Monthly Archives: පෙබරවාරි 2013

බාලචන්‍ද්‍රන්ගේ මරණය තුළින් එළිවන පරමාදර්ශීය ඇල්කෙමියාගේ නිරුවත………..


ඇල්කෙමියා පොරවාගෙන සිටි සියළු සළු පිළි උනා දමා නිරුවත් වී තිබේ.. නැත නැත, ඇල්කෙමියාගේ එකම එක ප්‍රතිචාරයකින් ඔහු මෙතෙක් කල් මානුෂිකත්‍වයේ සළුවෙන් වසාගෙන සිටි මෘගභාවයේ යථාර්තය එළියට පැමිණ තිබේ.. ඇල්කෙමියා අප හිතාගෙන සිටි සංවේදී මානුෂික පුද්ගලයා නොවේ… ඇල්කෙමියාගේ නියම ස්වරූපය එළියට පැමිණ තිබේ…. හුරේ… ඇල්කෙමියා නිරුවත් වී ඇත……. මෙය බ්ලොග් අවකාශයේ ජනප්‍රිය ලොකු පොරවල් දෙතුන් දෙනෙකුට සුවිශාල මාතෘකාවක් වී ඇතිවාක් පමණක් නොව ඒ නිසා සිය හිට් සංඛ්‍යාවද වැඩි කරගැනීමේ මඟක් ද පාදා ගෙන ඇත… සංතෝෂය… අප්‍රමාණ සංතෝෂය..

පින්තූරය ගත්තෙ කතන්දරකාරයාගේ මානුෂීය වෙබ් අඩවියෙන්

පින්තූරය ගත්තෙ කතන්දරකාරයාගේ මානුෂීය වෙබ් අඩවියෙන්

සිදු වූයේ කුමක්ද ? බොහෝ දෙනා නොදන්නවා විය හැකිය… අවම වශයෙන් මා කළ ප්‍රතිචාරය නිසා මට පහර ගසන බව වැටහෙන්නට මටද දින කිහිපයක් ගත වූ කල්හි, අන් අය ගැන කවර කතාද ? මාද එය දැනගත්තේ කතන්දරකාරයා දැමූ මේ ලිපියෙහි වූ කමෙන්ටුවක් ඇස ගැටුන කල ය… පහර ගැසුවත්  කෙළින්ම නම කියා පහර ගසන්නට තරම් අපේ බ්ලොග් කරුවන්  බියගුළුය… මා  මේ වනතෙක් කිසිම බ්ලොගයක් හෝ බ්ලොග් කරුවෙකු මේ බ්ලොග් අඩවිය තුළින් විවේචනය කර හෝ ප්‍රචලිත කර නැත. එය මගේ ප්‍රතිපත්තියක් නොවීය.. මේ ලිපිය මා ලිවීමට අදහස් නොකළ ලිපියක් වුවත්, ගසන්නට ගසන්නට ඔළුව නවාගෙන සිටීම කවරදාකවත් මගේ පුරුද්දක් නොවූ නිසා ඔබ කැමති ආකාරයකට තේරුම් ගැනීමට මා කැමති දේ මෙසේ ලියා තබමි.

ලාංකීය බ්ලොග් අවකාශය ප්‍රතිපත්ති, සාරධර්ම, සහ අපක්‍ෂපාතී විනිශ්චයන්ගෙන් තොර කලාපයකි. ලංකාවේ සමාජයේම තවත් එක් පැතිකඩක් වන බ්ලොග් අවකාශය බොහෝ විට පෞද්ගලික හිතවත්කම් මත ජනප්‍රියතාවය මනිනු ලබන සිදුවීමක් පමණි. ලියැවෙන බ්ලොග් වල ගුණාත්මක වටිනාකමකට අවම ලංසුවක් දෙන ලාංකීය බ්ලොග් අවකාශය බොහෝ විට සරළ වින්දනය ලබා දෙන බ්ලොග් අඩවි ජනප්‍රිය වන ස්ථානයකි. ලාංකීය බ්ලොග් අවකාශයේ ප්‍රධාන අංශ කිහිපයකි.

  1. සිය ජීවිත කතන්දර සහ සමීපතයින්ගේ කතන්දර ඉදිරිපත් කෙරෙන බ්ලොග් අඩවි.
  2. පාසැල් ජීවිතය නැවත නැවත ආවර්ජනය කෙරෙන අඩවි.
  3. කවි – කතා ලියැවෙන නිර්මාණාත්මක අඩවි.
  4. දේශපාලනය – සමාජයීය තොරතුරු ලියැවෙන බ්ලොග් අඩවි.
  5. තාක්‍ෂණික තොරතුරු ගෙන එන බ්ලොග්
  6. පර්යේෂණාත්මකව සහ විචාරාත්මකව ලියැවෙන බ්ලොග්.
  7. කුණුහරුප බ්ලොග්…

මේ මොන බ්ලොග් අඩවියේ බ්ලොග් එකක් පළ වුවත්, එයට ලැබෙන හිට් සහ කමෙන්ට් සංඛ්‍යාවෙන් 95% ක් තීරණය වන්නෙ ලිපියේ ගුණාත්මකභාවය නිසා නොවෙයි. ලේඛකයාගේ පෞද්ගලික දැන හැඳුනුම් කම් මත, බොහෝ දෙනා සයිබර් අවකාශයේ තවත් එක චරිතයක් පමණක් වුවත්, බ්ලොග් සහ ෆේස්බුක්, මාර්ගයෙන් දැන හඳුනාගෙන, මිතුරුදම් ඇති කරගෙන තම තමන් “කල්ලියකට” එකතු වෙනවා. අන්න ඒ කල්ලියේ ප්‍රමාණාත්මක භාවය අනුව කමෙන්ට් සහ හිට් ලැබෙනවා. මෙය මේ පසුගිය වසර තුනක කාළයකදී බ්ලොග් අවකාශයේ දුටු සත්‍යයක්. මේ නිසාම නවක බ්ලොග් කරුවන්ට සිය බ්ලොගය ප්‍රචලිත කරගැනීමට “මේ පැත්තෙනුත් ඇවිත් යන්න” කියන සිඟමන් යැදීමට සිදුවී තිබෙනවා. අවාසනාවන්තයි – නමුත් ඇත්ත මෙයයි.

බ්ලොග් අවකාශයේ ලියැවෙන බ්ලොග් වර්ගීකරණය කරන්නෙත් අපමයි. දේශපාලන ලිපියක් ලියැවුන සැණින් සමහර බ්ලොග් දේශපාලන ගොන්නට වැටෙන්නෙත්, සංවේදී ලිපියක් ලියැවුන බ්ලොග් එකක් මානුෂීය – සංවේදී ගණයට වැටෙන්නෙත් ඒ නිසයි. මේ අන්තර්ජාලයේ පුද්ගල අනන්‍යතාවය කියන දේ විහිළුවක් වුනත්, ලියැවෙන බ්ලොග් අනුසාරයෙන් බ්ලොග් ලියන්නා පිළිබඳ චිත්තරූප මවාගෙන ඒ පුද්ගලයා මෙන්න මේ වගේ චරිතයක්ය කියා හංවඩු ගහන්නෙත්  අපිමයි. මේ නිසාම බ්ලොග් ලිපිවල අන්තර්ගතයට වඩා ඒ බ්ලොගයේ ලේඛකයාවෙත ආකර්ෂණය වීමක් සිදු වෙනවා. විශේෂයෙන්ම ලාංකීය බ්ලොග් තලය තුළ. මේ නිසා පසුව බ්ලොග් අඩවියේ පෞරුෂත්‍වය ලේඛකයාගේ පෞරුෂත්‍වය බවට පත් වෙනවා. මේ නිසාමයි සමහර බ්ලොග් කරුවන් සාමාන්‍ය ජීවිතයේදී දුටුවිට මේ ඔහුමද/ඇයමද ? කියා විශ්වාස කරන්න අපහසු වෙන්නෙ… වැරදි වුනත් මේ වර්ග කිරීම කරගෙන ඉන්නෙ අපිමයි. නමුත් මේ චරිත සියල්ලම අපි බ්ලොග් හරහා දකින චරිතද ?

මේ බ්ලොග් වර්ග ඇල්කෙමියාගේ දිනපොත අයත් වන්නේ පර්යේෂණාත්මකව සහ විචාරාත්මක බ්ලොග් කාණ්ඩයට බව මගේ හැඟීමයි. මුලින් මුලින් දිනපොතෙහි එදිනෙදා රසායනාගාරයේහෝ ජීවිතයේ  සිදුවන දෑ ලියැවුනත්, එය මටම නීරස වූ නිසා කෙමෙන් කෙමෙන් පර්යේෂණාත්මක පැත්තට බර වුනා. ඒ මගේ ජීවිතයම පර්යේෂණ හා බැඳුන නිසා. දැන් බොහෝවිට ඇල්කෙමියාගේ දිනපොතෙහි ලියැවෙන්නෙ ඔබට කිසියම් දැනුමක් ලබාදීම අරමුණු කරගත් ලිපි. මේ ලිපි සමහර වෙලාවට කර්කෂයි. තවත් සමහර වෙලාවට සංවේදීයි. තවත් සමහර වෙලාවට මේ ලෝකෙ රහක් නෑ… නමුත්, ඒ මොනවා වුනත් ඇල්කෙමියාගේ දිනපොත බැලූ ඔබ එය කියවනවා. සමහර වෙලාවට නම් ඔබ කෙළින්ම කියනවා මෙය වැදගැම්මකට නැති ලිපියක් බව. නමුත් ඒ එහෙමත්ම කෙනෙක්.

මා ලිපි ලියන්නෙ ඔබ සතුටු කරන්න නොවෙයි. මා එකතු කර ගත් හො අන්තර්ජාලයෙන් උකහා ගත් දැනුම ඔබට ලබා දීමට, ඉඳහිට දේශපාලනික ලිපියක් හෝ වෙනයමක් ලියැවෙන්නෙ ඒකාකාරීබව මඟහරවා ගන්න. මම ලිපි ලියන්නෙ හිට් ගන්නවත් කොමෙන්ට් ගන්නවත් නෙවෙයි.. එහෙම ලියනවා නම් ලියන්න ඕනතරම් ලිපි තිබෙනවා. ඒත් මම ඒවා ලියන්නෙ නෑ.. මටත් ලස්සන පොඩි කාළයක් තිබුණා – දඟකාර පාසැල් සමයක් තිබුණා.. මම ඒවා ලියන්නෙ නෑ… මට ඊට වඩා වැදගත් දේ තිබෙනවා ලියන්න..  මට බ්ලොග්වලට ගිහින් කමෙන්ට් දාන්න තරම් වෙලාවක් නෑ.. අළුත් බ්ලොග් හොයාගෙන ගිහින් කියවන්න වෙලාවක් නෑ. මම ඒ නිසාම කියවන්නෙ අතට හසුවන ෆේස් බුක් එකේ ඇති- බ්ලොග් කිහිපයක් විතරයි. ඒ නිසාම මට බ්ලොගය හරහා මිතුරන් ඇතිකරගන්නවත්, ෆේස් බුක් එක හරහා මිතුරන් ඇතිකරගන්නවත් අවශ්‍යතාවයක් නෑ.. ඒ ඇති කරගත්තත් මිතුරුකම් පවත්වන්න වෙලාවක් නෑ…. මම සැබෑ ජීවිතයෙ හමු වෙලා තියෙන්නෙ  බ්ලොග් කරුවන් දෙදෙනෙකු විතරයි. ඒ අරුණි අක්කා සහ මහවෙදනා. වැප් නිශාන්ත එක්ක දෙවතාවක් දුරකථනයෙන් කතා කරලා තිබෙනවා. ඒ මගේ බ්ලොග් ලෝකයේ සයිබර් නොවන සම්බන්ධතාවයන්. ඒ විතරක් නොවෙයි මගේ බ්ලොග් එක ලියන්නවත් වෙලාවක් නෑ… ඒ නිසාම බ්ලොග් අඩවිය යාවත්කාලීන වෙන්නෙ ඉඳහිට. ගිය සතියෙ මගේ බ්ලොග් අඩවිය දිනපතා යාවත්කාලීන වුනේ මට තරමක් විවේකීව තිබුණ නිසා මෙන්ම Blog Awards Carnival නම් තරඟාවලියකට ඇතුලත්ව තිබූ නිසා. අදින් පසුව සතියක්ම රසායන විද්‍යා සම්මන්ත්‍රණ මාලාවකට සහභාගි වෙන්නට ඇති නිසා යාවත්කාලීන වන එකක් නැහැ. ඉතින් මේ සීමිත කාළයේ ඇල්කෙමියාගේ දිනපොත වටා බ්ලොග් කියවන්නන් 50 ක් පමණ එකතු වුනා. ලිපියක් දැමූ දවසක 200-300 අතර කියවූවත් එය බ්ලොග් ලෝකයේ මහ ලොකු දෙයක් නෙවෙයි. මට ඒක ප්‍රශ්නයකුත් නොවෙයි.

දැන් අපි ප්‍රධාන ප්‍රශ්නයට බහිමු…

යුධ සමයේත් ප්‍රධාන මාතෘකාවක් ව තිබූ ප්‍රභාකරන්ගේ බාලම පුතු බාලචන්‍ද්‍රන්ගේ මරණය නැවත වතාවක් කරළියට පැමිණ තිබෙනවා. මෙය පැමිණ තිබෙන්නේ ජිනීවා හි මානව හිමිකම් සැසිවාරයට සමගාමී වීම අපූරු සිද්ධියක්. මෙතෙක් කල් සැඟව තිබූ ඡායාරූප කිහිපයක් හදිසියේම කරලියට පැමිණ තිබෙනවා පමණක් නොවෙයි ඔහු මරාදැමීම පිළිබඳවත් ඇසින් දුටුවාසේ කතා ලියැවෙනවා. මේ පිළිබඳ මාරයාගේ හෝරාව බ්ලොග් අඩවියේ ඔක්කෝම හරි….. අපි වැරදියි යන මාතෘකාව යටතේ ඔහුගේ අදහස් ලියැවී තිබුණා. බ්ලොග් අඩවියක් තුළ ලියැවිය හැකි/යුතු දෑ පිළිබඳ කාටවත් අභියෝග කළ නොහැකියි. ඒ තමන්ගේ අඩවියෙහි අයිතිය තමන්ට ඇති නිසා. මේ ලිපියෙහි අන්තර්ගතය පිළිබඳව ශ්‍රී ලාංකීය බ්ලොග් අවකාශය මත දෙකක පිහිටනවා. ඒ කියන්නෙ දෙකට බෙදිලා. සුළු පිරිසක් එය සාධාරණීකරණය කරන අතර විශාල පිරිසක් එම මරණය හෙළාදැක තිබෙනවා. මරණය සිදු වූයේ කෙසේදැයි මේ බ්ලොග් අවකාශයේ කිසිම කෙනෙකු 100% ක් නිවැරදිව නොදැන සිටියත්, තමා සියල්ල දත් බව සිතමින් එහි සම්පූර්ණ වරද ත්‍රිවිධ හමුදාව වෙත පවරන්නෙ බොහොම පහසුවෙන්.

මෙහිදී මා පළ කළ අදහස වූයේ

කියන්න වදන් නෑ… සහතික ඇත්ත….
වඳ පීදිච්ච කෙහෙල් ගහක් ගලවනකොට වටේ ඉන්න මොටෙයියොත් ගලවන්නෙ ඒවා ලොකු වුනත් හැදෙන ගස් වඳ පීදෙන නිසා….
මම දන්නෙ එච්චරයි.”

එයින් මම අදහස් කළේ තීරණ ගත් කවුරුන් හෝ ඒ අවස්ථාවේ ගත යුතු සුදුසුම තීරණය අරගෙන ඇති බවයි. එයට පිළිතුරු සපයන මාතලන් : කනගාටුයි අල්කෙමියා. ඔබ ලාංකික දරුවන්ට ආදරය කරන්නේ හදවතින්ද.. නැතිනම් ජන්ප්‍රියතාවය සඳහාද…? මේ ප්‍රශ්ණය නැගුවා කියා ඔබ මා හා අමනාප නොවනු ඇතයි සිතමි.

මට ඒක ප්‍රශ්නයක් වුනේ නැහැ මම ඊට පිළිතුරු දැක්වූයේ

කණගාටු වෙන්න එපා මාතලන්…
මටත් මේ පින්තූරය දැක්කම දුක හිතුනා.. මම මිනිහෙක් තියා සතෙක්වත් මරණවට කැමති මිනිහෙක් නෙවෙයි…
නමුත්, මෙහෙම කියන අපි කී දෙනෙක් දුමින්ද මැරෙයි කියලා බලං හිටියද ? ප්‍රේමදාස මැරුණාම රතිඥ්ඥ පත්තු කළාද ? ප්‍රභාකරන් මලා කිවුවම කිරිබත් ඉව්වද ?
මේ රටවල කරන්නෙ සතෙක් මැරෙන්න යනව නං ඌට ඉන්ජෙක්ෂන් එකක් දීලා ඌට තවත් දුක් විඳින එකෙන් මුදවනවා.
හොඳයි මාතලන්ම හිතලා බලන්න, මාරයා කියපු දේවල වැරැද්දක් තියෙනවද කියලා…
ඔසාමාගෙ මිනිය පුච්චන්නෙ නැතුව මුහුදෙ ගිල්ලුවෙ ඒකා වීරයෙක් කරයි කියන සැකයට. මෙතනත් ඊට වඩා වෙනසක් දකින්නෙ නෑ… ආයුධ පෙන්නන්න ගිහින් මාංචු පිටින් මැරෙන පාතාලයොත් ඉන්නවා… සමහර දේවල් තියෙනවට වඩා නැති තරමට හොඳයි…
මම හිතන්නෙත් ඒ විදියට… මානුෂිකත්‍වය එක දෙයක්, ප්‍රායෝගිකත්‍වය තව දෙයක්… ලටපවා ගන්න එපා….

ඊට කිහිප දෙනෙකු ප්‍රතිචාර දක්වලා තිබුණා. නැවත මාතලන් කිවුවෙ “දුමින්ද එවෙලෙම වෙඩි හුවමාරුවෙන් මැරුණා නම් සතුටු වනවා මිසක්. ඔහුව මැරුවොත් මම සතුටු වෙන්නේ නෑ. ප්‍රේමදාස මැරුණාම මට ඇති වුනේ දුකක්. අද ඒක එදා කිරිබත් කාපු කාටත් දැනෙනවා ඇති. ඔහි සිටියානම් මේ රට ආර්ථික අතින් ඉහලටම ගමන් කරණවා. ප්‍රභා මැරුණම සතුටු උනාට. ඒ සතුටු වුනේ ප්‍රභාකරන මරා දැමීම ගැන නොවේ. තස්තවාදය අවසානය සනිටුහන් කල නිසා. මා ප්‍රභා මරා දැමු ආකාරයත් කිසි සේත් අනුමත කරන්නේ නෑ. මතක තබා ගන්න එළාරගේ සොහොනටත් ගරු කළ මිනිසුන් අපි. මට ඒ ඡායාරූප දෙස බලා සතුටු වන්නට නම් කිසිසේත්ම බෑ. ඇතිවන්නේ කනගාටුවක් හා කළකිරීමක් පමණයි. එසේ නොවන්නේ නම් ප්‍රභා අහා අප අතර ඇති වෙනස කුමක්ද…?

මෙතැනදී මම සතුටු වන බවක් කිසිම තැනක පවසා සිටියෙ නැහැ. ඒ වගේම මම මාතලන්ට ගරු කරනවා කෙළින්ම සාධාරණව මනුස්සයෙක් වගේ ප්‍රශ්නය කතා කිරීම ගැන. වහෙන් ඔරෝ එන්නෙ නැතුව කෙළින්ම ගේමට බැස්ස එක ගැන. එහෙම එන්න මිත්‍රයා. කිසිම තරහක් නෑ..

මම කිවුවෙ එතැන තිබූ ප්‍රායෝගිකත්‍වය. මම පෙරදිත් කිවූ පරිදි මම පර්යේෂණයන්ට සහ දත්ත – විශ්ලේෂණාත්මක තීරණ මත තීරණ ගන්න පුද්ගලයෙක්. මේ දැමු ප්‍රතිචාරය මම හැඟීම් බරව ලියූවක් නොවෙයි. මම ඒ ලියූ ප්‍රතිචාරය පිළිබඳ 100% ක වගකීම භාර ගන්නවා.  ඒ අතර නැඟුන ප්‍රධාන පැණයක් තමයි විජේවීරගෙ පවුල ආරක්‍ෂා කළ ආණ්ඩුව – කරුණා අම්මාන්ට ඇමති පදවියක් දුන් ආණ්ඩුව – කේ පීට අභය දානය දුන් ආණ්ඩුව බාලචන්‍ද්‍රන් මරා දැමුවෙ ඇයිද කියන ප්‍රශ්නය.

  1.  බාලචන්‍ද්‍රන් මරා දැමුවෙ ආණ්ඩුවද කොටිද යන දේ සහතිකව දන්නෙ කවුද ? මාතලන් දන්නවද ? කතන්දරකාරයා දන්නවද ? රයිගම් මණ්ඩිය ලියන පුද්ගලයා දන්නවද ?  කාටද කියන්න පුළුවන් 100% ක් සහතික ඇතුව බාලචන්‍ද්‍රන් මරා දැමුවෙ කවුද කියලා ? (මම කාටවත් කඩේ යනවා නෙවෙයි… මම ලියන්නෙ සාධාරණ සැකය මත) තවත් සැකයක් නම්, යුධ හමුදාවන්ගෙන් රැකවරණය ලැබූ බාලචන්‍ද්‍රන් මියගියේ අවසාන යුද්ධයේදී  කොටින්ගෙ වෙඩි පහරක් නිසා නොවන්න බැරිද ?
  2. විජේවීරගෙ පවුල මරා දැම්මෙ නැත්තෙ ඇයි ? හේතුවක් නොතිබුණ නිසා… විජේවීරගෙ පවුල ආණ්ඩුවට තර්ජනයක් නොවෙයි. පැවැත්මට තර්ජනයක් නොවෙයි. ඔවුන් ඇමට දාගෙන නැවතත් අරගලයක් පටන් ගන්න ජේ වී පී එකටවත් වෙනත් සිංහල සංවිධානයකටවත් කොන්දක් නැති බව ආණ්ඩුව දැනගෙන හිටි නිසා. හැරත් විජේවීර යටත් වුනේ යුධමය වාතාවරණයක් මත නොවන නිසා. විජේවීර යටත් වුනේ යුධබිමක නම්, විජේවීරගෙ පවුලටත් අයත් වෙන්නෙ ඔය ඉරණමම තමයි. හොඳයි නෑ කියන්න පුළුවන් කෙනෙක් ඉන්නවද ?
  3. කරුණා අම්මාන් පිල්ලෙයාන් ආණ්ඩුවේ උසස් තනතුරු දරන්නෙ ඇයි ? කරුණා සහ පිල්ලෙයාන් කියන්නෙ ආණ්ඩුවට සම්පත් (assets) ඔවුන්ගෙන් ලබා ගත් තොරතුරු මත ආණ්ඩුව සිය යුධ යාන්ත්‍රණය මෙහෙයවූවා. ජයග්‍රහණ අත්පත් කරගත්තා. කේ පී කියන්නෙ කොටි සංවිධානයේ ආර්ථික කේන්‍ද්‍රයේ මහ මොළය, දේශපාලනික උපක්‍රමශීලීත්‍වය අතින් ඉහළම හිණිපෙත්තෙ හිටපු ආණ්ඩුවට ඒ වගේ සම්පතක් කොතැනකවත් නැහැ.. බාලචන්‍ද්‍රන් සම්පතක්ද ? නැහැ. වගකීමක් (liability)
  4. බාලචන්‍ද්‍රන් ජීවතුන් අතර තබා ගත්තා නම් – ඔහු ජීවත් කිරීමේ වගකීම කිසිවෙකු හෝ දැරිය යුතු වෙනවා. කේ පී – කරුණා වගේ නොවෙයි ඔහු – කුඩා දරුවෙක්. පාසැල් යවන්න වෙනවා, මවුපිය සෙනෙහස ලබා දෙන්නට වෙනවා. ඔහු උසස් ගණයේ ඉලක්කයක්  (High profile target) ජනාධිපති තුමාගෙ දරුවන් මෙන්ම ආරක්‍ෂාවක් රැකබලාගැනීමක් කරන්නට වෙනවා. විශාල වගකීමක්, වැරදෙන්නට ඉඩ ඇති තැන් බොහෝයි.
  5. බාලචන්‍ද්‍රන් කියන්නෙ ප්‍රභාකරන් පරපුරේ අන්තිම පුරුක – ඊලාම් අරගලයේ මීලඟ බලාපොරොත්තුව – ප්‍රභාකරන්ගෙ ලේ බිංදුවක් ගෑවුන කිසිම කෙනෙකු නැතිව (සහෝදර සහෝදරියන් සිටියත්- ඔවුන් ක්‍රියාකාරී නැහැ) ඊලාම් අරගලය ඩයස්පෝරාව විසින් මෙතෙක් දුර අරගෙන යන අවස්ථාවේ, බාලචන්‍ද්‍රන්ගේ පැවැත්ම සියල්ල අවුල් කරන බව තීරණ ගන්නවුන් දැනගෙන සිටියා වන්නට පුළුවන්. පිටතින් බලන අපට ඒ බව තේරෙනවා නම් – ඇතුලත සිටින, දේශපාලනයෙන් තෙම්පරාදු වුන අයගේ තීරණ මීට වඩා බොහෝ ලෙසින් තීරණාත්මක වන්නට පුළුවන්. මේ නිසාම එක වෙඩි උණ්ඩයකින් ප්‍රශ්න බොහොමයකට විසඳුමක් ලබා දුන්නා වෙන්නට පුළුවන්.
  6. බාලචන්‍ද්‍රන්ගෙ අයියා – චාල්ස් ඇන්තනිත් බාලචන්‍ද්‍රන් වගේම හුරුබුහුටි කොල්ලකුව හිටියා කාටත් මතක ඇති. නමුත් අයියා කොටි සංවිධානයේ දෙවැනියා වී අවසන් සටනේදී මිය ගිය බව කාටත් අමතක වන්නටත් ඇති. නමුත් – අයියා ගිය මඟම මල්ලී යා දැයි කාට හෝ සංවේදී මනුස්සයෙකුට හැඟීමක් ඇතිවන්නට පුළුවන්. හිට්ලර් ගැනත් කවුදෝ ෆේස් බුක් එකේ ඔය වගේ කතාවක් ලියා තිබුණා. තමන්ගෙ පවුලම  සතුරන් අතින් තමන්ගෙම දෑස් ඉදිරිපිට මැරෙද්දී, ඒ හැඟීම් කාටද ජීවිතේ තියෙන තාක් කල් ඉවත් කරගන්න පුළුවන් ? මේ මානුෂිකත්‍වය ගැන කතා කරන මහත්වරුන්ට පලිගැනීම කියන චේතනාව හදවතේ කොතැනකවත් නැද්ද ? ඔබ බාලචන්‍ද්‍රන්ගෙ මනසට ඇතුළු වී බලන්න.
  7. බාලචන්‍ද්‍රන් ජීවත්ව සිටියා නම්, ඔහුට අයිතිවාසිකම් කියන්න ඉදිරිපත් වන්නෙ ප්‍රභාකරන්ගෙ සහෝදර සහෝදරියන් පමණක් නොවෙයි. ජයලලිතා – රුද්‍රකුමාරන් පමණක් නොවෙයි ඇඩෙලා බාලසිංහම් වුනත් අයිතිය කියාගෙන එන්න පුළුවන්. නවි පිල්ලෙත් ඇවිත් දරුකමට හදාගන්න ඉල්ලන්න බැරි නෑ… මෙය ආණ්ඩුවට ප්‍රශ්නයක්. පිළියම – මරා දැමීම වෙන්න පුළුවන්.

මේ ඔබ නොසිතන – මා දකින පිළිතුරු කිහිපයක්. මා අමානුෂික වන්නට පුළුවන්, නමුත් බාලචන්‍ද්‍රන් අපේ අතින් මරණයට පත් වූවා නම් මේ පිළිබඳ තීරණය ගත් කිසිවෙකු ඒ අවස්ථාවේ ගනු ලැබූ වඩාත්ම ප්‍රායෝගිකම තීරණය හැටියට මා එය දකිනවා. කොටි සංවිධානය විසින් ඔහුව මරණයට පත් කර ඡායාරූප ගනු ලැබුවා නම්, ඔවුන් ද ඒ අවස්ථාවේ කල හැකිව තිබූ අනාගත ආයෝජනයක් කර තිබෙනවා.

මානව සංහතිය මෙලොව රජකළ කාළයේ කිසිම අවස්ථාවක පන්සිල් පද පහ රැකගෙන දිනපු යුද්ධයක් නැහැ. එහෙම එකක් තියෙනවා නම් ඔය මානුෂිකත්‍වය ගැන කතා කරන මහත්වරු මට කියන්න. ලොව සිදුවන සෑම යුද්ධයකම මානව හිමිකම් කඩ වෙනවා. නමුත් යුද්ධ වලට සහභාගි වන හැම පාර්ශවයම ශිෂ්ණය දෙපරංදය අස්සෙ ගහගෙන වෘෂණ කෝෂ වලින් රමණය කරන්න යන නිසා (අදාල වචන තමන් දන්න කුණුහරුප වලින් ආදේශ කරගන්න) තමන් පිරිසිදු බව ලොවට හඬගා පවසනවා. ලංකාවට මානව හිමිකම් චෝදනා නගන ඇමරිකාව විසින් ඩ්‍රෝන් ප්‍රහාර වලින් සහ කෙළින්ම වෙඩි තබා කරන ඝාතන වලින් සිදු කරන මානව හිමිකම් කඩ කිරීම් ගැන කතා කරන්න නවි පිල්ලෙට කොන්දක් නෑ.. බන්කි මූන්ට කොන්දක් නෑ.. නමුත් පුංචි රටක් වන ලංකාවට තලන්න පෙලන්න හැමෝම සූදානම්, ඒකට සාක්‍ෂි දෙන්න ඕනතරම් කට්ටිය. හරියටම ලංකාවෙ නඩු අහනවා වගේ.

දිග වැඩියි.. ඒත් ලියනවා. බලන එවුන් බලයිනෙ….

දැන් ප්‍රශ්න ගොඩක් පැණ නගිනවා….

  1. ඇල්කෙමියා මේ ප්‍රහාර නිසා බ්ලොග් ලිවිල්ල නතර කරයිද ? – නැහැ මහත්වරුනේ…. බල්ලෙක් දෙන්නෙක් බිරුවට කන්දක් පහත් වෙන්නෙ නෑ… ඇල්කෙමියා කවදත් කියන්න ඕන දේ කිවුවා. යුද්ධය දිනූ මහින්ද – ෆොන්සේකා – ගෝඨා- බැසිල් සහ ලලිත් වීරතුංග මහත්වරුන් අගය කළා වගේම විවේචනය කරන්න අවශ්‍ය වුන අවස්ථාවලදී විවේචනය කරන්නත් ඇල්කෙමියට කොන්දක් තිබුණා. කොළඹ ලස්සන කරන ගෝඨාභයගෙ චින්තනය අගය කරන ඇල්කෙමියා ඔහුටම රටේ වන අපරාධ මර්ධනය කරගන්න බැරි එක ගැන තිබෙන්නෙ දුකක් – කළකිරීමක්. ඒ ගැන කතා කරන්න ඇල්කෙමියට බැඳීම් නැහැ. උඹලා මට ගැහුවයි කියලා මගේ බ්ලොග් ලිවිල්ල නතර වෙන්නෙ නැහැ.
  2. සංවේදී කට්ටිය ඇල්කෙමියගෙ දිනපොත කියවන එකක් නැද්ද ? මට පුකයෑ (කතන්දර කාරයා පුක යන වචනය කුණුහබ්බයක් නොවන බව පේටන්ට් බලපත්‍රයක් මගින් තහවුරු කරගෙන ඇති නිසා මා එය භාවිතා කරමි.) මම ලියන්නේ මගේ ආසාවට. මට මීට අවුරුදු 3 කට ඉස්සර නොහිටි පාඨකයො සංඛ්‍යාවක් මේ බ්ලොගය හරහා ලැබුණ බව ඇත්ත. ඒත් මම ඒ එකෙක්ගෙන්වත් හම්බකරන් කන්නෙ නැති බවත් ඇත්ත. ඉතිං මට උන් ආවත් නාවත් ප්‍රශ්නයක් නෑ… එන එවුන් බලාවි – නොඑන එවුන් නොබලාවි.
  3. ඇල්කෙමියා කොන් වේවිද ? ඇල්කෙමියා කොන් වෙන්න මිතුරු සමාගමක හිටියෙ නෑ… හිටියත් බොහොම සීමිත පිරිසක් තමයි හඳුනගෙන හිටියෙ… ඇල්කෙමියා මාරයාගෙ හෝරාවෙ ලියපු එක ප්‍රතිචාරයකට ඇල්කෙමියා කොන් කරන මිතුරු පිරිසක් ඉන්නවා නම්, උන් ඉන්නවට වඩා නැති එක ගැන ඇල්කෙමියාට සතුටුයි.
  4. මාරයා ලියූ ලිපියකට ඇල්කෙමියට ගහන්නෙ ඇයි ? ඵල ඇති රුකටයි ගල් වදින්නෙ… මාරයට ගැහුවට වැඩක් නෑ… ගතියක් නෑ…. මාරයා ඕකට උත්තර බඳින්න එන්නෙත් නෑ…. ඊට හොඳයි වඳුරන්ට අවකලනය කියලා දෙන එක…. නමුත්, ඇල්කෙමියා කියන්නෙ මානව හිතවාදියෙක් කියලා හැමෝටම ඒත්තු ගන්වගෙන හිටපු කෙනෙක්… ගැහුවාම Impact එක වැඩියි… ලැබෙන හිට් ප්‍රමාණය වැඩියි. දැනෙන සතුට වැඩියි. අපි ඇල්කෙමියටත් ගහපු පොරවල් කියලා අභිමානයක් එනවා. මාරයා කියන්නෙ නිකංම නිකං සිකුරිටි කාරයෙක්, ඇල්කෙමියා කියන්නෙ මහලොකුවට පීඑච් ඩී එකක් තියෙනවා කියලා කියාගනිපු පොරක්. වෙනස ඒකයි.

මේ මම පුද්ගලිකව කිසියම් බ්ලොග් කරුවක් හෝ පිරිසක් විවේචනය කර – අභියෝග කර ලියන එකම සටහන. මට සීමා බැඳීම් නැහැ. බුවාගෙ සටහනට ප්‍රතිචාර ලියන මම ම අන්වර් මනතුංගගෙ බ්ලොග් අඩවියටත් ප්‍රතිචාර දමනවා. ඒක මට ප්‍රශ්නයක් නෙවෙයි. නුඹලා කැමති නම් මගේ ලිපි බලපල්ලා… අකැමැති නම් නෑවිත් හිටපල්ලා… මට ලියන්න අවශ්‍ය දේවල් මම ලියනවා. මම පරමාදර්ශී පුද්ගලයෙක් කියා කොතැනකවත් ලියා නැහැ. මම කැමති සුසමාදර්ශීය වෙනසක් (Paradigm shift) කරන්න මිසක් කවදාවත් පරමාදර්ශීය සමාජයක් බිහි කරන්න නෙවෙයි. බුදුන් වහන්සෙට පරමාදර්ශීය සමාජයක් බිහි කරන්න බැරි වුන එකේ ඇල්කෙමියා වගේ පඟර නැටටෙක් මොනවා කරන්නද ? එල්ලුම් ගසට නියම වෙච්ච පුද්ගලයින් මරා දැමීම ගැන මගේ එකඟත්‍වය තිබෙනවා වගේම ආයුධ පෙන්නන්න ගිහින් මාංචු පිටින් මිය යන “පාතාලේ අපරාධ කරුවන්” (අහිංසකයින් නොවේ) ගැන මගේ අනුකම්පාවක් නැහැ. ඒ – ලංකාවෙ පුනරුත්ථාපනය කියන දේ විහිළුවක් නිසා. පොඩි හොරකමකට හිර ගෙදරට යන මිනිහා ඉන් එළියට එන්නෙ ඊට වඩා පරිපූර්ණ අපරාධකාරයෙක් වෙලා, හිරගෙදරට යන පාතාලයා නැවත එන්නෙ පාතාල නායකයෙක් වෙලා. ඊට වඩා ලේසියි එක වෙඩි උණ්ඩයකින් ප්‍රශ්න ගොඩක් නිරාකරණය කරගන්න එක… මානව හිමිකම් ? සති දෙකකින් කාටත් අමතකයි. 

මම ෆේස් බුක් මානුෂිකත්‍වය පසුපස යන්නෙ නැහැ. මලාලා හෝ ඉන්දියාවෙ දූෂණය වී මිය ගිය තරුණිය ගැන අන්තර්ජාලයේ දුක් වෙන්න මට වෙලාවක් නැහැ. ඒක පළක් නැති දෙයක්. අපි දුක් වුනා කියලා ඕවා ෆේස් බුක් එකේ බෙදා ගත්තා කියලා ඒවා නතර වෙන්නෙ නෑ… ෆේස් බුක් එකේ හඬක් නගන්න පුළුවන් නෙ ? මෑණියන්ගෙ වස්ත්‍රය තමයි…..

කොටින්ම කා ගැනවත් මම දුක් වෙන්නෙ නැහැ. දුක් වීමෙන් පලක් නැහැ. දුක් වීමෙන් දුකට හේතුව නැති වෙන්නෙ නැහැ. නමුත් මම පන්සල් යනවා. ඒ මාත් සමඟ පන්සල් යන අය සතුටු කරවන්න. මම බුදුන් වඳිනවා. යමක් ඉල්ලන්නෙ නැහැ… දානය දෙනවා… හැකිතරම් පන්සිල් රකිනවා..  මම බෞද්ධයෙක් – මම බුදු දහම හදාරනවා. මම සෝවාන් වෙලා නැහැ. පෘතහ්ජනයෙක්.  බාලචන්‍ද්‍රන්ගෙ මරණය බුදු දහමට පටහැණියි:සතුරාටත් මෛත්‍රී කළ යුතුයි. නමුත් එය ප්‍රායෝගිකද ? එතැනදී බුදු දහමත් ප්‍රායෝගිකත්‍වයත් අතර දෝලනය වීමක් සිදු වෙනවා. හැඟීම් වලට ඉදිරියෙන් විශලේෂණාත්මක තීරණ ඉදිරියට එනවා. එච්චරයි.

මහත්වරුනේ, මගේ ලිපි බලලා මාව සංවේදී මානුෂික ගොඩට දැම්මෙත් උඹලාමයි.. මාව පොරක් කළෙත් උඹලාමයි… දැන් මට ගහන්නෙත් උඹලාමයි.. ඒ ගැන මට කරන්න දෙයක් නැහැ.. රයිගම් මණ්ඩියේ ලියැවුන “පරමාදර්ශී ජීවන විලාසිතා සොයන වඳ පීදුන කෙහෙල් ගස්! Genuine fake watches for sale!” ලිපියේ අන්තිමට ලියලා තියෙන්නෙ “(බාලචන්ද්‍ර පිලිබඳ ලියවුන දේවල් වලින් මා බැලුවේ කතන්දර හා උදිතගේ සටහන් පමණයි).” කණගාටුයි… මහත්මයා කියන්න… ඔබතුමාත් අර නවලෝකෙ ස්කෑනර් එක පුපුරලා ළමයෙක් මැරිච්ච වෙලාවෙ රෝහල නවලෝකය කියාගන්න බැරුව තටමපු ලංකාවෙ විද්‍යුත් මාධ්‍ය වගේ… කොන්දක් නෑ මේක ඇල්කෙමියා කියපු දෙයක් කියලා කියන්න… රසික සූරියාරච්චි මහත්මයටත් කොන්දක් නෑ කෙළින්ම ඇල්කෙමියට ගහන්න.. නමුත්, එහෙම කළා කියලා මේ දෙදෙනාම මගේ පරම සතුරන් ගණයට දාන්නෙත් නැහැ. මොකද මෙතැන සිදු වුනේ මේ අයගෙ මානුෂිකත්‍වය හදිසියේම අවස්ථානුකූලව එළියට පැමිණීමක්. මට හංගන්න දෙයක් නෑ.. මම මගේ සැබෑ හැඟීම් සඟවගෙන මාරයාගේ ලිපියට බැණලා ප්‍රතිචාරයක් දැම්මා නම්  මේ අයට මම තවමත් පොරක්… නමුත් දැන් මම මෘගයෙක්…. මට අවසාන වශයෙන් කියන්න තියෙන්නෙ එක දෙයයි.

පූජාසනයේ ඔබ හිඳවා – ඔබට පුදන මේ ලෝකයමයි

ඔබට එරෙහි වී නැගිටින්නේ…

මේක මටත්, මහින්දටත්, ගෝඨාභයටක්, සරත් ෆොන්සේකටත්, ප්‍රේමදාසටත්, ඔබාමාටත්, මානුෂිකත්‍වයේ සළු පිළිවලින් නිරුවත වසාගෙන ඉන්න අයටත් පොදු ධර්මතාවයක්…

සේවා ස්ථානයෙදි පෞද්ගලිකව වෙබ් අඩවි වලට නොයන නිසාත්, මේ සතියෙම පැවැත්වෙන සම්මන්ත්‍රණ මාලාවකට සහභාගි වන නිසාත් මේ ලිපියට වැටෙන ප්‍රතිචාරවලට එසැණින් පිළිතුරු ලබා දීමේ හැකියාවක් මට නැහැ. ඔබට කැමති දෙයක් තියෙනවා නම් කියන්න…. පිළිතුරු සැපයිය යුතු යැයි හැඟෙන ප්‍රතිචාරවලට පිළිතුරු සපයන්නම්.

2013 පෙබරවාරි 10: මෙන්න තවත් ලෝක වාර්තාවක්…. හිතේ අමාරුවට නොලියා ඉන්න බැරි වූ කතාවක්……


ලංකාවේ ආණ්ඩුවේ ඇමති තනතුරු සංඛ්‍යාව ශතකය ඉක්මවූයේ මෑතකදීය… ඒ බූරුවන් කූට්ටමේ වෙනස් වූ කොළ අතර ඛණිජ තෙල් ඇමති ධුරයද විය. ඛණිජතෙල් නීතිගත සංස්ථාව එසේ නැතහොත් සිපෙට්කෝ ආයතනය සැමදාම පාඩු ලැබූ ආයතනයකි. එය පාඩු ලබනවා පමණක් නොව විදුලිබල මණ්ඩලය වැනි ආයතනවලටද පාඩු සිදු කරන බව හිටපු විදුලිබල ඇමති පාඨලී චම්පික රණවක පවසා තිබුණි.

මෙසේ පාඩු ලබන මේ ආයතනය පසුගිය වසරක සිදු කළ ඓතිහාසික හෙජින් ගණුදෙනුවද, මෑතකදී සිදු කළ බාල පෙට්‍රල් ගෙන්වීම නිසා සිදු වූ අලකලංචිය ද ලිහිසි තෙල් හුටපටයක් නිසා සිදු වූ පාඩුව ද ආදී ආසියානු වාර්තා රැසක් තබා ඇති ආයතනයකි. සාමාන්‍යයෙන් ශ්‍රී ලංකාව ලෝකයේ නැතහොත් අඩුම ගණනේ ආසියාවේ ලොකුම ඒවා තබාගෙන වාර්තා තබන නිසා මෙවැනි වාර්තා ඇත්තෙන්ම ශ්‍රී ලාංකිකයනට අමුත්තක් නොවේ.

මේ අද දිවයින පුවත්පතේ වූ ලිපි දෙකකි. පළමුවැන්නෙන් කියැවෙන්නේ මූලදී රසායනාගාර තත්ත්‍ව පරීක්‍ෂණවලින් අසමත් වූ රුපියල් මිලියන 8000 ක් වටිනා ඛණිජතෙල් තොගයක් පසුව එක රැයින් රසායනාගාර පරීක්‍ෂණවලින් සමත් වූ බවය. මේ අනුව නැවතත් අපට සමහරවිට වාහනවලට වන්දි ලබා ගැනීමේ ස්වර්ණමය අවස්ථාව හිමි වෙනු ඇත.

දෙවන ප්‍රවෘත්තිය නම් ඛණිජතෙල් සංස්ථාවේ  එක්තරා ලොක්කෙකු සිය මාසික වැටුප රුපියල් ලක්‍ෂ දෙකේ සිට හත දක්වා වැඩි කරගෙන ඇති බවත් ඔහුට රුපියල් එක් කෝටි හතලිස් ලක්‍ෂයක් වටිනා වාහනයක් ද ආනයනය කරගෙන ඇති බවයි. එසේ වැඩි කර ගත්තේ අමතර කාර්යයක් හෝ අමතර වගකීමක් කිසිවෙකු දරන නිසාද ? නැතිනම් තමන්ට වැඩි කරගත හැකි වූ නිසා එසේ වැඩි කරගත්තාද ?

මේ එක දිනයක ඛණිජතෙල් සංස්ථාව තැබූ වාර්තාවකි… මේ දෙකටම ගෙවන්නේ අදාල නිලධාරීන් නොව මහජනතාවගේ මුදලිනි. එනම් පෙට්‍රල් හෝ ඩීසල් ලීටරයකට රුපියලක් හෝ දෙකක් වැනි ප්‍රමාණයක් මේ සඳහා වැයවනු ඇත.. මේ කාබාසිනියා කරන්නේ මහජන මුදල් වේ. සාමාන්‍යයෙන් සදාචාර සම්පන්න රටක පොදු දේපල අයථා ලෙස පරිහරණය කරන්නන් හට දඬුවම් ලැබෙන නමුත් ලංකාවේ ලැබෙන්නේ උසස්වීම් ය…

මේ, ඒ ආයතනයේ උසස් නිලධාරියෙකු දිවයිනට පැවසූ ප්‍රකාශයකි.

බාල පෙට්‍රල් හා බාල ඩීසල් ගෙන්වීමද, ඒවා නිසි පරිදි පරීක්‍ෂා කිරීම ආදී කටයුතුවලට සුදුසු සහ පළපුරුදු නිලධාරීන් නොමැති නිසා මෙම අර්බුද පැනනැගී ඇතැයි ද 1994 වසරින් පසු දේශපාලන හිතවතුන්ට ඉහළ තනතුරු ලබාදීම මෙම ප්‍රශ්නවලට ප්‍රධාන හේතුව යෑයි ද හෙතෙම කියා සිටියේය.

මේ අතර ඇමරිකාවේ එක්සෝන් මොබයිල් සමාගම 2012 වසරේ ඩොලර් බිලියන 44.3 ක වාර්තාගත ආදායමක් ලබා ගත් බවත් එය සමාගම් වැඩිම ලාභයට වඩා අඩුව ඇත්තේ මිලියන තුන්සියයකින් පමණක් බවත් මෙය ලෝකයේ තෙල් සමාගම් තැබූ ආදායම් වාර්තා අතර ඉහළම අගය ගන්නා බවත් වාර්තා වේ. මේ නිසි කළමණාකරණයෙන් නිසි සම්පත් පරිහරණයෙන් ලාභ ලබාගතහැකි එක් උදාහරණයක් පමණි. නමුත්, අප රටේ කිසිදු ආයතනයක නිසි සම්පත් කළමණාකරණයක් කවදා සිදු වේද ?

ජනාධිපතිතුමා කියන්නේ තමන්ගේ රට විවේචනය කිරීමෙන් වලකින ලෙසයි…. එසේනම් එතුමාගේ 2/3 බලතල සහ පූර්ණ විධායක ජනපති බලතල පාවිච්චි කර මේ අකටයුතුකම් නැවැත්විය යුතුය… එවිට රටේ සිදුවන යහපත් දෑ අගය කළ හැක… එතුමාගේ විධායක බලතල පාවිච්චි වන්නේ තම හෙංචයිනයට උසස්වීම් ලබාදෙන්නට පමණක් නම් අපට ආසියාවේ ආශ්චර්යය වීම ඉතාම ඉක්මනින් ඉටු කරගත හැක… සුදුස්සාට සුදුසු තැනක් ලැබෙන තුරු අපි හැමදාම වලේය…  නැතහොත් ඉක්මනින්ම මහින්ද චින්තනය ඇහින්ද චින්තනයක් වනු නොඅනුමානය…

සුභ අනාගතයක් !

සුභ අනාගතයක් !

ඔබට සුභ අනාගතයක් !

මේ සින්දුවත් අහගෙනම යමු…

මේ කියන්නේ තරහ ගන්නට නොව රට ගැන ආදරයට තියෙන හිතේ අමාරුවටය….. මේවා කිවුවාය කියා ඔබතුමන්ලා ගන්නා තීරණ වෙනස් වේ යැයි ද සිතන්නට අමාරුය… එසේ වූවා නම් මේ රට මීට වඩා හොඳ තැනක තිබෙන බව ද උපකල්පනය කළ හැක.

උල්කාෂ්මයක් සරළව හඳුනාගන්නේ කෙසේද ?


පසුගිය මාස කිහිපය පුරාවටම ලංකාවේ විවිධ පලාත්වලින් උල්කාෂ්ම පතනය වීම් වාර්තා වුනා… මේ හැම වාර්තාවක් ගැනම පුවත්පත් සහ වෙබ් අඩවි පුරා විවිධාකාර ලිපි ලියැවී තිබුණත්, සාමාන්‍ය කෙනෙකුට විද්‍යාගාර පර්යේෂණයකින් තොරව උල්කාෂ්මයක් හඳුනා ගන්නේ කෙසේද යන දැනුම ලබා දීමට කිසිවකු උනන්දු වී තිබුණ බවක් වාර්තා වී නැහැ.. එසේ වාර්තාවක් තිබුණා නම් එය ඉතා අගය කළ යුතු ක්‍රියාවක් – සමහරවිට මට එය මඟහැරුණා විය හැකියි…

උල්කාෂ්මයක්

උල්කාෂ්මව බොහෝ දුරට පොළවේ ඇති සාමාන්‍ය ගල් වලට පෙනුමින් හැඩයෙන් සමාන වෙන නිසා සමහරුන් උල්කාෂ්ම වුවත් සාමාන්‍ය ගල් කැටයක් ලෙස සළකා කසළගොඩට දමන අවස්ථා වාර්තා වී තිබෙනවා. මේ උල්කාෂ්ම පෙනුම – හැඩය – අතින් පෘථිවියේ ඇති ගල්කැට වලට කිසියම් සාමානකමක් දැක්වූවත්, ඒවායේ ගුණ අතින් නම් කිසිසේත්ම සමාන වන්නේ නැහැ. මේ නිසා සරළ පරීක්‍ෂණ කිහිපයක් මගින් පෘථීවියේ ගල්කැට සහ උල්කාෂ්ම වෙන්කර හඳුනාගන්න පුළුවනි. උල්කාෂ්ම යනු අභ්‍යවකාශයේ සැරිසරන ඇස්ටරොයිඩ සහ වෙනත් වස්තූන්ගෙන් කැඩී එන කුඩා කොටස්. මේවා සිය ගමනේදී පෘථිවි ගුරුත්‍ව ක්‍ෂෙත්‍රයට හසුවීම නිසා පෘථිවියට ඇද වැටෙනවා. බොහොමයක් පෘථිවි වායුගෝලයට ඇතුළු වන විට සිදුවන ඝර්ෂණය හේතුවෙන් රත් වී පසුව ඔක්සිජන් හා ක්‍රියා කර ගිණිබෝල ලෙස පොළවට පතිත වනවා. මේවා ඉතාම අධික වේගයකින් පොළවට පතිත වන නිසා සමහර උල්කාෂ්ම පිපිරුම් ශබ්ධයක් (Sonic Boom ) පවා පිටකරනවා. සමහරු මෙය අකුණු සැරයක් බවට වරදවා වටහා ගන්නවා. සමහරක් වායුගෝලයේදීම දැවී අළු වනවා සමහරක් පොළවට පතිතවෙනවා. මේවා ලංකාවේ පමණක් නොවෙයි, සෑම විටම ලෝකය පුරාවටම පොළවට පතිත වෙනවා.

උල්කාෂ්ම වර්ගීකරණය (Meteorite Classification)

උල්කාෂ්ම ප්‍රධාන වර්ග තුනකි. පාෂාණමය (Stony) පාෂාණමය-යකඩ සහිත (Stony-Irons ) සහ යකඩමය (Irons) මේ අනුව උල්කාෂ්මවල යකඩ අඩංගු වන බව ඔබට පෙනෙනවා ඇති. මේ නිසාම 99% ක් පමණම උල්කාෂ්ම ප්‍රබල චුම්භකයන්ට ඇදී යාමේ හැකියාවක් පවතිනවා. නමුත් හීමටයිට් සහ මැග්නටයිට් නම් යකඩ බහුල පෘථිවි පාෂාණත් මේ ලක්‍ෂණයම පෙන්නුම් කරනවා… පහත දැක්වෙන්නේ පියවරෙන් පියවර උල්කාෂ්මයක් හඳුනා ගන්නා පිළිවෙලයි.

පෙනුම

අළුත පතිත වූ උල්කාෂ්මයක් සාමාන්‍යයෙන් දැවී අළු වුන ස්වභාවයක් සහිත මතුපිටක් උරුම කර ගන්නවා. මෙය සිදුවන්නේ ගිණිගැනීම නිසායි. මෙයට Fusion Crust කියා කියනු ලබනවා. මෙය කළු පැහැයේ සිට දුඹුරු පැහැය දක්වා විවිධ වර්ණයන් ගන්නවා. නමුත් පරණ වූ උල්කාෂ්මවල මේ ගතිය දකින්නට ලැබෙන්නේ නැහැ.

Fusion Crust

Fusion Crust

එය සාමාන්‍ය ගලක් බවට බොහෝ විට වරදවා හඳුනා ගන්න පුළුවනි. එය වෙන්කර හඳුනාගත හැකි එක් ක්‍රමයක් නම් එම පාෂාණය තරමක් දිළිසෙනසුළු පොලිෂ් වූ ගතියක් පෙන්වීමයි. එසේම ඒ උල්කාෂ්ම විවිධ හැඩයන් ගන්නවා. සමහර ඒවා ඇඟිලි වලින් එබූ මඩ ගුලියක් පිළිස්සූ කළෙක මෙන් කුඩා වලවල් පෙන්නුම් කරනවා  (Regmaglypts).

Regmaglypts

Regmaglypts

මේ අතරම කාබනික උල්කාෂ්ම (Carbonaceous Meteorites) නම් විරළ ( පතනය වන මුළු උල්කාෂ්ම වලින් 4.6% ක් පමණ) උල්කාෂ්ම ද මෙවැනි ස්වභාවයක් ගන්නවා.. සමහර ඒවා තරමක් රළු වනවා. ලංකාවට මෑතදී පතනය වූ උල්කාෂ්ම කාබනික උල්කාෂ්ම බවට මහාචාර්ය චන්‍ද්‍රා ජයරත්න මහතා පවසා තිබුණා. මේ උල්කාෂ්ම වල ජලය 3% – 22% අතර ප්‍රමාණයක් තිබෙනවා, අනෙක්වා කාබනික සංයෝග, සිලිකේට, ලෝහ ඔක්සයිඩ, සල්ෆයිඩ වැනි විවිධ සංයෝග අඩංගු වෙනවා. මෙම උල්කාෂ්මවල කාබනික සංයෝග අඩංගුවීමෙන් පැවසෙන්නේ ඒවා දැඩි උෂ්ණත්‍වයකට හසු වී නොමැති බවයි. මේවා සූර්ය නෙබියුලාවේ සංයුතියට සමාන බව පැවසෙනවා. මේවා වැඩිපුර රත්වීමකට ලක් නොවීම නිසා ජීවය පැවතිය හැකි බවට කෙනෙකුට තර්ක කළ හැකි වුවත්, මෙයට පෙර පතනය වූ කිසිම උල්කාෂ්මයක ජීවය ඇති බවට හඳුනා නොගැනීම නිසා මේ මතය බැහැර කිරීමට තවත් කෙනෙකුට හැකියි. මේ නිසා කාබනික උල්කාෂ්ම රාශියක් ජීවය ඇති-නැති බවට පරීක්‍ෂා කර හඳුනාගත යුතුයි.

forestburg2-point-6-closeup-2

කාබනික උල්කාෂ්ම

කාබනික උල්කාශ්ම

මේ තිබෙන්නේ එවැනි කාබනික උල්කාෂ්මයක් සහ එහි හරස්කඩක්.

 භෞතික ගුණ (Physical Properties)

උල්කාෂ්මවල සුවිශේෂ භෞතික ගුණ කිහිපයක් තිබෙනවා. පළමුවැන්න තමයි එහි ඇති අධික යකඩ ප්‍රතිශතය නිසා ප්‍රබල චුම්භක වලට ඇති ආකර්ෂණය. සාමාන්‍යයෙන් කුඩා චුම්භකයකට ද ප්‍රතිචාර දක්වන මේවා හරියටම හඳුනා ගැනීමට තරමක් ප්‍රබල චුම්භකයක් භාවිතා කළ හැකියි. ශීතකරණයක සවි කරන කුඩා සිහිවටනවල ඇති (Refrigerator Magnets) චුම්භක සමහර අවස්ථාවලදී භාවිතයට ගැනුනත්, මීට වඩා ප්‍රබල චුම්භක අප සතුව තිබෙන බව සමහරවිට ඔබ නොදන්නවා ඇති. ඔබ සතුව අකර්මන්‍ය වූ පරිඝණක දෘඪාංග තැටියක් (hard disk) ඇතිනම් එය තුළ ඇති ඉතා ප්‍රබල චුම්භක සොයාගත හැකියි. මෙවැනි චුම්භකයක් ඉතා පහසුවෙන් උල්කාෂ්මයකට ඇලී පවතිනු ඇති. එය පළමු සාක්‍ෂියයි.

උල්කාෂ්මවලට චුම්භක ඇදී යයි.

උල්කාෂ්මවලට චුම්භක ඇදී යයි.

නමුත් යකඩ අඩංගු පාෂාණ වන හීමටයිට් සහ මැග්නටයිට් ද මෙසේ චුම්භක වලට ආකර්ෂණය වන නිසා ඒවා උල්කාෂ්ම ලෙස වරදවා වටහා ගත හැකියි. මේ නිසා ඒවා හීමටයිට් සහ මැග්නටයිට් බවට සහතික කර ගත හැකි පරීක්‍ෂණයක් ද ඔබටම කළ හැකියි.

hematitestreak_lg

හීමටයිට් රතු පැහැයෙන් සෙරමික් ටයිල් එක වර්ණ ගන්වයි

magnetitestreak_lg

මැග්නටයිට් කළු පැහැයෙන් සෙරමික් ටයිල් එක වර්ණ ගන්වයි

මේ පරීක්‍ෂණය සිදු කිරීමට ඔබට සෙරමික් ටයිල් එකක් හෝ බිඳුනු සෙරමික් පිඟානක් අවශ්‍ය වෙනවා. ඔබ උල්කාෂ්මයක් යැයි සැක කරන චුම්භක ගුණ ඇති පාෂාණය සෙරමික් ටයිල් එකේ ඇතිල්ලූ පසු රතු හෝ කළු පැහැයක් ඇඳෙනවා නම් එය උල්කාෂ්මයක් නොවේ.

එසේම මේ උල්කාෂ්ම පිටතින් බලා කළ හැකි පරීක්‍ෂණ අවසානයේ ඔබට මෙහි ඇතුලත පරීක්‍ෂා කිරීම ඇරඹිය හැකියි. ඒ සඳහා ඔබට අවශ්‍ය වන්නේ පීරක් පමණයි. මේ උල්කාෂ්ම සමහරවිට වටිනා උල්කාෂ්ම විය හැකි නිසා ඒවා පළුදු කිරීමෙන් වටිනාකම අඩු වන නිසාත්, අවශ්‍ය පරීක්‍ෂණ වලට බාධා පැමිණෙන නිසාත්, හානිය අවම කරගැනීමට සුදුසුයි. මේ නිසා උල්කාෂ්මයේ එක් පසෙකින් කොටසක් තෝරාගෙන පීරෙන් හෙමින් එහි ඇතුළත නිරාවරණය වන සේ පීරිගාන්න.. ඉන්පසු ඔබට එහි ඇතුලත හරස්කඩක් ලැබෙනු ඇති.

Esquel

පාෂාණමය – යකඩ උල්කාෂ්මවල හරස්කඩක්

සාමාන්‍ය කාබනික උල්කාෂ්මයක ලෝහමය සංයෝග ඒකාකාරව පැතිර පවතී

MontDieu

යකඩමය උල්කාෂ්මයක් දැඩි ඝණත්‍වයක් සහිතව ඇසිරී පවතී

ඒ හරස්කඩ මගින් උල්කාෂ්මයක් පැහැදිලිව හඳුනා ගත හැකියි. 

සාමාන්‍ය පෘථිවි පාෂාණ වලට වඩා උල්කාෂ්ම වෙනස් වන තවත් ප්‍රධාන භෞතික ලක්‍ෂණයක් වන්නේ ඒවායේ ඝණත්‍වයයි. සාමාන්‍ය පාෂාණයකට වඩා උල්කාෂ්ම ඝණත්‍වයෙන් වැඩියි. පහත දැක්වෙන්නේ සාමාන්‍ය පෘථිවි පාෂාණ සහ උල්කාෂ්ම අතර වූ ඝණත්‍ව සංසන්දනයයි.

Rock Type Density in grams / milliliter (mL) Density in ounces / cup
Granite 2.8 23
Sandstone 2.6 21
Basalt or lava rock 3.1 26
Hematite 5.1 42
Stony meteorite 3.5 29
Iron meteorite 8.0 66

මේ භෞතිකව උල්කාෂ්මයක් හඳුනා ගන්නා ක්‍රම කිහිපයක්. රසායනිකව සහ උසස් භෞත රසායනික උපකරණ භාවිතයෙන් උල්කාෂ්මයක් හරියටම හඳුනාගැනීම පහසුවෙන් කළ හැකියි.

උල්කාෂ්ම හඳුනා ගැනීම රසායනිකව කිරීම සාමාන්‍ය පුද්ගලයින්ට විද්‍යාගාර පහසුකම් නොමැතිව නොහැකියි. මේ උල්කාෂ්ම බොහොමයක නිකල් අඩංගුයි ඒ වගේම සාමාන්‍ය පෘථිවි පාෂාණවල නිකල් ලෝහය අඩංගු නැහැ. මේ නිකල් ලෝහය සඳහා සුවිශේෂී පරීක්‍ෂණයක් කිරීම මගින් කිසියම් පාෂාණයක් හරියටම උල්කාෂ්මයක් ද නැද්ද යන්න සොයාගත හැකියි. නිකල් ආම්ලික මාධ්‍යයකදී  ඩයිමෙතිල් ග්ලයොක්සීම් (DMG) සමඟ සංකීර්ණ අණුවක් තනනවා. මෙය රෝස පැහැතියි. 

මේ සඳහා උල්කාෂ්මයෙන් ලබාගත් කුඩු ස්වල්පයක් ගෙන තනුක හයිඩ්‍රොක්ලෝරික් අම්ලයේ එම කුඩු කිසියම් ප්‍රමාණයකට දිය කර එම ද්‍රාවණය ඩයිමෙතිල් ග්ලයොක්සීම් (DMG) මගින් පරීක්‍ෂා කළ විට රෝස පැහැයක් ලබා දේ නම් එම පාෂාණය 99% ක්ම උල්කාෂ්මයක් බවට සහතික කරගත හැකිය. 

මෙයට අමතරව Scanning Electron Microscope යන උපකරණයේ ලෝහමය සමස්ථානික රටාව ආශ්‍රයෙන් කිසියම් පාෂාණයක උප්පත්තිය නිසැකවම හඳුනාගත හැකියි. නමුත් මේ ක්‍රමය ලංකාවේ ඇතිනම් එය ඇති එකම ස්ථානය ශ්‍රී ලංකා නැනෝ තාක්‍ෂණික ආයතනය විය හැකියි. (SLINTEC).

ඉතින් ඉහත දක්වා ඇත්තේ ලංකාව තුළදී කිසියම් පාෂාණයක් උල්කාෂ්මයක්ද නැද්ද හඳුනාගැනීමට යොදා ගත හැකි සරළ පරීක්‍ෂණ කිහිපයක්. මේ සරළ පරීක්‍ෂණ කිහිපය භාවිතයෙන් ඔබ උල්කාෂ්මයක් යැයි සැක කරන ඕනෑම පාෂාණයක් හඳුනා ගැනීමට හැකියි. මේ උල්කාෂ්ම සමහරවිට අධික වටිනාකමින් යුත් දේ විය හැකියි. ඒ නිසා ඔබ උල්කාෂ්මයක් සතු කරගත් පසු එය කුණු කූඩයකට නොදමා පරිස්සමෙන් තබා ගතහොත් අනාගතයේදී ඔබේ නමත් සමහරවිට විද්‍යාත්මක සොයා ගැනීමකට සම්බන්ධ විය හැකියි.

ඉතින්, ඔබ මිදුලට වැටෙන උල්කාෂ්මයක් හෝ පාරේ ඇවිදිනවිට පයේ හැපෙන ගල් කැබැල්ලක් උල්කාෂ්මයක්දැයි පරීක්‍ෂා කිරීමට ඔබටත් හැකියාවක් මේ මගින් ලැබේ යැයි මා සිතනවා.

ලිපිය දිගු වැඩි වන නිසා මෙයට වඩා විස්තර එකතු කරන්නෙ නැහැ..

මෙන්න මේ වෙබ් අඩවියේ ඇති ක්‍රම වලින් උල්කාෂ්මයක් හඳුනාගත හැකියි. එතැනට මෙතැනින් යන්න. තවත් එකක් මෙතැන

How to identify a meteorite යනුවෙන් Google (හෝ Weemal) කළ විට ඔබට මේ ගැන වැඩිදුර විස්තර දැනගත හැකියි…

මෙය ඔබ බෙදාහදා ගන්නේ නම් ඇල්කෙමියාගේ දිනපොතින් උපුටා ගත් බවට නොකියන්න අකාරුණික වන්න එපා… මෙය වෙබ් අඩවි විස්සක් පමණ කියවා නිදිවරා ලියූ ලිපියක් නිසා එහි අගය මට හොඳටම දැනෙනවා.

දිගු කල් ජීවත් වෙන්න නිර්මාංශ ආහාර (Vegetarian Diet) වලින් ලැබෙන උදව්……


නිර්මාංශ ආහාර යනු සැම දෙනාම පාහේ දන්නා පරිපූර්ණව ශාක ආහාරයන්ගෙන් පමණක් සැදුම්ලත් ආහාරයි. සමහරුන් සත්‍ය වශයෙන්ම එහි වටිනාකම අවබෝධ කරගෙන නිර්මාංශ වන අතර තවත් සමහරු සිය ආගමානුකූලව නිර්මාංශ වීම සිදු කරයි. තවත් සමහරු මේ අතර මෝස්තරයට ද නිර්මාංශ වීම සඳහා යොමු වී සිටනවා. මෙසේ නිර්මාංශ වීමේ සීමාව එකිනෙකාගේ සිතුම් පැතුම් වලට අනුව වෙනස් වෙනවා.

කෙසේ වුවත්, නිර්මාංශ වීමෙන් සිදුවන වාසි අනන්තවත්. තම තමන්ගේ ශක්ති ප්‍රමාණයට මෙන්ම තම තමන්ගේ චිත්ත ධෛර්යයේ ප්‍රමාණය අනුව මේ නිර්මාංශ වීම වෙනස් වෙනවා. මීට වසර දහයකට විස්සකට පමණ පෙර නම් නිර්මාංශ වීම පිළිබඳ මිනිසුන්ට තිබුණෙ වැරදි හැඟීම්… ශරීරය දුර්වල වෙන බව, ශරීරයට අත්‍යවශ්‍ය පෝෂණය නොලැබෙන බව මේ මිත්‍යා මත වලින් ප්‍රධාන දෙකක්. නමුත් කෙමෙන් කෙමෙන් නිර්මාංශ ආහාර ප්‍රචලිත වෙද්දී මේ දුර්මත බැහැර වුනා.. ලෝක ප්‍රසිද්ධ නළු නිළියන් සහ විවිධ ප්‍රසිද්ධ පුද්ගලයින් නිර්මාංශ ආහාර වලට පුරුදු වෙන බව ප්‍රචලිත වෙද්දි බොහෝ දෙනා ඒ අනුව යමින් නිර්මාංශ වන්නත් පටන් ගත්තා. ඒ වගේම ඒ නිර්මාංශ වීමේ නියම තේරුම් දැනගත් අයත් ඒ හා සමානවම නිර්මාංශ වෙන්නට පටන් ගත්තා…

නිර්මාංශිකයින් වර්ග කිහිපයක් සිටිනවා.

සමහර නිර්මාංශිකයින් මස්, මාළු, කිරි  බිත්තර භාවිතයෙන් වැලකෙනවා  වගේම සතුන්ගේ සමින් සැදුන කිසිම භාණ්ඩයක් පාවිච්චි කරන්නෙත් නැහැ. මේ විවිධාකාර කාණ්ඩයන් නිර්මාංශ වීමේ ප්‍රමාණය අනුව කොටස් කිහිපයකට බෙදෙනවා.

  • Fruitarians:  මොවුන් සියළු සත්ත්‍ව නිශ්පාදන භාවිතයෙන් වැලකෙනවා. එසේම සැකසූ ආහාර (processed foods) පවා භාවිතා කරන්නෙ නැහැ .
  • Vegans: මොවුන් සියළු සත්ත්‍ව නිශ්පාදන භාවිතයෙන් වැලකෙනවා.
  • Lacto-vegetarians: කිරි ආහාර භාවිතා කළත් බිත්තර පාවිච්චියක් නැහැ
  • Lacto-ovo-vegetarians: මස් මාංශ වලින් වැලකුණත් බිත්තර සහ කිරි ආහාරයට ගන්නවා. 
  • Semi-vegetarians: මාළු සහ කුකුළුමස් වැනි සුදු මස් භාවිතා කළත් රතු මස් භාවිතා කරන්නෙ නැහැ. සාමාන්‍යයෙන් මේ අය නිර්මාංශ පුද්ගලයින් ලෙස වර්ග කෙරෙන්නේ නැහැ.

නිර්මාංශ ආහාර වේලකට පුරුදු වීම ඉතාමත් හිතකර පුරුද්දක් වුවත්, එම නිර්මාංශ ආහාර වේල් සෑමවිටම සමබල ආහාර වේලක් වීම වඩාත් සුදුසුයි. උදාහරණයක් වශයෙන් ඔබට නිර්මාංශ ආහාර ලෙස නිතරම පාහේ අල පෙති බැද ආහාරයට ගත හැකියි – නමුත් ඉන් ඇතිවන හානිය අධිකයි. ඒ නිසා නිර්මාංශ වනවා නම් එය ඉතාමත් කල්පනාවෙන් කළ යුත්තක්.

සමබල නිර්මාංශ ආහාර වේලක ඇති දේ බොහෝයි…..

  • ධාන්‍ය වර්ග සහ පිෂ්ඨමය ආහාර: පරළු පාන් – ධාන්‍ය වර්ග ඇතුලත් කළ පාන්, රතු හාල්, සහ වෙනත් ධාන්‍ය වර්ග.
  • රනිල කුළයේ ශාක ද්‍රව්‍ය: සෝයා බෝංචි සහ වෙනත් බෝංචි වර්ග, පරිප්පු, මුං, කජු, තල ආදිය.
  • එළවලු සහ පළතුරු: විවිධාකාර එළවලු සහ පළතුරු වර්ග
  • කිරි හෝ සෝයා නිෂ්පාදන: කිරි පානය කරන නිර්මාංශිකයින්ට කිරි ද එසේ නොමැති අයට සෝයා නිෂ්පාදනද සුදුසුය.

සාමාන්‍ය නිර්මාංශ ආහාර වේලක් මෙසේ ගැනීමෙන් මාංශ සහිත ආහාර වේලක ගුණයම ලැබේ. එසේම මෙයින් වැඩිපුර තන්තුමය ආහාර ලැබෙන නිසා ඇතිවන වාසි බොහොමයකි. වග බලාගත යුත්තේ මේ සියළු ගුණාංග ඇති ආහාර වේලක් ගැනීමයි.

නිර්මාංශ පිරමීඩයනිර්මාංශ ආහාර පුරුද්දක් ඇතිකර ගැනීමේ විශාලතම වාසිය වන්නේ එයින් පිළිකා වැළඳීම වලක්වාලන නිසාය. 1997 දී ලෝක සෞඛ්‍ය සංවිධානයේ වාර්තාවකට අනුව වැඩි වශයෙන් නිර්මාංශ පැත්තට බර වන ආහාර රටාවක් මගින් ශරීරයට ඇතුළු වන පිළිකා කාරක ප්‍රමාණය අඩු කරගතහැකි බව පැවසෙනවා. සමහර කෑම වර්ග පිසීමේදී පිළිකා කාරක බහුවලික ඇරෝමැටික හයිඩ්‍රොකාබන සහ විශමචක්‍රිය ඇමීන (heterocyclic amines) ශරීරයට ඇතුළු වනවා. එළවලු සහ පළතුරු ආහාරයට ගැනීම පිළිබඳ සිදු කරන ලද වසර 200 ක පමණ පැරණි පර්යේෂණවල ප්‍රතිඵලයන් දෙස බැලීමේදී වැඩිපුර එළවලු සහ පළතුරු ආහාරයට ගන්නා පුද්ගලයින්ට පිළිකා වැළඳීමේ අවදානම 50% කින් අඩු වී ඇති බවත්, තවත් 20-50% අතර කාණ්ඩයකට කුමන ආකාරයේවත් පිළිකාවක් වැළඳීමේ හැකියාව අඩු වී ඇති බවත් සොයාගෙන තිබෙනවා.

මේ පිළිබඳ පසුගිය දශක දෙකෙහිදී සිදු කෙරුණ පර්යේෂණ ප්‍රමාණය අති විශාලයි. ඒ අනුව පිළිකා වලක්වන ශාක ආහාර වර්ග 40 ක් පමණ වෛද්‍යවරුන් සහ විද්‍යාඥයින් විසින් සොයාගෙන තිබෙනවා. ගෝවා කුළයේ එළවලු වන බ්‍රොකොලි, කෝලිෆ්ලවර්, බ්‍රසල්ස්ප්‍රවුට්ස්, ගෝවා යන එළවලු; කැරට්, සෙලරි, පාස්ලි, කොත්තමල්ලි කොළ, උළුහාල් ආදී එළවලු සහ ඖෂධ පැලෑටි; වෙනත් එළවලු සහ පළතුරු වර්ග වන දොඩම්, තක්කාලි, පිපිඤ්ඥා, මිදි, බෙරි වර්ග ආදිය; බෝංචි, සෝයා බෝංචි; රතුහාල්, යවහාල් සහ බාර්ලි වර්ග; සහ විවිධාකාර කුළුබඩු වර්ග වන සුදුළූණු, රතුළූණු, ඉඟුරු, කහ, සහ රෝස්මෙරි, තයිම්, ආදී ඖෂධ පැලෑටි වර්ග මේ සුපිරි ආහාර ගණයන්ට අයත් වෙනවා.

මේ ආහාර වල පිළිකා වලක්වන රසායනික වන කැරොටිනොයිඩ, ෆ්ලේවනොයිඩ, අයිසොතයෝසයනේට, අයිසෝෆ්ලේවෝන, එලෙජික් අම්ලය, ග්ලූකරේට, කුකර්මින්, ලිමිනොයිඩ්, ලිග්නන්, ෆීනොලික අම්ල, තැලීඩ්, සැෆොනීන්, ෆයිටොස්ටෙරෝල්, සල්ෆයිඩ, ටර්පිනොයිඩ, ආදී විවිධාකාර සංයෝග රාශියක් අඩංගු වෙනවා. මේ නිසා මේ ආහාරවල අඩංගු මේ සංයෝග පිළිකා කාරක ද්‍රව්‍ය හා සටන් කර ඒවායින් ඇති කරන මුක්ත ඛණ්ඩ හා ක්‍රියා කර මුක්ත ඛණ්ඩ විනාශ කරනවා. මේ නිසා පිළිකා සෑදීමේ අවදානම අඩු වෙනවා. මේ ආහාර වල ප්‍රතිඔක්සිකාරක (Antioxidants) අඩංගු යැයි කියන්නේ මේ නිසායි.

හෘද රෝග – Heart Disease

නිතිපතා එළවලු පළතුරු ආහාරයට ගැනීම මඟින් හෘද රෝග වැළඳීමේ හැකියාව අඩුවන බව සොයාගෙන තිබෙනවා. ඉතාලි ජාතිකයින් 47,000 ක් යොදාගෙන කළ පර්යේෂණයකින් අනාවරණය වූයේ වැඩියෙන් එළවලු අනුභව කළ අයගේ හෘද රෝග වැළඳීමේ ප්‍රතිශතය සියයට 21 කින් අඩු වී ඇති බවත්, පපුවේ මහන්සිය – රිදීම වැනි රෝගයන් සියයට 11 දක්වා අඩු වී ඇති බවයි.   බ්‍රිතාන්‍යයේ පැවැත්වූ තවත් පර්යේෂණයකින් අනාවරණය වූයේ නැවුම් පළතුරු වැඩිපුර ආහාරයට ගන්නා අය හෘදරෝග වලින් මිය යාමේ ප්‍රවණතාවය සියයට 24 කින් සහ මස්තිශ්ක වාහිනී පිපිරීමෙන් මිය යන (ආඝාතය – stroke) ප්‍රවණතාවය සියයට 32 කින් ද අඩු වී ඇති බවයි.  එසේම අමු එළවලු වලින් සැදි සැලඩ් දිනපතා ආහාරයට ගන්නා අය ද හෘදරෝගවලින් මිය යාමේ ප්‍රවණතාවය සියයට 36 කින් අඩු වන බව සොයාගෙන තිබෙනවා.

තවත් පර්යේෂණයකින් සොයාගෙන ඇත්තේ දීර්ඝකාලීනව මස් මාංශ ආහාරයට ගන්නා අයට වඩා කිරි සහ බිත්තර සහිතව නිර්මාංශ ආහාර ගන්නා අය රුධිර වාහිනී ආශ්‍රිත හෘද රෝග වලින් මිය යාමේ ප්‍රවණතාවය සියයට 24 කිනුත්, පරිපූර්ණ නිර්මාංශ (vegan) ආහාරයට ගන්නා අය සියයට 57 කිනුත්  අඩු වන බවයි.. එනම් නිර්මාංශිකයින් හදිසි මරණවලට ගොදුරු වීමේ අවදානම අඩු බවයි. එසේ වන්නේ රුධිරයේ කොලෙස්ටරෝල් ප්‍රමාණය නිර්මාංශ ආහාර මගින් දැඩි සේ පාලනය වීම නිසා එසේ අකල් මරණයනට ගොදුරු වීම අඩු වෙනවා.

ආඝාතය සහ දියවැඩියාව (Stroke and Diabetes)

දීර්ඝකාලීන පර්යේෂණ වලින් අනාවරණය වී ඇති කරුණු අනුව නිර්මාංශ ආහාර ගන්නා අයට සහ විශේෂයෙන්ම නොපිසූ නිර්මාංශ ආහාර (Raw Vegan Diet) ගන්නා අයට දියවැඩියාව සහ ආඝාතයන් වැළඳීමේ බ්‍රවණතාවය බොහෝ අඩු බව සොයාගෙන තිබෙනවා. මේ අනුව මාංශ සහිත ආහාර ගන්නා අය නිර්මාංශිකයින්ට වඩා 20 -30 % වැඩි ප්‍රමාණයකින් ආඝාතයන් නිසා මරණයට පත් වීමට හැකි අතර නිර්මාංශිකයින්ගේ රුධිර පීඩනය ද ක්‍රමවත්ව පවත්වාගෙන යාම පහසු බව සඳහන්.නිර්මාංශිකයින් අධික තරබාරුකමින් නොපෙළෙන අතර බොහෝ විට සතුටින් සිටින කාණ්ඩයක්.. ධාන්‍ය සහ ඇට වර්ග අධිකව ආහාරයට ගන්නා නිර්මාංශිකයින්ට දියවැඩියාව වැළඳීම අඩු බවත් සොයාගෙන තිබෙනවා. එසේම දියවැඩියාව සහ හෘද රෝග යන බෝ නොවන මාරාන්තික රෝග දෙකම ආහාර පාලනය මගින් වලක්වාගැනීම පහසු බව ආහාර විශේෂඥයින් පවසනවා.

ඉතින් මේ දක්වා ඇත්තේ නිර්මාංශ වීමෙන් ඔබට ලැබෙන ප්‍රතිපල කිහිපයක්. එසේම නිර්මාංශ වීමෙන් තවත් සතෙකුගේ ජීවිතයක් ද නොනසා ඉතිරි කරගන්නත්  පුළුවනි. නිර්මාංශිකයින් බොහොම සතුටින් ජීවත් වන සැහැල්ලු ජීවිත ගත කරන එසේම ආවේගයන් නොදරන පාලනය කරගත් මනසක් සහිත පුද්ගලයින්… මේ අය අතින් වැරදි සිදු වනවා බොහොම අඩුයි. මක් නිසාද යත්, නිර්මාංශ වීමට ඉතා ඉහළ මානසික පාලනයක් තිබිය යුතුයි. මේ නිර්මාංශ ආහාර පුරුදු ගැන ඔබට කියන මමත් ඉඳලා හිටලා හෝ කුකුළු මස් කැබැල්ලක රස බලනවා. මට වුවත් ඒ මානසික පාලනය ඇති කරගන්න තවමත් අමාරුයි…

ඉතින් ඒ විතරක් නොවෙයි. නිර්මාංශ වීම පොකට් එකටත් හොඳයි.. ඒ කෙසේ වුවත්, මේ නිර්මාංශ ආහාර වස විස නැති රසායනික පොහොර සහ රසායන ද්‍රව්‍ය නොයෙදූ නිර්මාංශ ආහාර වනවා නම් ඉතාම හොඳයි. කෙතරම් නිර්මාංශ වුවත්, ඒ එළවලු පළතුරුවල ඇත්තේ වසවිස නම්, ඒ නිර්මාංශ වීමෙන් ඇති ප්‍රතිඵලයක් නැහැ… ඒ නිසා තමන්ගේ වත්තේ වස විස නොයොදා වගා කරගතහැකි යමක් අමුවෙන් කන්න පුළුවන් නම් එයින් ඇතිවන වාසි ගැන අමුතුවෙන් කියන්න ඕන නැහැ…

පිරිමි අපි පියයුරුවලට මේ තරම් කැමති ඇයි ? පිරිමින්ට පමණයි… ගැහැණුන් මෙය කියවා බලා පිරිමින් එසේ කරන්නේ ඇයිදැයි තේරුම් ගන්න…


නිතරම වෛද්‍ය උපදෙස් පිළිපදින්න උත්සාහ කරන්න...

නිතරම වෛද්‍ය උපදෙස් පිළිපදින්න උත්සාහ කරන්න…

සමලිංගික නොවන පිරිමින්ට දවසකට විනාඩි 10 ක් පියයුරු දෙස බලා සිටීමෙන් ජීවිත කාලය දිගු කරගත හැකි බව කළෙක වෛද්‍ය වාර්තාවක සඳහන් වුනා.. නමුත් මෙය වරදවා වටහා ගතහොත් සිදු වන්නේ සමහර විට ජීවිත කාළය කෙටි කර ගැනීමටයි…. ඒ නිසා පරිස්සමෙන් මේ වෙදකම කරන්නට හිතට ගන්න..

පිරිමියා යන සත්ත්‍වයා ජීවිතයේ සෑම අවධියකම පියයුරුවලට ආකර්ෂණය වන බව වෛද්‍යවරුන්ගේ මතයයි. කුඩා දරුවන් නම් එය භාවිතා කරන්නේ ආහාර ලබා ගැනීමේ මාර්ගයක් වශයෙන් වුනත් තරුණ වයසට එළැඹෙනවිට එය ලිංගික ආකර්ෂණයක් දක්වා වෙනස් වෙනවා. සමහර වෙලාවට දරුවන්ට බොන්න කිරි නැති වෙන වෙලාවලුත් තියෙනවා.. තාත්තලා බීලා.. ඒක වෙනම කතාවක්… කෙසේ වුවත් ලොව පුරා මේ ආකර්ෂණය වෛද්‍යවරුන්ට මහත් වදයක් ගෙනදුන් ගැටළුවක්. නමුත් මේ ගැටළුවට කිසියම් අර්ථකතනයක් දෙන්නට ස්නායු වෛද්‍යවරයෙක් සමත් වෙලා තිබෙනවා. ඔහුට අනුව මානව පරිණාමයේදී ළදරුවා සහ මව අතර වූ බැඳීම ඇති කරන ප්‍රධාන ඒකකය වන පියයුරු (දරුවාගේ කිරි උරා බීම මගින්) දරුවා වයසින් වැඩෙත්ම මොළයේ පරිපථ ඒ බැඳීම අනුව සකස් වන බව පැවසෙනවා. ඒ අනුව දරුවා ලොකු මහත් වුවත් ඔහුට ඒ බැඳීම දිගටම පවතිනවා. නමුත් කාන්තාවන්ට එය සිදු නොවන්නේ කාන්තාවන් සතුව ඔවුන්ටම කියා පියයුරු යුවලක් ඇති නිසා වන්නට පුළුවනි. කෙසේ වුවත් අප වඩාත් කැමති වන්නේ අප සතුව නොමැති දේ වලට…

ඒ වගේම නවතම වෛද්‍ය පර්යේෂණ වලට අනුව පියයුරු තුඩු උත්තේජනය වීම නිසා කාන්තාවන් බොහෝ දෙනෙකුගේ ලිංගික හැඟීම් පහළ වීම වැඩි වනබව සොයාගෙන තිබෙනවා.. (සමහරු අහයි ඕක කියන්නත් දෙයක් ද කියලා) නමුත් මෙය සිදු වන්නේ පියයුරු උත්තේජනය සිදුවන අවස්ථාවේදී කාන්තාවගේ මොළයේ ඔක්සිටොසීන් නම් හෝමෝනය ශ්‍රාවය වන්නට පටන් ගන්නවා. මෙය දරුවාට කිරිදෙන අවස්ථාවේදී ද සිදු වන බව සොයාගෙන තිබෙනවා. මෙම හෝමෝනය මගින් ඇල්ම – බැඳීම ආදරය යන හැඟීම් මතුවීම වැඩි කරනවා. ඒ නිසයි මවක් දරුවාට කිරිදෙන අවස්ථාවේදී ආදරය දෝරෙගලා යනවා යැයි කියන්නේ.. එසේම ලිංගික සම්බන්ධතාවයක් සිදුවන අවස්ථාවේදීද මේ ඔක්සිටොසීන් ශ්‍රාවය වීමෙන් එසේම ආදරය දෝරෙගලා යන බව ලිංගිකව සක්‍රීය ඇත්තන් දන්නවා ඇති. වෙනත් ආකාරයකින් කියනවා නම් ලිංගික සම්බන්ධතාවයකට පෙර අවස්ථාවේදී (foreplay) කාන්තාවකගේ පියයුරු උත්තේජනය කිරීමෙන් අදාල කාන්තාව පහසුවෙන් තමා වෙත නම්මා ගැනීමට පිරිමියෙකුට හැකියාවක් ඇති බව පැවසෙනවා.

මෙය සිදු වන්නේ සමලිංගික නොවූ පිරිමියා නව යෞවන වියට පා තබන විට මොළයේ සිදුවන ස්නායු පරිපථ පියයුරු වලට ආකර්ෂණය වීමට නැඹුරු වෙමින් සැකසෙන නිසා බව මේ පිළිබඳ පර්යේෂණ කළ ඇමරිකාවේ එමරි විශ්ව විද්‍යාලයේ මනෝ වෛද්‍ය විශේෂඥ මහාචාර්ය ලැරී යං පවසනවා. මිනිස් ජීවිතයේ එක් විශ්මයක් ලෙස හඳුන්වන මෙය මානව පරිණාමය සිදුවන විට පිරිමියා ගැහැණියගේ පියයුරු වෙත ආකර්ෂණය වීම වැඩිවන සේ මොළය හැඩ ගැසී ඇති බවත්, ඒ නිසා ලිංගික කාර්යයේ දී මෙන්ම මව සහ ළදරුවා අතර සම්බන්ධතාවයේදී ඒ දෙදෙනා අතර බැඳීම වැඩි කිරීම මගින් මානව සංහතිය ඉදිරියට ගෙනයාමට උදව් කිරීමක් ලෙස සඳහන් කෙරෙනවා. එය වෙනත් ක්‍ෂීරපායීන් අතර සිදු නොවී මානවයන් අතර පමණක් ඇති වී ඇත්තේ මිනිසා පවුල යන සංකල්පයේදී එක් ස්වාමියෙකුට එක් බිරිඳක් ලෙස ජීවත් වීමට (බර වචනයෙන් කියනවා නම් ඒකපත්නීවෘතය – Monogamous)   පරිණාමය වීම මගින් එකිනෙකා කෙරෙහි ආකර්ෂණය ඇති කිරීමට සිදු කරන ලද්දක්.. එසේම තවත් සාධකයක් නම් ලිංගික කාර්යයේදී මානවයා බොහෝවිට මුහුණට මුහුණ බලාගෙන එය සිදුකිරීම හේතුවෙන් පියයුරු උත්තේජනයට වැඩි අවස්ථාවක් ලැබීම නිසා එසේ පරිණාමය වූ බවයි.  එසේ වුවත් මේ න්‍යාය බිඳ වැටෙන වෙනත් තර්ක ද පළ වෙනවා. ඉන් එකක් වන්නේ මානව පරිණාමයේදී මිනිසා වඩා පිරිපුන් පියයුරු ඇති කාන්තාවන් කෙරෙහි ඇල්මක් දැක්වූයේ තම වර්ගයා පෝෂණය කිරීමෙහි ලා වැඩිපුර මේද ඇති පියයුරු වලින් වඩා හොඳ කාර්යයක් සිදුවනු ඇති බවට පැරණි මානවයා විශ්වාස කිරීම නිසා විය හැකි බවත් පැවසෙනවා. මක් නිසාද යත් මිනිසා දියුණු වීමට ප්‍රථම සියළුම තීරණ ගැනීම සිදු වූයේ මානව පරපුර තවත් පරම්පරාවක් කරා ගෙනයාම මත පමණයි.

ලැරී යං ගේ මෙම මතය තවත් ආකාරයකින් බිඳ වැටෙන්නේ පියයුරු පරිණාමය පිළිබඳව දීර්ඝකාලීනව පර්යේෂණ සිදු කරන රට්ගර්ස් විශ්ව විද්‍යාලයේ මානව විද්‍යා මහාචාර්ය ෆ්‍රෑන් මාසියා ලීස් ගේ තර්කයකින්… ඇයට අනුව සෑම පිරිමියෙකුම පියයුරුවලට ආකර්ෂණය නොවන බවයි කියැවෙනවා. ඇය පවසන්නේ මානව පරිණාමය පිළිබඳ පර්යේෂණ කරන විද්‍යාඥයින් මානව හැසිරීම සහ හැඟීම් පිළිබඳ මත ඉදිරිපත් කළත්, කිසිවෙකු සංස්කෘතික වෙනස්කම් පිළිබඳ හැදීරීමක් කර නොමැති බවයි. උදාහරණයක් වශයෙන් අප්‍රිකානු ගෝත්‍රික ජනතාවට අයත් කාන්තාවන් පියයුරු නිරාවරණය කරගෙන ජීවත් වන නිසා පිරිමින්ට ඒ පිළිබඳ කිසිදු හැඟීමක් නොමැති බව පැවසෙනවා.. (ස්වාසීලන්තෙ කට්ටියත් එහෙමලු… ) නමුත් එයට පිළිතුරු දක්වන ලැරී යං පවසන්නේ, ඒ පියයුරු නිරාවරණය කරගෙන ජීවත් වූවා කියා ලිංගික කර්තව්‍යයේදී ඒවා උත්තේජනය නොකිරීමක් සිදු නොවන බවයි. එසේම මෙතෙක් කල් සිදුකර ඇති මානව විද්‍යා පර්යේෂණවලදී පියයුරු පිළිබඳ පර්යේෂණ සිදු වූවත් ලිංගික කාර්යයේදී සහ ඊට පෙර පියයුරු උත්තේජනය සිදුකිරීම පිළිබඳ පර්යේෂණ එතරම් සිදු නොවී ඇතිබවයි ඔහු පවසන්නෙ…

කරනව නං ඔන්න පර්යේෂණ…. !

2013 පෙබරවාරි 06 : ඩෙංගු මර්ධන BTI බැක්ටීරියාව ගැන ඔබේ දැනුම කොපමණද ?


වසරේ කලින් කලට – විශේෂයෙන්ම වැසි කාලයකට පසු හිස ඔසවන වඩාත්ම දරුණුතම ප්‍රශ්නය නම් ඩෙංගු මදුරුවන් බෝ වීමේ ප්‍රශ්නයයි. ආණ්ඩුව කට කැඩෙන කල් කිවුවත්, අපේ මහජනතාව තමා අවට පරිසරය පිරිසිදු කර ගන්නේ එක්කෝ ආණ්ඩුවෙන් දඩ ගසන බවට නීතියක් පැණවූවොත් හෝ අහල පහල එකෙකු දෙන්නෙකු ඩෙංගු වලින් මිය පරලොව ගියහොත් පමණකි. ඒ අපේ කට්ටියගේ හැටිය.

අපේ කට්ටියගේ හැටි දන්නා ආණ්ඩුව ද, කලින් කලට ඩෙංගු ප්‍රශ්නය මතක් වී යමක් කළ යුතු බව සිතා එක් එක් විද්වතාගේ යෝජනා අනුව එක් කලෙක බිමින් පැමිණ BTI බැක්ටීරියාව ඉසින අතර තවත් වරෙක උඩින් පැමිණ ඉසීමට කල්පනා කරයි. BTI බැක්ටීරියාව නමින් හැඳින්වුවත් මේ කුමක්දැයි නොදන්නා පිරිස දන්න පිරිසට වඩා බොහෝ සෙයින් අධිකය. මේ නොදන්නා අය දැනුවත් කිරීමටත් දන්නා අයට තමන් දන්නා තරම කුමක්දැයි අවබෝධ කිරීමටත් සැකසෙන ලිපියකි. මෙහි අතහැරුණ යමක් ඇතොත් එයට එක් කිරීමට ඔබට අයිතියක් ඇත. අවසානයේ සිදුවිය යුත්තේ අප සියල්ලන්ගේම දැනුම එක තැනකට පැමිණ ජනතාව දැනුවත් වීම සහ අදාල ව්‍යසනයෙන් බේරීමයි. මා හිතන්නේ එහෙමය.

BTI බැක්ටීරියාව යනු කුමක්ද ?

BTI යනුවෙන් කෙටි වහරෙන් හඳුන්වා දෙන්නේ Bacillus thuringiensis israelensis නම් වූ,  විවිධාකාර මදුරු විශේෂයන්හි කීටයින්ගේ ආහාර මාර්ගයේ ස්වභාවිකව වැඩෙන බැක්ටීරියා විශේෂයකි. මෙම බැක්ටීරියාව ලොවට හඳුන්වාදීම පිළිබඳව  ඉතා සිත්ගන්නාසුළු වාර්තාවක් ඇත. 1975-76 වසරවලදී ලෝක සෞඛ්‍ය සංවිධානයේ මඟපෙන්වීම මත මදුරු විශේෂයන්හි කීටයන් තුළ වර්ධනය වන ක්‍ෂුද්‍රජීවීන් පිළිබඳ ව්‍යාපෘතියක් සංවිධානය විය. මෙම පර්යේෂණයේදී මදුරු කීටයනට අධික විෂ සහිත පැක්ටීරියා විශේෂයක් හඳුනා ගැණුනි. මෙය පසුව israelensis නම් බැක්ටීරියා විශේෂයක් බවට හඳුනා ගැණුනි. ඒ නිසා මෙම බැක්ටීරියාව Bacillus thuringiensis israelensis ලෙසින් නම් කෙරිණ.  මෙම බැක්ටීරියාව එකතු කරගන් ලැබූවේ ඊශ්‍රායලයේ නෙගෙව් කාන්තාරයේ මදුරුවන්ගේ සිරුරු තුළිනි. මෙම බැක්ටීරියාව විශේෂයෙන්ම පියාපත් දෙකක් පමණක් ඇති කෘමි විශේෂ (Diptera) සඳහා විෂ සහිතවන බව සොයා ගැණුන නිසා නිලමැස්සන් සහ මදුරුවන් වඳ කිරීම සඳහා මෙය යොදා ගැනීමට ලෝක සෞඛ්‍ය සංවිධානය තීරණයක් ගන්නා ලදී. මෙය වෙළඳපලට එක් කිරීමට ඉන්පසුව හැකි විය.  මේ බැක්ටීරියා භාවිතයේ සුවිශේෂී වාසිය වන්නේ වෙනත් සත්ත්‍ව විශේෂ වලට එතරම් බලපෑමක් සිදු නොවීමයි.

BTI බැක්ටීරියාව මදුරු කීටයන් තුළ ක්‍රියාකාරී වන්නේ කෙසේද ?

Bti බැක්ටීරියා වර්ග තුළ pBtoxis නම් වූ ප්ලාස්මිඩ වර්ගය ඇත. මේ ප්ලාස්මිඩ විසින් විවිධාකාර විෂ වර්ග තනනු ලැබේ. මේවා  Cry සහ Cyt toxins ලෙස හැඳින්වේ.මේවායේ වර්ග රාශියකි. Cry4, Cry10, Cry11, Cyt1 සහ Cyt2 යනුවෙන් ඒවා නම් කෙරේ. මේ විෂ වර්ග ස්ඵටික ලෙස බැග්ටීරියා තුළ සැකසී එකතු වේ. මෙම ස්ඵටික  මදුරු කීටයාගේ ආහාර මාර්ගයේ සෛල තුළට ඇතුළු වූ විට සෛල බිත්ති තුළ සිදුරු හට ගනී… එමගින් කීටයා විනාශ වේ. 

බැක්ටීරියාව මදුරු කීටයා තුළ ක්‍රියාත්මක වන ආකාරය

බැක්ටීරියාව මදුරු කීටයා තුළ ක්‍රියාත්මක වන ආකාරය

ඩෙංගු මර්ධනයට Bti බැක්ටීරියාව යොදා ගන්නා ක්‍රම කිහිපයකි.

  • බැක්ටීරියා අඩංගු ද්‍රාවණ ඉසීම
  • බැක්ටීරියා අඩංගු කුඩු ජලයට එකතු කිරීම
  • බැක්ටීරියා අඩංගු කුඩා පෙති එකතු කිරීම
  • බැක්ටීරියා ද්‍රාවණය අහසින් ඉසීම

ආදී වේ

බටහිර රටවල නම් මේ බැක්ටීරියාව වෙළඳසැල්වලින් මිලදීගත හැකි අතර එතරම් මිල අධික දෙයක් ද නොවේ. නමුත් අපේ රටේ බලධාරීන් මෙය ඉතා විශාල කර්තව්‍යයක් සේ සළකා විවිධාකාර වූ නිදහසට කාරණා දක්වා සිටිති. නමුත් කෙසේ හෝ අවසානයේ අප රටටද Bti බැක්ටීරියාව ලැබුණි. පමාවි හෝ ලැබීම සුභදායකය.

පහත දැක්වෙන්නේ මෙම බැක්ටීරියාව මිලදීගතහැකි ආකාර වේ.

ද්‍රාවණයක් ලෙස

පෙති ලෙස

මෙම පෙත්තක් ජලයට එක් කළ විට දිනක් ඇතුලත මදුරු කීටයින් මිය යන අතර මසක් පුරා ක්‍රියාකාරීව පවතී

බැක්ටීරියා අඩංගු කුඩු හෝ කැබලි ලෙස

බැක්ටීරියා අඩංගු කුඩු හෝ කැබලි ලෙස

මේවා ද පෙති සේම ජලයට එකතු කළ හැකිය.

ජලයට එකතු කළ පෙති

ජලයට එකතු කළ පෙති

පහත දැක්වෙන්නේ එවැනිම තවත් නිශ්පාදන සමූහයකි.

bitsanddunks2

මේ බැක්ටීරියාව සහ එහි ක්‍රියාකාරීත්‍වය පිළිබඳව වාර්තා රාශියක් එළි දැක්වී ඇත… මේවා සියල්ල මෙවැනි කුඩා ලිපියකට එක් කිරීම එතරම් පහසු කාරියයක් නොවේ.

හරිහැටි අවශ්‍යතාවයක් ඇතිනම් අපේ රජයට  මේවා  මිලදී ගැනීමට එතරම් වෙහෙසක් දැරීමට සිදු නොවේ. එසේම සමහර සමාගම් ටොන් ගණන් විකිණීමට පවා සූදානම් ය. එසේම අධික වියදමක් වැයවන  අහසින් ඉසීම වැනි නිශ්ඵල අකාර්යක්‍ෂම ක්‍රම අතහැර මේවා පහසුවෙන් ජනතාව අතර බෙදා දී පිරිවැය අවම කරගත හැකිය.  නමුත් අවාසනාවට අපේ අය බලන්නේ මිල අධිකම ක්‍රමය මුලින් ක්‍රියාවට නැංවීමයි.  කොළඹ වැනි සුළං අධික ජනාකීර්ණ පෙදෙසක Bti බැක්ටීරියාව අහසින් ඉසීම අධික අකාර්යක්‍ෂම සහ මිල අධික අනතුරුදායක කටයුත්තකි. ඩෙංගු මර්ධනයට Bti බැක්ටීරියාව පැතිරවීමේ වඩා පහසු ක්‍රම අනන්තවත් ඇත.

ඒ කෙසේ වුවත් මහජනතාව වශයෙන් ඔබටද මේ කාර්යයට දායක විය හැකිය. තම ගෙවත්ත සතියකට හෝ සති දෙකකට වතාවක් පරීක්‍ෂා කර පිරිසිදු ජලය රැඳෙන තැන් වසා දැමීම සහ නිවස ඇතුලත පිරිසිදු ජලය රැඳෙන තැන්වලට සබන්වතුර වැනි මදුරු නාශක ද්‍රව්‍ය යෙදීම සහ ගෙවත්ත පිරිසිදුව තබා ගැනීමෙන් සමාජයට ඔබෙන් සිදු විය යුතු සේවය ඉට කළ හැක. ඩෙංගු රෝගය දැන් දැන් සුව කළ හැකි තත්ත්‍වයට පත් වුවත්, රෝගී නොවී සිටීම නිසා ඇතිවන ලාභය ඔබ සියල්ලන්ම දන්නා බව සිතමි…

ආරෝග්‍යා පරමා ලාභා !

ඔබට ආයු බෝ වේවා……..

ප්ලාස්ටික් බෝතලේ සැඟව එන බිස්ෆිනෝල් ඒ, Bisphenol A (BPA) ඇත්තටම මාරාන්තිකද ?


වාසනාවකට (හෝ අවාසනාවකට) සාමාන්‍ය ලාංකිකයා රසායන ද්‍රව්‍ය පිළිබඳ දක්වන අවධානය ඉතාම අල්පය. මූලික වශයෙන්ම සාමාන්‍ය ජනතාවට රසායන විද්‍යාව පිළිබඳ ඇති දැනුම අවම නිසා සහ මාධ්‍ය මඟින් වුවද රසායනික ද්‍රව්‍ය පිළිබඳව නිවැරදි ආකල්පයක් ජනතාව වෙත නිසි සංනිවේදනයක් නොවන නිසාම සාමාන්‍ය ජනතාවගේ අවබෝධය අවම මට්ටමක පවතී. මේ නිසාම කිසියම් පුද්ගලයෙකු රසායන ද්‍රව්‍යයක් පිළිබඳ යමක් කී පමණින් ජනතාව කළබල වීම හෝ වැරදි ආකල්ප ඇති කරගැනීම සිදු වේ. පසුගිය කාළයේ ආසනික් අඩංගු සහල් පිළිබඳ කළබලය, සහ නෝලිමිට් ආයතනයෙන් ලබාදෙනු ලබන ටොෆි වර්ගය පිළිබඳ ආන්දෝලනය මේ සඳහා හොඳම උදාහරණ වේ. දැන් දැන් විවිධ පලාත්වලට ඇද වැටෙන උල්කාපාත සහ විවිධ වර්ණ වැසි පිළිබඳ ඇති අනවබෝධය ද ලාංකිකයා විද්‍යාත්මකව කෙතරම් පසුපස සිටිනවාද යන්න පිළිබඳ මනා සාක්‍ෂි වේ.

බිස්ෆිනෝල් ඒ යනු කුමක්දැයි ලාංකික ගෘහණියකගෙන් විමසුවහොත් ඔවුහු ඒ පැනයම පෙරළා අපෙන් අසනු ඇත. බටහිර රටවල ගෘහණියෝ මේ පිළිබඳව තරමක හෝ අවබෝධයක් ලබා ඇත්තේ බටහිර මාධ්‍ය සහ අන්තර්ජාලයට පින්සිදු වන්නටය… එසේවතුදු, ඔවුන් ද විවිධ මාධ්‍ය මගින් ගෙනයන ප්‍රචාර අනුව සිය අදහස සකසා ගනිති. ඕනෑම කාරණයකට සිවු දිශාවකින් අවතීර්ණ විය හැකිය.

  1. ඒ කාරණයට එකඟ වීම
  2. ඒ කාරණයට විරුද්ධ වීම
  3. මධ්‍යස්ථව සිටීම හෝ
  4. කිසිදු අදහසක් නොමැති වීම

එසේ ගත් කළ බිස්ෆිනෝල් ඒ (මින් පසු BPA ලෙස හඳුන්වමු) ගත් කළ සමහරක් මව්වරු මාරාන්තික රසායන ද්‍රව්‍යයක් යැයි හඳුන්වා දෙන අතර රසායනද්‍රව්‍ය නිශ්පාදන සමාගමකින් අසන ලද කල්හි, එය එසේ නොවේ යැයි සඳහන් කිරීමට පුළුවන. BPA වලට විරුද්ධව ක්‍රියා කරන කල්ලියක මතය වන්නේ එය ඉතා අහිතකර වන බවයි. විද්‍යාඥයින්ගෙන් විමසුවහොත් ඔවුන් බොහෝ දෙනෙකුගේ අදහස වන්නේ ඒ පිළිබඳ පැහැදිලිව යමක් පැවසිය නොහැකි බවයි. මේ BPA පිළිබඳ ඇත්ත තත්ත්‍වයයි.

BPA සෞඛ්‍යයට අහිතකර නම් එය ලෝකයේ මෙතරම් භාවිතා වන්නේ ඇයි?. BPA මෙතරම් වැදගත් වන්නේ එය ඉතාමත් පහසුවෙන් නිපදවාගත හැකි මෙන්ම භාවිතයට ගත හැකි රසායන ද්‍රව්‍යයක් වන නිසායි. BPA නිපදවාගන්නේ ඉතාම ලාභදායී අමුද්‍රව්‍ය දෙකක් වන ඇසිටෝන් සහ ෆීනෝල් යන සංයෝග දෙක එකට දෙක අනුපාතයෙන් ආම්ලික මාධ්‍යයකදී ප්‍රතික්‍රියා කරවීම මඟිනි.

බිස්ෆිනෝල් ඒ සංස්ලේෂණය

බිස්ෆිනෝල් ඒ (BPA) සංස්ලේෂණය

මෙසේ ලබා ගන්නා BPA අවර්ණ, අවශ්‍ය පමණට තදගතියක් ලැබෙන, බහුකාබනේට සංයෝගයක් වන අතර එය එපොක්සි රෙසින තැනීමට වැදගත් වේ. මේ වනවිට BPA ලෝකයේ බහුලවම භාවිතාවන සංයෝග කිහිපයෙන් එකක් වන අතර එම කර්මාන්තය ඩොලර් බිලියන ගණනක ආදායම් උපදවන කර්මාන්තයක් බවට පත් වී හමාරය. මේ BPA වතුර බෝතල්, සංයුක්ත තැටි, ජංගම දුරකථන, වාහන කොටස්, වෛද්‍ය උපකරණ, ආදී මෙකී නොකී සියල්ල තැනෙන මූලික ඒකකය බවට පත් වී හමාරය. යුරෝපයේ පමණක් වසර 2007 දී BPA කර්මාන්තය යුරෝ බිලියන 37 ක් වටිනා සහ රැකියා 550,000 ක් ලබා දී ඇති ව්‍යාපාරයක් ව ඇත.

BPA මගින් පොලි කාබනේට් සංස්ලේෂණය

BPA වල ඇති වාසිය එය පාරදෘශ්‍ය වීම පමණක් නොවේ. එය අනෙක් ප්ලාස්ටික් ද්‍රව්‍ය වලට වඩා කල්පැවැත්ම, නොබිඳෙනසුළු වීම, සැහැල්ලු බව, තාපස්ථායීතාවය වැනි ගුණාංග නිසා අනෙක් ප්ලාස්ටික් බහු අවයවික වලට වඩා ඉදිරියෙන් සිටී. එසේම ආහාර කෑන්, බෝතල් සහ ජලනල ආදියෙහි ඇතුලත ස්ථරය ලෙස BPA විසුරවීම (Spraying) කිරීමට භාවිතා වේ. අනෙක් බහු අවයවික  (Polymers) මෙන් නොව BPA වල ඇති මේ සුපිරි ගුණාංග නිසා සිය තරඟකරුවන්ට වඩා ඉදිරියෙන් සිටින බව ඔබට හැඟෙනු ඇත… නමුත් BPA හි ඇති එක අවාසියක් මේ සුපිරිබවට හරහට සිටී. එනම් බහුඅවයවික ඒකක (Monomer) වලින් බහුඅවයවික තැනීමේදී ඉතා සුළු BPA ප්‍රමාණයක් මේ මහා අණු අතර පැතිර පවතී.  මේ නිදහස් BPA අණු පසුකාලීනව කෙමෙන් කෙමෙන් ඒ තුළින් රිංගා ගොස් නිදහස් වේ. විශේෂයෙන්ම අදාල භාණ්ඩය හෝ උපකරණය රත් වීමේදී මේ නිදහස් වීම වැඩි වේ. මේ BPA අන්තරාසර්ග පද්ධතියේ විසංකූලතා ඇති කරයි. මෙය BPA හි සුපිරිභාවයට එල්ල කරන මරු පහරකි.

සුපිරි පුද්ගලයින් පිටුපස කුමන්ත්‍රණ, මඩප්‍රචාර වැනි දෑ හඹා එනවාක් මෙන්ම BPA වටාද අපවාද, අවලාද කුමන්ත්‍රණ  ඇති පදම් සැරි සරයි. පෙර පැවසුවාක් මෙන්ම පක්‍ෂව මෙන්ම විපක්‍ෂව කරුණු දැක්වීම් නිරන්තරයෙන් සිදු වේ. පසුගිය වසර කිහිපය තුළ මේ මත දෙකම වෙනුවෙන් පර්යේෂණ පත්‍රිකා සෑහෙන සංඛ්‍යාවක් එළිදැක්වි තිබුණි. BPA විපක්‍ෂ කණ්ඩායමේ ප්‍රධාන තර්කය වන්නේ බිස්ෆිනෝල් ඒ මගින් ඇති කරන තත්ත්‍වය ඊස්ට්‍රජන් හෝමෝනය මගින් ඇති කරන ආචරණයට සමාන බවයි. ඊස්ට්‍රජන් (Estrogen) හෝමෝනය ගැහැණු ලිංගික හෝමෝන අතර ප්‍රධාන වන හෝමෝනයකි. එය ගැහැණු සහ පිරිමි සිරුරු වලට දක්වන ආචරණය එකිනෙකට වෙනස් වේ. 2003  සහ 2004 අතර  ඇමරිකානු රෝග නිවාරණ කේන්‍ද්‍රය මගින් පවත්වන ලද සමීක්‍ෂණයක ප්‍රතිඵල අනුව අවුරුදු 6 ට වඩා වැඩි ඇමරිකානු ජනගහනයෙන් 93% කගේ සිරුරු තුළ නිරීක්‍ෂණය කළ හැකි මට්ටමක BPA තත්ත්‍වයන් ඇතිබව සොයා ගෙන තිබුණි. එසේ නම් ඇමරිකානු ජනතාව BPA සහිත භාණ්ඩ සහ උපකරණ භාවිතයේදී  ඔවුන්ගේ සිරුරු තුළට BPA කාන්දු වී ඇති බව ඔප්පු වී ඇත.

BPA නොමැති බෝතල්

BPA නොමැති බෝතල්

එසේ නම් BPA තහනම් නොකරන්නේ ඇයි ? මේ සඳහා පක්‍ෂ කණ්ඩායම ද තම සටන අතහැර නොමැති බවක් පෙනෙයි…. ලොව පුරා ඇති පර්යේෂණ සංවිධාන තවමත් BPA දංගෙඩියට දක්කාගෙන යාමට ඉඩක් ලබා දී නොමැත. තවමත් BPA පිළිබඳ අනන්තවත් විවිධාකාර පර්යේෂණ සිදුකෙරෙමින් පවතින අතර දෙපාර්ශවයටම වාසි ලබාදෙන දත්ත මෙන්ම අවාසිදායක දත්ත ද විටින්විට පළවන නිසා තවමත් පැහැදිළි තීන්දුවක් දීමට කිසිවෙකු සමත් වී නොමැත. නමුත් සමහර රටවල් මේ සඳහා දැඩි නීති රීති පණවා ඇත. උදාහරණයක් ලෙස යුරෝපයේ සම්මත BPA අගයයන්  අනුව පුද්ගලයෙකුගේ බර කිලෝ ග්‍රෑම් 1 කට BPA මිලි ග්‍රෑම් 0.05ක් දක්වා උපරිමයකට ශරීරගත විය හැක. මේ අගය ගණනය කරන ලද්දේ 2006 දී යුරෝපීය ආහාර ආරක්‍ෂණ අධිකාරියේ ගණනය කිරීම් අනුවයි. මේ අනුව පුද්ගලයෙකුට සාමාන්‍යයෙන් දිනපතා වුවත් 0.05 mg/kg ප්‍රමාණයක් ශරීරගත වූවාට කම් නැත. මේ අගයයන් 2006 සිට 2012 දක්වාම වෙනස් නොවූවත් කුඩා දරුවන්ගේ කිරි බෝතල්වල BPA අගයයන් සංශෝධනයකට ලක් වී තිබෙනවා. මේ සඳහා මුලින්ම ක්‍රියා කරනු ලැබුවේ කැනඩාවයි. ඒ 2008 දී.  දරුවන්ගේ කිරිබෝතල් නිතර නිතර තැම්බීමකට ලක් කරන නිසා BPA නිදහස්වීමේ ප්‍රවණතාවය වැඩියි. ඒ නිසා දරුවන්ට සිදුවිය හැකි අතුරු ආබාධ වැඩිවීම නිසා මේ තීරණය ගෙන තිබෙනවා.

කුඩා දරුවන්ගේ බෝතල්, කෝප්ප ආදිය හැරෙන්නට අන් සෑම දේකම BPA භාවිතය පෙර පරිදිම සිදු වෙනවා. ප්‍රංශ රජය මගින් පැවැත්වුන පර්යේෂණයකට අනුව සතුන්ගේ ශරීර තුළ  BPA විෂ වීම් වාර්තා වී ඇති නිසා මිනිසුන් කෙරෙහි එය බලපැවැත්විය හැකි බවත්, තවත් පමා නොවිය යුතු බවත් ඔවුන් පවසා තිබෙනවා. බලාපොරොත්තු වූ පරිදිම මේ ප්‍රකාශය ප්ලාස්ටික් සහ පොලිමර් වර්ග නිශ්පාදකයින් ගේ නොමනාපයට හේතු වී තිබෙනවා.

ඔවුන් අවධානය ගෙන එන පාඨය (Catch Phrase) වන අඩු මාත්‍රාවකදී සිදුවන ආචරණය (Low dose effect) ගැන හේතු දක්වන විද්‍යාඥයින් පවසන්නේ සාමාන්‍යයෙන් හෝමෝන මගින් අන්තරාසර්ග පද්ධතියට බලපෑම් ඇති කරන්නේ අඩු මාත්‍රාවකදී නිසා BPA පර්යේෂණ ද සිදු කළ යුත්තේ එවැනි සාන්‍ද්‍රණයක දී බවයි. නමුත් දැනට කෙරෙන පර්යේෂණ සිදු වන්නේ දිනකට මිලිග්‍රෑම් කිහිපයක් බැගින් ශරීරගත කර, ඉන් සිදුවන බලපෑම්  පරීක්‍ෂා කිරීම නිසා එය මේ මොඩලයට පෑහෙන්නේ නැතිබවයි.  දැනට BPA නියාමනය කරන අධිකාරීන් අඩු මාත්‍රා ආචරණය ගැන තැකීමක් නැති නිසා නිසි ඇගයීමක් සිදු නොවන බවයි. කර්මාන්තකරුවන් පවසන්නේ තවමත් BPA නිසා සිදුවන ආචරණයන් හරිහැටි හඳුනාගෙන නැති නිසා එය තහනම් කිරීමේ තේරුමක් නොමැති බවයි.

සාමාන්‍යයෙන් මසකට ලොව පුරා BPA පිළිබඳ පර්යේෂණ පත්‍රිකා 30 ක් පමණ එළි දැක්වුවත්, BPA ලොව පුරා නියාමනය පිළිබඳ විවිධ අධිකාරිත්‍වයන් පවසන්නේ ඒ පිළිබඳ තවමත් නිසි නිගමනයකට පැමිණීමට තරම් දත්ත නොමැති බවයි. ශ්‍රී ලංකාවේ තත්ත්‍වය ගතහොත් අපේ පාරිභෝගික ආරක්‍ෂණ අධිකාරියේ මහත්වරු BPA යනු කුමක්දැයිවත් නොදන්නවා විය හැකිය. මක් නිසාද යත් ඔවුනට දැනට ලංකාවේ පවතින පාරිභෝගික ප්‍රශ්නවත් විසඳීමට වෙලාවක් නැති නිසාවෙනි. පළතුරුවලට මැලතියන් හෝ වෙනයම් ද්‍රව්‍ය ඉසීම, කුළුබඩු කුඩු වලට එකතු කරන විවිධ අපද්‍රව්‍ය, පරිප්පු – රතු හාල් වලට එකතු කරන රතු පැහැති ඩයි වර්ග ආදී මෙකී නොකී වෙළඳ උපක්‍රම හමුවේ අසරණ වන පාරිභෝගිකයා  දැනුවත් කිරීමට කිසිදු සංවිධානයක් හෝ මාධ්‍යයක් කටයුතු නොකිරීම කණගාටුවට කරුණකි. පුවත්පත්වලට මේ ලිපි ලිවුවද ඒවා පළ නොවන්නේ වෙළඳමහතුන් තරහ කර ගැනීමට පුවත්පත් කතුවරුන් අකමැති නිසා විය හැකිය…

මට එවන් බැඳීම් නොමැත. මම ඔබට මා දන්නා දේ සහ අන්තර්ජාලයේ ලියැවුන දේ සරළ සිංහලෙන් ලබා දෙමි. මා දන්නා රසායන විද්‍යාවට අනුව ස්වභාවික දේ සහ අත්‍යවශ්‍ය ඖෂධ හැරෙන්නට මොනයම් රසායන ද්‍රව්‍යය ශරීරයට ඇතුළු වුවත් එය ශරීරයට අහිතකරය.. BPA වේවා එසේත් නැතිනම්  MSG වේවා මේ සියල්ල කෘත්‍රිම රසායන ද්‍රව්‍ය වේ… මේවායින් ශරීරයට සිදුවන ආචරණ මොනවාද යන්න පර්යේෂණ වල කෙළ පැමිණි අයටද නිසි ලෙස නිගමනයකට පැමිණීමට නොහැක…. කෙසේ වුවත් ප්ලාස්ටික් භාණ්ඩ භාවිතය අඩු කිරීම පරිසරයටද හිතකාමීය..

ඒ නිසා ඒ රසායන ද්‍රව්‍ය ඔබේ ශරීරය තුළට කෙසේ පිළිගන්නේද යන්න තීරණය ඔබට භාරය….

2012 පෙබරවාරි 03: ඇත්තටම අපි නිදහස් ! අභිමානවත් 65 වන නිදහසට පෙරවදනක්……


ශ්‍රී ලංකා ප්‍රජාතාන්ත්‍රික සමාජවාදී ජනරජයේ 65 වන නිදහස් දිනය අභිමානවත් අන්දමින් ත්‍රීකුණාමලයේදී සැමරීමට සියළු කටයුතු සූදානම් කර ඇත. ජනාධිපතිතුමා ආචාර පෙළපාලිය නිරීක්‍ෂණය කරනු ඇත, බාලිකාවියන් ජයමංගල ගාථා ගායනා කර දේවෝ වස්සතු කාලේන ද කියනු ඇත… ලංකාවේ අප සැවොම සියළු කටයුතු පසෙක දමා රූපවාහිනී ඉදිරිපිට දෑස් අයාගෙන මේ ආශ්චර්යය නරඹනු ඇත… නමුත්, ඒ සියල්ල අවසානයේ එක් පැණයක් පමණක් අප සිත් තුළ ඉතිරි කර අප සැවොම යළි පියවි ලෝකයට දමාගසනු ලබනු ඇත…

නිදහස

නිදහස

ඇත්තටම අප නිදහස් ද ?

වසර 1505 න් පසු  ලක්දිව  යටත් විජිතයක්ව පැවතුනි. මුලින්ම පෘතුගීසීන් ද, දෙවනුව ලන්දේසීන් ද, අවසන ඉංග්‍රීසීන්ද අප රට යටත් විජිතයක් කරගෙන පාලනය කළහ. ඒ සමයේ ඔවුන් අපෙන් ලබාගත් අනන්තවත් වස්තූන් වෙනුවට අපට මාර්ග පද්ධතියක්, පොතක ලියැවුන නීතිරීති පද්ධතියක්, දුම්රිය මාර්ග සහ විධිමත් ප්‍රවාහන පද්ධතියක්, සැලසුම් සහගත රාජ්‍ය ආයතන පද්ධතියක්, ආදී දෑ නොලැබුණාය කිවහොත් එය මහා කුහක කමකි. එසේම ඔවුන් අප රටෙන් පිටව යද්දී ඔවුන්ගේ සිතුම් පැතුම් අනුව ක්‍රියා කරන කළු සුද්දන් සමූහයක්ද ඇතිකර ගිය බව බොහෝ දෙනාගේ අදහසයි… 1947 දී ඉන්දියාව නිදහස ලබද්දී,  ඉන්දියාවෙන් ඉවත් වූ සුද්දාට ලංකාව පාලනය කිරීමට අමතර උත්සාහයක් දැරිය යුතු විය. කලාපයේ ඉංග්‍රීසි ආධිපත්‍යය පතුරවා ගැනීම අත්‍යවශ්‍ය නොවුන නිසාත්, ඉන්දියාවෙන් තමන් අයින් වුන නිසාත්, කරදරයකින් තොරවම සුද්දා ලංකාවට ද නිදහස ලබා දුන්නේය. මේ නිසාම අපි කිසිදු අරගලයකින් තොරව නාම මාත්‍රික නිදහස ලබා ගතිමු. ඉන් අනතුරුවද 1972 වනතුරු අපට පූර්ණ නිදහසක් ලැබුණේ නැත… අවසන 1972 දී අප ශ්‍රී ලංකා  ප්‍රජාතාන්ත්‍රික සමාජවාදී ජනරජය බවට පත් වීමු.. ඒ අපේ නිදහසේ අතීතයයි.

ඉන් වසර 41 ක් ගිය තැන අප කොතැනද ? 1977 දී අප රටට හඳුන්වා දුන් පූර්ණ විවෘත ආර්ථිකයේ බලමහිමයෙන් අපට අවශ්‍ය සහ අනවශ්‍ය සියල්ල ලැබී ඇත.. ආර්ථිකය විවෘත වීමත් සමඟම ලෝකය අපටත්, අප ලෝකයටත් විවෘත වීමු. එතෙක් කල් අර්ධ ස්වයංපෝෂිත ආර්ථික ක්‍රමයක් මත යැපුනු අප සියල්ලම පිටරටින් ආනයනය කරන්නට විය. හාල් ඇටයේ සිට රෝල්ස් රොයිස් රථය දක්වා වූ සියල්ල අපි පිටරටින් ආනයනය කරමු.. අප ආර්ථිකව පිටරටට ගැති වෙමු. චීනය, ඉන්දියාව, ඉරානය, සව්දි ආරාබියාව, වැනි ධනවත් බලවත් රටවලට අප ආර්ථිකව ණයගැති වෙමු… ඒ නිසාම අපි ආර්ථිකව දීන ජාතියකි. ඒ දීන බව නිසාම ඒඒ රටවල උවමනාවට අපේ ඇමති මණ්ඩලය වෙනස් කරන්නට තරම් අදීන ජාතියකි අප. දැන් ගණන් බලා ඇති අන්දමට සෑම ශ්‍රී ලාංකිකයෙකුම පිටරටවලට රුපියල් 300,000 ට අධික ප්‍රමාණයක් ණය ගැති ය. මේ ණය එන්න එන්න වැඩිවනවා මිසක් අඩු වීමක් නැත. ඒ අපේ රජය ණය ගනිමින් ආශ්චර්යය කරා ගමන් කරන නිසාවෙනි.

වෙනදා සහලින් පොලින් ස්වයංපෝෂිත වූ අප කේරලයෙන් පොල් ආනයනය කරන තත්ත්‍වයට පත් වී ඇත. මේ තාක් රට කළ ආණ්ඩු සිය මඩි තර කර ගැනීම පිණිසම කළ අදූරදර්ශී ක්‍රියා කලාපයන් නිසා පොල් ත්‍රිකෝණයෙන් වැඩි කොටසක් නිවාස සඳහා වෙන් වී ඇත. යුද්ධයෙන් පසු ජාතික ප්‍රවාහයට එක් වූ  උතුරු නැගෙනහිර ගොවිපොළවලින් එන සහලින් රට ස්වයංපෝෂිත ව තිබිය යුතු නමුත්, නිසි කළමණාකරණය සහ දූරදර්ශී සැලසුම්කරණයේ අඩුවක් නිසා අපට තවමත් සහල් මිලෙහි කිසිදු සහනයක් දක්නට නැත… මේ උදාහරණ දෙක තුනක් පමණි. බොහෝ බඩු භාණ්ඩවල මිලෙන් පමණක් නොව අන්තර්ගතයෙන්ද අප නිදහස් නොමැත. පාරිභෝගිකයා ආහාරයට ගත යුතු දෑ නිර්ණය කරන්නේ වෙළඳ දැන්වීම් සමාගම් ය… ඒඅනුව අප සියළුම දෙනා අහවල් සොසේජස් වර්ගයත්, අහවල් බීම ජාතියත්, අහවල් සබන් ජාතියත් මිලදී ගනු ඇත. අපට තෝරාගැනීම් ඇත… නමුත්, ඒ සියල්ලේ තත්ත්‍වය එකමය… සියල්ලේම ඇත්තේ ජරාවය…

සෞඛ්‍යය අතින් අප ස්වාධින නැත. වෛද්‍යවරුන් අපට නියම කරන බෙහෙතේ ගුණාත්මක භාවය ඖෂධ වෙළඳ නියෝජිතයන් (Medical Representatives) වෛද්‍යවරයාට දෙනු ලබන සංතෝෂම අනුව තීරණය වේ. බෙහෙතේ පිරිසිදු භාවය බෙහෙත් ගෙන්වන පුද්ගලයන්ට අදාල සමාගමෙන් ලැබෙන කුට්ටිය මත තීරණය වේ. ඒ නිසාම අපට යල් පැනගිය බෙහෙත්, ගුණාත්මකභාවයෙන් අඩු බෙහෙත් මෙන්ම බෝනස් ලෙස වීදුරු කැබලි ඇති එන්නත් කුප්පි ද ලැබේ.. අනාගතයේ ඒ තුළ කැරපොත්තන් ද දැකිය හැකි වනු ඇත.

ආගමිකව සහ සංස්කෘතිකව අප සිටින්නේ නරා වලකය. වසර දහයකට පෙර නොතිබූ හලාල් සංස්කෘතියක් ආහාර පාන සඳහා පැමිණ ඇත. වෙනදා මිල දක්වන ලේබලය දෙස බලා බඩු ගත් පාරිභෝගිකයා අද බලන්නේ එය හලාල් ද නැත්ද යන්නයි. ආහාර නිපදවන සමාගම් 85% ක් දෙනාගේ තෝරාගැනීමේ නිදහස 15% කට අඩු පාරිභෝගික සංඛ්‍යාවක් නිසා අහිමි කර ඇත. සිය නිශ්පාදන හලාල් කළ යුතුම නම් කළ යුත්තේ හලාල් සහ හලාල් නොවන ලෙස අංශ දෙකකින් සිය නිශ්පාදන පාරිභෝගිකයා වෙත ලබා දීමයි. ආගමිකව අප බලෙන් ආගම් හැදෑරීමට පොළඹවා ඇත. පෙර පැවති ආගමික සහජීවනය වෙනුවට මුස්ලිමුන් බෞද්ධයන් කුපිත කිරීමත්, විවිධ බෞද්ධාගමික සංවිධාන මුස්ලිමුන්ට පහර දීම සහ ඔවුන්ගේ ව්‍යාපාරවලට එළිපිටම පහර දීම වැනි ගුජුප්සාජනක ක්‍රියා කෙරෙහි එළැඹී ඇත.. දෙපැත්තම නිවැරදි නැත.

දේශපාලනිකව කිසිවෙකු නිදහස් නොමැත. ඒ ගැන කතා කිරීමෙන් පළක් නැත. නීතිමය පැත්තෙන් අප කිසිවිටෙක නිදහස් නැත… මුදල් මත නිදහසත් සිරගෙයත් තීරණය වේ. ජනාධිපති තුමා නීතිය සැමට එක යැයි පාරම් බෑවත්, වරෙන්තුකරුවන් නිදැල්ලේ එතුමා සමඟම ඡායාරූප වලට පෙනී සිටීමෙන් එතුමාගේ නිදහසේ අර්ථකතනය ද ජනතාවට පෙනේ.. අපට අවශ්‍ය දේශපාලනඥයෙක් තෝරා ගැනීමේ නිදහස ද අපට අහිමි වී තිබේ. ඒ තමන් සතු මැර බලයේ ප්‍රමාණයෙන් ඡන්දයේ ඉරණම තීරණය කිරීමේ හැකියාව සැමට ඇති බැවිනි.

රූපවාහිනිය බැලීමේ නිදහස වෙලඳ දැන්වීම් වලින් උදුරාගෙන තිබේ. තිරයේ දැක්වෙන රූපරාමු අතරින් වෙලඳ දැන්වීම් බම්ප් වේ… ඒ දැක අපට පිස්සු බම්ප් වේ. වැඩසටහනක් විනාඩි පහක් එක දිගට නැරඹීමේ නිදහස වෙළඳ දැන්වීම් නිසා අහිමි වී තිබේ.  නිදහසේ බස් රථයක යාමේ නිදහස ඩ්‍රයිවර් මහතා සහ කොන්දා විසින් උදුරාගෙන තිබේ. කාන්තාවක් නම් ඇය බස් රථයේ යාමේ නිදහස අවට සිටින ජැක් කාරයන් සහ අඟපසඟ මිරිකන්නන් ගෙන් බේරාගතයුතුව තිබේ. නිදහසේ ව්‍යාපාරයක් කරගෙන යාමේ නිදහස කප්පං කරුවන් විසින් උදුරාගෙන තිබේ.. එසේත් නැතිනම් යමක් නිදහසේ කරවා ගැනීම අල්ලස් කරුවන් විසින් උදුරාගෙන තිබේ.

අපට කිසියම් නිදහසක් තිබිය යුතුය.. එය වල්බූරු නිදහසක් නොව, නිදහස්ව සිතීමේ, නිදහස්ව කතා කිරීමේ, නිදහස්ව ජීවත් වීමේ නිදහසකි… සමහර රටවල් හා සසඳන විට අපට ඇති නිදහස ගැන අප සතුටු විය යුතුය… නමුත්… වැඩි දියුණු කළ හැකි දේ බොහෝය… පරිපූර්ණ පද්ධතියක වුවද වැඩිදියුණු කළ හැකි තැන් එමට ඇත. There is always room for improvement..

අන්තර්ජාලයේ යමක් කියවීමට ඇති නිදහස බ්ලොග් කරුවන් විසින් උදුරාගෙන තිබේ… උන් නිදහස අර්ථකතනය කරන විදියට අපටත් සිතන්නට පුරුදු කර තිබේ… ඇල්කෙමියා ද එවැනි නිදහස උදුරාගත් එකෙකි.. ඌ පිටරට සිට හිතන්නේ අපට නිදහසක් නෑ කියාය.. නමුත් අපට අවශ්‍ය වෙලාවට අවශ්‍ය යමක් කිරීමේ නිදහස අපේ රටේ ඇත.අවශ්‍ය නම් පයින්ද, බසයෙන්ද, ත්‍රී වීලයෙන්ද, නැතහොත් කැබ් එකකින්ද ගමන් යාමේ නිදහස අපට ඇත. අපට අවශ්‍ය මැක්ඩොනල්ඩ්ස් ද කේ එෆ් සී  ද යන්න තීරණය කිරීමේ නිදහස අපට ඇත. සෞඛ්‍යය බල්ලාට ගියත් ඒවා කෑවෙ නැතිනම් ජීවත් වී කුමටද ? වෙනකක් තබා මිනිහෙක් මරා එහෙම කළ බවට මතකයක් නැති බව ප්‍රකාශ කිරීමෙන්ම දඬුවමින් නිදහස්වීමේ නිදහස අපට ඇත. අපට අවශ්‍ය ගීතයක් ඇසීමේ  අපට අවශ්‍ය පොතක් කියවීමේ නිදහස අපට ඇත.. ගීතයේ ආකෘතිය පොතේ අන්තර්ගතය අපට අවශ්‍ය නැත. කොතරම් වැරදි කළත්, අල්ලස් ගත්තත්, ආණ්ඩුවට පාඩු කළත් අපේ නිදහසේ අපට අවශ්‍ය විදියට සියල්ල කරගෙන යාමේ නිදහස අපට ඇත. සමහරවිට උසස්වීමක් ද ලැබෙනු ඇත.  අපට අවශ්‍ය එකා අවශ්‍ය තැනකට පත් කිරීමේ නිදහසත්  අනවශ්‍ය එකා එක රැයකින් ඉවත් කිරීමේ නිදහසත් අපට ඇත. අපට අවශ්‍ය විදියට පරිසරය විනාශ කරමින් තැන තැන කුණු දැමීම, ජල පද්ධතිය විනාශ කිරීම ආදී සියල්ල කිරීමේ නිදහස අපට ඇත. මිනිස්සුන්ට අවශ්‍ය මෙගා ටෙලියක්ද නැතිනම් චංගුමීද පංචමීද ඉන්දියානු මෙගාවක්ද යන්න ඕනෑම තැනකින් තෝරාගත හැක…  මේ ඇල්කෙමියාට පිස්සුය… ඌට Permanent Head Damage හැදිලාය..

ඇත්තටම අපි නිදහස්ය…..

ඇති හැකි සියල්ලන්ටම සුභ නිදහසක් වේවා !