2012 ජුනි 22: අන්තරාවයි………. නූගත්කම ඉදිරියෙන්…..


පසුගියදා අන්තර්ජාල පුවත්පතකට මොරටු සරසවියේ මහාචාර්ය අජිත් ද අල්විස් මහතා Danger: Science Illiteracy Ahead ! යන ශීර්ෂයෙන් ඉතා වටිනා ලිපියක් ලියා තිබුණා. මෙය අපේ අනාගත පරපුර පිළිබඳ අවධානයක්, ආදරයක් ඇති කාගේත් ඇස් අරවන ලිපියක්. අවාසනාවට බලධාරීන්ට මේ ගැන හිතන්න වෙලාවක් නැතුව ඇති. වෙනත් වැඩ නිසා.

රටක දියුණුව රඳා පවතින්නෙ ඒ රටේ මිනිස්සුන් හිතන පතන ආකාරය මතයි. ඒ අධ්‍යාපන මට්ටම අනුවයි. බොහෝ බටහිර රටවල්, චීනය, ජපානය වැනි රටවල් අද ආර්ථිකව ශක්තිමත්වත් සමාජයීයව ඉදිරියෙන් ඉන්නෙත් රටේ ජනතාව බුද්ධිමත්ව සිතීම, කැපවීමෙන් වැඩ කිරීම වගේම නායකයින්ගෙ නිවැරදි මග පෙන්වීම නිසා. තුන්වන ලෝකයේ දිළිඳුම රටවල් වන අප්‍රිකානු රටවල සාක්‍ෂරතාවය තවමත් ඉතාම පහළ  මට්ටමකයි පවතින්නෙ. ඉන්දියාව කෙතරම් ආර්ථික බලවතෙක් වුනත්, ජනතාව අන්ත අසරණයි. සමහරුන් ඉතාම පහත් ජීවන තත්ත්‍වයකයි ඉන්නෙ. නමුත් රටේ සුළුතරයක් ඉතාම ඉහළින් එහි ආර්ථික සංවර්ධනයට දායක වෙනවා. දැන් දැන් ඉන්දියානු විශ්ව විද්‍යාල ලෝකයේ අන් රටවල දියුණු විශ්ව විද්‍යාල සමඟ කරට කර. මේ බුද්ධියේ පරිණාමයයි.

බොහෝ දියුණු රටවල අධ්‍යාපනයට සහ පර්යේෂණ සඳහා ඉහළ අගයක් ලබා දෙනවා. බොහෝ විට ඒ රටවලට ආවේණික නිත්‍ය අධ්‍යාපන ප්‍රතිපත්තියක් තිබෙනවා. එය ආණ්ඩුවෙන් ආණ්ඩුවටවත්, ඇමතිවරයාගෙන් ඇමතිවරයාටවත් වෙනස් වන්නක් නොවෙයි. සුදුසුකම් ලත් අධ්‍යාපනඥයින්, අත්දැකීම් ඇති ගුරුවරුන් මෙන්ම සාමාන්‍ය ජනතාවත් ආදී බොහෝ දෙනාගේ අදහස් උදහස් යෝජනා සියල්ල මත පදනම් කරගෙත් දීර්ඝකාලීන දැක්මක් ඇතිව අවුරුද්දක් නොව අවුරුදු දහයක් පහලොවක් ඉදිරිය බලා සැලසුම් කරන ලද්දක්. ඒ වගේම අධ්‍යාපන රටාවේ නව සොයා ගැනීම්, නව අධ්‍යාපන ක්‍රම ආදියත් කළින් කලට මේවාට ඇතුලත් කෙරනෙවා සංස්කරණයන් ලෙසින්. මේ නිසාම ඒ රටවල අධ්‍යපන මට්ටම්, සිසු දැනුම වගේම සිතීමේ හැකියාවන් අන් රටවලට වඩා ඉදිරියෙන් තිබෙනවා. ගුරුවරුන්, අධ්‍යාපනඥයින් මෙන්ම මහාචාර්යවරු පවා මේ සියල්ල හොඳින් අධ්‍යයනය කරලා, සැලසුම් කරලයි මේ ප්‍රතිපත්ති සකස් කරන්නෙ, සුළු වැරැද්දක් සිදු වුනත් තමන්ගෙ රැකියාවෙන් වන්දි ගෙවන්න වෙන නිසා මෙයට සම්බන්ධ වන සියළුම දෙනා උපරිමයෙන් සිය වගකීම් ඉටු කරනවා. (සමහර විට ඔබට මේ ඉහළින් ලියැවුන ඡෙදය බොහොම හුරු පුරුදු ඇති – ලංකාවෙ කෙරනේනේ මේ ඡේදයේ ප්‍රතිලෝමය නිසා)

මෙසේ සැකසුන අධ්‍යාපන පාඨමාලාවන් ගුරුවරුන්ගේ සහභාගිත්‍වයෙන් සහ ඔවුන්ගේ යෝජනා වලින් නිරන්තරයෙන් සංස්කරණය වෙන්නේ සිසු දරුවන්ගේ යහපත, පහසුව, සහ දියුණුව වෙනුවෙන්. අවසානයේ සියළුම දෙනාට සරිලන ආකාරයේ අධ්‍යාපනයක් සැකසෙනවා. මෙය ඇත්තෙන්ම බොහෝ රටවල පරිපූර්ණවම සිදු නොවුනත්, ආසන්නව හෝ සිදු වෙනවා. ඒ වගේම දරුවන්ගේ දක්‍ෂතා වෙනුවෙන් ගුරුවරුන් වගකිව යුතුයි. පන්තියේ සිසුන් පහළ මට්ටමක සිටිනවා නම් ගුරුවරයාගේ රැකියාව අවදානම්. ඉහළ තත්ත්‍වයක සිටින සිසුන්ගේ ගුරුවරුන්ට උසස්වීම් ආදී දෙපැත්තෙන්ම වාසි සහ අවාසි ලැබෙනවා. බොහෝ විශ්ව විද්‍යාලවල නම් අදාල ඒකකය අවසානයේ පැවැත්වෙන ගුරුවරයා ඇගැයීමේ ක්‍රමය නිසා නිතරම ගුරුවරුන් දැනුමින් සන්නද්ධ වනවා වගේම නව ක්‍රම යොදාගෙන සිසුන්ට ආකර්ෂණීය වන අන්දමට උගන්වන්න මහන්සි ගන්නවා.

මෙයට සමගාමීව රූපවාහිනී නාලිකා, වෙනත් අධ්‍යාපනික වැඩසටහන් දැරුවන්ගේ දැනුම මෙන්ම සමාජයේ සාමාන්‍ය දැනුමත් ඉහළට ගෙනයන්න වැඩසටහන් ඉදිරිපත් කරනවා. රියැලැටි වැඩසටහන් වගේම අධ්‍යාපනික තරඟාවලින් ද සංවිධානය කරනවා. සමහර නාට්‍ය පවා ප්‍රේක්‍ෂකයන්ගේ කුතුහලය වැඩිදියුණු කරවන සිතන්නට පුරුදු කරවන නාට්‍ය… රටේ බොහෝ ස්ථානවල අධ්‍යාපනික කෞතුකාගාර තිබෙනවා, මත්ස්‍යාගාර, සත්වෝද්‍යාන පවා සිසුන් පුහුණු කරවන මධ්‍යස්ථාන සහ පර්යේෂණ කරන ස්ථාන ආදිය බවටයි පරිවර්තනය වෙලා තිබෙන්නේ.

ලංකාවේ තත්ත්‍වය මෙයට වඩා වෙනස්, ඒ ගැන විශේෂයෙන් කතා කළ යුතු නැහැ. ඉසෙඩ් ස්කෝර් ක්‍රමය, ප්‍රශ්න පත්‍රවල වැරදි ආදී බොහෝ අවුල් වලට වගකුව යුත්තෝ තවමත් ඒ ඒ තැන්වලම වැජඹෙනවා. නුසුදුස්සන් ඉහළ තැන්වල, හැම දෙයක්ම අවුල්… හොඳයි කියලා ඇහෙන දෙයක් නැහැ. සිසුන් මෙන්ම ගුරුවරුනුත් වර්ජනයේ… බුද්ධියට තැනක් ඇත්තෙ කොතැනද කියලා පෙනෙන්න නැහැ. ඒ සියල්ල ඔබ හොඳින් දන්නවා… මා අළුතෙන් කිවයුතු නැහැ.

මේ තත්ත්‍වය දිගටම පැවතුන හොත් සිදු වන්නේ මොට්ට අනාගත පරපුරක් බිහිවීමයි. මෙය දේශපාලනඥයින්ට බොහොම වාසි සහගත තත්ත්‍වයක්. නමුත් රටක් වශයෙන් භයානකයි. උගතුන් රට හැර යනවා. නූගතුන් ඉහළ තැන්වල වැජඹෙනවා.. රටට නිසි බුද්ධිමත් නායකත්‍වයක් අනාගතයේ ඇති වන්නෙ නැහැ. රටේ ඵලදායීතාවය මෙන්ම අධ්‍යාපනය පැත්තෙන් අගය එක්කළ නිෂ්පාදන (value added products) වෙනුවට ඔප මට්ටම් නොවූ අමුද්‍රව්‍ය වැනි මිනිසුන් භාවිතයට ගැනෙනවා…. රට අගාධයට යනවා…

මේ තත්ත්‍වයේ පැහැදිලි වෙනසක් අනාගතයේ දැකිය නොහැකියි. දැනටමත් විශ්ව විද්‍යාල ආචාර්යවරුන් පවා වර්ජනයට එක්වෙලයි ඉන්නෙ.. මෙය භයානක තත්ත්‍වයක්. බුද්ධිමතුන් නූගතුන්ට එරෙහිව අවි අමෝරා ගත්තොත්, නූගතුන්ගේ එකම මාර්ගය වන්නේ මර්ධනයයි. එය නරක අතට හැරෙන්න පුළුවන්… කාටවත් හැමදාම හැමදෙනාම අන්දවන්න බැහැ… බොරුවෙ සළුපිළි ගැලවුන දවසට හෙළුව පෙනෙන්න ගන්නවා… එදාට එක්කොම අවුල් වෙනවා.. ඉතිං… ඔබ බුද්ධිමත්ව හිතන්න….

අන්තරාවයි… නූගත්කම ඉදිරියෙන්… පරිස්සසමින් ගමන් කරන්න……

Advertisements

Posted on ජූනි 21, 2012, in ඇල්කෙමියාගේ දිනපොත. Bookmark the permalink. ප්‍රතිචාර 8.

  1. නූගත්තුන්ට වඩා භයානකයි උගත් මෝඩයෝ! ලංකාවේ දැන් දැන් මේ මිනිස්සු වැඩිවේගෙන යනවද මංදා!

  2. අන්තරාවයි නෙවෙයි වාසනාවයි කියලයි රටතොට ආණ්ඩුමට්ටුකරන උදවිය ඔකට කියන්නේ.
    ඉගනගත්තේ නෑති ජනතාවක් ඉන්නකන් දේසපාලුවෝ හෑමදාම ගොඩනේ.
    රටේ අද්‍යාපනයට වෙන්කරනවාට වඩා වෑඩි මුදලක් අද්‍යාපනය කඩාකප්පල්කරන්න යොදවන්නේ ඵ්කනේ.

  3. ඇල්කෙමියා මල්ලිත් ඔන්න මට අදත් ඇඬෙන්න වැඩක් දීලා 😦

    සතුටු වෙන්න කියන්නකො තුන්දෙනාම මුහුදු වෙරළට එන්නෙ කවදා ද කියල.

  4. හැබැයි ඇල්කෙමියෝ විද්‍යා හා ගණිත අංශයන්ට නැඹුරු වෙන සිසුන් ගණන අඩු වීම බටහිරටත් අද ප්‍රශ්නයක්! මේක ඕස්ට්‍රේලියාවෙත් දකින්න ලැබෙන දෙයක්. මෙහෙ සමහර විද්‍යා පාඨ මාලා කරන්න (සරසවි) යොමු වෙන සිසුන් ගණන අවුරුදු පතා පහල යනවා. ඉගෙන ගන්න වැය කරන්න වෙන අධික මුදලත් එක හේතුවක්. අනික තමා මෙතරම් මහන්සි වෙලා ඉගෙන ගත්තත් මෙම ක්ෂේත්‍රයේ රැකියා වල ඉස්තිර කමක් හෝ ඉහල වැටුප් නැහැ.

ප්‍රතිචාරයක් ලබාදෙන්න

Fill in your details below or click an icon to log in:

WordPress.com Logo

ඔබ අදහස් දක්වන්නේ ඔබේ WordPress.com ගිණුම හරහා ය. පිට වන්න / වෙනස් කරන්න )

Twitter picture

ඔබ අදහස් දක්වන්නේ ඔබේ Twitter ගිණුම හරහා ය. පිට වන්න / වෙනස් කරන්න )

Facebook photo

ඔබ අදහස් දක්වන්නේ ඔබේ Facebook ගිණුම හරහා ය. පිට වන්න / වෙනස් කරන්න )

Google+ photo

ඔබ අදහස් දක්වන්නේ ඔබේ Google+ ගිණුම හරහා ය. පිට වන්න / වෙනස් කරන්න )

%d bloggers like this: