2013 මාර්තු 02 : හලාල් නිෂ්පාදන සහ ලෝක නිෂ්පාදන ආර්ථිකයේ නව ප්‍රවණතා…..


හලාල් :

විකිපීඩියාවට අනුව හලාල් යනු මුස්ලිම් ජීවන දර්ශනයට අනුව නීත්‍යානුකූල හෝ ආහාරයට ගත හැකි තත්ත්‍වයේ ඇතැයි සහතික කළ ආහාර සහ ඒ අනුව එදිනෙදා ජීවිතයේ භාවිතාව ලෙස සඳහන් වෙනවා. හලාල් යන වදන නිසි ලෙස තේරුම් නොගත් පුද්ගලයින් හලාල් යන වදන ඇසුණු සැණින් අදහස් කරන්නේ මස් මාංශ හා බැඳුන වදනක් ලෙසින්. නමුත් මුස්ලිම් ජීවන දර්ශනයට අනුව සත්ත්‍ව නිෂ්පාදන අන්තර්ගත විය හැකි සියල්ල හලාල් ලෙසින් හඳුන්වනවා. උදාහරණයක් වශයෙන් සැකසූ ආහාර, ඖෂධ, රූපලාවන්‍ය නිෂ්පාදන, ආදියද හලාල් සංකල්පයට අයත්.

යුරෝපීය හලාල් සහතිකයක්

යුරෝපීය හලාල් සහතිකයක්

හලාල් සහ මුස්ලිම් ලෝකය:

මුස්ලිම්වරුන් අන් ආගමිකයින්ට වඩා  භක්තිමත් යැයි සැලකෙනවා, ඒ නිසාම හලාල් සංකල්පය දිවිහිමියෙන්ම අදහනවා. ලෝකයේ මුස්ලිම් රටවල් 57 ක් ද බිලියන 1.7 ක් ජනගහනයක් ද සිටිනවා. යුරෝපයේ පමණක් මිලියන 51ක් මුස්ලිමුන් සිටින අතර ජර්මනියේ මිලියන 4.2 ක් ජීවත් වෙනවා. එසේම හලාල් නිෂ්පාදන සැකසීම ඉතා සුවිශාල ව්‍යාපාරයක්, වසරක් තුළදී ලොව පුරා ඇමරිකානු ඩොලර් බිලියන 700 කට ආසන්න අගයක  ආහාර සහ පාරිභෝගික ද්‍රව්‍ය පමාණයක් සංසරණය වනවා. කවුරු කෙසේ කීවත් මේ නිසාම හලාල් ව්‍යාපාරයන් ලොව පාරිභෝගික වෙළඳපලෙන් සැළකිය යුතු ප්‍රතිශතයක් අයිතිකරගෙන ඇතිබව පිළිගන්න වෙනවා.  සසඳා බලනවා නම් කාබනික/හරිත නිෂ්පාදන (Organic products) වෙළඳපල ආර්ථිකය වසර 2010 දී ඇමරිකානු ඩොලර් බිලියන 30 ක් .

හලාල් සහ නිෂ්පාදන ආර්ථිකය:

හලාල් සැකසීම ආහාර වලට පමණක් සීමා වන්නෙ නැහැ. ඖෂධ, රූපලාවණ්‍ය නිෂ්පාදන, රෙදිපිළි, සියල්ල හලාල් වලට අයත්. මේ නිසාම ඒ ඒ නිෂ්පාදන සැකසීමේදී ලබා ගන්නා අමුද්‍රව්‍ය හලාල් වීම මුස්ලිම් ලෝකයට වැදගත්. ආහාර ද්‍රව්‍ය කෙළින්ම හලාල් ක්‍රමයට සැකසිය හැකි වුවත්, බොහෝ සැකසූ ආහාර ද්‍රව්‍ය සහ ආහාරමය නොවන ද්‍රව්‍ය හලාල් ක්‍රමයට සැකසීමේදී සැලකිය යුතු කාරණා බොහොමයක්. උදාහරණයක් ලෙසින් යෝගට් හෝ අයිස්ක්‍රීම් සළකා බැලුවහොත්, එය ඍජුවම මස් මාංශ නොමැති වුවත් වක්‍රාකාරව සත්ත්‍ව නිෂ්පාදන අඩංගුයි. ඒ යෝගට් සහ අයිස්ක්‍රීම් වල අඩංගු කිරිවලටත් වඩා ජෙලටින් නිසායි. ජෙලටින් සැකසෙන්නේ සත්ත්‍ව පටක ආශ්‍රයෙන් විශේෂයෙන්ම ඌරු පටක ආශ්‍රිතව. මේ නිසා මුස්ලිමුන්ට මෙය ඉතා වැදගත්. ඒ එක පැත්තක්. තවත් පැත්තකින් බලනවා නම් ඖෂධ නිෂ්පාදනය. ඖෂධ නිෂ්පාදනයේදී විවිධාකාර රසායනික ද්‍රව්‍ය භාවිතා වෙනවා. උදාහරණයක් ලෙසින් විටමින් B සළකා බලනවා නම්, එහි අන්තර්ගත රසායනික සංයෝගය සැකසෙන්නේ විවිධාකාර කුඩා සංයෝග කිහිපයක් ක්‍රියා කරවීමෙන්. මෙහි එක සංඝඨකයක් වන්නේ සිට්‍රැල් නම් සංයෝගය. සිට්‍රැල් සැකසෙන්නේ පෙට්‍රෝලියම් විඛණ්ඩනයෙන් ලබා ගන්නා සරළ අණුවක් කිහිප වතාවක් ඔක්සිකරණයට සහ ප්‍රතික්‍රියාවනට සහභාගී වීමෙන්. මේ සිට්‍රැල් වෙනත් සංයෝග කිහිපයක් සමඟ ක්‍රියාකරවීමෙන් විටමින් B සැකසෙනවා. ලොව පුරා බෙදාහැරෙන විටමින් බී නිෂ්පාදනවල නිෂ්පාදකයා වන්නේ BASF ආයතනයයි. මෙහිදී ඔවුන් සිය නිෂ්පාදන සැකසීමේදී යුරෝපීය – ඇමරිකානු සහ පිළිගත් ආහාර – ඖෂධ සම්මතයනට අනුකූලව ඉතාමත් සුපිරිසිදුව නිෂ්පාදනය කිරීමට කටයුතු කරනවා. මෙහිදී සුවිශේෂ කාර්යයක් නොකළත්, මේ නිෂ්පාදන සියල්ල සත්ත්‍ව නිෂ්පාදනවලින් තොරව සැකසීමට ඔවුන් කටයුතු කරනවා. මේ නිසා මේ නිෂ්පාදන හලාල් ගණයට සැකසෙනවා. ඒ හැරුණත්, මේ රසායනික ද්‍රව්‍ය සැකසෙන්නේ මානව පරිභෝජනයට නිසාම ඔවුන් ඉතා සුපිරිසිදුව ඒවා සකසනවා.

මේ ආකාරයට BASF ආයතනය බොහොමයක් අමුද්‍රව්‍ය සකසන්නේ හලාල් නිෂ්පාදන සඳහා අනුකූල වන ආකාරයට. මෙය ඔවුනට සුවිශේෂ වෙහෙසක් ගන්නට සිදුවන කාරණයක් නොවන්නේ ඔවුන්ගේ සම්මත තත්ත්‍වයන් හලාල් තත්ත්‍වයනටත් වඩා සුපිරිසිදු ලෙස සැකසෙන නිසා. නමුත් කාරණය වන්නේ ඔවුන් කිසිම විටෙක සිය නිෂ්පාදනවල දත්ත කිසිවෙකුට නොපෙන්වීමයි. ඒ නිෂ්පාදන රහස් තරඟකාරී ආයතනවලට එළිවන නිසා. මේ නිසා අදාල නිෂ්පාදන හලාල් සහතිකය සහතික කිරීමේදී සිදුවන්නේ විශ්වාසය පදනම් කරගෙන පෙන්විය හැකි දත්ත අදාල සහතිකය ලබාදෙන මුස්ලිම් සංවිධානයට පෙන්වා එය ලබා ගැනීමයි. නමුත්, මේ හලාල් සහතිකය අන්තර්ගතකර වෙළඳපොලට නිකුත් කරන ඒ සංයෝගවලට වැඩි මිලක් නියම කිරීමට ඒ ආයතනය කටයුතු කර තිබෙනවා. මේ නිසා ඇත්තෙන්ම BASF ආයතනය වැඩි ලාභයක් ලබනවා. හලාල් සම්බන්ධව නිෂ්පාදන ආර්ථිකය තුළින් ඒ ආයතන වාසි ලබා ගන්නේ එහෙමයි.

ශ්‍රී ලංකාවේ තත්ත්‍වය:

ශ්‍රී ලාංකිකයින් උපතින්ම බොහෝ ආවේගශීලීයි. කිසිවෙකු යමක් කිවූ පමණින්ම උසි ගැන්වෙන අපි – බොහෝ දුරට නඩු අහන්නෙ වෙඩි තියා අවසන් කර. මේ නිසා ප්‍රශ්න වැඩියි. මෑතකදී ඇති වූ අර්බුධකාරී තත්ත්‍වය වූයේ බොහෝ නිෂ්පාදන හලාල් සහතිකය ලබා ගැනීම නිසා නොසන්සුන් වූ බෞද්ධ සංවිධාන මගින් පැවැත්වූ මාධ්‍ය සංදර්ශන. හැම දේකටම සිදු කරනවා සේ මේ කාරණයේදීත් රජය රඟපෑවේ පසුගාමී චරිතයක්. මේ නිසා නියපොත්තෙන් කඩන්න තිබූ දේ පොරවෙන්වත් කඩා ඉවත් කරන්න බැරි ලෙස අවුල් වී තිබෙනවා.

පළමු ප්‍රශ්නය පැමිණියේ හලාල් සහතිකය ලබා ගැනීමට සමාගම් වලට කිසියම් මුදලක් උලමා සංවිධානයට ගෙවන්නට සිදු වීම සහ ඒ මුදල්වලට සිදුවන්නේ කුමක්ද යන පාරදෘශ්‍යභාවය නොමැති වීම. මේ ගැන විවිධාකාර මති මතාන්තර මාධ්‍ය ඔස්සේ මෙන්ම ෆේස් බුක් වැනි සමාජශාලා වෙබ් අඩවි ඔස්සේ සංසරණය වන්නට වීම නිසා අදාල කතාන්දරයෙන් බාගයක් දැනගන්නා පුද්ගලයින් සත්‍යයත් අසත්‍යයත් දෙකම විකෘති කිරීමකට ලක් කළා. ලංකාවේ ප්‍රධානම දුර්වලතාවය වන්නේ අදාල පුද්ගලයින් කිසිම කාරණයක් කෙරෙහි නිසි දැනුවත්වීමක් නොමැතිකම. ඔවුන් යමක් දන්නේ බාගයයි. ඉතිරි බාගය තමන් දන්නවායැයි සිතන කාරණාවලින් පුරවාගෙන කතාන්දරය නිර්මාණය කරනවා. බොදුබලසේනාවට මෙන්ම මුස්ලිම් සංවිධානවලටද මේ චෝදනාව එකසේ අදාලයි.

මේ හලාල්කරණය නිසි ලෙස කළා නම් උලමා සංවිධානය කළ යුතුව තිබුණේ අදාල අංශ නිසි ලෙස දැනුවත් කරවා, ආණ්ඩුවේද අවසරය සහ සහයෝගය ඇතිව එය සිදු කිරීමයි. එසේම මුලින්ම මේ පිළිබඳව නිසි දැනුවත් කිරීමක් සිදුකළා නම් මෙවන් අර්බුධයක් ඇතිවන්නේ නැහැ. බොදුබලසේනාව කළ යුතුව තිබුණේ අදාල අංශ සමඟ නිසි සාකච්ඡාවක් පවත්වා, අදාල ආයතන සමඟ කතාබහෙන් අනතුරුව  ඒ ඒ නිෂ්පාදන හලාල් කරණය මෙන්ම හලාල් නොවන සේ සැකසිය හැකිද යන්නත්, ඒ ඒ නිෂ්පාදනවල හලාල්කරණය නිසා වැඩි වූ මිල හලාල් නිෂ්පාදනවලට පමණක් ඇතුලත්වන සේ වෙනස් කිරීම ආදී සාමකාමී ක්‍රියාමාර්ග විනා කැතිපොලු රැගෙන සටනට යාම නෙවෙයි. එයටම හරියන්න ෆේස්බුක් බෞද්ධයින් ද සිටින නිසා මේ තත්ත්‍වය දෙගුණ තෙගුණ වෙනවා. 

හලාල් කරණය නැවැත්විය හැකිද ?

හලාල්කරණය නැවැත්විය නොහැකියි. ලෝකයේ නිෂ්පාදන ආර්ථිකය එකම ජාලයකින් ආවරණය වෙලා තිබෙන්නෙ. මේ නිසා ලංකාවට පමණක් හලාල්කරණයෙන් ඈත් වෙන්නට බැහැ. ලෝකයේ ප්‍රධාන සමාගම් සහ ඉතාම බලවත් ආර්ථිකයන් හලාල්කරණය ට සමගාමීව සිය නිෂ්පාදනයන් සහ වෙළඳාම සකසාගෙන ඇති කාළයේ අපට කවදාවත් තනිව මේ ගමන යන්න අපහසුයි. එපමණක් නොවෙයි, අපේ ආර්ථිකය 80% කට වඩා සැකසී ඇත්තේ මුස්ලිම් රටවල ආර්ථික රටාවට සමගාමීව – අපේ තරුණ පරම්පරාව රැකියාවල  යෙදිලා සැලකිය යුතු විදේශ විනිමයක් එවන්නෙ මුස්ලිම් රටවලින්. අපේ රටට සැළකියයුතු ආධාර ප්‍රමාණයක් ලැබී ඇත්තේ මුස්ලිම් රටවලින්. (මේවා රජයක් වශයෙන් වගකීම භාරගතයුතු වුවත් – ඔවුනට කරන්න දෙයකුත් නැහැ ඔවුන් හිඟාකෑමෙන් සංවර්ධන ඉලක්කයන් සපුරා ගන්න පුරුදු වී ඇති නිසා) මේ නිසා අපට හලාල්කරණයෙන් අපේ වෙළඳපොල මුදවාගන්න බැහැ. එසේ මුදවාගන්න හැකිනම් විරෝධතා දක්වන අය ඒ සඳහා විකල්ප ඉදිරිපත් කල යුතුයි. බොහෝ විට අප කරන්නේ විවේචන ඉදිරිපත් කරනවා විනා විසඳුම් ලබා දෙන්නේ නැහැ.

කළ යුත්තේ හලාල්කරණය නිසි ලෙස අධීක්‍ෂණය කිරීමයි. එක්කෝ හලාල් භාණ්ඩවලට වෙනම වෙළඳපොලක් නිර්මාණය විය යුතුයි.  නැතහොත් මේ හලාල්කරණය නිසිලෙස ප්‍රමිතිකරණය විය යුතුයි. නමුත් හලාල් නිෂ්පාදනවලට සහතික ලබාදීම නීතිගතවිය යුතුද යන්න පිළිබඳ මට පැහැදිලි අදහසක් නැහැ. ආහාරවල ප්‍රමිති සහතික වන්නේ ISO, HACCP (H azard A nalysis and C ritical C ontrol P oint) ජානමය වෙනස්කම් කරනලද ආහාර (Genetically modified foods), FDA,  සහ වෙනත්   ප්‍රමිතිකරණයන්. හලාල් සහ කෝෂර් යනු ජාත්‍යන්තරව පිළිගත් විද්‍යානුකූල ප්‍රමිතිකරණයන් නොවෙයි – ඒවා මුස්ලිම් සහ යුදෙව් ආගමික සම්මත පමණයි. එසේ වුවත් දැන් දැන් ඒවා නිෂ්පාදකයන් විසින් සඳහන් කරන්නේ තමන්ගේ වෙළඳපල ප්‍රසාරණය කරගැනීම වෙනුවෙන්.

හලාල්කරණය කරලියට පැමිණියේ මෑතකදී… වසර දෙක තුනක කාළයක් තුළ, මීට පෙර ආහාර නිෂ්පාදන ලේබල්වල අඩංගුව තිබුණේ මෙහි සත්ත්‍ව තෙල් අඩංගුව නැත යන නිර්ණායකයයි. මෙය ඇත්තෙන්ම හලාල්කරණයේ මූලික සිද්ධාන්තයයි. මේ නිසාම සමහරවිට උලමාවරුන් හෝ වෙනයම් කෙනෙකු මෙම කාරණයෙන් ප්‍රයෝජනයක් ගැනීමට සිතා හලාල්කරණය ඉදිරිපත් කළා වන්න පුළුවනි. (මේ මා සිතන ආකාරය- වැරදි වන්නට පුළුවන්) හලාල්කරණය පැමිණීමට පෙර ඔවුන් කෑවේ මොනවද ? මෙය බොහෝ දෙනෙකුට නැඟෙන ප්‍රධාන ප්‍රශ්නයක්. මටත් නැඟෙන ප්‍රශ්නයක්… නමුත් ප්‍රවේශමෙන් සළකා බැලුවහොත් එකළ බොහෝ දේ පදනම් වූයේ විශ්වාසය මත. මේ නිසා කිසියම් භාණ්ඩයක සත්ත්‍ව තෙල් අඩංගුව නැත යන්න මුස්ලිමුන් විශ්වාස කරන්නට ඇති. එසේම ඔවුන්ට දැන් පවතිනවාක් මෙන් සංවිධානය වූ හලාල් ප්‍රමිතිකරණයක් නොතිබෙන්නටත් ඇති. මීට වසර විස්සකට පෙර මේ කිසිම හලාල්කරණයක් මස්වලට හැර වෙනත් දේකට තිබුණා කියා මතකයක් මටත් නැහැ. මගේ මුස්ලිම් මිතුරන් පවා එකට කෑම කනකොට සැලකිළිමත් වූයේ ඌරුමස් අඩංගුද යන්න පමණයි.

අප කළ යුත්තේ කුමක්ද ?

විවිධාකාර න්‍යායපත්‍ර ඇති පුද්ගලයින් විවිධාකාර ලෙස මෙම ප්‍රශ්නය අර්ථ දක්වනවා. නමුත් මේ සියල්ලම ජනතාව රැවටීමක්. අපි හැමෝටම සාධාරණත්‍වයක් තිබිය යුතුයි. මුස්ලිම් ජාතිකයින්ට හලාල් සහිත ආහාර මෙන්ම මුස්ලිම් නොවන අයට හලාල් රහිත ආහාර ලබා ගැනීමේ පහසුකම තිබිය යුතුයි. නමුත් ව්‍යාපාරිකයින් පවසන්නේ හලාල් සහිත සහ රහිත ලෙස දෙආකාරයකට ආහාර සැකසිය නොහැකි බවයි. ඔවුන්ගේ පැත්තෙන් බැලූවිට එය සත්‍යයක්. නිෂ්පාදන සැකසීමේදි සිදුවන්නේ මහා පරිමාණ ක්‍රියාවලියක්. මේ නිසා දෙආකාරයකට නිෂ්පාදන සැකසීමේදී අමුද්‍රව්‍ය – බලශක්තිය – මිනිස් ශ්‍රමය ආදිය වෙනස් ආකාරයකින් – වෙනස් අවස්ථාවක වැයවෙනවා. එවිට නිෂ්පාදනයට වැයවන වියදම ඉහළ යනවා. එසේම බොහෝ නිෂ්පාදකයින් සිය නිෂ්පාදන ශ්‍රි ලංකාවට පමණක් සීමා කරගෙන නැහැ. ඔවුන් විවිධාකාර වෙළඳපොලවල් වෙත මේවා අපනයනය කරනවා. මේ නිසා මැදපෙරදිග වැනි පෙදෙසකට නිෂ්පාදන අපනයනයේදී හලාල් සහතිකය අනිවාර්ය අංගයක්. මේ නිසා ව්‍යාපාරිකයින් ඒ සඳහා වැඩි අවධානයක් යොමු කර තිබෙනවා.

කළ දුටුකළ වල ඉහ ගැනීම.

මේ අවස්ථාව නැගී එන කුඩා පරිමාණ ව්‍යාපාරිකයින්ට ස්වර්ණමය අවස්ථාවක්. දැනට හලාල් සහතිකය ලබා ඇති ව්‍යාපාර කෙසේවත් හලාල් සහතිකය අතහරින්නෙ නැහැ. එසේම බොහොමයක් මුස්ලිම් නොවන්නන් හලාල් සහිත නිෂ්පාදන මිලදී ගැනීමට මැලිකමක් දක්වනවා. ඒ අතින් බොදු බලසේනාවේ අරමුණ සාර්ථක වෙන්න පුළුවනි. මේ අවස්ථාව ප්‍රයෝජනයට අරගෙන කුඩා පරිමාණ ව්‍යාපාරිකයින්ට සිය ව්‍යාපාර වර්ධනය කර ගැනීමට හැකියි. අවශ්‍ය නම්. මක් නිසාද යත් අවසානයේ හැමෝගෙම සාර්ථකත්‍වය මනින්නෙ තමන් උපයන ලාභය මත.

මගේ මතය.

ලෝකය සංකීර්ණයි. අප රටක් වශයෙන් තනිව ජීවත් වීමට අපහසුයි. ජාතියක් ලෙසින් වුවත් සිංහලයින් – ද්‍රවිඩයින් හෝ මුස්ලිමුන් ලෙසින් තනිව ජීවත් විය නොහැකියි. මේ නිසයි ලොව පුරා සහජීවනය අවශ්‍ය. විද්‍යානුකූලව වුනත් ලෝකය පුරා එක ජාතියක පමණක් ජීවත් විය නොහැකියි. විවිධත්‍වයක් අත්‍යාවශ්‍යයි. නැතිනම් පැවැත්මක් නැහැ. ජනගහන වර්ධනය මගින් හෝ වෙනයම් ආකාරයකින් ලෝකයේ බලය සියතට ගත හැකි යැයි කියා මුස්ලිමුන් සිතනවා නම් එය විශාල වැරැද්දක්, මක් නිසාද යත් ලෝකයේ කිසිම ජනවර්ගයකට තනිව ජීවත් විය නොහැකි නිසා. විවධත්‍වය අවශ්‍ය පැවැත්මට පමණක් නොවෙයි.  මානව සංහතියේ ප්‍රගමනයට වෙනස් ජාන මිශ්‍රවීම අත්‍යවශ්‍යයි.

මේ නිසා මගේ කැමැත්ත නම් සියල්ලන් සහජීවනයෙන් ජීවත් වනු දැකීම. තම තමන්ට අවශ්‍ය පරිදි හලාල් හෝ හලාල් නොවන ආහාර නිෂ්පාදන පාවිච්චි කිරීමේ අයිතිය තිබිය යුතුයි. ව්‍යාපාරිකයින් සිය ව්‍යාපාර හලාල් කළත්, කාළයාගේ ඇවෑමෙන් සුදුසු පියවරන් ගෙන වඩාත්ම ගැලපෙන ආකාරයට හැඩගැසේවි.

මේ ඇස් හලාල්...

මේ ඇස් හලාල්…

මේ ලිපිය සැකසීමට මූලිකව හේතු වූයේ ගිය සතිය පුරාවට BASF ආයතනය මගින් පැවැත්වූ වැඩමුළුවක් අවසානයේ මට හමු වූ ව්‍යාපාරික සහ නිෂ්පාදන කළමණාකාරවරුන් සමඟ පැවැත්වූ මහා පරිමාණ නිෂ්පාදන සහ නව ලෝකයේ නිෂ්පාදන ප්‍රවණතා ආශ්‍රිත සාකච්ඡාවකින් මතු වූ කරුණු ඔබටත් දැනගන්නට සැලැස්විය යුතු යැයි මට හැඟුන නිසා. පසුගිය වතාවක අමානුෂිකත්‍ව ලේබලය ගහපු අය සමහරවිට මේ ලිපිය අවසානයේ මම මුස්ලිමුන්ට කඩේ යනවා යැයි ලේබලයකුත් අලවන්න බැරිකමකුත් නෑ… ඒකත් ඒ අයගෙ අයිතියක් !

මම කියන්නෙ මට හිතෙන දේ !

෴෴෴෴෴෴෴෴෴෴෴෴෴෴෴෴෴෴෴෴෴෴

මේ ලිපිය තම තමන්ගේ පෞද්ගලික අවශ්‍යතා අනුව යොදා නොගන්නැයි කාරුණික ඉල්ලීමක් කරනවා.

Advertisements

About Alchemiya

ආචාර්ය පියල් ආරියනන්ද, ජීව අකාබනික රසායන විද්‍යාව අංශයෙන් ඇමරිකාවේ ඩෙලවෙයා විශ්ව විද්‍යාලයෙන් ආචාර්ය උපාධිය ලබා වසර කිහිපයක් එහිම විද්‍යා පර්යේෂකයෙකු ලෙස සේවය කර, ජර්මනියේ BASF රසායන ආයතනයෙහි රසායනික උත්ප්‍රේරක සම්බන්ධයෙන් පර්යේෂණ කළ විද්‍යාඥයෙකි. හරිතාගාර ආචරණයට ප්‍රධාන දායකත්‍වයක් දක්වන කාබන් ඩයොක්සයිඩ් වායුව රසායනික සංයෝගවලට පරිවර්තනය කළහැකි රසායනික පර්යේෂණවලට ඉතා ඉහළ දායකත්‍වයක් දී ඇත. ලංකාවට පැමිණි පසු මයිඩාස් සේෆ්ටි ආයතනයෙහි පර්යේෂණ ප්‍රධානී වශයෙන් ද කටයුතු කර, දැනට MAS Holdings අනුබද්ධ Bodyline ආයතනයෙහි නවෝත්පාදන ප්‍රධානී වශයෙන් කටයුතු කරයි. රැකියාවට අමතරව ඔහු විද්‍යාත්මක Blog අඩවියක් ද, රිවිර -රිවිනෙත කලාපයට සතිපතා ලිපි පළකරන විද්‍යා ලේඛකයෙකි. මෙයට අමතරව ඔහු නවෝත්පාදන සහ නිර්මාණශීලීත්‍වය පිළිබඳව දේශන සහ වැඩමුළු ද පවත්වයි. Dr. Piyal Ariyananda was schooled at Mahinda College, Galle and obtained his first degree at the Institute of Chemistry, Ceylon. He excelled the studies being the Batch top in the First year and overall Batch second in the final year exams. After two years of work as a chemist at the Unilever Sri Lanka, Dr. Piyal received a scholarship to pursue his Masters Degree at the university of Louisiana, Monroe where he became the most outstanding Graduate student of the Department of Chemistry in 2003 at his graduation. Dr. Piyal did his Ph.D at University of Delaware, with another scholarship to study his Ph.D in Chemistry, where he studied the conversion of Carbon Dioxide to useful chemical compounds. After graduation with a Ph.D he continued the research at the same university in Energy generation through Carbon Dioxide conversion for two years. Dr. Piyal was offered a scientist position at the Catalytic Research Lab at BASF – Germany and prior to return to Sri Lanka, He worked on converting Carbon Dioxide to Superabsorbant materials, which are used in Diapers if simply explained. Prior to the current assignment, Dr. Piyal headed the R&D team at Midas Safety, a safety and sports glove manufacturing organization located in the Export processing zones in Sri Lanka. His team introduced several new products and technologies into the glove industry, which includes a recent international patent on a new method of making a special type of a coating. His team won the most outstanding innovation team Gold award, in the 2015 National Chamber of Exporters’ award Ceremony. Dr. Piyal is currently heading the Bodyline Innovation team in General Manager capacity. Bodyline is one of the largest business units in MAS holdings with over 15000 employees. He uses the latest innovation methods in the world to innovate the products, and new business models to cater the latest trends in apparel market. Apart from his professional work, He is a science communicator and he writes a special article in Sunday Rivira – Rivinetha, and a science fiction to the same paper. He is also a trainer of Science teachers working with the department of education, and the secretary of the Royal Society of Chemistry, Sri Lanka Section.

Posted on මාර්තු 1, 2013, in ඇල්කෙමියාගේ දිනපොත. Bookmark the permalink. ප්‍රතිචාර 14.

  1. හලාල් සම්භන්ධයෙන් දුර්මත, ව්‍යාකූල මත සහ අනවශ්‍ය ලෙස ඔප දැමු මත තොරතෝංචියක් නැතුව ඇසෙන බ්ලොග්ලන්තයෙන් මෙවැනි මධ්‍යස්ත මතයක් දැකීමට ලැබීම ගැන සතුටු වෙමි.

    කැමතියි

  2. ඇල්කෙමි තාම ඉන්නේ ජර්මනියේ නේද ? දැන් ඔයා ඔහේ සුපිරි වෙලඳ සැලකට ගිහින් . කුකුල් මස් කිලෝවක් , කිරි බෝතලයක් , යෝගට් කප් එකක් , බිසක්ට් වර්ග දෙකක් ගත්තොත් ඔතනින් කීයක් හලාල් ලාංඡනය ගහපුවද ?

    කැමතියි

    • ජර්මනියේ බොහොමයක් භාණ්ඩ හලාල් නැති වුනත් සමහර දේවල් දැන් දැන් හලාල් වීගෙන එනවා.
      නමුත් මෑතකදි ජරමන් බිෂොප් වරයෙක් අපූරු කතාවක් කියලා තිබුණා.
      උඹලා අපට උඹලාගෙ රටවල උඹලාගෙ නීති වලට හැසිරෙන්න කියනවා වගේම උඹලා අපේ රටවලත් අපේ නීති වලට හැසිරෙන්න ඕන කියලා. ඒ මුස්ලිම් පල්ලි හදන්න ජර්මනියේ අවසර ඉල්ලපු වෙලාවක.
      අපේ නායකයොන්ට මේ ටික කියාගන්න කොන්දක් නෑ.. ඒකයි ඔක්කොටම මුල.

      කැමතියි

  3. විලියොං කුමරු ලංඩන්

    Halal Sri Lanka මේකෙන් කියන්නෙ ශ්‍රී ලංකාව හලාල් කරන්න වගේ. ප්‍රායෝගිකව ගත්තොත් මේක අපිව එලවලා මුස්ලිම් කරමු කියන අරුත තියනවා වගේ.

    මේක නැති කරන්න පුලුවන් Halal Britain, Halal America මේවාගෙ මහා බ්‍රිතාන්‍ය හලාල් කරමු, ඇමරිකාව හාලල් කරමු, ඔය වගේ සංකල්පයකින් වෙළදපොල පටස් ගාලා අනිත් පැත්ත යන්න පුලුවන්නේ. අපි පටන් ගමු. * අපිට ඉස්සර ඕන් බ්‍රිතාන්‍ය එලියට බැහැල, ගූගල් මහත්තයාගෙන් අහලා දැනගත්තනම්,

    දැනටමත් බ්‍රිතාන්‍ය වගේ රටවල් හලාල් වලට විරුද්ධව අපිට ඉස්සෙල සංධාන ගත වෙලා ඉවරයි. ඒ නම් එයාලගේ දේශපාලන පක්ෂ. තව ටික කාලෙකින් මේක බිද වැටෙන වෙළදපොලක් වේවි. තෙල් සල්ලිත් මදි වේවි මේ තියන බාදක හමුවේ බිලියන 700 වෙළද පොල රැකන්න.

    කඩා වැටෙන වෙළදපොලක කඩා වැටීමට අපේ ව්‍යාපාරිකයන්ටත් ආරාධනා.

    කැමතියි

  4. ඇල්කේමියා බොහොම ස්තූතියි ප්‍රමාදවී හෝ සංවාදයට එකතුවීම පිළිබඳව. මම නම් කිසිම ආගමක් අදහන්නේ නෑ. මිනිසාගේ පුද්ගලික නිදහස උපරිමයෙන් අදහන කෙනෙක්. බොදු බල සේනාවේ සියළුම ක්‍රියාකාරකම් කිසිසේත්ම අනුමත කරන්නේ නෑ. මන්ද අවිහිංසාවාදි දර්ශණයක් වන බෞද්ධ දර්ශණයට ඔවුන් එකතු කරන්නේ විශාල කැලලක්. වෙන කිසි දෙයක් අවශ්‍ය නෑ, බංගලාදේශ තානාපති කාර්යාලයට එල්ල කල ප්‍රහාරයම් ඇති, එය හෙලා දකින්න. ඇත්තටම මේ ප්‍රශ්ණය හලාල්කරනය ගැනද.? මොකක්ද මේ හැම එකාටම හලාල් එකක් ගැන අතිවුන ලෙඩේ. ඇයි ලංකික ව්‍යාපාරිකයා හලාල් ගහගන්න දඟලන්නේ. අන්න ඒ කරුණුයි අප සොයා බැලිය යුත්තේ.

    දැන් ඔබ සඳහන් කරණවා ජාත්‍යන්තර වෙළඳ පොලක් ගැන. ඇල් ඔබ ජාත්‍යන්තර වෙළඳපොලේ අපේ නිශ්පාදන කීයක් නම් දැක තිබෙනවාද. මා නම් දැක ඇත්තේ තේ සහ ඇඟළුම් පමණයි. ඒවාවලත් පියෝ සිලෝන් ටී කියලා ගහලා තිබුනාට. පැකින් කරලා තියෙන්නේ ජාත්‍යන්තර සමාගම්. ඇඟළුම් පවා මේඩ් ඉන් ශ්‍රී ලංකා ගහලා තිබුනාට, වෙළඳ නමයන් ජාත්‍යන්තර සමාගම් වල වෙළඳ නාමයන්. අප අරාබියට සම්බන්ධවී තිබෙන්නේ වහල් වෙළඳාම නිසා. ඒ ගැන මගේ ඇත්තේ මධ්‍යස්ථ මතයක්.

    හේතුව, අරාබියේ රැකියාවන් සඳහා යන ලංකිකයන්ට අප රට තුල කිසිම අවස්ථාවක් නොමැතිවීම හා එය උප් සංස්කෘතියක් බවට පත්ව තිබීම. අපේ රට ජීවත් වන්නේ මේ අහිංසකයින් උපයන් සුළු මුදලින්. එහෙත් ඔවුන් ගැන සොයන්න කිසිම කෙනෙක් නෑ. මුස්ලිම් ළෝකය අප බිලිබාගන්න යන හේතුව මෙයයි. කොටින්ම අපට රිසානා බෙරාගන්න පුළුවන් උනාද.. එහෙත් ඊට දින කීපයකට පසු, ඉන්දුනීසියානු කාන්තාවක් මරණයෙන් නිදහස් කරණවා. ඒකෙන් දෙන පනිවිඩය කුමක්ද. තොපි ළෝකයාට පාට් දැම්මාට අපිට පාට් දාන්න එන්න එපා. තොපිට අප්ට පාට් දාන්නත් බෑ කියන් දේ.

    මොන් උලමාද රිසානාව බේරා ගන්න ඉදිරිපත් උනේ. මොන පල්ලියද ඒකට විරෝධතා ඉදිරිපත් කලේ. මොන මුස්ලිම් ජාතිකයාද එය හෙලා දැක්කේ. එතකොට මේ හලාල් එක කෙලවර වන්නේ කොහෙන්ද, ෂරියා සහ ජිහාඩ් වලින් නොවේද..? ඇල් මේ යටින් දෙවෙන දිගුකාලීන සැලස්මක් මුස්ලිම් පල්ලියට තියෙනවා. ඒක මම මුස්ලිම් බහුතරයක් වෙසන ප්‍රදේශයක් ජීවත් වන බැවින්, අත්දැකීමෙන් දකිනවා මෙන්ම විඳිනවා. ඔබ ලංකාවට පැමිණි විටක කොහේවත් යන්න අවශ්‍ය නෑ. සිකුරාදා හා සෙනසුරාදා රාත්‍රියට ගෝල්ෆේස් එකට යන්න.

    ඔබට සිතෙයි මේ අරාබියද කියා. මේ ව්‍යාපාරකයින්ගෙන් ලබා ගන්නා මුදලට වඩා විශාල මුදලක් ඔවුන් ව්‍යාපාරකයින්ට ලබා දෙනවා. පල්ලිය ඒ සඳහා අත දිග හැර මුදල් විසි කරණවා. අන්වර් මනතුංග, ජාතික පුවත් පත් පවා සල්ලිවලට ගන්න බවට මට අභියෝග කරන්නේ ඒ නිසයි. එයින්ම පේනවා ඔවුන් කරන්නේ කුමක්ද කියා. ඔවුන් කරන්න හදන්නේ අපේ මනුස්සකමෙන් ප්‍රයෝජන ගෙන තලෙයිබාන්කරණය මෙහි ස්ථාපනය කිරීමටයි. දැනටත් ඔවුන්ගේ ප්‍රයත්නය සාර්ථකයි. දුප්පත් මුස්ලිම් ජනතාව තලෙයිබාන්කරණයට අසුවී අවසන්.

    එබැවින් මෙම කාරණයේදි මධ්‍යස්තව බලනවාට වඩා ගැඹුරින් බැලීමයි කළ යුත්තේ. රිහානාගේ පොස්ටුවක් තුලදි බුවා විසින් අල්ලාට කරන ලද අපහාසයක් වෙනුවෙන් මා ඉතා නිර්ධය ලෙස විවේචනය කලත්. අද ඉතාමත් විනයානූකූලව, අන්වර් මනතුංගගේ ළිපිවලට උත්තර බැඳීම අප ඉතා අගය කළ යුතුම කාරණයක්. බුකියේ ඇති ජනප්‍රිය මෝඩ බෞද්ධ හා ඉස්ලාම් තලෙයිබාන් අදහස් වලට වඩා. මේ ලෙස මැදිහත් සිතින්, හලාල් ප්‍රශ්ණයේ කෙලවර දෙස බැලීමයි අප කල යුතුව ඇත්තේ. හලාල් ලංකාවට මුස්ලිම් නොවනා කිසිම පුද්ගලයකුට අවශ්‍ය නැත.

    මේක විහිළුවකට ගන්න එපා. මම අපේ මුස්ලිම් යාළුවන්ගෙන් අහන ප්‍රශ්ණයක් තමයි. මේ ළෝකේ මැව්වේ කව්ද කියන එක. එතකොට එයාලා කියන්නේ අල්ලා කියලා. මෙහි ඇති ජීවීන් සියල්ලම මවලා තියෙන්නෙත් අල්ලා. එතකොට ඌරා කියන සතා මවලා තියෙන්නේ අල්ලටත් වඩා බලගතු දෙවියෙක්ද..? ඒ ප්‍රශ්ණයට එයාලාට උත්තරයක් නෑ. යුදෙව්වනුත් ඌරු මස් කන්නේ නෑ. නමුත් ඒ රටේ කන්න කැමති මිනිස්සුන්ට කන්න, ඌරු මස් තියෙනවා. එයයි මානුෂික නිදහස කියන්නේ.

    කැමතියි

    • මම මේ දෙයියන්ගෙ ප්‍රශ්නය පෙර ලිපියක සාකච්ඡා කළා… මටත් පේන දෙයක් තමයි වෙනදා නොතිබූ දේ (උදාහරණයක් වශයෙන් කළු හිජාබ් වලින් සැරසුන මුස්ලිම් කාන්තාවන්) ලංකාවේ දකින්නට ලැබෙනවා වැඩියි. මේ වතාවේ ලංකාවට මා ගිය වෙලේ එය හොඳින්ම අත්දුටුවා.
      නමුත් අපි මේ හලාල් ප්‍රශ්නය මේ විදියට විසඳන්න පුළුවන්ද ?

      කැමතියි

  5. ඇල් බොහොම වටිනවා. කදිම ලිපියක්, අපි ව්‍යාපාර කරණ කොට බලන්න ඕනෙ ලෝක ව්‍යාප්තව ඒක කරණ විදිය මිසක් ලංකාවේ මේ ඉන්න කුඩා ජනගහනයට විකුනන එක නෙමෙයි. ඔබ මේ ලිපියෙන් කළ සේවය ඉතා විශාලයි.

    මගේ මතයත් හලාල් කියන්නෙ බිල්ලෙක් නෙමෙයි. අපි හලාල් ගැනීම අපේ ව්‍යාපාරවල උන්නතියට හේතුවනවා.

    නමුත් එයට අකමැති අයට එය ප්‍රතික්ෂේප කිරීමේ නිදහසද තිබිය යුතුයි. එවිටයි වඩා ප්‍රජාතන්ත්‍රවාදී.

    කැමතියි

  6. මා හලාල් යන්න දකින්නේ මෙසේයි.
    1) භාවිතයට සුදුසුයි කියා දක්වන සත්‍ය ප්‍රමිතියක් නොවන බැවින්
    2) ජන කොට්ඨාසයක පාරම්පරික සිතුවිලි වලට (දියුණු ක්‍රම නොව) පමණක් සීමා වූවක් බැවින්
    3) අනවශ්‍ය මුදල් යෙදවීමක් බැවින්
    4) අදාළ අනුමැතිය සහිත කිසියම් ආහාරයක් විෂ උවහොත් එහි වගකීම ඔවුන් භාර නොගන්නා බැවින්.
    5) පටු අරමුණඅ සහගත බැවින්
    6) රජයේ වගකීමක් නැති බැවින්
    7) වෙනත් ආයතනයකට මුදල් ගැනීමට රජය ඉඩ හැර ඇති බැවින්. (මන්ද, මේ මුදල අවසානයේ ගෙවන්නේ රටේ ජනතාව)
    8) සමහර නිෂ්පාදකයන්ට සහ පාරිභෝගිකයන්ට අසාධාරණයක් වන බැවින්
    9) වින්ඥානවාදයේ උල්පතක් වන බැවින්
    10) හලාල් අවශ්‍යනම් එසේ අවශ්‍ය කියන අය එහි පිරිවැය නොදරන බැවින්
    11) පැරැණි වට්ටෝරුවකට හිරවීම නිසා නව නිෂ්පාදන බිහි නොවීමට තුඩු දීම
    12) ….

    (වැරැදිවට වටහා ගන්න එපා. මේ ජාතිවාදයට ජැක් එකක් නොව. මා ජාතිවාදයට අකැමැතිය. අපි ශ්‍රී ලාංකිකයෝ පමණක් වෙමු. එහි පවතින ආගම්, ජාතීන් වල ජනතාව සාමූහිකව ජීවත් විය යුතුය)

    කැමතියි

  7. නිෂ්පාදන සැකසීමේදි සිදුවන්නේ මහා පරිමාණ ක්‍රියාවලියක්. මේ නිසා දෙආකාරයකට නිෂ්පාදන සැකසීමේදී අමුද්‍රව්‍ය – බලශක්තිය – මිනිස් ශ්‍රමය ආදිය වෙනස් ආකාරයකින් – වෙනස් අවස්ථාවක වැයවෙනවා. එවිට නිෂ්පාදනයට වැයවන වියදම ඉහළ යනවා. එසේම බොහෝ නිෂ්පාදකයින් සිය නිෂ්පාදන ශ්‍රි ලංකාවට පමණක් සීමා කරගෙන නැහැ. ඔවුන් විවිධාකාර වෙළඳපොලවල් වෙත මේවා අපනයනය කරනවා. මේ නිසා මැදපෙරදිග වැනි පෙදෙසකට නිෂ්පාදන අපනයනයේදී හලාල් සහතිකය අනිවාර්ය අංගයක්.

    mekedi me banda deke wena wenama milak ekathu karoth oya prashne nathi wenawa, Halal ona aya wadi milata halal gani..

    කැමතියි

ප්‍රතිචාරයක් ලබාදෙන්න

Fill in your details below or click an icon to log in:

WordPress.com Logo

ඔබ අදහස් දක්වන්නේ ඔබේ WordPress.com ගිණුම හරහා ය. පිට වන්න / වෙනස් කරන්න )

Twitter picture

ඔබ අදහස් දක්වන්නේ ඔබේ Twitter ගිණුම හරහා ය. පිට වන්න / වෙනස් කරන්න )

Facebook photo

ඔබ අදහස් දක්වන්නේ ඔබේ Facebook ගිණුම හරහා ය. පිට වන්න / වෙනස් කරන්න )

Google+ photo

ඔබ අදහස් දක්වන්නේ ඔබේ Google+ ගිණුම හරහා ය. පිට වන්න / වෙනස් කරන්න )

%d bloggers like this: