිරිලයි තිබෙන්නේ.. මේ ආයතනවලට පොදු ව්‍යායාම ශාලාවක් වැනි දෙයක් ස්ථාපිත කළ හැකි නම් සහ ඒ ස්ථානවලට යාමට සේවකයන් උනන්දු කිරීමේ වැඩපිළිවෙලක් සම්පාදනය කළ හැකිනම් තවත් අගෙයි….

මේ සියල්ලටම වඩා රාජ්‍ය සේවකයන්ගේ ආකල්පමය වර්ධනයක් ඇති කර, ඔවුන් සමබල සහ පෝෂ්‍යදායී ආහාර රටාවකට හුරු කරවීම, සිය සිරුරු පිළිබඳව මීට වඩා සැලකිල්ලක් දැකවීමට උනන්දු කරවීම, යහපත් සෞඛ්‍ය පුරුදු හුරු කරවීම වැනි දේ මගින් බොහෝ දේ මගහරවා ගන්නට පුළුවනි..

මේ ඇසූ මගේ මිතුරෙක් මෙහෙමත් කිවුවා..

“ලංකාවෙ රාජ්‍ය සේවකයන්ට අමුතුවෙන් ව්‍යායාම කරන්න ඕන නෑ.. ලොක්කා එනකොට පනින්න දන්නවා… වැඩ ඇරෙන්න ලංවෙන කොටම දුවන්න දන්නවා… වැඩ වලින් ලිස්සන්න දන්නවා.. පවුල්-බර උස්සන්න පුළුවන් නිසා බර එසවීම දන්නවා.. මේ නිසා ලංකාවෙ රජයේ සේවකයා කියන්නේ මේ හැම ව්‍යායාමයක්ම කන්තෝරුව ඇතුලෙම කරන කෙනෙක්.. අමුතුවෙන් ව්‍යායාම කරවන්න ඕන නෑ…”

ඒ ගැන හිතන්න ඔබට බාරයි…

Advertisements

2011 සැප්තැම්බර් 28 : අපෙ ගුරුතුමා යයි තාමත් ඉස්කෝලේ….


මේ දිගටම ලින්න බැරි වුනා…. වැඩ අධික කමත්, පැටියත් ඇල්කෙමිච්චිත් තරමක් අසනීපව සිටීම නිසා ලියන්න නිදහසක් නොමැති වීමත් නිසා දිනපොත කුරුටු ගාන්නට බැරි වුනා…. මේ ලිපිය ලියන්න ගත්තේ 20 වෙනිදා.. තවම හොඳටම නිම කළේ නැතත් පළකරන්න තීරණය කළේ හැමෝටම මාව අමතක වෙලා යන්නට පෙර……

ඉස්සර නම් ගුරු වෘත්තිය කියන්නේ සේවයක්… දැනුත් එහෙමම තමයි…. හොඳ ගුරුවරු නැත්නම් අපි මේ තැන්වල නෑ වගේම සමහර ගුරුවරු නිසා දරුවන් අතරමං වුන වෙලාවල් අනන්තවත් ඇහෙනවා… හැම දේම හොඳ නරක තියෙනවා වගේම මේ දේත් හොඳ නරක තියෙනවා… නමුත් තිබිය යුත්තේ හොඳ පමණයි.

ගුරුවරුන්ගේ සේවයට සරිලන වැටුපක් කවදාවත් ඔවුනට ලැබුනෙ නෑ වගේම ගුරුවරුන්ගෙන් සිදු වන සේවය අගය කිරීමක් නිසි ලෙස කවදාවත් ලංකාවෙ සිදු වුනේ නැහැ. ඒ වගේමයි දේශපාලනිකව පත්වීම් ලැබූ නිසි පුහුණුවක්, දැනුමක් සහ විනයක් නොමැති අය නිසාත් මේ ගුරු සේවයේ තත්ත්‍වය පහළට බැස තිබෙනවා.

නමුත් දැන් දැන් බොහොමයක් කරුණු දේශපාලනික වෙලා ….. තමන්ගේ ඉල්ලීම් දිනාගන්නට දරුවන්ගේ අනාගතය උකසට තබන තත්ත්‍වයක් බොහෝ අවස්ථාවල දකින්නට ලැබුණා.. සමහර වෙලාවට උසස් පෙළ අත්තර පත්‍ර බැලීම නතර කිරීම වැනි කාරණා කරා පවා යාමට ගුරු සංගම් කටයුතු කළා… ඒ අය වැරදියි කියන්නත් බැහැ… ඉල්ලීම් ඉල්ලන එකේ සීමාවකුත් තියෙනවා… ආණ්ඩුවෙන් තමන්ගේ ඉල්ලීම් වලට කන් දෙන්නේ නැත්නම් කරන්න දෙයක් නැහැ… සමහර විට දැඩි ක්‍රියාමාර්ග ගන්නට වෙනවා… ඒ තවත් පැත්තක්.

නමුත් ගුරුවරු අනෙක් වෘත්තිකයන් වගේ නොවෙයි. ඒ අය උදේ 8.00 සිට සවස 3.00 දක්වා වැනි කාලයකුයි සේවයේ යෙදෙන්නේ.. ඒ වගේමයි බොහෝ විට (ගුරු පුහුණු සැසි  සහ වෙනත් රාජකාරි කාරණා හැරුණුකොට) සති අන්ත නිවාඩුයි. වසරේ මාස තුනකට ආසන්න කාළයක් පඩි සහිත නිවාඩු ලැබෙන ගුරු වෘත්තියේ ඒ කාළයත් එක්කෝ විභාග රාජකාරි වෙනුවෙන් යෙදුවොත් අමතර ආදායමකුත් ලැබෙනවා… කිසිම වෙලාවක ගුරුවරයෙක් තම රාජකාරි අඩුපාඩු නිසා සේවයෙන් පහකළ බව අසන්නට ලැබෙන්නේ නැහැ. ඒ වගේමයි ගුරුවරුන්ගේ උසස්වීම් තමන් උගන්වන දරුවන්ගේ සාමාර්ථ ( පාරිභෝගික තෘප්තිය – Customer satisfaction) මත රඳා පවතින්නෙත් නැහැ. දරුවන් සමත් වුනත්, නැතත් ඔවුනට වේතනය සහ නියමිත උසස්වීම් ලැබෙනවා.

නමුත් සමහර ගුරුවරුන් ඉන්නවා තම වෘත්තිය සේවයක් කරගනිපු…. ඔවුනට වේතනය හෝ උසස්වීම් වැදගත් කාරණයක් නෙවෙයි. ඔවුන් නිතරම  බලන්නේ තම දරුවන්ගේ දියුණුව…. උගන්වන එක පොතපතට පමණක් සීමා වෙලා නැහැ… බොහෝ අමතර කරුණු කාරණා, විෂයයට අදාල විවිධ විෂය බාහිර ක්‍රියාකාරකම්, නව්‍යකරණයන්, නිර්මාණශීලී ඉගැන්වීම් රටාවන් ආදිය ඔවුන් නිරන්තරයෙන් අමතර වෙහෙසක් යොදා සොයාගෙනවිත් දරුවන්ට ලබා දෙනවා.. වෘත්තීය අයිතිවාසිකම් ගැන බලන්නේ තමන්ගේ යුතුකම් කොටස ඉටු කළාට පසුවයි…

දැන් මේ රටේ ගුරුවරු ගැන බලමු… බොහෝ දෙනා වැඩ කරන්නේ ඇත්තෙන්ම අඩු පඩියකට, බොහෝ දෙනා වෘත්තීය සුදුසුකම් සපුරා ලන විභාග සමත් වී අදාල බලපත්‍ර ලබාගතයුතුයි. සමහරවිට බොහෝ ගුරුවරු අතින් වියදම් කරගෙන පන්තිකාමරයට අවශ්‍ය බඩු භාණ්ඩ ගෙනෙනවා. ළමුන්ගේ විභාග සමත්වීමේ ප්‍රතිශතයන්, ළමුන් ගුරුවරුන් වර්ගීකරණය කිරීම ආදිය මත උසස්වීම් රඳාපවතිනවා. බේහෝ දෙනා තමන්ගේ පාසල අවසන්වුනාට පසුවත් බොහෝ වේලා රැඳීසිට ඊලඟ දිනයට අවශ්‍ය දෑ සූදානම් කරනවා. තමන් උගන්වන දරුවන්ගේ ප්‍රගතිය පිළිබඳ වගකීමට ඔවුන් සෑම දෙනාම බැඳී සිටිනවා… ඒ විතරක් නෙවෙයි… සෑම වසරක් අවසානයේම ඊලඟ වසරට තමන්ගේ රැකියාව සුරක්‍ෂිතද යන දෙගිඩියාව බොහෝ දෙනෙකුගේ සිතේ තිබෙනවා… මේක මා දුටු ලොකු වෙනසක්….

අපි පාසල් යන කාළේ සමහර ගුරුවරුන්ට දැඩි ගරුත්‍වයක් – ආදරයක් දැක්වූවත් සමහරුන් අපෙන් ඈත් වුනේ බොහොම ඉක්මනට… ඒ ඔවුන්ගේ ඉගැන්වීමේ සාර්ථකත්‍වය කියා පෑමක්… සමහර ගුරුවරු අපට ගුරු දෙවියන් වගේ…. මමත් මෙතැන ඉන්නේ ඒ වගේ දෙවියෙක් නිසා…

කොහොම වුනත් එදා ගුරුවරුන්ට තිබුන ගරුත්‍වය අද ළමුන්ගෙන් ගුරුවරුන්ට ලැබෙන්නේ නැත්නේ එක්කෝ සමාජයේ වැරැද්දක්… එහෙමත් නැත්නම් ගුරු වරුන්ගේ වැරැද්දක් ද කියලා කියන්න මට තේරෙන්නෙ නෑ… තමන් උගන්වපු ළමුන් කොයිතරම් උඩින් ගියත් බොහොමයක් ගුරුවරු තවමත් ඉස්කෝලෙ යන්නේ එදා ගිය විදියටම වීමත් එක්තරා ආකාරයක අභාග්‍යයක්…. මේ හැම දේටම විසඳුමක් දෙන්න කෙනෙක් ඉන්නවා නම් කොච්චර හොඳද ?

මේකත් අහගෙනම යන්න…

ලිංගිකත්‍වය පිළිබඳ විවෘතව සාකච්ඡා කිරීමට අප සූදානම් ද ?


මේ ලිපිය ලියලා සෑහෙන දවසක් වුනත්, සම්පූර්ණ කරගන්න ටික කලක් ගතවුන නිසා පළ කරන්න බැරි වුනා.

මේක බොහොම බැරෑරුම් මාතෘකාවක්, සීමාවේ පිහිටා ලිවීම හරිම අමාරු කටයුත්තක්, එසේම මේ සටහන් ප්‍රසිද්ධ කරන සිංහල සින්ඩි වල සීමා වලටත් අදාලව ලිවිය යුතු නිසා බොහොම පරිස්සමින් තමයි ලිවිය යුත්තේ…   ලංකාවෙත් මේ කතා නීතියෙන්ම තහනම් නේ…. ඒ වගේමයි, මේ ලිපිය ඔබට කියවන්න අනවශ්‍යයි කියලා හැඟෙනවා නම් දැන්ම පිටවන්න…. කියවලා බලලා මැසිවිලි නඟනවාට වඩා එය හොඳයි. ප්‍රතිචාර දැක්වීමේදී තමන්ගේ සීමාවේ සිට ප්‍රතිචාර දක්වන්න…. අපි වැදගත් මිනිස්සු ලෙස මෙය සාකච්ඡා කරමු…..

අවවාද:

  1. වැඩිහිටියන්ටම පමණක් නොවේ.
  2. උඩින් පල්ලෙන් කියවන්න එපා – හිතලා බලන්න.
  3. චූන් වෙන්න දෙයක් මෙහි නැත – එසේ සිතුවා නම් දැන්ම පිටවන්න.

ලිංගික චර්යාව ඒක සෛලිකයාගේ පටන් පරිණාමයේ ඉහළම හිණිපෙත්තේ සිටින මානවයා දක්වා සියළුම සත්ත්‍වයින්ට පොදු වූ ක්‍රියාදාමයක්. ඒක සෛලිකයා සහ නොදියුණු සතුන් සිය වර්ගයා බෝ කිරීමේ අරමුණින් ලිංගිකව හැසිරුණත් මිනිසා සහ ඩොල්ෆින් වැනි මනසින් උසස් සතුන් ලිංගිකව හැසිරෙන්නේ වර්ගයා බෝ කිරීමට පමණක්ම නොවෙයි: වැරදීමක් වුනොත් ඇරෙන්න. ලෝක සෞඛ්‍ය සංවිධානයේ දත්ත අනුව දිනකට මිලියන සියයක ලිංගික හැසිරීම් ලොව පුරා සිදු වනවා. ඇමරිකානුවන් මිලියන හතලිහක් ලිංගිකව සක්‍රීය වන අතර ඇමරිකානු වැඩිහිටි ජනගහණයෙන් 52% ක් සිය ලිංගික සම්බන්ධතා පිළිබඳ අසතුටෙනුයි පසු වන්නේ. යුරෝපයේ හැර වෙනත් බොහෝ රටවල මේ දත්ත දක්නට නොලැබෙන්නේ ඒ රටවල් තවමත් ලිංගිකත්‍වය යන්න විවෘතව කතා කරන මාතෘකාවක් නොවීම නිසා. ලෝකයේ සියයට 25 – 35 ත් අතර සබඳතාවල මූලික හරය වී ඇත්තේ ලිංගික සබඳතා. එය නැතිවූ කළ විවාහය හෝ ප්‍රේම සම්බන්ධයට තිත තැබෙනවා. ආසියානු පවුල් සංස්ථාව ලිංගිකත්‍වයට වඩා පවුල් සබඳතාවයට මුල් තැන දෙනවා. එය බොහෝ විට සංස්කෘතික බැඳීම් සහ ආගම අනුව තීරණය වන්නක්. සමහර ආගම් බහු භාර්යා විවාහ වලට පවා අවසර දෙනවා.

බොහොමයක් ආසියාතික සමාජවල ලිංගිකත්‍වය යනු විවෘත සංවාදයකට සුදුස්සක් නොවෙයි. අවම වශයෙන් අඹු-සැමි දෙදෙනාවත් මේ ගැන විවෘතව කතා කෙරෙන්නේ නැති නිසා බොහෝ ප්‍රශ්න ඇති වෙනවා.  බොහෝ දෙනා වැරදි මතිමතාන්තර, විකෘති ආකල්ප ආදියෙන් ඔළුගෙඩි පුරවාගෙන සිටිනවා පමණක් නොවෙයි ඒවා නිවැරදි කරගැනීමට වත් උත්සුක වන්නේ නැහැ. උදාහරණයක් වශයෙන් අප්‍රිකානු සමාජයේ ඇති විකෘති මතයක් නම් ඒඩ්ස් වැළඳුන කෙනෙකු කන්‍යාවක් හා එක් වුවහොත් ඒඩ්ස් සුව වන බව. මෙයින් අසරණ කුඩා ගැහැණු දරුවන් දූෂණය වනවා පමණක් නොවෙයි – ඔවුන්ටද එය වැළඳෙනවා.

පරිඝණක යුගය පැමිණෙන්නට පෙර බොහෝ දේ පොත-පතට සීමා වුනත්, පරිඝණක සහ අන්තර්ජාලය මේ ලිංගික දැනුම පුපුරවා යන වේගයකින් බෙදා හරින්න පටන් ගත්තා.  බොහෝ පිරිමින් ලිංගික වෙබ් අඩවි පරිහරණය කළත්, මෑතක් වනතුරුම කාන්තාවන් ලිංගික වෙබ් අඩවි පරිහරණය තරමක් සීමා වී තිබුණේ සමාජයීය බැමි, සීමා ආදිය තවමත් කාන්තාව වටකොට තිබෙන නිසා වෙන්නට ඇති. නමුත්, CNN වෙබ් අඩවියේ තිබුණ වාර්තාවකට අනුව පිරිමින් හා සම සමව ගැහැණුන් ද අන්තර්ජාලයේ Porn නරඹන බව දැක්වෙනවා…. මෙය එක්තරා අන්දමකට නව ප්‍රවණතාවයක් මෙන්ම කාන්තාව සිය ස්වාධිනත්‍වය කරා යන ගමනේ වැදගත් සන්ධිස්ථානයක් වන්නටත් ඉඩ තිබෙනවා. මේ වාර්තාවට අනුව කාන්තාවන් ලිංගික දර්ශන නරඹන්නට හේතු කිහිපයක් තිබෙනවා.

  • බොහෝ තරුණ යුවල ලිංගික දර්ශන දෙදෙනාම එක්ව නැරඹිම. මෙහිදී කාන්තාව විසින් කුමක් නරඹනවාද යන්න තෝරා ගැනීමට ප්‍රමුඛත්‍වය දෙයි..
  • තනිකඩ කාන්තාවන් සිය සන්තර්පනය උදෙසා සහ තමන් විසින් තමන්ගේ ලිංගිකත්‍වය අවදි කරගැනීම උදෙසා.
  • යම් යම් අළුත් දේ ඉගෙන ගැනීම සඳහා සහ විවිධාකාර අළුත් ක්‍රම ආදිය ඉගෙනීමට.
  • සාමාන්‍ය කුතුහලය සංසිඳුවාගැනීමට (සමහර දෑ අසා දැනගැනීමට නොහැකියි)
  • බොහෝ කාන්තාවන් දැන් දැන් ලිංගිකත්‍වය පිළිබඳ කුලෑටි ගතියක් නොදක්වන නිසා ඒ පිළිබඳ විවෘතව කතා කිරීමේදී අවශ්‍ය කරුණු ආදිය දැනගැනීම සඳහා.

එනම් කාන්තාවද ලිංගික දසුන් නැරඹීම කරන්නේ පොදුවේ පිරිමින් විසින් නරඹනු ලබන හේතු සඳහාම වේ.

“Men are like light switches – just flip them on and they’re ready to go. Women are like irons – plug them in and let them warm up.”

කාන්තා ලිංගිකත්‍වය සහ පිරිමි ලිංගිකත්‍වය යනු එකිනෙකට වෙනස් පරාස දෙකක පැතිර ඇති විෂයයන් දෙකකි. පිරිමි ස්වභාවිකවම ඉතා ඉක්මනින් ලිංගිකව උත්තේජනය වේ. ඔවුනට රූපයක්, ශබ්ධයක්, සුවඳක්, ස්පර්ශයක්, හෝ සුළු ආලවන්ත කතා බහක්, උත්තේජනය සඳහා ප්‍රමාණවත් වන අතර එය බොහෝවිට ලිංගික සම්බන්ධතාවයකින් හෝ අවම වශයෙන් ස්වයංවින්දනයෙන් හෝ නිම වේ. සරළව පැවසුවොත්, පිරිමි ලිංගික පරිපථ ඉක්මනින් සම්පූර්ණ වන අතර සුළු උත්තේජනයකින් එය ආරම්භ වේ. නමුත් කාන්තා ලිංගිකත්‍වය මෙයට වඩා සංකීර්ණ බව විද්‍යාඥයින් හා වෛද්‍යවරුන්ගේ මතයයි. කාන්තාවන් ද ඉහත කී කාරණා මගින් ලිංගිකව උත්තේජනය වුවද, ඔවුනට ලිංගික සම්බන්ධතාවයකින් හෝ සුරාන්තයකින් ඒ උත්තේජනය අවසන් කිරීමේ අවශ්‍යතාවයක් බොහෝ දුරට පැණ නගින්නේ නැත. එයට බොහෝවිට හේතු වන්නේ ඔවුන් අවසාන ප්‍රතිඵලය කරා ලඟා විමට බොහෝ වේලාවක් ගතවීම සහ බොහොමයක් කාන්තාවන් විවිධ හේතූන් මත එයින් වැලකී සිටීම නිසායි. (එය සමාජයීය සහ සංස්කෘතික බැඳීම් වලින් සීමා වී ඇත). අප බොහෝ දෙනා විවිධාකාර ආකල්ප දැරුවත්, ලිංගිකත්‍වය වින්දනයට කෙතරම් වලිකෑවත්, පිරිමි සුරාන්තයක් පවතින්නේ තත්පර 6ක් බවත් ගැහැණියක් තත්පර 20 ක් පුරාවට එම හැඟීම විඳින බවත් දන්නේ කීයෙන් කී දෙනාද ?

සුරාන්තය පිළිබඳ ඔබ දන්නේ කෙතරම් ස්වල්පයක් ද යන්න දැනගන්න මෙන්න මේ ප්‍රශ්න 10 ට උත්තර දීල බලන්න.

පරම්පරා ගණනක් පුරාවට කාන්තාවන් ලිංගික දසුන් නැරඹීම නොකළයුත්තක් බවට හැඟීමක් පළවී තිබුණි. ඒ සඳහා කාන්තාවන් යොදා ගැනීම කාන්තා පරපුරටම කරන නින්දාවක් බවත්, කාන්තාවන්ගේ ලිංගික දසුන් කාන්තාවන් විසින් නැරඹීම කාන්තාවන් අවමානයට ලක් කිරීමක් බවත් මතයක් වී තිබුණි. නමුත් දැන් දැන් සමලිංගික විවාහ, සහ සමලිංගිකත්‍වය විවෘතව සංවාදයට බඳුන් වන දෙයක් නිසාම කාන්තාවන් අතර ඒ මතය කෙමෙන් කෙමෙන් බැහැරව යමින් පවතින දෙයක්. ලංකාවේ සමලිංගිකත්‍වයට බාධක තිබුණත්, ලෝකයේ බොහෝ රටවල ඊට පැවති සීමා ලිහිල් වීමෙන් ලිංගිකත්‍වය නිසා පීඩා විඳි බොහෝ දෙනෙකුට සහනය ලැබී තිබෙනවා. එසේම  මෑතක් වනතුරු ලිංගික දැනුම බොහෝ විට ඉලක්ක වී තිබුණේ පිරිමියා උදෙසා පමණක් වීම නිසා කාන්තාවට විවෘතව ලිංගික දැනුම පරිහරණයට හේතුවක්, අවස්ථාවක් නොලැබී ගොස් තිබුණා. එසේම පවුල් සම්බන්ධතාවයකදී පවා පිරිමියා ලිංගිකව සියල්ල දත් පුද්ගලයෙක් සේ හැසිරීම නිසා කාන්තාවට ඒ පිළිබඳ සිය අදහස් ප්‍රකාශ කිරීමේ අවස්ථාව අහිමි වී ගොස් තිබුණා. නමුත් දැන් දැන් පවුල් සංස්ථාව තුළ ද අඹු සැමියන් අතර විවෘත භාවයෙන් යුක්තව අදහස් හුවමාරු වීම නිසා කාන්තාවට ද සිය ලිංගික අභිමතාර්ථයන් සහ ආසාවන් පිළිබඳ අදහස් හුවමාරු කර ගැනීමේ අවස්ථාව උදා වී තිබෙනවා.

නමුත් ආසියාතික රටවල මේ තත්ත්‍වය බොහෝ වෙනස්. ආසියාතික කාන්තාව (සහ පිරිමියා) තවමත් සංස්කෘතික යදම් වලින් බැඳී ඇති දෙදෙනෙක්. බොහෝ විට නිවසේ අඹු සැමි දෙදෙනාටම කියා වෙලාවක්, ස්ථානයක් වෙන්ව නොතිබීම, දරුවන් කිහිප දෙනෙකු සිටීම නිසා කාර්යබහුල වීම, නිවසේ බොහෝ විට අඹු සැමියන්ට අමතරව ඔවුන්ගේ දෙමාපියන්, නෑදෑයන් විසීම ආදී කරුණු නිසා ආසියාතික අඹු සැමියන් තවමත් ලිංගිකත්‍වය පිළිබඳව බොහෝ දුරට සංවෘතයි. අවම වශයෙන් සුරාන්තයේදී කාන්තාවට ඇතිවන ආවේගයන් ශබ්ධ නගා පිට කිරීමටවත් ලංකාවේ ඉඩක් නැති නිසා ඔවුන් නිහඬවම එය විඳිනවා. දෙමාපියන් දරුවන් හා කිසිදු අන්දමින් ලිංගිකත්‍වය පිළිබඳ සංවාදයක නිරත නොවීම නිසා බොහෝවිට දරුවන් සිය කුතුහලය සංසිඳුවාගන්නේ මිතුරන් හෝ දැන් නම් අන්තර්ජාලය මගින්. අන්තර්ජාලයේ ඇති විවිධාකාර තොරතුරු දරුවාට ලබා දෙන්නේ විකෘති තොරතුරුයි. බොහෝවිට දරුවන් ලිංගිකත්‍වය පිළිබඳ දෙමාපියන් සමඟ සංවාදයකට පැමිණෙන්නේ බොහෝ දේ නැවත ගත හැකි තත්ත්‍වයෙන් ඔබ්බට ගිය පසුවයි. මෙතරම් විවෘතභාවයක් ඇති ඇමරිකාවේද මේ තත්ත්‍වය මෙසේමයි. බොහෝ යොවුන් දියණිවරුන් දෙමාපියන් සමඟ ඒ පිළිබඳ සංවාදයකට එළැඹෙන්නේ ඔවුන් ගැබ් ගත් පසුවයි..එවිට පරක්කු වැඩියි. මේ තත්ත්‍වය සමනය කිරීමට විවිධ සංවිධාන, ලිංගික අධ්‍යාපන සම්මන්ත්‍රණ ආදිය පැවැත්වුවත්, තත්ත්‍වයේ වැඩි වෙනසක් දක්නට නැහැ.

එසේම ලංකාවේ ඇති සමාජයීය බැමි නිසා ලිංගික අසහනය තරමක් ඉහළයි. බටහිර රටවල කාන්තාවන් ශරීරය තරමක් නිරාවරණය වන ඇඳුමක් ඇන්දාට කිසිවිටෙක ඇනුම්පද ඇසීමට හෝ අනවශ්‍ය ලෙස බැලීම් හෝ ස්පර්ශකිරීම් වලට භාජනය වන්නේ නැහැ. එය බොහෝ දුරට නීති මගින්ම සීමා වී තිබෙනවා. එසේම ඒ නීති නියමිත පරිදි ක්‍රියාවට ද නැගෙනවා. නමුත් දකුණු ආසියාතික  රටවල මේ තත්ත්‍වය වෙනස්, එසේම ඒ සම්බන්ධ නීති ද හරිහැටි ක්‍රියාත්මක වන්නේ නැහැ. කොටින්ම පාර අයිනේ ඇති දැන්වීම් පුවරු වලින්ද ශරීරය නිරාවරණය වන සේ දක්වා ඇති කාන්තා රූප ඉවත් කිරීමෙන් පෙනෙන්නේ අප ජීවත් වන සංස්කෘතික ආගාධය පිළිබඳවයි. කුඩා දරුවන් අනවශ්‍ය ලෙස පරිහරණය කරන නිසා අන්තර්ජාල වෙබ් අඩවි සීමා කිරීම වැනි වැදගත්, කාලෝචිත දෑ සිදු වුවද, ලංකාවේ සංස්කෘතික පොලීසියට බොහෝ දේ ඉගෙන ගැනීමට ඇත. මා වරක් ප්‍රකාශ කළාක් මෙන්, ලංකාවේ මාධ්‍ය භාවිතය තවමත් නිදැල්ලේ- අයාලේ යාමට ඉඩ තැබීම සහ රූපවහිනී වැඩසටහන් වර්ගීකරණය නොකිරීම වැනි දේ නිසා මේ දැන්වීම් පුවරු වලින් සිදුවන හානියට වඩා හානියක් දරුවන්ට සිදු වේ. සිප වැළඳ ගැනීම් මත්පැන් පානය වැනි දේ රූපවාහිනී වැඩසටහන් වලින් ඉවත් කළත්, පවුල් අවුල්, ප්‍රචණ්ඩත්‍වය වැනි දේ එළිපිටම පෙන්වීම දරුවනට හානි කර දෙයක්, එසේම ටෙලිනාට්‍ය වලින් පෙන්වන වැඩිහරියක් පවුල් අවුල් වීම නිසාම බොහොමයක් දෙනාට අනියම් සම්බන්ධතාවයක් හෝ විරසක වීම් දැන් ලොකු දෙයක් නොවන තත්ත්‍වයට පත් වෙලා. මෑතදී මගේ මිතුරියක් කීවේ බොහෝ කාර්යාලවල සේවකයන් අනියම් සම්බන්ධතාවලට පැටලීම් ප්‍රවණතාවය වැඩි වී ඇති බවයි. මේ සඳහා හේතු කිහිපයක් තිබිය හැකියි.

  1. සිය නිවසේ ඇති ව්‍යාකූල තත්ත්‍වයන්
  2. බිරියගේ නොසලකා හැරීම්
  3. පිරිමියාගේ වලත්තකම
  4. පිරිමියා නොසලකා හැරීම
  5. සිය බිරිඳට/සිවාමියාට වඩා අනියම් පුරුෂයා/අනියම් ස්වාමියා ලෙන්ගතුකමක් දැක්වීම

ඇතුළු මෙකී නොකී සියළුම දෑ… මෙහිදී වඩාත් වැදගත් වන්නේ බිරිඳගේ සහ ස්වාමියාගේ අන්‍යොන්‍ය නොසැලකිළිමත්කමයි. බොහෝ විට කාන්තාව විවාහයට පෙර සිය සිරුර ගැන සැලකිලිමත් වූවාට. විවාහයෙන් පසු හෝ දරුවන් ලැබූ පසු සිය සිරුරේ හැඩරුව නිරෝගීබව කෙරෙහි දක්වන්නේ අඩු සැලකිල්ලකි. (හුචක්කුව වීඩියෝව කොහෙන් හරි හොයාගෙන බලන්න) පිරිමියා නම් තම සිරුර පිළිබඳ දක්වන්නේ ගැහැණියටත් වඩා අඩු සැලකිල්ලක්. බොහොමයක් දෙනා වයස 30 පසු කරනවිටම උදරය ඉදිරියට නෙරා එන්නට පටන් ගන්නවා. කෙතරම් අවස්ථා තිබුණත් ව්‍යායාමයක් ගෙදර වැඩ පල මහන්සි වී කිරීමක් වැනි දේ සිදු වන්නේ බොහොම කලාතුරකින්. සමහරුන්ට ඒ සියල්ල මතක් වන්නේ පළමු Heart attack එක ආවට පසුවයි. එසේමයි ආහාර පාලනය අතිනුත් අපපේ ආසියාතික පවුල් බොහොමයක් සිටින්නේ පිටුපසින්. ගුණාත්මක ආහාර සහ නිසි ව්‍යායාම ශරීර සෞඛ්‍යයට පමණක් නොවෙයි ලිංගික සෞඛ්‍යයටත් වැදගත් බව බොහෝ දෙනා අමතක කරලා. නිසි ලිංගික සම්බන්ධතාවල වාසි මෙතැනින් කියවන්න. මෙතැනත් තියෙන්නේ එහි වැදගත් කම….

ලංකාවේ දිනකට ගබ්සා 800 ක් පමණ සිදු වන බව මෑතදී පළ වූ වාර්තාවක සඳහන්.. මේ සියල්ලෙන් පෙනී යන්නේ ලාංකිකයා සතු ලිංගික නොදැනුවත්කමයි. ආරක්‍ෂාකාරී ලිංගික හැසිරීම් පිළිබඳ කිසිවක් නොදන්නා බවයි. එසේම තවමත් උපත් පාලන ක්‍රම ආදිය ලබා ගැනීමේදී ඇති කුලෑටි බව මේ සඳහා දැඩිව බලපා තිබෙනවා. ඒ වගේම අධික වෙහෙසකර සහ දුවන්නන් වාලේ දුවන ජීවන රටාව හමුවේ ක්‍ෂණික තෘප්තියක් හෝ තරමක සහනයක් හෝ ලබා ගැනීම සඳහා ලිංගික ඇසුරක් කරා ගිය විට ඉන් ඇතිවන ප්‍රතිඵල ගැන නොහිතා සිටීම නිසාම මෙවැනි සැලසුම් නොකරන ලද පිළිසිඳ ගැනීම් ඇති වෙනවා. ඒ වගේම දැන් පාසැල් සිසුන් අතරත් ලිංගිකව සක්‍රීයවීමේ ප්‍රවණතාවය වැඩි නිසා බොහෝ දෙනා නොදැනුවත්වම අමාරුවේ වැටෙනවා. ඇත්තෙන්ම  මෙයින් අමාරුවේ වැටෙන්නේ තරුණියන් පමණයි. තරුණයන් සිය කටයුත්ත කරගෙන බොහෝ විට පැත්තකට වෙනවා. මේ සියල්ලෙන් විඳවන්නේ තරුණියන්. මගේ මිතුරෙකුත් මේ වගේ සිදුවීමකට මුහුණ දුන්නා. ඔහු තමාට වඩා වයසින් බාල උසස් පෙළ හදාරන තරුණියක් සමග පැවතූ සම්බන්ධතාවයකින් අනතුරුව ඇය ගැබ් ගත්තා. අවසානයේ ඔහු ඇයව ගබ්සා මධ්‍යස්ථානයකට රැගෙන ගියා. සිදුවිය හැකි වූ තත්ත්‍වය සළකා බැලූ විට ඒ සඳහා හොඳම පිළිතුර එය වුනා. නමුත් ඔවුන් දෙදෙනාම අවම වශයෙන් ආරක්‍ෂාකාරී ලිංගික හැසිරීමක් ගැනවත් සිතුවා නම් එය එසේ සිදු වන්නේ නැහැ. දැන් දෙදෙනාම වෙනත් දෙදෙනකු හා විවාහකයි. ඔවුන්ගේ සහකරු/සහකාරිය මේ පිළබඳ දන්නවාද කියා මම හිතන්නේ නැහැ. තවත් තරුණියක් සිය පෙම්වතා (පසුව ඔවුන් විවාහ වුනා) නිසාම ගැබ් ගෙන සිදු කළ ගබ්සාවකින් අනතුරුව ඇයට සමාජ රෝගයක් වැළඳී තිබෙනවා. මෙවැනි කතා අනන්තවත් ඇති. මේ දුරදිග නොසිතා හැඟීම්වලට වහල් වී සැලසුම් නොකර සිදු වන ලිංගික සම්බන්ධතාවන අවසාන ප්‍රතිඵලය නීති විරෝධී ගබ්සාවන්. මේ නිසා අනාගතයේ මව් පදවිය ලැබීමට බලා සිටින තරුණියන් එක්කෝ අනතුරට පත් වීම, විවිධ රෝග වැළඳීම, ගබ්සා මධ්‍යස්ථානවලදීම අතවර වලට පත් වීම සහ නැවතත් තම පුරුදු පිළිවෙතටම එළැඹිම ආදිය නිසා අකාලයේ ජීවිත අඳුරට පත් කරගන්නවා.

ලිංගිකත්‍වය කිසි විටෙක සැඟවිය හැකි දෙයක් නොවෙයි. සෑම විටම විරුද්ධ ලිංගිකයන් කෙරෙහි කිසියම් ආකර්ෂණයක් සෑම කෙනා තුළම තිබෙනවා. එය සෑම වයසකම දකින්නට පුළුවනි. විවාහක- අවිවාහක කියා බේදයක් නැහැ. ප්‍රශ්නය වන්නේ එය ප්‍රසිද්ධියේ පිළිගැනීමට අපේ සුද්දවන්තයින් අකමැති වීමයි. සමහරු සමලිංගිකත්‍වයට නැඹුරුයි. එය මෙතෙක් කල් මානසික විකෘතිතාවයක් කියා සිතා සිටියත් දැන් දැන් ඒවාත් පිළිගැනීමට සමාජය පටන් අරන් තිබෙනවා. ලංකාවේ නම් සම ලිංගිකත්‍වය පිළි ගැනීමට තව දශකයක් වත් ගත වේවි. නමුත් සත්‍යය එයයි. එසේම ලිංගිකත්‍වය නිසි ලෙස ඉදිරි පරම්පරාවට කියා දීමට කටයුතු කිරීම මව්පියන්ගේත් වැඩිහිටියන්ගේත් යුතුකමක්. සිය දියණිය පියෙකු නැති දරුවෙක් ගෙදර ගෙන එනවාට හෝ ගබ්සා මධ්‍යස්ථානයකදී විනාශ වනවාට වඩා සුදුසු ආකාරයට දරුවනට ඒ පිළිබඳව සුදුසු අවස්ථාවකදී කියා දීම වැදගත්.

එසේමයි අඹු සැමියන් වශයෙන් සිය අදහස් විවෘතව සාකච්ඡා කිරීමෙන් බොහෝ ප්‍රශ්න මගහරවාගන්නටත් පුළුවනි. සමහර විට ඔබ දෙදෙනාගේම සම්බන්ධතාවය මීට වඩා නැවුම් වෙන්නට පුළුවනි.

වෙන වෙන හෝටල් වලින් කන්න ගොස් අමාරුවේ වැටෙනවාට වඩා ගෙදර හෝටලයේ කෑම විවිධාකාරයෙන් සකසාගෙන කෑම කාගෙත් ඇඟට ගුණයි…

2011 අගෝස්තු 16: හිත හරි නැති වුනාම මොකද කරන්නේ ?


අද හවස් වෙත්දී මගේ හිත බොහොම චංචල වෙලා… උදේ බොහොම සැහැල්ලුවෙන්, සංතෝෂයෙන් පටන් ගත්ත දවස හවස් වෙනකොට මොනවදෝ වෙලා…. ගෑණු හුටපටයක් වත්, පිරිමි හුටපටයක් වත් කිසිම දෙයක් නෙවෙයි…. පණ නැති, හිතක් පපුවක් නැති, කැඩිල තිබුණ වස්තුවක් හදාගන්න බැරුව මගේ හිත අසරණ වෙලා…

පහු ගිය දවසක මගේ පර්යේෂණයේ වැදගත් දත්ත කොටසක් ලබා ගත් උපකරණයක් හදිසියේම කැඩිලා… බලාගෙන ගියාම ඒක ක්‍රියාකරවන්න තිබුන laptop එක කවුද හෝදලා… වතුර එකයි… ඒකත් මමයි හොයාගත්තේ…. වෙනත් පරිඝණකයක් ගෙනැවිත් අදාල මෘදුකාංගය පැටවූවත් Windows 7 එක්කලා ඒක ගැලපුනේ නැහැ.. ඒ නිසා ඒකෙ ප්‍රශ්න ඇති වුනා… Windows XP දාලා ඔක්කෝම ඉවර කරලා අද තමයි උපකරණය හා බද්ධ කළේ…

මගේ වෙලාවටද මන්දා උපකරණයේ ලේසර් ආලෝක ධාරා ස්ථානගත කරන්න තිබෙන කණ්නාඩි නිසි පරිදි පෙළගැසී තිබුණෙ නැති නිසා මමත් තවත් පර්යේෂකයෙකුත් එකතුව එය පෙලගස්සන්න පටන් ගත්තා… එක වරම දෝශයක් ඇවිත් සියල්ල ඇණ හිටියා…

දැන් එය කැඩිලා… තාක්‍ෂණ නිලධාරියෙකු නම් කිවුවේ භූමිකම්පාව නිසා කණ්නාඩිවල සැකැස්ම වෙනස් වී ඇති බව….

කොහොම වුනත් අද කරන්න තිබුණ පරීක්‍ෂණ සියල්ල ඇණ හිටියා විතරක් නෙවෙයි දවසම ඒ වෙනුවෙන් ගත වුනා…

හිතට බොහොම හරි නැහැ… වෙනත් දෙයක් කරන්න වෙලාවකුත් නැහැ…

දැන් ගෙදර යනවා… ගෙදර ගිහින්වත් හිත හදා ගන්න…

මොනව නැතත් ගෙදර දෙන්නෙක් මග බලාගෙන ඉන්නවනේ හිත හදන්න…

ආයෙම හෙට ඇවිත් බලනවා උපකරණය හදාගන්න පුළුවන් වේද කියලා… නැත්නම් ඉතින් අදාල සමාගමෙන් කෙනෙක් ගෙනැවිත් හදවගන්න ඕන….

හිතට හරි නැති වුනාම ගතටත් හරි නෑ….

මගේ කං කෙඳිරිය කියවපු ඔබටත් මේ වගේ වෙලා ඇති නේද ? අපි කතා කරමු…. !

2011 ආගෝස්තු 15: “ඇමරිකාවේ ඇපල් ජූස් වලත් ආසනික් ඇති බව නාථ දෙයියෝ දැනුම් දෙති”…. සහ කාටද පිස්සු……..


මේ දිනවල නිවාඩුවක් සඳහා ගොස් ඇමරිකාවෙ වැඩ වාසය කරන නාථ දෙයියො ඇමරිකාවෙ ප්‍රසිද්ධ වෛද්‍ය වරයෙක් මාර්ගයෙන් ඇපල් ජූස්වල ආසනික් තියෙන බව ජනතාවට දැනුම් දීලා තියෙනවා. ඉංගිරිසියෙන් යන සාකච්ඡාව මෙතැනින් බලන්න.

මේ නිසා දොස්තර ඔස් මහතා ලොකු අමාරුවක වැටිලා වගේ… හැම පැත්තෙන්ම එක් එක් විදියේ කතා කියවෙනවා.

ආහාර සහ ඖෂධ අධිකාරියත් මේ වැඩේට දොස් පවරනවාලු….

ඒ අතරේ අපේ ආචාර්ය උදය ගම්මන්පිල පලා බබා අළුතෙන්ම තියරියක් හොයාගෙන.

ඒ තමයි සුද්දෝ තේ වැව්වෙ නැතිනං අපේ පරිසරය විනාශ වෙන්නේ නැතිලු. අපේ පරිසරය විනාහ වෙන්න ප්‍රධාන හේතුව සුද්දෝ රට ආක්‍රමණය කරපු එකලු.

අනිත් එක්කෙනා පවුසි නානා ඊට හපන් කතාවක් කියලා…

ඒ තමයි මිනිසුන් පහළ වෙන්නට පෙර මේ ලෝකය හරිම ලස්සනට තිබුණාලු…..

අම්මපා මෙයාලගේ මොලේ තමයි මොලේ….

මෙන්න මෙහෙමත් පත්තරේක තිබුණා…

ලංකාවේ හැම මිනිසුන් 10 දෙනෙකුටම එක්කෙනෙක් මානසික රෝගියෙක් කියලා….

දියවන්නාවට ගිහිපු කට්ටිය දිහා බැලුවාම නම් අපේ ඡන්ද දායකයො එකතු වෙලා එතෙන්ට යවපු කට්ටිය ඔක්කොම එක වගේ කියලයි මට හිතෙන්නේ…. එතැනට ගිහිපු ජයලත් ජයවර්ධන දොසතර මහත්තයා කියලා තියෙනවා අපේ විමලසිරි ගම්ලත් ඇමතිතුමා මැන්ටල් කේස් එකක් කියලා… අනේ අම්මපා…. දේශපාලනඥයො වෙලත් ඔහෙම ඇත්ත කියනවාද ? …

එක්කෝ අපේ ඡන්ද දායකයොන්ට පිස්සු… එක්කෝ මේව දැකලා ලියන අපට පිස්සු….

මේව බලන ඔය පිස්සොන්ට ඒක තේරුම් කරගන්න බාර දීලා මේ පිස්සා අදට නවතිනවා.

2011 සැප්තැම්බර් 06 : කඩුවට වඩා පෑන බලවත්ය; පෑනට වඩා නැන්දම්මා බලවත්ය…..


පහුගිය දවසක ඇල්කෙමියගේ දිනපොතේ ආසනික් ගැන ලියැවුන ලිපිය චානුකගේ පිහිටෙන් රාවය පත්තරේ කොටස් තුනකට පළ වෙලා තිබුණා. මේක දුටු බොහෝ දෙනෙක් ඒ ගැන මෙලෝ හසරක් නොදැන හිටියත් ලිපියක් පත්තරේ ගිය එක ගැන ප්‍රශංසා කළා…. බොහෝ දෙනෙකුට ප්‍රශ්නයක් වෙලා තිබුණේ පළවුන පත්තරේ රාවය වීමයි.. බොහෝ දෙනෙක් නොදැන හිටි දෙයක් වුනේ මේ ලිපිය දිවයින පත්තරේට යැවුවත් ඒකෙ කතෘ තුමා (හෝ එතුමාගෙ කාර්යාලය) ලිපිය ලැබුණ බවට හෝ ප්‍රතික්‍ෂේප කළ බවට පිළිතුරක්වත් එවන්න තරම් වෘත්තීයමය නොවීමයි.

ඒ කෙසේ වෙතත්, අපේ ඇල්කෙම්ච්චිගෙ අම්මගෙන් නම් ලැබුණ ප්‍රතිචාරය ඒ තරම් යහපත් නෑ. ඇය කියන කතාව නම් මේවා රාවය පත්තරේ ගියාම ආණ්ඩුව පෙරලන්න කතා කරනවා වගේ කියලා සමහරක් අයට හිතෙන්න පුළුවන් ලු…ඇත්තටම රාවය එහෙමද ? මම නම් දන්නෙත් නෑ…. එක අතකට ඇය හදන්නේ අපව ආරක්‍ෂා කරන්න… කරදරේ වැටෙන්න නොදී තියාගන්න.. කොහොමත් ඉතිං මගේ කට එච්චර හොඳ නැති නිසා අම්මයි දුවයි දෙන්නම එකතු වෙලා මට බර බරේ දැම්මා නෙවැ…. ඇත්ත තමයි.. මගේ කට හින්දා තමයි කවදහරි මාව නැහෙන්නෙත්… අර මාළුවා වගේ….

මේ දවස් වල බොහොම වැඩ අධිකයි.. ලබන සඳුදා වෙනවිට මගේ පළමු පර්යේෂණ ලිපිය ලොක්කට ලියලා දෙන්න කියලා ඉහළින් අණක් ලැබුණා… දිවා රෑ නොබලා මේ එක ලියනවා… සිංහලෙන් ලිවුවා නම් මෙලහකට ලිපි 10 ක් ලියලා… ඉංගිරිසි ගලප ගලප ලියන්න ගියාමත් එපා වෙනවා… කොහෙද දන්න දෙයක් යෑ…

ඒ නිසා ඉදිරි දින කීපයේ නම් දිනපොත ලියැවෙන එකක් නැති වේවි….

ඊට පස්සේ තව මොනවා හරි කුරුටු ගාන්න බලමු…

2011 සැප්තැම්බර් 02 : මෙන්න තවත් ආචාර්ය උපාධියක්….


ලංකාවේ බුද්ධිමතුන්ට ලංකාවේ අපි හරියට සලකන්නේ නැත. මේ නිසා සිදු වන පාඩු ගණනාවකි.

  • ඒ බුද්ධිමතුන්ගේ කලකිරීම නිසා උපරිම සේවය නොලැබීම.
  • ඔවුන් හට ලැබිය යුතු ගෞරවය නොලැබී යාම නිසා කළකිරී සිය රාජකාරි පැහැර හැරීම.
  • සිය බුද්ධියට සරිලන වැටුප් නොලැබීම නිසා මන්දෝත්සාහී වීම.
  • නිසි ලෙස නොසැලකීම නිසා රටට සේවය කිරීමට ඇති අකැමැත්ත.

ආදී මෙකී නොකී සෑම දේ සිදු වේ.

අපේ ආචාර්ය මර්වින් සිල්වා මහතා දැන් සිය ගතේ පමණක් නොව මුළු ආසනයේම වෙර යොදා රටට වැඩ කරන්නේ එතුමාගේ උගත්කමට සරිලන ලෙස ආචාර්ය උපාධියක් ලබා දීම නිසාය. අපේ ජනාධිපති ආචාර්ය මහින්ද රාජපක්‍ෂ මැතිතුමාට තෙවන ආචාර්ය උපාධියත් මෑතකදී චීන රජයෙන් ලබා දුන්නේ ඒ මැතිතුමා රටට, ජාතියට ආගමට සහ චීනයට දක්වන ලැදියාව නිසාය. ආචාර්ය ගෝඨාභය රාජපක්‍ෂ මැතිතුමාට කොළඹ විශ්ව විද්‍යාලයෙන් ආචාර්ය උපාධියක් ලබා දුන්නේ ඒ මහතා වසර 30 ක් තිස්සේ ඇදී ගිය යුද්ධයට තිත තැබීම සඳහා ඇප-කැප වී වැඩ කළ නිසාය. ආචාර්ය මහින්ද බාලසූරිය පොලිස්පති තුමා ආචාර්ය උපාධිය ලබා ගත්තේ අපේ රට හොර මැර තක්කඩින්ගෙන් තොර සුචරිත සමාජයක් බවට පත් කළ නිසාය.

ආචාර්ය රාජිත සේනාරත්න මැතිතුමා

මේ ආචාර්ය ගොන්නට තවත් ආචාර්යවරයෙක් එකතු වී තිබීම ශ්‍රී ලංකා වාසී අප අමන්දානන්දයට පත් කරවන්නකි. ලෝකයේ ලොකුම ඇමති මණ්ඩලය ඇති අප ලෝකයේ බුද්ධිමත්ම ඇමති මණ්ඩලය බවට පත් කිරීම සඳහා ගෙන යන මේ ප්‍රයත්නයට කිසිදු ලෙසකින් බාධාවන් නොපැමිණේවායි යන්න අපේ පැතුමයි. පෑලියගොඩ මාළු වෙළඳපල සිය පෞද්ගලික ධන පරිත්‍යාගයෙන් තනා නිමකර ජනතා අයිතියට පැවරීම හේතුවෙන් නව නම්බු නාමයක් ලැබූ ආචාර්ය රාජිත සේනාරත්න මැතිතුමා වෙත අපේ සුබ පැතුම්.

මේ ගොන්නට තවත් එක්කළ යුතු බොහෝ දෙනා ඇත… අපේ රටේ ඇමති මණ්ඩලයට ආචාර්ය උපාධි ප්‍රමාණය වැඩි වන්නට වැඩි වන්නට අපේ රටේ ඇමතිවරුන්ගේ බුද්ධි මහිමය ලොවටම විදහා පෑම කළ හැකිය. මේ සඳහා  නිර්දේශිත නාම මෙසේයි. ලෝකයේ ඇති කොහේ හෝ විශ්ව විද්‍යාලයකින් මේ මන්ත්‍රීවරු සහ ඇමතිවරුන්ටත් ආචාර්ය උපාධියක් පිරිනැමීමට සිත් පහළ වේවා…. !

  • උසස් අධ්‍යාපනය වෙනුවෙන් කළ සේවය උදෙසා –  ආචාර්ය බන්දුල ගුණවර්ධන, ආචාර්ය එස් බී දිසානායක මැතිතුමන්ලා.
  • ජාත්‍යන්තර වෙළඳාම අතැඹුලක් සේ දැන, ලංකාවේ වෙළඳ වර්ධනය  උපරිමයක් දක්වා ගෙනගිය – ආචාර්ය ජොන්ස්ටන් ප්‍රනාන්දු මැතිතුමා.
  • දේශියත්‍වය අගයමින් උපරිම වියදමක් දරා අවම විදුලි ජනනයක් සිදු කිරීමේ ක්‍රමය වටහා ගත්, විදුලිබල ඇමති – ආචාර්ය චම්පික රණවක මැතිතුමා.
  • වැඩිම වියදමින් අඩුම නිවාස ප්‍රමාණයක් තැනීමෙන් ලෝක වාර්තාවක් තැබූ නිවාස හා උපවාස  ඇමති – ආචාර්ය විමලසිරි ගම්ලත් මැතිතුමා.
  • වැඩිම මැතිවරණ ගණනාවක් පරාද වී තවමත් පක්‍ෂනායක හා විපක්‍ෂ නායක යන තනතුරු දෙකම එකවර හොබවන ලෝකයේ එකම පුද්ගලයා වන – ආචාර්ය රනිල් වික්‍රමසිංහ මැතිතුමා.
  • පීඩිත පන්තිය සඳහාම පෙනී සිටින වෙනත් කිසිදු අරමුණක් නොමැති එකම මන්ත්‍රීවරයා ලෙස – ආචාර්ය අනුර කුමාර දිසානායක මැතිතුමා.
  • තම බුද්ධි මහිමය මැනවින් ප්‍රදර්ශනය කරමින් කාන්තාවන්ට අතවර සිදුවීම සහ මානව සංහතියේ ආර්ථික වර්ධනය පිළිබඳ සම්බන්ධය ලොවට හඳුන්වාදුන් එමෙන්ම මත්ද්‍රව්‍ය වෙළඳාම් කරන ඇමතිවරු හඳුනාගැනීමේ යන්ත්‍රය ලොවට බිහි කළ අපේ අතිගරු අගමැති ආචාර්ය දි. මු. ජයරත්න මැතිතුමා.
  • ඩෙංගු රෝගයේ මූල බීජය හඳුනාගෙන බීටී අයි වැනි කිසිදු කමකට නැති හානිකර බැක්ටීරියාවක් පරිසරයට මුදා හැරීම වලකන සෞඛ්‍ය අමාත්‍යාංශයේ නිළධාරීන් සුරකිමින් ඔවුන්ට තවමත් බැන වදින, ලංකාවට බෙහෙත් ගෙන්වීමේ නව ක්‍රමවේදයක් හඳුන්වා දුන් සෞඛ්‍ය ඇමති ආචාර්ය මෛත්‍රීපාල සිරිසේන මැතිතුමා
  • සෞඛ්‍ය සේවය ලංකාවේ ඉහලම තලයට ගෙනා හිටපු සෞඛ්‍ය ඇමති ආචාර්ය ඇ.නිමල් සිරිපාල මැතිතුමා.
  • සිය වර්ගයාගේ උන්නතිය කෙරෙහි කිසිදු පැකිලීමකින් තොරව කටයුතු කරන පශු සම්පත් ඇමති ආචාර්ය ආරුමුගම් තොන්ඩමාන් මැතිතුමා
  • ඉන්ධන පිරිමැසීමට නව ක්‍රමයක් සොයාගත් ඉන්දන ජාති (අල බතල නොවේ) සම්බන්ධ ඇමති ආචාර්ය සුසිල් ප්‍රේමජයන්ත මැතිතුමා.
  • තාක්‍ෂණය සහ පර්යේෂණයන් හි කෙළ පැමිණි ආචාර්ය පවිත්‍රා වන්නිආරච්චි මැතිණිය
  • මගී ප්‍රවාහනය කාර්යක්‍ෂම කරමින් මගීන්ට ලෝකයේ නවතම සහ පරිපූර්ණම සේවාව සැපයීම නිසා ප්‍රවාහන ඇමති ආචාර්ය කුමාර වෙල්ගම මැතිතුමා.

මෙයට අමතරව දැනටත් දියවන්නාවේ සිටින ආචාර්ය රජීව විජේසිංහ, ආචාර්ය හර්ෂ ද සිල්වා, ආචාර්ය මර්වින් සිල්වා, ආචාර්ය ජී ඇල්පීරිස්, ආචාර්ය කෙළියනේද රඹුක්වැල්ල (මම හිතන්නෙ එයත් ආචාර්ය තමයි) ආදී මෙකී නොකී ආචාර්ය වරුන් ඇතුළුව අපේ පාර්ලිමේන්තුව සහ ඇමති මණ්ඩලය ලෝකයේ බුද්ධිමත්ම ඇමති මණ්ඩලය කිරීමට අපේ ජනාධිපති ආචාර්ය මහින්ද රාජපක්‍ෂ මැතිතුමාට ධෛර්යය ශක්තිය තව තවත් ලැබේවා… යි ඉත සිතින් ප්‍රාර්ථනා කරමු…

ආචාර්ය මහේන්‍ද්‍ර සිං දෝණි මැතිතුමා

ප.ලි:

එංගලන්තෙ ගහපු ටෙස්ට් මැච් හතර පරාද වුන ගමන්ම එංගලන්තෙන් ආචාර්ය උපාධියක් ලබපු ඉන්දීය කණ්ඩායමේ නායක ආචාර්ය මහේන්‍ද්‍ර සිං දෝණි මැතිතුමාටත් අපේ සුභ පැතුම්…..

තවත් ප.ලි.

ඔබාමාට ඉස්සරහට කරන්න තියෙන වැඩ ගැන හිතලා නොබෙල් සාම ත්‍යාගය ලැබුණ එකේ මෙහෙව් ආචාර්ය උපාධි කජ්ජක් ද බොලං…

2011 සැප්තැම්බර් 01: ඔබාමාගේ මාමා සහ එස් බී ගේ රියදුරා


ඇත්ත ඇමරිකාව චිත්‍රපටි වලින් ලංකාවේ අය බලන ඇමරිකාවට වඩා තරමක් වෙනස් ය… මිනිස්සුන්ට කන්න බොන්න හෝ වෙනත් මොනවා නැතත් ඇමරිකාවේ එක දෙයක් තවමත් ඇත. ඒ නීතිය තරමක් හෝ හරියට ක්‍රියා කරවීමයි. යම් යම් අඩුපාඩු ඇතත්, බොහෝ අවස්ථාවල ඇමරිකාවේ නීතිය කාටත් පොදුය… මොනිකා බිල් ක්ලින්ටන් අමාරුවේ දමා (හෝ ඒකේ අනිත් පැත්ත සිදුවී) තවමත් යහතින් සිටින්නේත් ඒ නිසාය… සමහර පොලිස් නිලධාරීන් අත්තනෝමතිකව ක්‍රියා කළත්, බොහොමයක් දෙනා නීතියට පිටින් නොයන්නේ ඇමරිකාවේ හිරගෙවල්වල තරම දන්නා නිසාය.. හොලිවුඩයේ නළු නිළියන් සුළු වැරදිවලට හසුවූ පසු සිය දඬුවම් අඩු කරගත්තත්, බොහෝ දෙනා නීතිගරුකව ඉන්නේ ඇමරිකාවේ මිනිසුන්ගේ හැදියාව නිසා නොව නීතියට ඇති බය නිසාය.

ඔබාමාගේ මාමා

නිදහස් ඇමරිකාවේ පළමු කළු ජාතික ජනාධිපති බරක් ඔබාමාගේ නෑදෑයන් සමහරක් වෙසෙන්නේ ඇමරිකාවේය.. එක දිනක් මේ ජනාධිපතිගේ මාමා කෙනෙක් තරමකට පදම් වී වාහනයක් පදවත්දී එක්තරා මංසන්ධියකදී අනෙක් වාහන වලට යාමට ඉඩ නොදී නොනවත්වා තම රථය ධාවනය කිරීම නිසා හැංගී සිටි පොලිස් නිලධාරියෙකු අල්ලා ගත්තේ ලු..  මේ මාමාත් අපේ මාමලා වගේම පොලීසියට කොකා පෙන්වන්නට හිතාගෙන ධවල මන්දිරයට දුරකථතන ඇමතුමක් ඉල්ලා සිටියේ ලු.. පොලීස් නිලධාරියාගේ උද්ධච්ච කමට මේ අසරණ මනුස්සයා හිර කූඩුවේ දැමූ බව ආරංචි වේ. මාමා ධවල මන්දිරයට කතා කළාද නැද්ද කියා ධවල මන්දිරයෙන් සනාථ නොකරන බවත් ප්‍රවෘත්ති වාර්තාවල සඳහන්. කෙසේ වෙතත් මේ මාමා නීති විරෝධීව ඇමරිකාවේ ඉන්නවා දැයි බැලීමට දැන් පොලීසියේ නවත්වාගෙන සිටිනවාලු… මාමා ඇල්ලූ පොලිස් නිලධාරියා තවමත් යහතින් බොස්ටන් හි සේවය කරනවා ලු.. ඔහු ඉරාකයට මාරු කර නොමැති බව ප්‍රවෘත්ති වාර්තාවල සඳහන්.

නිදහස් ශ්‍රී ලංකාවේ උසස් අධ්‍යාපන ඇමති තුමාගේ පුත්‍ර රත්නය පිටරට සිට ගුවන් තොටුපලට සැපත් වුනේ ලු. බේබිව ගුවන් තොටුපල පර්යන්තයේ තනිවම තැබිය නොහැකි නිසා එස් බී තුමාගේ ආරක්‍ෂක නිලධාරීන් පිරිසක් ගුවන් තොටුපලට යැවුවේ බේබිව කැඳවාගෙන එන්නලු.. බේබි එන වෙලාව පරක්කු නොවුනද ඇමති තුමාගේ රස්නය ඇඟට වැදුන වාහනය පියාඹවන පොලිස්කාරයා විසින් තම බිරිඳද මෝටර් බයිසිකලයේ නංවාගෙන ගිය විශ්‍රාමලත් ඉංජිනේරුවරයෙක් යටකරගෙන ගියේ ලු… පොලිස්කාරයා මේ බව දැක්කේ වත් නැතිලු.(අඳෝමැයි). කෙසේ හෝ පසුව මේ පොලිස්කාරයා පොලිසියටම බාර වෙලාලු.. අසරණ මනුස්සයා මියගිහින් ලු.. ඔහුගේ බිරිඳටත් අමාරුයිලු…

දැන් ත්‍රස්තවාදීන් කොළඹ බෝම්බ පුපුරවන්නේ නැති නිසා හදිසි නීතියත් ඉවත් කරලාලු. ඒත් අපේ මන්ත්‍රීලා ඇමතිලා ආරක්‍ෂකයින් පිරිවරාගෙන පාරෙ පවනට බඳු වේගයෙන් ඉගිල්ලෙනවාලු.. මේ පිස්සුව නිසා දැනටමත් දෙතුන් දෙනෙක් මිය පරලොව ගිහිල්ලා ලු.. ඒත් අර රියැදුරන්ට නම් කිසි ගානක් නැතිලු…

රටේ නීතිය ක්‍රියාත්මක කරවන්නට ඉන්නේ පොලීසියය. දැන් අපේ රටේ සිටින පොලිස් නිලධාරීන්ගෙන් කී දෙනෙකු POLICE  කියන වචනයේ තේරුම දන්නවා දැයි සිතාගන්නටවත් අපහසුය…

Politeness – ඇත්තේම නැත. මිනිස්සුන්ට කතා කරන්නේ තිරිසනුන්ට මෙනි..

Obedience – තියෙන්නේ ඇමතිවරුන් හෝ මන්ත්‍රීවරුන්ට පමණි… නීතියට Obedience එකක් නැත… අඟුලානේ කට්ටියත් බම්බලපිටියේ කට්ටියත් අසරණයින් මැරුවේ එබැවිනි.

Loyalty – තියෙන්නේද මැති ඇමතිවරුන්ට පමණි.

Intelligence – මොකක් ?

Courageous – අසරණ මිනිසුන්ට පමණක් නීතිය හරිහැටි ක්‍රියා කරවන්න ධෛර්යය තියෙනවා.

Encouraging / Enthusiastic / Eager to help – එහෙම දේවල් අහලා නැතුව ඇති…

නමුත්, සමහර පොලිස් නිලධාරීන් නීතිය අකුරටම ක්‍රියා කරවන අවස්ථා දක්නට ලැබේ, ඒ අයට අපේ ප්‍රණාමය… කෙසේ වුවත් මේ නීතිය අපේ රට කරවන ඇත්තන් විසින් කඩ කිරීමත්, ඔවුනට කිසිදු දඬුවමක් නොලැබීමත් කණගාටුවට කරුණකි. ගෝනවල සුනිල් ලවා විනිශ්චයකාරවරුන්ගේ නිවෙස් වලට ගල් ගැස්සවූයේත්, ඒ ගෝනවල සුනිල්ටම සාම විනිසුරුකමක් ප්‍රදානය කළේත්, තොන්ඩමාන් ඇමති තුමා මහ රෑ පොලීසියක OIC මහත්තයාගේ පුටුවක වාඩි වුනේත්, ආචාර්ය මර්වින් සිල්වා මැතිතුමා පිස්තෝලය ගෙන ප්‍රසිද්ධියේ චන්ඩිකම් පෑවේත්, නිශාන්ත මුතුහෙට්ටිගම මැතිතුමා ජනාධිපතිතුමා විවෘත කළ ගාල්ලේ බස් නැවතුම්පොලේ යකඩ පොලු කැපුවේ – කරාපිටියේ ත්‍රීරෝද රථ ගාලට කඹය කඩා ගත් මී හරකෙකු සේ රථය පැදවූයේත්, මැති ඇමති ආරක්‍ෂක රථ වාහන නිසා කිහිප දෙනෙකු මරු වැළඳ ගත්තේත් තවත් බොහෝ සිදුවීම් සිදු වන්නේත් මේ නීතියට ඇස් නැති නිසා නොව ඇති නිසාය.. අවාසනාව මේ දකින ජනතාවටද ඇස් නොමැති වීමයි… අපේ කට්ටිය මේ අයව ආයෙමත් අපව පාලනය කරන්න දියවන්නාව මැද්දට යවනවා නොඅනුමානය….

රටක් ආර්ථිකව, සමාජයීයව ඉදිරියට යන්නේ හැදියාවක් ඇති විටය. හැදියාව ඇති කරවිය යුතු තැන්වල හැදියාවක් නැති තැන රටේ ජනතාව හැදියාවකින් කටයුතු කරවීම අපහසුය… එය හරියට තාත්තා සිගරැටි බිබී පුතාට එහි ආදීනව කියා දීම වැනි නිෂ්ඵල ක්‍රියාවකි…. තුනෙන් දෙකක වැඩි ඡන්දයක් ඇති ආණ්ඩුවකටත් මේ හැදියාව පාලනය කිරීමට නොහැකි වීමෙන් අදහස් වන්නේ කුමක්දැයි යන්න ඔබටම භාර කරමි…

%d bloggers like this: