පිටස්තරයා – 19

දින දෙකක ඇවෑමෙන් විශ්ව ආපසු යන වෙලාව පැමිණුනි. ගීතිකා යුහුසුළුව විශ්වගේ සියළුම ඕනෑ එපාකම් සොයා බලනු මොලී හොඳින්ම දුටුවාය. කිසියම් ඊර්ෂ්‍යාවක් සිතට දැනුනත් එය නොපෙන්වා සිය අරමුණ කරා යාම පුරුදු පුහුණු කළ ඇය කිසිදු වෙනසක් නොදක්වා සිනාසෙමින් සිටියාය. ලද අවස්ථාවෙන් ප්‍රයෝජන ගන්නට ඇය ද විශ්වගේ කටයුතු වලට නොමසුරුව සහයෝගය දුන්නාය. සුමනසේකර යුවලද ඉතාම උනන්දුවෙන් සිය ඥාති පුත්‍රයා නැවතත් ඔහුගේ නවාතැනට ගෙන යාමට අවශ්‍ය කටයුතු සම්පාදනය කළෝය.

ඉතිං…. තව සති දෙකකින් මේ පැත්තෙ ඇවිත් යන්න වෙයි….

තව සති දෙකක් යනකොට මට නම් ආයෙම මැරතන් එකක් දුවන්න පුළුවන් වෙයි….

ඒ වුනාට සුදු පුතාට මේ ලැබුණ සත්කාර ගෙදර ලැබෙන එකක් නෑ නේද මහත්තයා…. සුමනසේකර මැතිණිය තම සැමියා දෙස බලා විමසුවාය….

එහෙමම කියන්න බෑනෙ.. අපි දෙන්නත් ගෙදරම ඉන්න එකේ…..

ඒත් ඉතිං අපි කවදා හරි ආපහු යන්න ඕනනෙ… අපි ගියාම කවුද සුදු පුතාව බලා ගන්නෙ ?

සිංහලෙන් කෙරෙන මේ සාකච්ඡාව දෙස මොලී බලා සිටියේ කිසිවක් තේරුම් ගත නොහැකි බැල්මකිනි. ඇගේ අපහසුව තේරුම් ගත් ගීතිකා මොලීට කිසිවක් පැහැදිළි කර දුන්නාය.

ඔව්… මටත් නිතර නිතර ඇවිත් බලන්න පුළුවන්… අපේ පර්යේෂණාගාරය තියෙන්නෙත් එතැන ඉඳලා වැඩි දුරකින් නෙවෙයිනෙ….

අවශ්‍ය ලියකියවිලි සහ බෙහෙත්, ආම්පන්න සියල්ල සකසා අවසන සියළුම දෙනා මොලී ගේ රථයට නැඟුනේ විශ්වගේ නවාතැන බලා යාමටය. පුනරුත්ථාපන මධ්‍යස්ථානයෙන් සේවය ලබාලෙන සුව වී නිවෙස් බලා යන රෝගීන් අනන්තව දැක තිබුණත් ගීතිකාට තරමක දුකක් දැනුනේ තම රටේ තම භාෂාව කතා කරන තමන්ට බෙහෙවින් සමීප වූ කෙනෙකු තමාගෙන් ඈත් වී යනවාක් මෙන් හැඟීමක් දැණුන නිසා වන්නට ඇත. ගත වූ කාළය තුළදී ඒ තරමටම ඇය විශ්ව හා කුළුපගව සිටියාය.

::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::

මොලීට අද වැඩ නැද්ද ? විශ්ව මොලීගෙන් ඇසුවේ රථය පණගන්වා මහා මාර්ගයට අවතීර්ණ වෙද්දීම ය.

මම අද නිවාඩුවක් දැම්මා…. මම නීල්ට කිවුවා අද ඔයා නිවසට යන දවස කියලා… නීල් මට අවසර දුන්නා අද ඔයා වෙනුවෙන් කැප කරන්න…. දැන් කොහොමත් අළුත් පර්යේෂණයේ වැඩ කටයුතු පටන් ගන්නකල් මට තරමක් විවේකීයි… ගණනය කිරීම් වුනත් සැලසුම් කළාට පස්සෙ කොම්පියුටරයෙ ඉබේම වැඩ කෙරෙනව නෙ…

ඉතිං කොහොමද පර්යේෂණය ?

ඔයාට දෙන්න කියලා නීල් මට පර්යේෂණ ලිපි ගොඩක් එකතු කරලා දුන්නා…

ඒක හොඳයි මටත් වැඩක් නැති එකේ ඒවා කියවලා හොඳ අදහස් ටිකක් ගන්න පුළුවනි. මම ඔයා ගෙනැත් දුන් ලිපි ටිකත් කියෙව්වා… තව සති දෙකකින් අපට ආයෙම වැඩ පටන් ගන්න පුළුවන් වේවි…

ඒ අතරතුර ඔවුහු විශ්වගේ නවාතැන වෙත ළඟා වී තිබුණි.

විශ්ව සහ පිරිස ගවනර්ස් කෝනර් නිවාස සංකීර්ණයේ හත්වන තට්ටුවට සෝපානයෙන් යනවිට තම නිවස ඉදිරිපිට දැක පුරුදු දෙදෙනෙකු සිටිනු ඔහු දුටුවේය. කවදා හෝ දැක පුරුදු බව දැණුනත් කොහේ දී දැයි විශ්වට නිනවුවක් වුනේ නැහැ. කෙසේ වුවත් මොලී ඔවුන් දෙදෙනා දෙස බලා මඳ සිනාවක් පානු විශ්ව දුටුවා. කෙසේ වුවත් අසල්වැසියෝ එකිනෙකා වෙත සිනහා පෑම සාමාන්‍ය දෙයක් නිසා විශ්ව ඒ පිළිබඳ වැඩි අවධානයක් පෑවේ නැහැ.

නිවසට පැමිණි විශ්වට කිසියම් සැහැල්ලුවක් දැණුනේ එය තමාට හුරුපුරුදු තැනක් වූ නිසා. රෝහල මෙන්ම පුනරුත්ථාපන මධ්‍යස්ථානය ද තමන්ට නුහුරු තැන් වූ නිසා ඒ තැන් කිසිවක තමන්ගේ නිදහස් බව නොතිබූ නිසා…. ඔහු සෙමෙන් ගොස් සෝපාවේ වාඩි වී අවට බලන්න වුනා…..

මොනවද මේ පැල ජාතිය ? මල් පැලද නැතිනම් එළවළු පැල ද ? මොලී විශ්වගෙන් ඇසුවේ විශ්වගේ නවාතැනේ බැල්කනිය දෙස නෙත් යොමාගෙන…

ආ… ඕකට කියන්නෙ Milk Thistle කියලා… මේක බොහොම හොඳ ඖෂධීය ගුණයක් තියෙන පැලෑටියක්. ඇඟේ තියෙන විෂ ඔක්කෝම ඉවත් කරනවා. විශ්ව කිසි ගණනකට නොගෙන පැවසුවා.

මේක මේ රටේ තියෙනවද ? මම නම් කවදාවත් දැකලා නැහැ..

මේක මට යාළුවෙකුගෙන් ලැබුණ ඇට කිහිපයකින් පැළ කරගත් ගස්…. හරි අමාරුයි වගා කරගන්න… මේ රටේ වැවෙන දෙයක් නෙවෙයි…..

ඉතිං… ඔයාට ඇයි විෂ ඉවත් කරගන්න ඕන ඇඟේ ? විශේෂ විෂක් කියලා දෙයක් ඇතුළු වෙන්නෙ නෑ නෙ ?

මොලී…. මොලී…. ඔයා දන්නෙ නැති කොච්චර දේවල් වෙනවද ලෝකෙ…. මම මේක පාවිච්චි කරන්නෙ සෑහෙන කාලෙක ඉඳලා… විශේෂ විෂක් ඇඟට ආවෙ නැතත්, අපේ ඇඟේ ක්‍රියාකාරීත්‍වය හොඳින් සිදු වෙන්න වගේම නීරෝගි බව පවත්වාගෙන යන්නත් මේ වගේ පොඩි පොඩි දේවල් උපකාරී වෙනවා..

ආ පුතා… මම තේ එකක් හදාගෙන ආවා…. සුමනසේකර මහත්මිය ඔවුන් දෙදෙනා අතරට පැමිණීම නිසා සිදු වූ කතා බහට නැවතුම් තිතක් තබන්නට මොලීට සිදු වුනා…

කාලෙකින් හොඳ තේ එකක් බිව්වෙ… ඉස්පිරිතාලෙ හොඳ තේ එකක්වත් නැහැනෙ..

ඒ සංවාදය එසේ සිදු වන අතරේ ඊට නුදුරු නිවසක ඒ සියල්ල පටිගත වන බව එතැන සිටි බොහෝ දෙනෙකු දැන සිටියේ නැහැ.

තේ පානයෙන් අනතුරුව මොලී ආපසු යාමට සූදානම් වුනා….

මට අද හරිම සංතෝෂයි විශ්ව… ඔයා නැවතත් පරණ පුරුදු තත්ත්‍වයට ටික ටික පැමිණීම ගැන මට හරිම සංතෝෂයි… මම බලාගෙන ඉන්නෙ ආයෙම ඔයා කවදද පර්යේෂණාගාරයට එන්නෙ කියලා…

මටත් දැන් නම් හරිම අමාරුයි පර්යේෂණාගාරයට යන්නෙ නැතුව ඉන්න… කොහොම වුනත් මට කරන්න තියෙන ව්‍යායාම ටික කරලා ඉක්මනටම කකුල හොඳ කරගන්න ඕන… සති දෙකකින් ආයෙම ඉස්පිරිතාලෙට ගියාම දැනගන්න පුළුවනි මට වැඩට යන්න පුළුවන්ද කියලා… මේ දෙන්නටත් වැඩි කල් මගේ වැඩ කර කර ඉන්න බැහැනෙ… තව ටික දවසකින් යන්න ඕන නෙ.. ඒ නිසා ඉක්මනින්ම මට හොඳ වෙන්න ඕන..

බය වෙන්න එපා විශ්ව…. ඔයාගෙ අමාරුම කාළය ගෙවුනා… ඔයාට සිහිය එන්නෙ නැතිව තියෙනකොට මම විඳපු දුක දන්නෙ මම විතරයි… මම හිටියෙ හරිම බයකින්…. ඒත්….. ඒත් දැන් නම් මම ඉන්නෙ බොහොම සතුටින්…. මොලී පැවසුවෙ බොහොම ආදරෙන් බව විශ්වටත්, ඒ සංවාදය අසා සිටි සුමනසේකර මහතාටත් නොදැනුනා නෙවෙයි….

එහෙනම්, මම ගිහින් එන්නම්…… සුභ රාත්‍රියක් හැම දෙනාටම….

සුභ රාත්‍රියක් මොලී,… පරිස්සමින් ගිහින් එන්න… කට්ටිය ඔක්කෝම මතක් කළා කියන්න…..

:::::::::::::::::::::::::::::::::::::::::::::::::::::::::::::::::::::::::::::::::

සුදු පුතා, මම මේ පුතාගෙන් අහන්නමයි හිටියෙ…..

මොලී එතැනින් පිට වී සුළු වෙලාවකින් සුමනසේකර මහතා සිය බැරෑරුම් කටහඬ අවදි කළා… විශ්ව කියවන්න ගත් පර්යේෂණ ලිපිය පසෙකින් තබා සිය මාමාට සවන් යොමු කළා…

මොනවා ගැනද ලොකු මාමා ?

මොලී ගැන…. පුතා ගැන ඒ දරුවා සෑහෙන්න කරදර වෙනවා…. මට පේනවා ඒ දරුවගේ ලොකු බලාපොරොත්තුවක් තියෙනවා පුතා ගැන….

මටත් ඒක පේනවා ලොකු මාමා…. නමුත්….

මොකද නමුත් කිවුවෙ ? පුතාගෙත් අකැමැත්තක් මට නම් පේන්න නැහැ…..

සුමනසේකර මහත්මියත් කතාවට හවුල් වුනේ තවත් තේ කෝප්පයක් පානය කරන ගමන්….

නමුත් කිවුවෙ මේකයි… මට තවමත් මොලී ගැන එහෙම හැඟීමක් නැහැ… එයා මට තවමත් යාළුවෙක් විතරයි… නමුත් මටත් දැනෙනවා ඒක යාළුකමට වඩා ලඟ බැඳීමක් කියලා… නමුත් ඊට වඩා දෙයක් නැහැ..

සුදු පුතාට වෙනත් යමක් තියෙනවද කියන්න ? අර දොස්තර නෝනත් සෑහෙන්න යාළු වුනා නේද ? එයා නම් ලංකාවෙ කෙනෙක්…

ඇය සිය සිතැඟි නොවලහා පැවසුවා…

මම දන්නවා ලොකු නැන්දා එන්නෙ ඔතැනට කියලා…. මම එයා එක්ක ගොඩක් යාළු වුනා තමයි… නමුත් එයාගෙ කතාව බොහොම වෙනස් කතාවක්…. මම හිතන්නෙ නැහැ එයා ආයෙම කිසිම බැඳීමක් ඇතිකර ගනී කියලා…..

ඒ මොකද ?

එයා බඳින්න එන්ගේජ් වෙලා හිටපු ඇමරිකානු යුධ හමුදාවෙ හිටපු එයාගෙ පෙම්වතා ඉරාකයෙදි මිය ගිහින්…. එදා ඉඳලා එයා ජීවිතේම කැප කරන්නෙ යුද්ධයෙන් තුවාල වෙලා අසරණ වුන සොල්දාදුවොන්ගෙ ජීවිත නැවත හරිගස්සන්න…. එයාගෙ මුළු ජීවිත කතාවම මට දවසක් කිවුවා… මම කවදාවත් හිතන්නෙ නැහැ එයා එයාගෙ හිත වෙනස් කරගනී කියලා… මම දන්නවා මම කොච්චර තනි වෙලා හිටියද කියලා… එයාටත් එයාගෙ කියලා කවුරුවත් නැහැ…. එයා ඇමරිකන් ජාතිකයෙක් එක්ක විවාහ වෙන්න යනවා කියලා එයාගෙ පවුලෙන් එයාව අයින් කරලා…. මට කිවුවෙ එහෙමයි…. කොහොම වුනත් මට ඒ ගැන බලාපොරොත්තුවකුත් නැහැ… කොටින්ම මට තවත් බැඳීමක් කරගන්න අවශ්‍යතාවයක් නැහැ… ඒක බොහොම කරදර වැඩක්නෙ….

පුතා…. මම දන්නවා ඔයා එන්න හදන්නෙ කොතැනටද කියලා… නමුත්, හැමදාම ඔහොම ඉන්න බැහැනෙ… ඔයාට කියලා යන කලදවසක් තියෙන්න ඕන… ඒ විතරක් නෙවෙයි.. ඔයාගෙ පරම්පරාගත දේපල ඉඩකඩම් වලට යන කලදවසක් තියෙන්නත් ඕන… අපියි කියලා හැමදාම ජීවත් වෙන්නෙත් නැහැ… ඔයාගෙ ජීවිතයට මේ වුන කරදරේ ගැන හිතනකොට අපට හරිම බයයි… කවුද දන්නෙ ඔයාට මොනවගේ දේවල් වේද කියලා ඉස්සරහට… මට තවමත් සැකයි මස්සිනාට වුන දේ ගැන… දැන් මේක… කවුද දන්නෙ මේවා පස්සෙ කවුරුම හරි ඉන්නවද කියලා ….. සුමනසේකර මහතා තමන්ගෙ හිතේ හංගාගෙන හිටි බොහෝ දේ පවසලා හිත සැහැල්ලු කර ගත්තා….

මාමා දන්නවනෙ…. මට ඕවයෙ බැඳීමක් නැහැ කියලා…. මම කියන්නෙ නම් කවදා හරි ඕවා පන්සලකට හරි නැතිබැරි කෙනෙකුට හරි දෙන්න කියලා….. ඕවා එකතු කර ගන්න තරමට ප්‍රශ්න වැඩියි….

මට තේරෙනවා පුතා… ඒ වුනාට ඒවා එහෙමම කරන්න බැහැනෙ.. ඔයා තවමත් හොඳ අනාගතයක් තියෙන දරුවෙක්… දැන් එපා වුනාට පස්සෙ ඕන වෙන වෙලාවල් තියෙනවා… අපි ඉන්න කල් ඕවා අපට බලා කියාගන්න පුළුවන්… ඒ ඔක්කොම නිරවුල්ව පුතාගෙ නමට තියෙන ඉඩම්…. ආගම දහමට නැඹුරු වෙන එක එකදෙයක්.. නමුත් තමන්ට හිමි දේවල  අයිතිය ඒ විදියට තියා ගන්න ඕන… ඒක තන්හාව නෙවෙයි.. තමන්ගෙ අයිතියක්….

ඕන එකක් ලොකු මාමා… තවම මම නම් ඔය ප්‍රශ්න දෙක ගැනම පැහැදිලි තීරණයක් අරගෙන නැහැ….

::::::::::::::::::::::::::::::::::::::::::::::::::::::::::::::::::::::::::::::::::::::::

අන්න එනවා…. ගිහින් අල්ලගන්න….. පරිඝණක තිරයෙන් දෑස් මෑත් නොකරම ජේසන් සිය සගයාට පැවසුවා….

ඉන්න මම කෙටි පණිවුඩයක් යවන්නම්….

කෙටි පණිවුඩ යවලා වැඩක් නෑ… ගිහින් අල්ලගෙනම එනවා…. ඔය විදියට ගියොත් මේ වැඩේ කරගන්න බැරි වෙනවා….

හරි…..

ඇය ඒ ගොඩනැඟිල්ලේ සිට තට්ටු දෙකක් බැස්සා පමණි…. පිටුපසින් දුව ආ එෆ් බී අයි ඒජන්ත මාක් පිස්ට්නර් ඇය අසළටම ගොස් කතා කළාය…..

ජෙනී…. අපට පොඩ්ඩක් කතා කරන්න ඕන……..

මොනවා ගැනද ? ඇගේ හඬේ තිබුණෙ නොරිස්සුමක්….

අර හාදයා ගැන….

මොනවා කතා කරන්නද ? ඔයාලා දකින්න ඇතිනෙ ගෙදර සිද්ධ වෙච්ච දේවල් ඔක්කොම…..

දැක්කා තමයි… දැක්ක නිසා තමයි කතා කරන්න ඕන… අපිට තේරෙන්නෙ නැහැ මොකද්ද මෙතන සිද්ධ වෙන්නෙ කියලා….

මොනවා සිද්ධ වෙන්නද ? දැන් එයා පුනරුත්ථාපනය වෙනවා… තව සති දෙකකින් හොඳටම හොඳ වේවි… තවමත් මොකද්ද වෙන්නෙ කියලා මටවත් තෝරා බේරා ගන්න බැහැ… කලබල වුනොත් අපට ගොඩක් දේවල් නැති වෙයි…. අපි හෙමින් තමයි මේ වගේ ඉලක්කයකට ලං වෙන්න ඕන… දැනට මම හොයා ගත් තොරතුරු වලට අනුව නම් මෙයා අනතුරුදායක පුද්ගලයෙක් නෙවෙයි.. නමුත් මෙයාගෙන් ලැබෙන තොරුතුරු වෙනත් දේ වලට යොදා ගන්න පුළුවන් වේවි… ආරක්‍ෂාව අතින් නම් මෙයා පූස් පැටියෙක් වගේ….

ඇත්තද ? අපි දැක්කා හොර පූසිගෙ මූණෙ තිබුණ බැල්ම….. මොනවා කළත් කමක් නෑ… අපේ මූලික අරමුණ අමතක කරන්න එපා….

ඒ ගැන බය වෙන්න එපා…. මම ජෙනරාල්ටත් කතා කළා ඒ ගැන……

ඔයා කොහොමද ජෙනරාල්ට ලං වුනේ ? කවදද ?

ඒවා වැඩක් නෑ…. මට ජෙනරාල් දවසක් හම්බ වුනා… ඒ වෙලාවෙ තමයි මම කිවුවෙ මගේ අරමුණ වෙනස් වෙලා නැහැ කියලා.. ඔයා දැනගන්න ඕන… ඔයාට වඩා මේ සම්බන්ධයෙන් මට ලොකු පුහුණුවක් තියෙන බව……

හරි හරි…. ඔයාට හොඳට කට්ටිය අන්දන්න පුළුවන් නෙ…. අපි නොදන්නවයෑ ඔයාගෙ හැටි…..

 

නිවසක ජලය ඒකකයක් රුපියල් 50,000 ක් වේද ?

ජීවත් වෙන්න නැතුවම බැරි, උපතේ සිට මරණය දක්වාත්, ඉන් පසුවත් උපයෝගී වෙන, මරණාසන්න කෙනෙකු වුනත් අවසාන මොහොතේ පවා ඉල්ලන, මදි වුනත් – වැඩි වුනත් කරදර දෙන, අපේ ශරීරයෙන් 60% කට වඩා අත්පත් කරගෙන සිටින, ලෝකයේ යුද්ධ පවා ඇති වුන, ඒ වගේම ලෝක ශිෂ්ඨාචාර පැවැත්මට සහ විනාශයට මුල් වුන, ලෝකයේ එකම බලවේගයක් තියෙනවා නම් ඒ ජලයයි.

වතුර නැතිනම් ජලය බොහෝ සංවේදී මාතෘකාවක් වූයේ අද ඊයේ නොවේ. පෘථිවියේ හෝ වෙනයම් තැනක, ජීවය ඇති වූ දින සිටම ජලය – ජීවය හා බැඳී පැවතුනා. මිනිසා මේ ලොව පහළ වූ දා පටන් මිනිස් ශිෂ්ඨාචාර සියල්ලම පාහේ ඇති වූයේ ජලය හෝ ජලමාර්ග සම්බන්ධිතවයි. ඉන්දු නිම්න, නයිල්, යුප්‍රටීස් – ටයිග්‍රීස්, සහ හොවැංහෝ යන ශිෂ්ඨාචාර සියල්ලම ඒ ඒ නදී ආශ්‍රිතව බිහි වීම ම මිනිසාගේ කටයුතුවලට ජලය කෙතරම් සමීප – නැතිවම බැරි දෙයක්දැයි පැවසීමට වෙනත් උදාහරණ අනවශ්‍යයි. ලොව බොහෝ යුද්ධ ඇති වූයේ ද ජලය ආශ්‍රිතවයි. බුදුන් සමයේදී ශාක්‍ය – කෝලිය සටන ඇති වූයේ කාවේරි නදියේ ජලය බෙදා ගැනීමටයි. යටගිය දවස බ්‍රහ්මදත්ත රජු රජකම් කරන සමයේ මියුළු නුවර වටලන බවට අනතුරු හැඟවීම් ඇති වූ අවස්ථාවේ මහෞෂධ පණ්ඩිතයින් කළේ දිගු උණ බට වලට මඩ සහ ජලය පුරවා දිගු දඬු සහිත නෙළුම් මල් වගා කරගෙන, මියුළු නුවර වැටළු හමුදාවනට පෙනෙන්නට එම නෙළුම් මලෙහි මැද කෑමට පවුර උඩ සිටින සොල්දාදුවනට අණ කිරීමයි. ඉන්  අදහස් කළේ මියුළු නුවරට ජලයෙන් අඩුවක් නොමැති බව පෙන්වීමටයි. එය එසේම වී යුද්ධය තාවකාලිකව කල්ගිය බවත් ජාතක කතාවල සඳහන්. මෑතකදී අවසන් වූ ඊලාම් යුද්ධයේ මූලබීජය වූයේද මාවිල් ආරු සොරොව්ව වසා දැමීම බව අප අමතක කළ යුතු නැහැ. මේ සියලෙන්ම අදහස් වන්නේ ජලය ජීවයට කෙතරම් වැදගත්ද, සමීපද යන්නයි..

රසායනිකව ගත් කළ, ජලය මහා අරුම පුදුම ද්‍රවයක්. එය සම්මත තත්ත්‍ව යටතේ සාමාන්‍ය පීඩනය සහ උෂ්ණත්‍වය යටතේ ද්‍රවයක් ලෙසින් පවතිනවා. මේ නිසාම ජීවය පවත්වාගෙන යාමට සහ ඇතිවීමට එය හේතුසාධක වී තිබෙනවා. එය ද්‍රවයක් ලෙසින් පවතින්නේ ජල අණු අතර වූ හයිඩ්‍රජන් බන්ධන හේතුවෙන්. මේ නිසා ජල අණු එකිනෙක බැඳී පවතිනවා. ජලයට ඇති සංසක්ත – ආසක්ත ගුණ නිසා ජල අණු එකිනෙක බැඳී පවතිනවා මෙන්ම ආසන්නම පෘෂ්ඨයටත් බැඳී පවතිනවා. මේ නිසාම ජලය බොහෝ දෑ අල්ලා ගන්නවා. ඒ නිසා ජලය පිරිසිදු කාරකයක් වශයෙන් භාවිතා කළ හැකිවාක් පමණක් නොවෙයි, මේ ගුණය නිසාම ජලය ඉක්මනින්ම අපවිත්‍රවීමත් සිදු වනවා. ජලයේ ඇති සුවිශේෂී ද්‍රාවක ලක්‍ෂණ නිසා බොහෝ දෑ ජලයේ දියවෙනවා. එසේම, ජලය ස්වභාවික අවස්ථාවේ ඝණ, ද්‍රව, වායු යන පදාර්ථයේ අවස්ථා තුනෙහිම දකින්නට ලැබෙන ද්‍රව්‍යයක්. අයිස්/හිම, ජලය, සහ ජල වාෂ්ප ලෙසින් මේ තුන් ආකාරයෙන්ම පරිසරයේ පවතිනවා. පිරිසිදු ජලය රසක්, ගඳ සුවඳක් නොමැති අවර්ණ ද්‍රවයක්. ජලයේ අවර්ණ බව රැඳී පවතින්නේ පිරිසිදු ජල අණු දෘෂ්‍ය ආලෝකය අවශෝෂණය කරගැනීම අඩු නිසා. ඇත්තෙන්ම ජලය ලා නිල් පැහැතියි, එය අපට සුළු ජල ප්‍රමාණයක් දෙස බැලුවිට පෙනෙන්නෙ නැහැ. නමුත් මුහුද දෙස බැලූ විට ඔබට මුහුද නිල් හෝ නිල් කොළ පැහැය දක්නට පුළුවනි. ජලය විසින් රතු, තැඹිලි, සහ කහ යන වර්ණ අවශෝෂණය කරගන්නවා. මේ නිසා ඊට ප්‍රතිවිරුද්ධ පාට වන කොළ සහ නිල් පැහැයන් ජලය විසින් පරාවර්තනය කරනවා. ඒ නිසයි මුහුද සහ අහස නිල් හෝ නිල්-කොළ පැහැයක් ගන්නේ.

ලෝකය ගත් කළ එයින් සියයට 75 ක් පමණ ප්‍රමාණයක් වසා ඇත්තේ ජලයෙන්. මෙය ලීටර වශයෙන් ගත් කළ 1,260,000,000,000,000,000,000 ක්.  නමුත් මේ ප්‍රමාණයෙන් සියයට 96.5 ක්ම මුහුදු හෝ ලවණ මිශ්‍ර ජලය නිසා භාවිතයට ගත හැකි ලවණ රහිත ජලය ඇත්තේ සියයට 2.5 ක් වැනි ඉතා සුළු ප්‍රමාණයක්. එයින් ද සියයට 1.7 ක්ම ධ්‍රැවීය පෙදෙස්,  ග්ලැසියර සහ අයිස් කඳු අත්පත් කරගෙන තිබෙනවා. ඒ අනුව අපට පානීය ජලය ලෙස ඇත්තේ සියයට දශම තුනක ජල ප්‍රමාණයක්. ලෝකය පුරාම පැතිර තිබිය යුතු මේ ජල ප්‍රමාණයෙන් බාගයක්ම බෙදී ගොස් ඇත්තේ රටවල් 6ක් අතර වන අතර ශ්‍රී ලංකාව එයින් එකක්. එපමණක් නොවෙයි අනාගතයේදී ජල හිඟයක් ඇතිවුවහොත් පිරිසිදු පානීය ජලය ඉතිරිව තිබෙන එකම රට හැටියට ශ්‍රී ලංකාව හඳුනාගෙන තිබෙනවා.  ඔබ නොදන්නවා වුනාට, ලංකාවේ තත්ත්‍වය මෙයයි. නමුත් අපි අපේ ජල මූලාශ්‍රවලට කොපමණ කසළ එකතු කරනවාද ?, අපි අනාගත ලෝකයටම ඇති සම්පතක් අපි අපේ පටු අරමුණු සහ නොසැලකිළිමත්කම නිසා මෙසේ විනාශ කරනවා.

ලෝකය එසේ වුවත්, කවදාවත් අපට ජලය නොමැතිව මිය යන්නට වන එකක් නැහැ. දැනට ගණන් බලා ඇති ක්‍රම අනුව ලෝකයේ ජලය තවත් අවුරුදු බිලියන 7.6 කට සෑහෙන්න තිබෙනවා. නමුත් මිනිසා ජීවත්විය හැකි කාළය වන්නේ තවත් අවුරුදු බිලියන 1.75 ක් පමණයි. ඒ වනවිට සූර්යයාගේ උෂ්ණත්‍වය අධික වී ලෝකය ජීවය පවත්වාගෙන යා නොහැකි තත්ත්‍වයට පත් වනවා. එසේම පෘථිවිය සෞරග්‍රහ මණ්ඩලයේ පිහිටා ඇති ස්ථානය ග්‍රහලෝකයක් මත ජලය රැඳීපැවතිය හැකි උචිතම ස්ථානයයි. පෘථිවියේ වූ ගුරුත්වාකර්ෂණ බලය නිසා ජලය සිය වලාකුළු ස්ථරයෙන් එපිටට වාෂ්ප නොවීම නිසා පෘථිවි වායුගෝලය තුළ ජලය රැඳී පවතිනවා. මෙසේ ජලය අප සතුව සමානව බෙදී රැඳී පවතින්නේ අප හැමෝම දන්නා ජල චක්‍රය නිසායි.  ජල චක්‍රය ප්‍රධාන වශයෙන් වාෂ්පීකරණය, වර්ෂාපතනය, සහ ගලායාම යන කොටස් තුනකින් යුක්තයි. ලෝකය පුරා සමුද්‍ර, විල්, වැව්, පොකුණු, වැනි ජල මූලාශ්‍රවලින් වසරකට ටෙරා ටොන් 47 ක ප්‍රමාණයක් ජලය වාෂ්ප වෙද්දී, ටෙරා ටොන් 72 ක් ගොඩබිමින් දායක වනවා. මෙසේ එකතුවන ජලය විවිධාකාරයෙන්, එනම්, වැස්ස, හිම පතනය ආකාරයෙන් ටෙරා ටොන් 119 ක් වසර පුරාම ලෝකය පුරා පතිත වනවා. එනම් සියයට සියයක්ම වාෂ්පීකරණය සහ වර්ෂාපතනය ලෙස චක්‍රීකරණය වනවා.

කාර්මීකරණයට පෙර ඕනෑම ජල මූලාශ්‍රයකින් ජලය පානයට ගත හැකි වුවත්, දැන් දැන් මිනිස් ක්‍රියාකාරකම් සහ කාර්මික අපද්‍රව්‍ය මුසු වීම නිසා ජලය ඒ ආකාරයෙන්ම පානයට හෝ වෙනයම් ක්‍රියාවලියක් සඳහා භාවිතයට ගැනීම අපහසුයි. මේ නිසා ජලය පිරිපහදුව අත්‍යවශ්‍ය වෙනවා. ලෝක සෞඛ්‍ය සංවිධානයට අනුව පානීය ජලය පිළිබඳ පිරිවිතරයන් සකස් කර ලෝකයටම හඳුන්වා දුන්නත්, ඒ ඒ රටවල ප්‍රමිති කාර්යංශයන්හි නිර්දේශ අනුව මේ පිරිවිතරයන් වෙනස් වනවා. ඒ අනුව අප රටේද භාවිතා කරන ජලය සඳහා විවිධාකාර නිර්ණායක තිබෙනවා. මේ සියල්ල පාලනය වන්නේ ජාතික ජලසම්පාදන සහ ජලාපවාහන මණ්ඩලය මගින්. සාමාන්‍ය ජල පිරිපහදුවකදී පරාමිතීන් සියයකට වඩා වැඩි ප්‍රමාණයක් සඳහා ජලය පරීක්‍ෂා කෙරෙනවා. විශේෂයෙන්ම ජලයේ pH අගය, වර්ණය, ක්‍ෂුද්‍රජීව ඝණත්‍වය, රසය, ගන්ධය, ද්‍රාව්‍ය ක්ලෝරීන් ප්‍රමාණය, ද්‍රාව්‍ය ඝණද්‍රව්‍ය ප්‍රමාණය, විෂ ද්‍රව්‍ය අන්තර්ගතය සහ අටෝරාසියක් ලෝහමය අපද්‍රව්‍ය සඳහා මෙම පරීක්‍ෂණ සිදු කෙරෙනවා.  මෙසේ පිරිපහදුවන ජලය විවිධාකාර ස්ථානවලදී නැවත නැවතත් නිරන්තරවම පරීක්‍ෂණවලට භාජනය කරමින් ඔබ වෙත ලබාදීමට ඔවුන් කටයුතු කරනවා. මේ කර්තව්‍යය මෙසේ වුවත්, අප බොහෝ දෙනා මේ බීමට ගන්නා ජලය, බීමට අමතරව වෙනත් කටයුතුවලටද භාවිතා කරනවා. බීමට ගන්නා ජලයෙන් වාහන සේදීමට හෝ මල්පාත්ති නඩත්තුව අවශ්‍ය නොවුනත්,  අප බොහෝදෙනා පුරුදුව සිටින්නේ පහසුවෙන් ලැබෙන නිසා ඒ ජලය භාවිතා කිරීමටයි. ජලය ඝණ මීටරයක් පිරිපහදුව සඳහා ආසන්නව රුපියල් 50 ක් පමණ වැයවුවත්, අපට ජලය ලැබෙන්නේ ඝණ මීටරයක් රුපියල් 12 ක් වැනි සුළු මුදලකටයි. ඝණ මීටරයක් යනු ලීටර 1000 කි. මේ ප්‍රමාණය වෙළඳ සැළකින් මිලදී ගන්නවා නම් ලීටරයකට රුපියල් 50 ක් මිළ කලහොත්, එක් ජල ඒකකයක් සඳහා ඔබට වැයවන මුදල රුපියල් 50,000 කි. නමුත් අපට එය රුපියල් 12 කට වැනි සුළු මුදලකට ලැබෙන නිසා අපට එහි අගයක් දැනෙන්නේ නැතිවා ද ?

අපේ මූලික පානීය ජල ප්‍රභවය වන්නේ කැළණි ගංගාවයි. කිලෝමීටර 145 ක් දිග කැළණි ගඟට වර්ග කිලෝමීටර 2300 කට ආසන්න ජලාධාරක ප්‍රදේශයක් අයත් වන අතර එය ලංකාවේ වැඩියෙන්ම කාර්මීකරණයට ලක් වූ ගංගාධාරයද වෙනවා. කැළණි ගංගාධාරය අවට ඇති කර්මාන්තශාලා 10,000 ක් සෘජුවම හෝ පිරිපහදුවට ලක් කළ ජලය මුදා හරින්නේ කැළණි ගඟටයි.  බොහෝ දෙනා පහසුවට අවම පරාමිතීන්ට යටත්ව ජල පිරිපහදුව සිදු කර, හෝ වංචනිකව එසේවත් පිරිපහදුව නොකර ගඟට ජලය මුදා හරින්නේ සිය පෞද්ගලික හෝ ආයතනමය ආර්ථික වාසි තකාගෙනයි. නමුත් එසේ කිරීමෙන් දීර්ඝකාලීනව පරිසරයට මෙන්ම අනාගත පරපුරටද ඔබ කරන හානිය ඔබ ආර්ථිකව ගණන් බලන්නේ නැහැ. මෙය ඇත්තෙන්ම කණගාටුවට කරුණක්.

ජලය අපවිත්‍ර වන ක්‍රම ගණනාවක් තිබෙනවා. ගංගා ඇල දොල වැනි විවෘත ජලමාර්ගවල ස්නානය, ඒවාට කසළ බැහැර කිරීම, සමහර අවස්ථාවන්හිදී වැසිකිලි අපවහන නළ පවා ගංගාවලට හරවා තිබෙනවා. කර්මාන්තශාලා වලින් පිටකරන ජලය නිසි ලෙස පිරිපහදුවට ලක් නොකර මුදා හැරීම, සතුන්, වාහන ආදිය සේදීමට භාවිතා කරන ජලය නිසි පිරිපහදුවකින් තොරව ගංගාවලට මුදා හැරීම ආදී මිනිසාට සියයට සියයක් පාලනය කළ හැකි නමුත් අප විසින් හිතාමතාම නොසළකාහරින ක්‍රියාකාරකම් නිසා ජලය අපවිත්‍ර වනවා.

විවිධාකාර ප්‍රදේශවල ජලය විවිධාකාර සංයුතීන්ගෙන් පවතිනවා. මේ නිසාම විවිධ පලාත්වල ජලය විවිධ රස ගන්නවා. එසේම ගතිගුණත් වෙනස්. උතුරුමැද පලාතේ ජලයෙහි වැඩිපුර කැල්සියම් සහ ෆ්ලුවොරයිඩ් ආදී අයණ අඩංගු නිසා ඒ පලාත්වල ජනතාවගේ දත් සහ අස්ථිවල ව්‍යාකූලතා හටගෙන තිබෙනවා. තවත් පලාත්වල ජලයෙහි කැල්සියම් සාන්‍ද්‍රණය අධික නිසා ජලය කිවුල්, එසේත් නැතිනම්, කඨිණ ජලය ලෙස හඳුන්වනවා. මේ වගේම සමහර පෙදෙස්වල ජලයේ සුවිශේෂී ගුණද අඩංගු වන්නේ මේ විවිධ ලවණ දියවීම නිසා. මේ නිසා ඒවා පානය හෝ ස්නානය නිසා ලෙඩරෝග සුව වනවා කියා මතයන් ද තිබෙනවා. ඒ වගේම සමහර ප්‍රදේශවල ජලයේ මිනිස් සිරුරට හානිකර ලෝහවර්ග, ලවණ වර්ග අන්තර්ගතයි. රජරට වකුගඩු රෝගයට මූලික වූ ආසනික් කැඩ්මියම් වැනි ලෝහ සහ ග්ලයිෆොසේට් වැනි රසායන ද්‍රව්‍ය නිසා ඒ පලාත්වල ජනතාවට පානීය ජල ප්‍රශ්නයක් පැණ නැගී තිබෙනවා. මෙය ස්වභාවිකව ඇතිවූවක් නොවෙයි. මිනිසා විසින් අප්‍රමාණ ලෙස භාවිතා කළ පොහොර සහ කෘෂිරසායන ද්‍රව්‍ය නිසා ඇතිවූවක්.

අප බොහෝදෙනා සිතා සිටින්නේ ජලය අවශ්‍ය වන්නේ ස්නානය, පානය, සහ සේදීම වැනි අපට සෘජුව සම්බන්ධවන කටයුතු සඳහා පමණක් යන්න නමුත්, අප නොසිතන බොහෝ දෑ වෙනුවෙන් මේ ජලය අධිකව පාවිච්චි වනවා. උදාහරණයක් ලෙස ගතහොත් කපු ටී ශර්ට් එකක් නිපදවීමට ජලය ලීටර 2700 ක් වැයවන බව ගණන් බලා තිබෙනවා. කපු යනු පරිසර හිතකාමී නිෂ්පාදනයක් ලෙස හැඳින්වුවත්, එය නිෂ්පාදනය පිටුපස පරිසරයට ඉතාම අහිතකර විනාශකාරී ක්‍රියාවලියක් ඇති බව බොහෝ දෙනා නොදන්නා කරුණක්. තවත් උදාහරණයක් වන්නේ බිත්තරයක් නිෂ්පාදනයට ජලය ලීටර 450 ක් අවශ්‍ය වනවා. කිකිළියගේ ආහාර, ජලය සිට බිත්තරය ඔබේ නිවස වෙත ගෙන එන තෙක් වූ ක්‍රියාවලි සියල්ල මීට ඇතුලත්. සාමාජිකයන් හතර දෙනෙකුගෙන් යුත් සාමාන්‍ය පවුලකට අවශ්‍ය දිනක ආහාර සැපයුම සඳහා ජලය ලීටර 27000 ක් වැයවෙන බව ඇසුවොත් ඔබ අනිවාර්යයෙන්ම පුදුමයට පත්වනවා නොඅනුමානයි. මේ අනුව ලෝකයේ බොහෝ දෑ වලට අප නොදැනුවත්වම ජලය විශාල වශයෙන් භාවිතා වනවා.  බොහෝ දෙනා කාබන් පියසටහන ගැන කතා කරතත්, ජල පියසටහන ගැන කතා නොකරන්නේ එය තමාට බෙහෙවින් අවාසිදායක සහ පාලනය කළ නොහැකි තත්ත්‍වයක තිබෙන නිසා. නමුත් නුදුරු අනාගතයේදීම අපට ජල පියසටහන ගැන කතා කරන්න සිදුවන තත්ත්‍වයක් උදා වේවි.

ජල සංරක්‍ෂණය විවිධාකාරයි. ජල මූලාශ්‍රයක පෝෂක ප්‍රදේශයක් සංරක්‍ෂණය කිරීම මගින් දීර්ඝකාලීනව ජල සැපයුම සුරක්‍ෂිත කරගත හැකියි. ඒ නිසා පොළවෙහි ජල මූලාශ්‍ර සුරැකී, පිරිසිදු අඛණ්ඩ ජල සැපයුමක් ලබාගත හැකියි. මේ සඳහා උස් භූමි සහ ඒ ජල මූලාශ්‍රවල ජෛව පද්ධතිය ආරක්‍ෂා කළ යුතුයි. උස් භූමිවල පිහිටි වන ගහණය ආරක්‍ෂා කිරීම සහ එය නිසි ලෙස පෝෂණය වන ගස් සිටුවීම මගින් එය සිදු කළ හැකියි. දෙවැන්න වන්නේ ලැබෙන ජලය අපිරිසිදු වීම වැලැක්වීමයි. එය ද වනාන්තර මගින් සිදු වනවා. ක්‍රමාණුකූල ජල වහනය සිදු වීමේදී පස්, රොන්මඩ, හෝ අපද්‍රව්‍ය ජලයට එකතු වන්නේ නැහැ. මිනිස් ක්‍රියාකාරකම් නිසා ජලයට මේ දෑ එකතු වීමෙන් ජලය අපවිත්‍ර වනවා. ජලයට ස්වයංව පිරිසිදුවීමේ යාන්ත්‍රණයක් නැහැ. එසේම ගලා යන ජලයට බැහැර කෙරන අපද්‍රව්‍ය සියල්ල ජලයේ රැඳී පවතිනවා. ඔබ නොසිතා මෙන්ම දැනුවත්වම සිදු කරන සමහර දෑ නිසා සමහරවිට ඔබම පානය කරන ජලය අපිරිසිදු වනවා.

මෙසේ ලැබෙනෙ ජලය දැඩි පරිශ්‍රමයක් දරා ජල පිරිපහදුවේදී පිරිසිදු කර ඔබ වෙතට ලැබෙනවා. එය ලැබුන පසු ඔබ නිසි ලෙස පරිහරණය නොකර අපතේ යවනවා නම් එය ඇත්තෙන්ම අපරාධයක්. පානීය තත්ත්‍වයෙන් ලැබෙන ජලයෙන් පානය සහ ආහාර පිළියෙල කිරීම සඳහා අප යොදා ගන්නේ සියයට එකක කොටසක් පමණයි, ඉතිරි සියයට අනූ නවයම වැය වන්නේ එතරම් පිරිසිදු ජලය අවශ්‍ය නොවන වැසිකිළි, ස්නානය, සහ සේදීම් කටයුතු වෙනුවෙන්. මේ සමහර දෑ ඔබට අහසින් වැටෙන වැසි ජලයෙන් කරගතහැකි දේවල්. ලෝකයේ බොහෝ පෙදෙස් මෙන්ම, ලංකාවේද වියළි කලාපයේ ජනතාව වැසි ජලය එකතු කරගෙන අත්‍යවශ්‍ය නොවන කටයුතු සඳහා භාවිතා කරනවා. මෙය ඇත්තෙන්ම ජල සංරක්‍ෂණය වෙනුවෙන් සැමටම කළ හැකි දෙයක්. එසේම අපගේ නොසැළකිලිමත්කම නිසාම සමහරවිට නිවසේ හෝ සේවා ස්ථානයේ ජල කරාම නිසි ලෙස නඩත්තුවක් හෝ වැසීමක් සිදු කරන්නේ නැහැ. එසේ නොවසන ජලකරාමයකින් ජල බිඳු වෑහීම නිසා, දිනකට ජලය ලීටර 75ක් හෝ ඊට අධික ප්‍රමාණයක් – මසකට ලීටර 2250 ක් අපතේ යන්නට පුළුවනි.  මේ ජලය ප්‍රමාණය ඔබ සුපිරි වෙළඳසැලකින් මිලදී ගන්නේ නම්, රුපියල් 112,500 ක් වැය වන ජල ප්‍රමාණයක්. මඳකට සිතා බලන්න, ඔබේ නොසැළකිලිමත්කම ලෝකයට සිදු කරන හානිය කෙතරම්ද කියා.

අපට මෙසේ ජලය ඇතිතරම් තිබුණත්, ලෝකයේ බිලියන 7 කට අධික ජනතාවකගෙන් බිලියන දෙකක්ම ජල හිඟයට මුහුණ පා සිටිනවා. ඔවුන් සාමාන්‍යයෙන් ජලය ලබා ගැනීම සඳහා දිනකට පැය තුනකට අධික කාළයක් ඇවිදීම සිදු කරනවා. ඔබට ඉතාමත්ම අඩු මුදලකට හෝ නොමිලේ ලැබෙන මේ ජලය, ඉවක් බවක් නැතිව අපතේ යවන්නේ, ඔබ සමහරවිට මේ කරුණු නොදන්නා නිසා විය හැකියි. එසේ වුවත්, ඊශ්‍රායලය, සිංගප්පූරුව වැනි ජල මූලාශ්‍රයන් නොමැති රටවල්, මහා පරාක්‍රමබාහු රජතුමාගේ කියමන වන, “ අහසින් වැටෙන එක දිය බිඳක් හෝ උපරිම ප්‍රයෝජන නොගෙන මුහුදට නොයැවිය යුතුය” යන්න මනාව සනාථ කරමින්, ජල ප්‍රතිචක්‍රීකරණයේ හිණිපෙත්තටම නැගි රටවල් වනවා. විශේෂයෙන්ම ඊශ්‍රායලයේ තාක්‍ෂණිකව සැකසුන වගාබිම්, නිශ්පාදනය කරන්නේ ලෝකයේ උසස්ම සහ ගුණාත්මක බවින් වැඩිම එළවලු සහ පළතුරුයි. ඔවුන් සිය මළ අපද්‍රව්‍යවලින් පවා ජලය නිස්සාරණය කර ගන්නවා.

ලෝකයේ ජලයෙන් 96.5ක් ම භාවිතයට ගත නොහැකි නමුත්, දැන් දැන් බොහෝ රටවල් ලවණහරණය (Desalination) මගින් මුහුදු ජලය පිරිපහදු කර භාවිතා කරනවා. මෙය ඉතා මිල අධික ක්‍රියාවලියක් වුවත්, ජලය අත්‍යවශ්‍ය සාධකයක් වන නිසාම ඔවුන් එසේ සිදු කරනවා. ලෝකයේ අනාගතයේදී ජලය වෙනුවෙන් ඉතා දැඩි ඉල්ලුමක් පවතින අතර ෆිජී වැනි රාජ්‍ය ජලය අපනයනය කිරීමෙන් ඉතා අධික විදේශ විනිමය ප්‍රමාණයක් උපයනවා. මේ නිසාම එහි ජනතාවට පානීය ජල හිඟයක් ඇති බවද කියැවෙනවා.

ජලය වටිනා සම්පතක් බව අප කුඩා කාළයේ සිටම ඉගෙන ගත්තද, එහි නිසි වටිනාකම අපට තවමත් දැනී නැහැ. එය දැනෙනවිට, අපේ දේශපාලනඥයින් සහ ඔවුන්ගේ හෙංචයියන් විසින් විනාශ කළ සහ තවමත් කරමින් පවතින වනාන්තරවල වටිනාකම අපට දැනෙන්නට පටන් ගනීවි. නමුත් ඒ වන විට අපි බොහෝ ප්‍රමාදවී සිටීවි…. අප අපගේ ජීවිත කාළයන් නුදුරේදීම අවසන් කරනවිට, අපගේ දරුවන් සහ ඉදිරි පරම්පරාවන්, අපට ඔවුන් වෙනුවෙන් ලෝකය ඉතිරි නොකළාට දෙස් දෙවොල් තියාවි. ඒ අසන්නට අප නොසිටියත්, අපේ ආත්මයන්ට හෝ සැනසිල්ලක් ලබන්නට, ලෝකය වෙනුවෙන්, ඉදිරි පරම්පරාවන් වෙනුවෙන්, මේ පරිසරය නිසි ලෙස භාවිතා කරමු, ස්වභාවික සම්පත්, අනාගතයට ඉතිරි කරමු.

 

අනාගතේ දවසක්දා……

අපි අනාගතය ගැන බලාගැනීමට අවශ්‍ය වූ විට කරන්නේ එක්කෝ සාත්තරකාරයෙකුට ගානක් ගෙවා ඔහු කියන දේ ඉත සිතින් විශ්වාස කර කටයුතු කිරීමයි. එසේත් නැතහොත් ‍ජ්‍යෝතිෂ්‍ය හෝ නක්‍ෂත්‍රකරුවකුට අපේ හඳහන ලබා දී ඔහු ගණන් බලන ආකාරයට අනාගතය තීරණය කිරීමයි. අවාසනාවකට මෙය රට කරවන මහාමාත්‍යාදීන් සිට එදා වේල කන්න නැති හිඟන්නා දක්වාම පැතිර ඇති ප්‍රවණතාවයකි. තමතමන්ගේ හැකියාවේ හැටියට ගමේ දේවාලයේ සිට තිරුපති දක්කවාම විවිධාකාර දෙවියන්ගේ පිහිට පතන්නට අපි පුරදු වී සිටිමු. මේ රටේ බොහෝ දෙනෙකු තමන්ගේ හැකියාවන් සහ ආත්ම විශ්වාසය, නොදකින බලවේග වෙත පවරා පසුපසට යමින් සිටින කණ්ඩායමකි. මේ කටයුත්ත පුද්ගලිකව එසේ වුවත්, ලෝකයේ අනාගතය මේ යැයි තීරණය කිරීමට මේ කිසිවෙකුට නොහැකියි. එසේ වූවා නම්, සුනාමිය, ලෝකයේ යුද්ධ, සුප්‍රසිද්ධ පුද්ගල ඝාතන, මහා පරිමාණ විනාශයන්, අන්තර්ජාල අනාවැකිකරුවන් විසින් මෑතකදී ඇති කළ තෙල් හිඟය වැනි දෑ, කාලගුණ ව්‍යසන ආදිය සියල්ල නැවැත්වීමේ හෝ පුරෝකථනය කිරීමේ බලය ඔවුන් සතු විය යුතුයි. කතරගම දෙවියන් වේල් ගණනක් බඩගින්නේ තැබූ කණ්ඩායමක් සුවසේ සිටීමෙන්ම, මේ දේවබලවල ප්‍රබලතාවය වටහාගත හැකිය. මිලියන විසි දෙකක් පමණ වූ ශ්‍රී ලාංකික අප මේ නක්‍ෂත්‍ර උගුලේ වැටී අනාගතය ග්‍රහලෝක නවයකට සහ නොපෙනෙන දෙවියන්ට භාර දී කල් ගෙවන අතර තවත් බිලියන හතකට අධික ප්‍රමාණයක මිනිසුන් මේ කිසිවක බලපෑමක් නොමැතිව අපට වඩා ගවුු ගණනක් ඉදිරියට ගොස් විද්‍යාවේ නව සොයාගැනීම්, ලෝකයට නව නිපැයුම්, ඇතුළු බොහෝ දෑ දායාද කරමින් සිටිති.

ඒ කෙසේ වුවත්, බොහෝ විද්‍යාඥයින් සහ අනාගතය දකින්නන් විවිධාකාර මට්ටමින් අනාගතයේ ඇතිවිය හැකි තත්ත්‍වයන් පිළිබඳව අනාවැකි පළ කරමින් සිටිති, ඒ සිය අධ්‍යයනවල දත්තයන් උපයෝගී කර ගනිමින්. මේ අනුව අනාගත ලෝකය තාක්‍ෂණයෙන් අනූන ලොවක් බවට පත් වන බව දත්ත නොමැතිව වුවද අපට පුරෝකථනය කළ හැකියි. දැනට ලෝකයේ භාවිතා වන අන්තර්ජාලයට සම්බන්ධ උපාංග (Internet of Things) මිලියන 20 නුදුරු අනාගතයේදී වසර 2025 වනවිට මිලියන අසූවකට ආසන්න වීමට නියමිතයි. මේ ප්‍රවණතාවය ඇති වී තිබෙන්නේ ස්වයංක්‍රීය කර්මාන්තශාලා සහ කෘත්‍රිම බුද්ධිය සහිත රොබෝවරු බිහිවීම වැඩිවීමත් සමගයි. සාමාන්‍යයෙන් මිනිසකු පැය අටක් තුළ කරන වැඩකොටස මෙන් දෙගුණයක් හෝ ඊට වැඩි ප්‍රමාණයක් කිසිදු  හෙට්ටු කිරීමකින් තොරව නිම කිරීමේ කටයුත්ත නිසාම, දැන් දැන් අධිකව මිනිස් ශ්‍රමය වැයවන කටයුතුවලට රොබෝවරු එකතු කර ගැනීමේ ප්‍රවණතාවය වැඩිවෙමින් පවතිනවා.

එසේම දැනට භාවිතා වන ජංගම දුරකථන ප්‍රමාණය 2020 වනවිට බිලියන තුනකට ආසන්න වනු ඇති. වැඩි වැඩියෙන් ජංගම දුරකථනය මාර්ගයෙන් ලෝකයට සම්බන්ධ වන තරුණ පරපුරේ සෑම ගණුදෙනුවක්ම අන්තර්ජාලය හරහාම සිදු වනු ඇති. මීට සමගාමීව වැඩිවන ජංගම දුරකථනවල උපයෝගීතාවයන් වැඩිවත්ම, මිනිසා පෙරටත් වඩා සංවෘත චරිත වනු ඇති. අන්තර් සම්බන්ධතා අන්තර්ජාලය හරහා පමණක්ම සිදු වෙද්දී, හැඟීම් පළකිරීමත් ඩිජිටල්ම වනු ඇති. ලංකාවේ කෙසේ වෙතත් බටහිර රටවල බොහෝ ඉලෙක්ට්‍රොණික උපාංග, ඇඳුම් ආයිත්තම්, මෙන්ම එදිනෙදා භාවිතයට ගන්නා ආහාරවර්ග ද ඇනවුම් කිරීම අන්තර්ජාලය හරහාම සිදු වෙනු ඇති. දැනටමත් සිදුවන Amazon Prime වැනි අන්තර්ජාල උපයෝගීතාවයන් නිසා  සාම්ප්‍රදායික ඇඳුම් සහ වෙලඳසැල්වල පැවැත්මට කණකොකා හඬනු ඇති.

මිනිසා සතුව ඇති හැකියාවන් යන්ත්‍ර භාවිතයෙන් සිදු කිරීමට යාමේදී බොහෝ දෙනෙකුට රැකියා විරහිතභාවයේ නීරසභාවය අත් විඳීමට සිදු වේවි. වසර 2000 සිට 2015 වනවිට ඇමරිකා එක්සත් ජලපදයේ පමණක් ස්වයංකරණය (Automation) නිසා පමණක් රැකියා මිලියන 5.6 ක් පමණ අහිමි වී ගොස් තිබෙනවා. මේ නිසාම දැන් දැන් ගූගල් සමාගම මූලිකත්‍වයෙන් මේ රැකියා අහිමිවන පුද්ගලයන්ට නව රැකියා වර්ග සඳහා පුහුණුව ලබා දීම නිසා මේ තත්ත්‍වය යම් තරමකට පාලනය වේවි. එසේ රැකියා අහිමිවන පුද්ගලයන් අතර, ගණකාධිකාරී, නීතීඥවරුන්, වාහන පින්තාරුකරුවන්, වෙල්ඩින් කාර්මිකයන්, ආදීන් ප්‍රධානයි. එසේම නව තාක්‍ෂණයේ සුපිරිබව විදහා දක්වන්නට තාක්‍ෂණඥයින් දිනපතා නව රොබෝවරුන් නිපදවනවා. මේ නිසා සමාජයේ විවිධ තලවල රැකියාවල පැවැත්ම ඉතාමත් දැඩි තර්ජනයකට ලක්ව තිබෙනවා.

රැකියා තත්ත්‍වය එසේ වෙද්දී, මිනිසා ද නව පරිණාමයකට ලක්වෙමින් පවතිනවා. මෙතුවක් කල් ශරීර අංගයක රෝගී වීමක් හෝ අහිමිවීමක් නිසා එක්කෝ සදාකාලික ආබාධිත තත්ත්‍වයට පත්වීමට ඉඩ තිබූ මිනිසා, දැන් දැන් තාක්‍ෂණයේ බල මහිමයෙන් බයෝනික් (Bionic) වීමට පටන් ගෙන තිබෙනවා. අස්ථියක භග්නයක් වූ විට වෙනදා කළ ශල්‍යකර්මවලින් ඈත්ව, ටයිටේනියම් අස්ථියක් හෝ ඊටත් වඩා සුපිරි අවයවයක හිමිකාරීත්‍වය ලබන්නට අපට හැකි වී තිබෙනවා. ගූගල් කණ්නාඩි, ඉලෙක්ට්‍රොණික සිවි කාච වැනි දෑ නිසා අපට ස්වභාවික පෙනීමේ පරාසයට වඩා එහාට ගිය සුවිසල් දත්ත ගබඩාවක හිමිකරුවන් වන්නට අපට හැකි වී තිබෙනවා. මෙය හොඳ පැත්තට මෙන්ම නරක පැත්තටද යොදා ගත හැකි නිසා ඇතිවන තත්ත්‍වය භයානකයි.

කෘත්‍රිම බුද්ධිය එකතු වූ රොබෝවරු ලෝකය පුරා විවිධ ක්‍රියාකාරකම්වල යෙදෙනු ඇති. සමහරවිට ගුරුවෘත්තිය ද රොබෝවරුන්ගේ තර්ජනයට ලක් වීමට පුළුවන්. සමහර ගුරුවරුන් දැනටමත් රොබෝවරුන් මෙන් උගන්වන නිසා දරුවන්ට එහි වැඩි වෙනසක් දකින්නට නොලැබෙන්නටත් පුළුවන්. නමුත් දැන් දැන් අන්තර්ජාලය හරහා උගන්වන කෘත්‍රිම බුද්ධිය සහිත ටියුටර් වරුන් ඇමරිකාවේ සිටිනවා. එසේම දැනටමත් තර්ජනයට ලක් වී හමාර අන්තර්ජාල තාක්‍ෂණික සහායකවරුන් මෙන්ම පාරිභෝගික සේවා සපයන්නන්ගේ වෘත්තීන් කෘත්‍රිම බුද්ධිය නිසා සදහටම නැතිවී යනු ඇති. එසේම ඔවුන් හා ඔබ සංවාදයේ යෙදෙන විට ඒ සංවාදයන් ඔබට ආගන්තුක නොවන ආකාරයට ඔබේ භාෂා හැසිරවීමට සමානව ඉබේම සැකසෙනු ඇති.

ආරක්‍ෂක අංශවල සහ ගොඩනැගිලි, මංමාවත් ආරක්‍ෂාවද කෘත්‍රිම බුද්ධියට පැවරෙනු ඇති. මාර්ග අයිනේ සිටින පොලීසියේ ට්‍රැෆික් නිලධාරීන් වෙනුවට කෘත්‍රිම බුද්ධිය කැවූ ස්වංක්‍රීය කැමරා පද්ධති මගින් ඔබේ රිය ධාවනය නිරීක්‍ෂණය කෙරෙනවා පමණක් නොව, ඔබේ වැරදිවලට අනුව දඩමුදල් ද නියම කෙරෙනු ඇති. සමහරවිට එම දඩමුදල ඔබටත් නොදන්වා ඔබේ බැංකු ගිණුමෙන් අයකෙරෙනු ඇති. ගොඩනැගිලිවල ආරක්‍ෂණ පද්ධතීන් ස්වයංක්‍රීය වී සාමාන්‍ය සොරුන්ට සොරකම් කිරීමට අපහසු තත්ත්‍වයක් උදාවනු ඇති. දැනටමත් භාවිතා වන ස්මාට් නිවාසවල ඇති ස්වයංක්‍රීය පද්ධතීන් අප්‍රමාණව වැඩිදියුණු වනු ඇති. සමහරවිට ඔබට රොබෝ ගෘහ සේවිකාවකගේ සේවය ලැබෙන අතර ඔබ කැමති කෑම වේලක් රොබෝ අතකින්, කලට වේලාවට නිසි ලුණු ඇඹුල් ඇතිව ඔබට ලැබෙනු ඇති.

තාක්‍ෂණය කෙසේ දියුණු වුවත්, පරිසරය විනාශය නම් දිගින් දිගටම සිදුවනු ඇති. දියුණු රටවල් පරිසර සංරක්‍ෂණය කරා යොමු වෙද්දී අප වැනි සැමදා දියුණු වෙමින් පවතින රටවල වනාන්තර ගහණය තවදුරටත් අඩු වෙමින් සම්පත් හිඟයකට මඟ පාදනු ඇති. තවත් වසර තිහක් වනවිට හිමාලයේ අයිස් තට්ටු දියවීම නිසා ඉන්දියාවට උඝ්‍ර ජලහිඟයකට මුහුණ පාන්න සිදුවන අතරම, කලාපයේ උෂ්ණත්‍ව යාමනයද ඇණහිට, දකුණු ආසියාව මිනිස් වාසයට නුසුදුසු වන්නට බොහෝ ඉඩකඩ ඇතිබව කිව හැකියි. වායුගෝලීය කාබන් ඩයොක්සයිඩ් ප්‍රමාණය කෙමෙන් කෙමෙන් ඉහළයත්ම, ධ්‍රැවීය අයිස් දියවීම නිසා මුහුදු මට්ටම ඉහළ යනු ඇති. 1870 සිට මේ දක්වා මුහුදු මට්ටම අඟල් 7.5 කින් ඉහළ ගොස් තිබෙනවා. මේ තත්ත්‍වය දිගටම පැවතුනහොත් 2100 වනවිට අඩි 4 කින් මුහුදු මට්ටම ඉහළ යා හැකියි. එවිට මාලදිවයින වැනි මුහුදු මට්ටමට ආසන්නව ඇති රටවල පැවැත්ම කෙසේ කෙළවර වේදැයි සිතා ගන්නට නොහැකි වේවි. ලංකාවේ පවා උතුරු නැගෙනහිර සහ දකුණේ වෙරළබඩ තීරයේ සමහර ප්‍රදේශ මුහුදට යටවී නොපෙනී යනු ඇති. මේ නිසා අප මෙතුවක් කල් සටන් කළ දේශ සීමා නැවත සකසාගෙන නව සටනකට පණ පෙවීමට සිදු වනු ඇති.

චීනයේ බීජිං, ඉන්දියාවේ නවදිල්ලිය වැනි වායු දූෂණය අධික නගර මිනිස් වාසයට නුසුදුසු වන තරමට අපවිත්‍රව තිබෙනු ඇති. උෂ්ණත්‍වය ඉහළ යාම නිසා ඇතිවන අධික තාපයෙන් වැඩි වැඩියෙන් ජලය වාශ්ප වනු ඇති. මේ නිසාම සංවහන වැසි සහ මෝසම් වැසිවලින් පතිතවන ජල ධාරිතාවය අධික වනු ඇති. එවිට සිදුවන ජලගැල්ම, නාය යාම් ආදී ස්වභාවික ආපදාවල තත්ත්‍වය බරපතල වනු ඇති. මේ නිසාම සුලිසුලං සහ ටෝනේඩෝ තත්ත්‍වයන්ගේ බලය අධික වනු ඇති. එවිට එමගින් සිදුවන හානීන් ගනන් බැලීමට අපට වෙනම ඇමතිවරයෙකු පත්කළ හැකි වේවි.

මේ හේතු නිසා විවිධාකාර ලෙඩරෝග තුන්වැනි ලෝකය පුරා පැතිර යනු ඇති. පවතින රෝගවල පවා තත්ත්‍වයන් වෙනස්වෙමින් මිනිසා පීඩාවට පත් කරනු ඇති. කෙසේ වුවත්, ලෝකයේ ඖෂධ කර්මාන්තයේ නව නිපැයුම් නිසා, තමන්ට ආවේණික බෙහෙත් සකසා ගැනීමේ (Personalized Medicines) කලාව ලොවට දායාද වනු ඇති. ඒ අනුව තමන්ගේ DNA සැකැස්මට අනුකූල ජෛව විද්‍යාත්මක අනුකූලතාවයක් ඇති බෙහෙත් ඔබට ලැබෙන දිනය වැඩි ඈතක නොවේ.

බොහොමයක් වාහන විදුලියෙන් ආරෝපණය වී ධාවනය වෙද්දී, සූර්ය බලය සහ සුලං ආදී ස්වභාවික බලශක්ති ප්‍රභව වෙත බොහෝ රටවල් අවධානය යොමු කරාවි. සූර්යකෝෂවල මිල අඩුවීම නිසා මුළු ලෝකයම සිය බලශක්ති ජනනය පරිසරහිතකාමී ආකාරයට සිදු කරන්නට පටන් ගන්නේ තමන් විසින් කාර්මික විප්ලවයෙන් පසුව ලෝකයට කරන ලද හානිය අවම කර ගැනීමට විය හැකියි. නමුත් අපි දැනටමත් පරක්කු වැඩියි. මේ නිසාම අරාබිකරයේ තෙල් ඒකාධිකාරය බිඳ වැටී ඇමරිකා එක්සත් ජනපදය සහ රුසියාවේ තෙල් ඒකාධිකාරය ඉදිරියට එනු ඇති. මේ අතර ධ්‍රැව ආසන්නයේ වූ Permafrost තට්ටුව මෘදු වීම නිසා වායුගෝලයට මෙතේන් එකතු වීමනිසා කැනඩාව සහ ඇලස්කාව වැනි ධ්‍රැවීය ප්‍රදේශවල ජීවත්වන අයට ජීවිතය ගැටගසාගැනීමේ ප්‍රශ්න පැණනඟින්නට පුළුවනි.

ලෞකික සම්පත් මෙසේ වෙනස් වෙද්දී, අධ්‍යාත්මිකවද නොයෙකුත් වෙනස්කම් දැකිය හැකි වේවි. බටහිර ජාතීන් අධ්‍යාත්මිකව දියුණු වෙද්දී, දකුණු ආසියාව මිථ්‍යාදෘෂ්ඨියේ ඉහළටම ගමන් කරනු ඇති, එසේම අනාගමිකත්‍වයද ඉදිරියේදී හිස ඔසවමින් ලොව ප්‍රධානපෙලේ ආගම්වල පැවැත්මට අභියෝග එල්ල කරනු ඇති.

චීනය ආර්ථිකව බලවත් වෙද්දී, ඇමරිකාව තව තවත් ආර්ථිකව අඩපණ වනු ඇති. රුසියාව ප්‍රමුඛ ආසියාව වෙත ලෝක බලය නැඹුරු වන අතර, ඉන්දියාව ද බලවත් රාජ්‍යයක් වනු ඇති. සමහරවිට චීනයෙන් ලොව පළමු මානව ක්ලෝනය සහ කෘත්‍රිම මිනිසකු එලිදැක්වීමේ හැකියාවක්ද පවතී. මේ නිසා මානව විද්‍යාවේ සදාචාරාත්මක භාවය පිළිබඳ ප්‍රශ්න ඇතිවනු ඇති.

ත්‍රස්තවාදීන් වඩාත් තාක්‍ෂණශීලී වනු ඇති. ඔවුන් බෝම්බ වෙනුවට සයිබර් අවකාශය යොදා ගැනීමේ ප්‍රවණතාවය ඉහල යා හැකියි. එසේම ජීව විද්‍යාත්මක අවි පරිහරණය ඉහළ යා හැකි අතර උතුරු කොරියාව සහ මුස්ලිම් අන්තවාදීන් මේ කෙරෙහි අවධානය යොමු කරනු ඇති. ඒ සියල්ලම ඇමරිකාවේ සහ උතුරු කොරියාවේ යුධ ආකල්පමය හැසිරීම මත තීරණය වනු ඇති.

කෙසේ වුවත් මේ වෙනස්කම් ලංකාවට දැනෙන්නට බොහෝ කල් ගතවනු ඇති. ලංකාවේ දේශපාලනය තවත් අවුරුදු 10 කට මේ ආකරයෙන්ම පල් වෙමින් ගතවනු ඇති. නව දේශපාලන සංස්කෘතියක අවශ්‍යතාවය අපට දැනෙනුයේ මේ එකතැන පල්වෙන ගතානුගතික පැරණි දේශපාලනඥයින්ගේ ක්‍රමික අභාවයත් සමගයි. තරුණ පරපුර වඩාත් ආවේගශීලී වන අතර ලෝකය පැහැදිලිවම ඇතිහැකි – නැතිබැරි පරතරය වැඩිවෙමින් දෙකට බෙදෙනු ඇති. මුදල් වෙනුවට සියල්ල කාළයෙන් මැනෙන ලෝකයක් නිර්මාණය වීමේදී ලංකාවටද ඒ වෙනුවෙන් කාළය වැය කිරීමට සිදු වනු ඇති.

කෙසේ වුවත්, පවතින ක්‍රමය වෙනස් නොවී අපට ඉදිරි ගමනක් සිතිය නොහැකිවනු ඇති…

මේ සියල්ල ඒ අයුරින්ම සිදු නොවුනත්, ඒ හා සමාන දෑ  සිදුවීමේ ප්‍රවණතාවය ඉහළ බව දැනටමත් අන්තර්ජාලයේ සැරිසරන ඔබට පෙනී යනවා ඇති.

බීර බොමු…. නිරෝගී වෙමු… Editor ගේ කතුරට හසුවී රිවිර පුවත්පතේ පළ නොවූ ලිපිය

Editor අමද්‍යප වීම නිසා විද්‍යාත්මක ලිපියක් පුවත්පතක පළවීම කෙතරම් අසාධාරණදැයි මම නොදනිමි. නමුත්, ඒ පිළිබඳ රණ්ඩු කරගන්නට නොගියේ මේ ලිපිය මගේ බ්ලොග් අඩවියේ පළ කිරීමට හැකි නිසාත්, එවැනි ලිපියකට රණ්ඩු කිරීම මගින්, එය මගේ ලිපි කියවන බොහෝ දෙනාට සිදුවන අකටයුත්තක් නිසා බැවිනි…

මා එම කටයුත්ත අනුමත නොකළත්, ඔබ බොහෝදෙනෙකු රිවිර පුවත්පතේ පළවන ඒ ලිපි කියවීමෙන් යම් දැනුමක් ලබන බව මා දන්නා නිසාත්, ඔබ මට එය පවසන නිසාත්, සුළු සිදුවීමකට එවැනි අමනෝඥ තීරණයක් නොගැනීමට මා තීරණය කළෙමි.

මේ එම ලිපියයි.

මෙවර අයවැයෙන් බීර මිල අඩු වීමත්, සීනි අඩංගු කාබනේට් සහිත බීමවලට නව සීනි බද්දක් පැණවීමත් සමගම බොහෝ දෙනාට බීර පිළිබඳ මතකය අවදි වූවා. සීනි සහිත බීම පානයට වඩා බීර පානය සුව දායකද යන ප්‍රශ්නය නිසා, සෑම දේකටම කියන්නට දෙයක් ඇති සමාජ ජාල වෙබ් අඩවිකරුවන්ටත්, බීර රසවත් මාතෘකාවක් වුනා.

බොහෝ දෙනෙකු නොදන්නවාට බීර කියන්නේ ලෝකයේ වඩාත්ම පැරණිම සහ ජලය සහ තේ හැරුණුකොටගෙන වඩාත්ම වැඩියෙන් භාවිතා වන බීම වර්ගයයි. බීරවලට ඇත්තේ ක්‍රිස්තු පූර්ව 9500 කාළය දක්වා ඉපැරණි ඉතිහාසයක්. එය මිනිසා ධාන්‍ය වගාව ආරම්භකළ අවධිය තරම්ම පැරණියි. කවුරු කෙසේ කීවත්, මානව සංහතිය කිසියම් හෝ ආකාරයකට මධ්‍යසාර සමග බැඳී පවතින බවට මෙය ඉතා වැදගත් සාක්‍ෂියක්. එපමණක් නොවෙයි, ක්‍රිස්තු පූර්ව 5000 පමණ කාළයේදී ඉරාකයේ හාම්පුතුන්, සේවකයන්ට ගෙවීම් කර ඇත්තේ ද බීර වලින්. ඊජිප්තුවේ ගීසා හි පිරමිඩ ඉදිකළ මිනිසුන්ට දිනකට බීර ලීටර හතරක් හෝ පහක් ලබා දී ඇත්තේ පෝෂණය ලබාදීමට මෙන්ම වෙහෙස නිවාගැනීම සඳහා බව පුරාතන ලේඛණවල සඳහන්. එසේ සැලකීමේදී බීර ශිෂ්ඨාචාරයක මූලික අංගයක් බවට පත්වී ඇතිබව පෙනී යනවා.

එපමණක් නොවෙයි, බීර නිෂ්පාදනය සහ ඒ සම්බන්ධ ව්‍යාපාර ලෝකයේ ප්‍රධාන ව්‍යාපාරවලින් එකක්. ලොව පුරා වසරකට බීර ලීටර බිලියන 133 ක් නිෂ්පාදනය කෙරෙන අතර එය ඇමරිකානු ඩොලර් බිලියන තුන්සියයකට අධික ව්‍යාපාරයක්.

සාමාන්‍යයෙන් ඕනෑම සීනි සහිත ඕනෑම ද්‍රව්‍යයක් ක්‍ෂුද්‍රජීව ක්‍රියාකාරීත්‍වය නිසා මධ්‍යසාර බවට පත් වීමේ හැකියාවක් තිබෙනවා. සීනි සහිත මාධ්‍යය අනුව බීරවල තත්ත්‍වය වෙනත් ලක්‍ෂණ වෙනස් වනවා. වර්තමානයේ බීර නිෂ්පාදනයේ මූලික අමුද්‍රව්‍ය වන්නේ ජලය, සහ බාර්ලි ආදියයි. එයට අමතරව පැසීම සඳහා යීස්ට් වර්ග සහ රසය ලබාදීම සඳහා බීර මල් (Hops) භාවිතා වෙනවා. සීනි ප්‍රභවය ලෙස් ප්‍රධාන වශයෙන් භාවිතා වන බාර්ලි වලට අමතරව, තිරිඟු, හාල්පිටි, මිලට්, වැනි ධාන්‍ය වර්ගත්, සීනි, හා අර්තාපල්, මඥ්ඥොක්කා වැනි පිටි අධික අල වර්ග ද භාවිතා වනවා.

ජලය සෑම තැනකටම පොදු වුවත්, ජලයේ දියවී ඇති ලවණ වර්ග අනුව මූලිකවම වෙනස් වනවා. සමහර ජලය කිවුල් බවින් වැඩි අතර තවත් සමහර ජල මූලාශ්‍රවලටම ආවේණික ලවණ වර්ග සහ සාන්‍ද්‍රණයන් තිබෙනවා. බීරවල මූලිකම අංගය වන්නේ ජලයයි. එය බීර පරිමාවෙන් 93% ක්. මේ නිසාම ජලයේ තත්ත්‍වය අනුව බීරවල ද තත්ත්‍වය වෙනස් විය හැකියි. ගිනස් ස්ටවුට් සඳහා භාවිතා වන ඩබ්ලින් ප්‍රදේශයේ කිවුල් ජලය නිසා ස්ටවුට් වලට ආවේණික රසයක් ලැබී තිබෙනවා. ලෝකයේ වෙන කොතැනක ස්ටවුට් නිෂ්පාදනය කළත්, ඩබ්ලින් හි ජලය භාවිතා නොකරයි නම්, එයට ආවේණික රසය ලබාගත නොහැකියි. ඒ වගේමයි, පිල්ස්නර් සඳහා භාවිතා වන්නේ චෙක් ජනරජයේ Plzen ප්‍රදේශයෙන් ලබා ගන්නා මෘදු ජලයයි. මේ නිසා බීර නිෂ්පාදනයේදී මූලික ජල ප්‍රභවයෙන් ජලය ලබාගත නොහැකි නම්, එම ජලයේ සංයුතියට සමානවන ලෙස සියළුම ලවණ වර්ග එකතු කිරීමට නිෂ්පාදකයන් වගබලා ගන්නේ බීර පානය කරන පුද්ගලයින් එහි රසයේ සුළු වෙනසක් හෝ හොඳින් ග්‍රහණය කර ගන්නා නිසයි. ලංකාවේ අප බීර පානය කරන්නේ කුමන හේතුවකට වුවත්, බොහෝ රටවල බීර පානය කරන්නන් එ්වා ඉතාම භක්තිමත්ව භාවිතා කරන්නේ යැයි කිවහොත් නිවැරදියි.

බීර නිෂ්පාදනයේ දෙවන වැදගත්ම අංගය වන්නේ සීනි ප්‍රභවයයි. සීනි ප්‍රභවය අනුව ද බීර වර්ගයේ රස සහ සාන්‍ද්‍රණය ආදී ලක්‍ෂණ වෙනස් වනවා. පෙර සඳහන් කළාක් මෙන් බීර වල සීනි ප්‍රභවය ධාන්‍ය වුවත්, මේ ධාන්‍ය සැකසීමේදී එ්වා ජලයේ ගිල්වා මුල් අද්දවාගැනීම සිදු කළ යුතුයි. එසේ මුල් අද්දවාගත් ධාන්‍ය කිසියම් ප්‍රමාණයකට වේලාගැනීම සිදු කරන්නේ කෘත්‍රිම පෝරණු භාවිතයෙන්. එවිට ධාන්‍යවල වූ එන්සයිම ක්‍රියාකාරී වන්නට පටන් ගන්නවා. මේ නිසා උපරිම මධ්‍යසාර ප්‍රමාණය ලබාගැනීම කළ හැකියි. එසේම එකම ධාන්‍ය වර්ගය වුවත්, මුල් අද්දවා ගැනීමට යොදා ගන්නා කාළය සහ වේලා ගැනීමේ කාලය, උෂ්ණත්‍වය අනුව ලබා ගන්නා බීර වර්ගයේ රස සහ වර්ණය වෙනස් වනවා. අඩුවෙන් වේලාගත් ලා පැහැති ධාන්‍ය ලා පැහැති බීර ලබාදෙන අතර, වැඩි පුර කර වූ ධාන්‍ය ලබා දෙන්නේ තද පැහැති බීර වර්ගයි. ධාන්‍ය මුල් අද්දවා, වේලා බීර නිෂ්පාදනයට යොදා ගනිතත්, සමහර ධාන්‍ය මුල් ඇද්දවීමක් නොකර ම භාවිතා වනවා. ඉරිඟු, වී, රයි සහ ඕට් මෙන්ම තිරිඟු සහ සෝගම්, මෙසේ මුල් ඇද්දවීමකින් තොරව භාවිතා වන ධාන්‍ය වර්ගයි. ලෝකයේ සමහරක් මිනිසුන් ග්ලූටන් නම් ධාන්‍ය ප්‍රෝටීනවලට දක්වන සංවේදීතාවය නිසා දැන් දැන් බීර නිෂ්පාදනය ග්ලූටන් රහිත ධාන්‍ය වලින් සිදු කිරීමද කරන්නේ ලොව සැමටම එකසේ බීර රස විඳීමට අවස්ථාව සලසා දෙමින්.

කිනම් ධාන්‍ය වර්ගය භාවිතා කර කෙසේ බීර නිෂ්පාදනය සිදු කළත්, බීරවලට ආවේණික තිත්ත රසය ලබා දෙන්නට ලොව පුරාම භාවිතා වන්නේ එකම අමුද්‍රව්‍යයක්. එය බීර මල් හෝ Hops යනුවෙන් හඳුන්වනවා. මෙය ගංජා පවුලට අයත් ශාකයක්. ලොව බොහෝ දෑ එක් අවශ්‍යතාවයකට වඩා භාවිතා වුවත්, මේ බීරමල් ලෝකයේ ඇත්තේ බීරවලට තිත්ත රසය ලබාදීමේ ක්‍රියාවලිය සඳහා පමණමයි. බීර රසවත් ( හෝ තිත්ත) කිරීම සඳහා බීරමල් යොදා ගැනීම ක්‍රිස්තු පූර්ව 822 දක්වා දිව ගියත්, නිසි ආකාරයට ක්‍රමවත්ව වගාව සිදු කර ඇත්තේ ක්‍රිස්තු වර්ෂ 1300 සිටයි. බීර මල් මගින් බීරවලට තිත්ත රසය ලබා දෙනවා සේම මෝල්ට් නිසා ලැබෙන පැණිරසය ද සමනය කරනවා. මෙමගින් දෙහි, මල්, සහ ශාකමය සුවඳක් සහ රසක් බීරවෙත එක් කරනු ලබනවා. මේ Hops වල තිත්ත ගතිය ගණනය කිරීමට අන්තර්ජාතික තිත්තරස පරිමාණයක් භාවිතා කරනු ලබනවා. මෙයට අමතරව බීර මල්වල ආම්ලික ගතිය නිසා බීර කල්තබා ගැනීමේ හැකියාවක් ඇති අතර මෙහි ක්‍ෂුද්‍රජීව නාශක ගුණ අඩංගුව පවතිනවා. මේ නිසා යීස්ට්වලට අමතරව වෙනත් ක්‍ෂුද්‍රජීවීන්ගේ ක්‍රියාකාරීත්‍වය අඩපණ කිරීම මගින් බීර මත වූ පෙණ ප්‍රමාණය වැඩි කිරීමට සහ පෙණ තට්ටුව කෙතරම් කාළයක් රඳා පවතින්නේද යන්න තීරණය කිරීමටත් දායක වනවා.. මේ බීර මල් ඒ ආකාරයෙන්ම බීර පැසවෙන භාජන තුළට දැමීම සෑමවිටම සිදු වන්නේ නැහැ. මේ නිසා බීර මල්වල ඇති රසායන ද්‍රව්‍ය සියල්ල වෙනත් ද්‍රාවකයකට උකහාගෙන එය සාන්‍ද්‍ර ද්‍රාවණයක් ලෙසින් බීරවලට එකතු කරනවා. බොහෝ විට මේ ද්‍රාවකය වන්නේ හෙක්සේන්, මෙතිල් මධ්‍යසාරය හෝ මෙතිලීන් ක්ලෝරයිඩ් යන රසායනික ද්‍රාවකයි. මේ බීර මල් ද්‍රාවණය බීර පැසෙන සුවිසල් භාජනයට එකතු කිරීමේදී මේ ද්‍රාවකයනුත් එකතු වනවා. මෙහි බීර මල් සාන්‍ද්‍රණය ද්‍රාවක පරිමාවෙන් සියයට 2.2 කට වඩා වැඩි කරන්නේ නැහැ. නමුත්, ඉතා සුළු ප්‍රමාණවලින් හෝ ඉහත කී රසායන ද්‍රව්‍ය බීර සමග අපේ ශරීර තුළට ඇතුළු වනවා.

බීර පානය කරන්නන් බීර වල වූ තිත්ත රසයට මෙන්ම වීදුරුවට වත්කළ පසු බීර මත රැඳෙන පෙණ තට්ටුවටද එකසේ ඇළුම් කරනවා. මේ පිළිබඳ මති මතාන්තර බොහොමයි. සමහරු පෙළ තට්ටුව නිසා වැඩිපුර රසයක්, සහ සුවඳක් ලැබේ යැයි විශ්වාස කරන අතර වැඩිපුර පෙණ තට්ටුවක් තිබීමත් බීර ප්‍රමාණයේ අඩුවක් යැයි සිතන අයත් සිටිනවා. මේ නිසා බීර මත වූ පෙණ තට්ටුවේ ප්‍රමාණය සහ එහි කල්පැවැත්ම කෙරෙහි බීර නිෂ්පාදකයන් ඉතා දැඩි අවධානයක් යොමු කර සිටිනවා. එය වැඩිකර ගැනීමට මෙන්ම දිගු කාළයක් රඳවා තබා ගැනීමටත් විවිධ උපක්‍රම භාවිතා කරනවා. මේ නිසා ධාන්‍ය පැසවීමට පෙර අඹරන ප්‍රමාණය, ධාන්‍ය වර්ගය හෝ මිශ්‍රණය ආදිය ඉතා වැදගත් වනවා. උදාහරණයක් ලෙස බාර්ලි වලට වඩා වැඩි පෙණ ප්‍රමාණයක් සහ පෙණ තට්ටුවේ කල් පැවැත්ම තිරිඟු වලින් ලබාදෙනවා. මේ පෙණ තට්ටුව ලැබෙන්නේ බීර පැසවීමේ ක්‍රියාවලියේදී පිටවන කාබන් ඩයොක්සයිඩ් වායුව නිසායි. සීනි මත ක්‍ෂුද්‍රජීවීන් ක්‍රියාකිරීමේදී අතුරුඵලයක් ලෙස කාබන් ඩයොක්සයිඩ් පිටවනවා. මේ ප්‍රතික්‍රියාව බීර බෝතලයට දමා සීල් කළ පසුද සිදු වනවා. බීර බෝතලයක් විවෘත කිරීමේදී එය හැකිතාක් නොසොල්වා කළ යුත්තේ මේ නිසා. එවිට කාබන් ඩයොක්සයිඩ් පිටවන්නේ බීර හා එකතුව පෙණ වශයෙන්. වීදුරුවකට බීර වත්කිරීමේදී වීදුරුව ඇලකර වත්කරන්නේ මෙසේ පෙණ ඇතිවීම අඩුකර ගැනීමටයි.  සමහර බීරවර්ගවල මෙසේ කාබන්ඩයොක්සයිඩ් නිෂ්පාදනය සිදුවන්නේ අඩුවෙන් නිසා බෝතලවලට ඇසිරීමේදී පැණිබීම බෝතල් අසුරනවාක් මෙන් කෘත්‍රිමව කාබන් ඩයොක්සයිඩ් බෝතල වලට පොම්ප කරනවා. කෙසේ වුවත්, ස්වභාවිකව බෝතලය තුළ ම ඇතිවන ප්‍රතික්‍රියාවෙන් පිටවන කාබන් ඩයොක්සයිඩ් වැඩි රසයක් ලබාදෙන බවයි බීර පානය කරනන්නන් පවසන්නේ. නමුත් එය විද්‍යාත්මකව තහවුරු වී නැහැ.

බීරවල ප්‍රතික්‍රියාව සිදු කරන්නේ යීස්ට් මගින්. යීස්ට් සීනි මත ප්‍රතික්‍රියා කර ඇල්කොහොල් සහ කාබන් ඩයොක්සයිඩ් නිෂ්පාදනය කරනවා. එයට අමතරව යීස්ට් මගින් පෙනුම සහ රසයද එකතු කරනවා. බීර නිෂ්පාදනය සඳහා ක්‍ෂුද්‍රජීව ක්‍රියාකාරීත්‍වය අවබෝධ කරගැනීමට පෙර එය සිදු කර ඇත්තේ වාතයේ වූ බැක්ටීරියා භාවිතා කිරීමෙන්. එසේ වීමේදී බැක්ටීරියා මිශ්‍රණය අනුව රසය වෙනස්වන නිසා වර්තමානයේදී එක් එක් බීර නිෂ්පාදනය සඳහා එක් පිරිසිදු දිලීර වර්ගයක් භාවිතා කරනවා.  එය බොහෝවිට Saccharomyces cerevisiae නම් යීස්ට් වර්ගයයි. එය ක්‍රියාත්මක වන්නේ සෙන්ටිග්‍රේඩ් 15ත් 25ත් අතරයි. මේ උෂ්ණත්‍ව පරාසයේදී මධ්‍යසාරවලට අමතරව යීස්ට් විසින් එස්ටර් සහ වෙනත් ද්විතීයික රසකාරක නිෂ්පාදනයද සිදු කරනවා. මේ නිසා මධ්‍යසාර රසයට සහ සුවඳට අමතරව එයට ඇපල්, පෙයාස්, අන්නාසි, කෙසෙල් වැනි පළතුරු රස සහ සුවඳ ද එකතු වනවා.

මීට අමතරව බීරවල පාරදෘශ්‍යබව සහ වෙනත් ගතිලක්‍ෂණ නියමිත ආකාරයෙන් පවත්වා ගැනීමට විවිධ ද්‍රව්‍ය එකතු කිරීමද සිදු කෙරෙනවා. සාමාන්‍යයෙන් බීරවල සාන්‍ද්‍රණය 3% සිට 14% දක්වා වෙනස් විය හැකි වුවත්, බොහෝවිට එය 4% – 8% දක්වා පරාසයක තබා ගැනීමට බොහෝ නිෂ්පාදකයන් වගබලා ගන්නවා. බීර බෝතලවලට ඇසිරීමට පෙර සියළුම ක්‍ෂුද්‍රජීව ක්‍රියාකාරීත්‍වයන් නතර කිරීමට එය හොඳින් පෙරනු ලබනවා. එසේම එය අඩු උෂ්ණත්‍ව තත්ත්‍ව යටතේ ගබඩා කර තැබිය යුතුයි.

මේ තාක් ලොව නිපදවූ ඉහළම සාන්‍ද්‍රණය සහිත බීර වර්ගය වන්නේ  Snake Venom නම් 67.5% ක සාන්‍ද්‍රණයක් සහිත බීර වර්ගයයි. ලෝකයේ වඩාත්ම මිල අධිකම බීර වර්ගය වනුයේ ඇමරිකානු ඩොලර් 1000 ක වටිනාකමක් ඇති Vielle Bon Secours නම්බීර වර්ගයයි. දැනට ලෝකය පුරා බීර වර්ග 400 ක් පමණ දක්නට ලැබෙනවා.

යීස්ට් සීනි ද්‍රාවණය මත ක්‍රියා කරන ආකාරය අනුව ප්‍රධාන වශයෙන් ලෝකයේ බීර වර්ග දෙකක් තිබෙනවා. ඉහළ උෂ්ණත්‍වයකදී බීර ද්‍රාවණය මත සිදු වන යීස්ට් ක්‍රියාකාරීත්‍වය නිසා නිපදවෙන බීරවලට ඒල් (Ale)යන නම භාවිතා කරන අතර Pale Ale, Porter, Stout, Blonde, Belgian Ale, ආදිය ඒවාට උදාහරණ වෙනවා. පහළ උෂ්ණත්‍ව වලදී බීර ද්‍රාවණය පතුලේ සිදුවන යීස්ට් ක්‍රියාකාරීත්‍වය නිසා නිපදවෙන බීර ලාගර් (Lager) ගණයට අයත් වනවා. Pilsner, Bock, Marzen, Helles, Doppelbock, ආදිය ඒවාට උදාහරණයි.

බීර පානය කිරීමත් කලාවක්. බීර පානයට ලොල්වූ අය බොහෝ විට වෙනත් මධ්‍යසාර පානය කිරීමට ගිජුකමක් දක්වන්නේ නැහැ. බීර පානය කළ යුත්තේ ශීත කිරීමට පසුවයි. බීරවල රසය ඉස්මතු වන්නේ ශීතකිරීමට පසුවයි. බීර වර්ගය අනුව ඒවා සෙන්ටිග්‍රේඩ් 7 සිට 15 දක්වා විවිධ උෂ්ණත්‍වයන්හි ශීත කරනු ලබනවා. පාටින් අඩු සහ මෘදුබවින් වැඩි බීර වර්ග අඩු උෂ්ණත්‍වයකද, පාටින් වැඩි බීර වර්ග ඉහළ උෂ්ණත්‍වයක ද ශීත කරනවා.

බීර පානය සත්තකින්ම සීනි අඩංගු පැණිබීම පානයට වඩා ගුණදායක වුවත්, බීරවල මූූලිකම අන්තර්ගතය වන්නේ එතිල් මධ්‍යසාරයයි. සියයට 8 ක උපරිමයකට යටත් වූවිට එහි සියයට 92 ක්ම ඇත්තේ ජලයයි. එසේ වුවත් මධ්‍යසාර භාවිතයෙන් ලැබෙන අතුරු ප්‍රතිපල සියල්ලම බීර පානයටත් වලංගුයි. නමුත්, බීරවල ඇති අඩු මධ්‍යසාර ප්‍රතිශතය නිසා අනෙක් මධ්‍යසාරවලින් ඇතිවන ආචරණවලට වඩා අඩු බලපෑමක් බීර මගින් ලැබෙනවා. ඒ නිසාම කසිප්පු පානය කරනවාට වඩා බීර පානය සෞඛ්‍යාරක්‍ෂිතයි. මේ නිසාම දිනකට බීර වීදුරුවක් වැනි සුළු ප්‍රමාණයක් පානය කිරීම නිසා හෘදයාබාධ, ආඝාත සහ දියවැඩියාව වැළඳීමේ හැකියාව අඩුකරන බව වෛද්‍ය මතයයි. අනෙක් මධ්‍යසාර පානය කිරීමේදී පෝෂණය ලැබෙන්නේ බයිට් කෑම නිසා වුවත්, බීර පානයේදී බීරවල ඇති පෝෂ්‍ය පදාර්ථ නිසාම යම් පෝෂණයක්ද ලැබෙනවා. සාමාන්‍යයෙන් මැග්නීසියම්, පොටෑසියම්, සෙලීනියම්, පොස්ෆරස්, ක්‍රෝමියම් සහ විටමින් බී කාණ්ඩයේ විටමින් වර්ග බීරවල අන්තර්ගතයි. මේ නිසාම බීරවලට ද්‍රව පාන් (Liquid Bread)යැයිද සඳහන් කරනවා. කෙසේ වුවත් බීර පානය කරන්නන්ගේ උදරය ඉදිරියට නෙරා එන බවට පොදු මතයක් තිබෙනවා. කෙසේ වුවත්, එහි නියම සත්‍යතාවය වන්නේ බීර පානයත් සමග සිදුවන අධික ආහාර ගැනීම සහ ක්‍රියාකාරීත්‍වය නොමැතිකම නිසා උදරය නෙරා එන බවයි. නමුත් නොනවත්වාම බීර පානය කරන්නවුන් ගේ උදරය ඉදිරියට නෙරා ඒමේ සම්භාවිතාවයක් ඇති බව 2004දී කරන ලද පරීක්‍ෂණයකින් අනාවරණය වී තිබෙනවා.

මෙයට අමතරව බීර මල්වල ප්‍රතිඔක්සිකාරක බහුලයි. මේ නිසාම බීර පානය නිසා ශරීරයට වයින්වලින් ලැබෙන ප්‍රතිඔක්සිකාරක ගුණයට හා සමාන ගුණයක් ලැබෙන බව වෛද්‍ය මතයයි. බීර සාමාන්‍ය ප්‍රමාණවලින් පානය කිරීමෙන් අස්ථිවල ඝණත්‍වය ඉහළ යා හැකියි. මේ නිසා වයසට යත්ම සිදුවන අස්ථි භග්න අඩුවනවා සේම, බීරවල අඩංගු සිලිකන් සංයෝග නිසා ඔස්ටියෝපොරෝසිස් වැනි රෝගවලට භාජනය වීමේ හැකියාව අඩු වනවා. බීරවල අඩංගු විටමින් බී සංයෝග නිසා රක්තහීනතාවය, සහ හෘද රෝග වැළඳීමේ හැකියාව අඩු වනවා. බොහෝ දෙනා දන්නා දෙයක් වන්නේ බීර පානය නිසා වකුගඩුවල හෝ මුත්‍රාශයේ ගල් සෑදීම 40% කින් බවයි. බීරවල අඩංගු ජලය ප්‍රමාණය අධික නිසා බීර පානයේදී අධික ලෙස මුත්‍රා කිරීමට සිදුවනවා. මේ නිසා ශරීරයේ වූ විශ ද්‍රව්‍ය සහ අපද්‍රව්‍ය මුත්‍රා මගින් බැහැර වන නිසා ශරීරය පිරිසිදු කිරීමක් ද සිදු වනවා. එසේම බීරවල ඇසට නොපෙනෙන අන්දමේ ක්‍ෂුද්‍ර තන්තු දිය වී පවතිනවා. මේ නිසා එය ආහාර මාර්ග පද්ධතියේ ක්‍රියාකාරීත්‍වයටත් ඉතා හොඳයි. මේ සියල්ල වෛද්‍ය විද්‍යාත්මකවද සනාථ වූ කරුණුයි.

මේ කරුණු එසේ වී මුත්, බීර වුවත් අධිකව පානය කිරීම සෞඛ්‍යයට හානිදායකයි. බීර පානය නිසා ලෝකයේ මරණ සිදුවී යැයි සඳහනක් නොමැති වුවත්, 1814 වසරේදී ලන්ඩනයේදී බීර ටැංකියක් පිපිරී යාම නිසා බීර ගැලුම් 400,000 ලන්ඩනය පුරා ගලා යාමෙන් නිවාස දෙකකට හානි සිදුවී මරණ 9ක් වාර්තා වී තිබෙනවා. ලෝකයේ වැඩියෙන්ම බීර පානය කරන රට වන්නේ චෙක් සමූහාන්ඩුවයි. එහි මිනිසෙකු වසරකට බීර ගැලුම් 40 ක් පානය කරන අතර අන් රටවට වඩා බොහෝ ඉදිරියෙන් සිටිනවා. ලෝකයේ විශාලතම බීර උත්සවය වන්නේ ජර්මනියේ මියුනිච් නුවර දින 16ක් පුරා මිලියන 6 ක සහභාගීත්‍වයකින් පැවැත්වෙන ඔක්ටෝබර්ෆෙස්ට් සැණකෙලියයි. දැන් දැන් ලංකාවේද ඔක්ටෝබර්ෆෙස්ට් පැවැත්වෙන නිසා අපටත් ලෝක වාර්තාවකට හිමිකම් කියන්න අවස්ථාවක් අඩුවූ බීර බද්දත් සමග ලැබේවිද ?

 

පිටස්තරයා 18

නැහැ නැහැ ගීතිකා… එහෙම ප්‍රශ්නයක් නැහැ…… මම වරදවා වටහා ගන්නෙ නැහැ….

මට කවදාවත්  ආදරයක උවමනාවක් වුනේ නැහැ… මට මිතුරියෝ නම් ඕනතරම් හිටියා…. නමුත් ඒ කාත් එක්කවත් ආදරයෙන් වෙලෙන්න උවමනාවක් වුනේ නැහැ මට… ඒ වගේම මට පෞද්ගලිකත්‍වයක් තිබුණා ආරක්‍ෂා කර ගන්න… මගේ පියා එක්සත් ජාතීන්ගේ සංවිධානයේ ප්‍රබල චරිතයක් වුනා.. ඒ නිසාම මගේ පෞද්ගලිකත්‍වයට සීමා පැණවුනා… මගේ දෙමාපියෝ දෙන්නම බුද්ධාගමට බොහොම ලැදි උදවිය.. ඒ අය හැකි සෑම විටම බණ දහම් හැදෑරුවා… මම භාවනාවට පුරුදු වුනේ අවුරුදු 14 දි.. මගේ අම්මා තමයි මට ඒ දේ පුරුදු කළේ… ඒ නිසාම මම අධ්‍යාපනය අතින් පවා සෑහෙන ඉදිරියට ආවා.. මම ගොඩක් ක්‍රීඩා කළ කෙනෙක්.. ඒ සිත එකඟ කර ගැනීම මගේ අධ්‍යාත්මික වගේම පෞරුෂත්‍ව සංවර්ධනයටත් බොහෝ සේ බලපෑවා.. මගේ දෙමාපියෝ මිය ගියාට පස්සෙ මම ගොඩක් තනි වුනා… ඒ තනිය මකා ගන්න මම ලං වුනේ පොත්පත් වලට… මම ඒ කාලෙ සෑහෙන පොත්පත් කියෙවුවා… අම්මලා මිය ගියාට පස්සේ මට හමුවුනා භාවනායෝගී ස්වාමීන් වහන්සේ නමක්…. ඇමරිකාවෙ ඒ වගේ සිද්ධියක් බොහොම විරළ වුනත් මට කැලිෆෝනියා බෞද්ධ විහාරයෙදි යෝගාවචර රාහුල හාමුදුරුවො හමු වුනා… රාහුල හාමුදුරුවෝ ගැන නොදන්න බෞද්ධයෙක් ඇමරිකාවෙ නැහැනෙ…. එතැනදි මම විදර්ශනා භාවනාවට යොමු වුනා… අන්න ඒ නිසා මට ඇත්තෙන්ම ප්‍රේම සම්බන්ධතාවය කියන අවශ්‍යතාවය ඇති වුනේ නැහැ…. ඒ නිසාම මට මගේ අධ්‍යාපන කටයුතු බොහොම හොඳින් කර ගන්න ලැබුණා… ඒකයි මම අධ්‍යාපනය පැත්තෙන් පසුකාලීනව බොහෝ ඉදිරියට ආවෙ… විශ්ව සිය දීර්ඝ ඉතිහාසයෙන් බිඳක් ගීතිකා වෙත විවර කර දුන්නා…

මම පුදුම වෙන්නෙ නැහැ විශ්ව…. මට සුමනසේකර මහත්මයා කිවුවා ඔයා මොන වගේ පුද්ගලයෙක්ද කියලා… මම දැන් දන්නවා ඇයි ඔයා මේ තරම් ඉක්මනට පුනරුත්ථාපනය වෙන්නෙ කියලා… වෙන මිනිස්සු මාස තුන හතරක් ගන්නවා සුළු අනතුරකින් මනස ප්‍රකෘති තත්ත්‍වයට ගෙන එන්න.. නමුත් ඔයා සතියක් දෙකක් ඇතුලත ඒ තත්ත්‍වයට ලඟා වුනා… මම හිතනවා ඔයාගෙ මානසික ඒකාග්‍රතාවය ඒකට බලපාන්න ඇති කියලා… ඔයා මානසිකව දැන් නිදහස්… ඒ කියන්නෙ සාමාන්‍ය පුද්ගලයෙක්.. ඔයාට පුළුවන් ඔයාගෙ ශාරීරික පුනරුත්ථාපනයත් ඉක්මන් කරගන්න… වැඩිපුර මහන්සි වෙන්න අවශ්‍ය නැහැ. නමුත් ඔයාගෙ කකුල ඉක්මනින්ම සනීප වේවි… ඔයා හොඳ ප්‍රගතියක් පෙන්නුම් කරනවා.. මට බොහොම සංතෝෂයි…

ඔයා කොහොමද වෝල්ටර් රීඩ් එකට ආවෙ ? සාමාන්‍යයෙන් මෙතැන බොහොම ආරක්‍ෂිත තැනක්.. විශ්ව පෙරළා ගීතිකාගෙන් ඇසුවේ ඇගේ සුහදතාවය පිළිබඳ පැහැදීමකින්….

ඒක දිග කතාවක්…. ඔයාට වැඩක් වේවිද ඒක… ?

කියන්න බෑනෙ…. කැමැත්තක් තියෙනවා නම් කියන්න…. මම අහගෙන ඉන්නම්… මටයි කියලාත් දැන් ඉතිං වැඩක් නෑනෙ…..

මම සාමාන්‍යයෙන් මේ කතාව කාටවත් කියන්නෙ නැහැ… නමුත් ඔයාව විශ්වාස කරනවා… මේක කිවුවයි කියලා කාටවත් වැඩක් වෙන්නෙ නැහැ කොහොමටත්… ඇය දිගු සුසුමක් හෙළුවා…

:::::::::::::::::::::::::::::::::::::::::::::::::::::::::::::::::::::::::::::::::::::

මොලී ඇය එනතෙක් බලාසිටි අමුත්තා සිටි මේසයේ ඉතිරිව ඇති පුටුවේ අසුන් ගත්තාය. සෙනෙටර්ස් ක්ලබ් ආපනශාලාව කෙතරම් කාර්යබහුල වුවත් එතැන සිටි පුද්ගලයින්ගේ පෞද්ගලිකත්‍වය උදෙසාම මේස සකසා තිබුණේ එකිනෙකට ඈතිනි. ඒ එකිනෙකාගේ කතාබහ අනෙක් මේසවල සිටින පුද්ගලයින්ට නෑසෙන ලෙස සිය සේවාදායකයින් ආරක්‍ෂා කර ගැනීමේ උපාය මාර්ගයක් ලෙසින්. මෙතැන සිදු වූ කතා බහ අතර ලෝක ඉතිහාසය වෙනස් කළ තීරණ පවා තිබූ බව දන්නේ ආපනශාලාවේ මේස සහ පුටු පමණි. මොනිකා ලෙවින්ස්කි තමා ඇමරිකානු ජනාධිපති බිල් ක්ලින්ටන් සමඟ පැවැත්වූ අසාමාන්‍ය සම්බන්ධතාවය පෝලා ජෝන්ස් හට හෙළි කළේ මේ අවන්හලේ එක්තරා ස්ථානයකදීය. එය ජනාධිපති බිල් ක්ලින්ටන්ට ලිංගික අපචාර සම්බන්ධයෙන් දෝෂාභියෝගයක් ගෙන ඒමට තරම් ප්‍රබල විය. මේ එක් උදාහරණයක් පමණි.

ඇයි අන්කල් ? මොකක් හරි ප්‍රශ්නයක්ද ?

සිය අසුනේ හරිබරි ගැසී වාඩි වී ඉදිරිපස අසුනේ වූ සිය මාමණ්ඩිය දෙස සෘජුවම බලාගෙන මොලී සෙමෙන් ඇසුවාය. ඔහු සිය ඥාතියෙකු බව දන්නේ වොෂිංටනයේ ඉතාම ස්වල්ප දෙනෙකු පමණි.  එසේම ඔහුටද, ඇය ඉතාම විශ්වාසවන්ත සේවිකාවක වූවා.. මේ නිසාම තමන්ගේ සම්බන්ධය පිටතට නොපෙන්වන්න දෙදෙනාම වගබලාගත්තා පමණක් නොව, සාමාන්‍ය වෘත්තීයමය අවස්ථාවලදී ඔහු මොලීටත් සැලකුවේ කිසිදු විශේෂත්‍වයක් නොපෙන්වා. මේ නිසාම ක්‍ෂෙත්‍රයේ කිසිම කෙනෙක් මේ ඥාතීත්‍වය හෝ සම්බන්ධය දැන සිටියේ නැහැ. දන්න ටික දෙනාත් ඒ රහස හොඳින්ම රැකගෙන සිටියා.

කොහොමද ජෙනී ? වැඩ කටයුතු හොඳින් කෙරෙනවද ?

ඔව්… දැන් අළුත් පර්යේෂණයත් පටන් ගන්නයි යන්නෙ.. විශ්ව සනීප වෙලා ආපු හැටියෙ අපි දෙන්නා එකතු වෙලා ඉක්මනින්ම ඒක පටන් ගන්නයි යන්නෙ..

මොකද විශ්ව මේ දවස්වල කරන්නෙ ?

විශ්ව දැන් ඉන්නෙ පුනරුත්ථාපන ඒකකයෙ. මේ දවස්වල එයා බිඳුන කකුළ පුනරුත්ථාපනය කරන්නයි මහන්සි වෙන්නෙ.. මානසිකව නම් යථා තත්ත්‍වයට ඇවිත්, මට නම් හිතාගන්න අමාරුයි එයා මෙච්චර ඉක්මනින් මෙහෙම පුනරුත්ථාපනය වුන එක… සාමාන්‍ය සොල්දාදුවෙක් නැතිනම් නාවික සීල් භටයෙක් වත් මේ තරම් ඉක්මනට මානසිකව පුනරුත්ථාපනය වෙන්නෙ නැහැ.. හැරත් එයා සතියක්ම සිහිය නැතිව ඉඳලා මෙහෙම ඉක්මනට සනීප වුන එක ගැන මටත් පුදුමයි. අංකල් දන්නවනේ අච්චර දරදඬු ක්‍ෂෙත්‍ර ඒජන්තයො කොච්චර කල් ගන්නවද කියලා පුනරුත්ථාපනය වෙන්න…

වේටර්වරිය ආහාර ඇනවුම භාරගැනීමට පැමිණිහෙයින් සිය කතාව නතර කළ මොලී සැන්ඩ්විච් එකක් සහ දෙහි යුෂ වීදුරුවක් ඇනවුම් කළාය…. ඉන් අනතුරුව ඔහු සිය ගැඹුරු කටහඬ අවදි කළේය.

මට තේරෙනවා ජෙනී.. ඒකම තමයි මම අද ඔයාව හමුවෙන්න තීරණය කළේ. ඔයා මේ ගැන දරන ආකල්පය මොකද්ද ? අපි මේ මනුස්සයා පස්සෙ මේ තරම් දුවන එකේ තේරුමක් තියෙනවද ? අපි මේ වැය කරන්නෙ රටේ සල්ලි, කාළය… ඔයා හිතනවද මේ දෙයින් අපි කිසියම් ප්‍රයෝජනයක් තියෙනවා කියලා

මම පෞද්ගලිකව නම් හිතන්නෙ නැහැ අපට විශ්වගෙන් ලොකු තොරතුරක් ලබාගන්න පුළුවන් වේවි කියලා. මේ දවස් කීපයට මම නිරීක්‍ෂණය කළ දෙයක් තමයි විශ්වගෙ පසුබිම බොහොම සාමාන්‍ය පසුබිමක්, එයාගෙ පවුලෙ සහ ඥාතීන් සියල්ල බොහොම සාමකාමී අය.. ඒ නිසා ප්‍රචණ්ඩත්‍වයක් ගැන නම් කිසිම සාධකයක් නැහැ. බොහොම ආගමානුකූලයි. විශ්ව භාවනාවටත් යොමු වෙලා කියලයි එයාගෙ මාමා කිවුවෙ…. නමුත් වෘත්තීයමය වශයෙන් ගත්තොත් විශ්වට බොහොම ශක්තිමත් පෞරුෂත්‍වයක්, මතකයක්, බුද්ධියක් තියෙනවා. ඉතින් ඔයාට පුළුවනි විශ්ව වෙනත් වැදගත් කාර්යයකට යොදා ගන්න.. නමුත් මම හිතන්නෙ නැහැ විශ්ව තමන්ගෙ ප්‍රතිපත්තිවලට පටහැණි තීරණයක් ගනීවි කියලා… එයා හරිම හොඳ කෙනෙක්….. නමුත් මම දන්නවා හොඳයි කියලා පිටින් පෙන්නගෙන ඉන්න සමහරු අන්තිම මෘගයො වගේ ක්‍රියා කරන අවස්ථා…

මට කියන්න තියෙන්නෙ මම විශ්වට පෞද්ගලිකවත් කැමතියි කියලා….. මම කැමති නැහැ එයාට මේ නිසා කරදරයක් වෙනවා නම්…

ජෙනී…. මේ ඔයාමද කතා කරන්නෙ ? සිය ඥාති දියණියගෙන් මෙවන් ප්‍රකාශයක් බලාපොරොත්තු නොවූ නිසා, අතිශයින් හැඟීම් පාලනය කරන්නකු සේ සුපතල ඔහුගේ දෑස් විශාල වූයේ ඔහුටත් නොදැනුවත්වමය…

මොලී කිසිවක් නොකියූවාය……………..

:::::::::::::::::::::::::::::::::::::::::::::::::::::::::::::::::::::::::::::::

ඉතින් මම ඒ සියල්ල අමතක කරලා වෝල්ටර් රීඩ් එකට ආවෙ අවම වශයෙන් එයා වෙනුවෙන් වෙන්න ඕන දෙයක් තිබෙනවා නම් එයාගෙ සහෝදර සොල්දාදුවොන්ටවත් වෙදකම් කරලා ඒ අය නැවතත් මේ ලෝකයට ගේන්න….ගීතිකා  දිගු සුසුමක් හෙලා සිය කතාව නිම කරද්දී ඇගේ නෙතඟින් ඇයටත් නොදැනීම කඳුලක් මතු වී තිබුණා…

ඔයාගෙයි මගෙයි අතීතෙ ලොකු වෙනසක් නෑ ගීතිකා.. විශ්ව සෙමෙන් පැවසූවේ තම දෙමාපියන් සහ ආදරණීය නැඟණිය නැවතත් සිහි වූ නිසාමයි…

ඒ දුක්බර සාකච්ඡාව නිමා වුනේ ගීතිකාගේ පේජරයට ලැබුණ කෙටි පණිවුඩයත් සමඟ..

අන්න නෑදෑයො ඇවිත් ලෙඩාව බලන්න… අපි යමු…….

ගීතිකා විශ්ව ද සමඟින් අමුත්තන් රැඳී සිටින ශාලාව වෙත පැමිණෙන විට සුමනසේකර යුවල සිනාසෙමින් ඒ දෙස බලා සිටියා…

ගොඩක් වෙලාද ඇවිත් ? විශ්ව ලොකු නැන්දාගෙන් ඇසුවේ සිනාසෙමින්…

ටිකක් වෙලා… අපි හිතුවා ඔයාට බාධා නොකරන්න…. ඇවිදින තරමට කකුලට හොඳයි නෙ….

ගීතිකා ඔවුන්ගෙන් සමුගෙන ගොස් නැවත පැමිණියේ තරමක සුභ ආරංචියක් ද රැගෙන….

මේ ප්‍රගතියෙ හැටියට විශ්වට තව දින තුනකින් විතර ගෙදර යන්න පුළුවන් කියලා ප්‍රධානියා කිවුවා… ඇය සිනාසෙමින් පැවසූවා…

හතර දෙනාගෙම මුහුණේ ඇඳුනේ සැනසුමක සිනා රැල්ලක්…..

:::::::::::::::::::::::::::::::::::::::::::::::::::::::::::::::::::::

පසුවදා මොලී පැමිණියේ තවත් ආරංචියක් රැගෙන… ඒ විශ්වත් ඇයත් එකතු ව සිදු කරන්නට නියමිත පර්යේෂණයට අවශ්‍ය අරමුදල් අදාල ආයතනයෙන් ලැබීමට නියමිත ආරංචිය. ඒ නිසා විශ්වගේ සිතේ නැවතත් තම පර්යේෂණය පිළිබඳ මතකයන් මෝදුලන්න පටන් ගත්තා…

මොලී… ඔයාට පුළුවන්ද මට අර පර්යේෂණ පත්‍රිකා ටික එවන්න ? එතකොට මට මෙතැන ඉන්න වෙලාවෙ ඒ ටික කියවලා නැවත මගේ මතකය අළුත් කරගන්න පුළුවනි.

ඉන්න, මට දැන්මම දෙන්න පුළුවනි… මොලී සිය අයි පෑඩ් එක ගෙන එහි වූ ලිපිගොණුවක් විවෘත කර විශ්වට පෙන්වූවාය… මම මේ ටික ඔයාට දැන්මම එවන්නම්, ඔයාට නිදහසේ කියවන්න පුළුවනි.. එතකොට අළුත් අදහස් ඇති  වෙන්නත් බැරි නැහැ…

ඒ සමඟම පැමිණි හෙදියක් විශ්වගේ රුධිර සාම්පලයක් ලබා ගැනීමට අවශ්‍ය බව දැන්වූවාය…. මොලී ඇයට ඉඩ දී මඳක් පසුපසට විය….

ඇයි මේ තරම් මගෙන් රුධිර සාම්පල් ගන්නෙ ? දැනට හතරක්ම ගත්තා නේද ? මොකක් හරි ප්‍රශ්නයක් තියෙනවද ?

නැහැ නැහැ… අපි මේ රුධිර සාම්පල් ගන්නෙ ඔබේ සෞඛ්‍ය තත්ත්‍වය පරීක්‍ෂා කරන්න… ඔබට ලබා දුන් බෙහෙත්වල අතුරු ප්‍රතිපල තිබෙනවද කියලා දැනගන්න අපි මේ රෝහලේ ඉන්න සෑම රෝගියෙකුගේම රුධිර සාම්පල් අරගන්නවා.. මේකත් එක්තරා ආකාරයක පර්යේෂණයක්…

ඔව් විශ්ව… මේ වගේ රජයෙන් පාලනය වෙන රෝහලක ඉන්නව නං මේ වගේ පර්යේෂණ වලට දායක වෙන්න සිදු වෙනවා. සාමාන්‍යයෙන් හමුදා නිලධාරීන්ට සහ සොල්දාදුවන්ට නම් මේ පරීක්‍ෂණ සාමාන්‍ය දේවල්… අපි රජයට සහ පාරිභෝගික ආරක්‍ෂණ අධිකාරියට දත්ත යවන්නෙ මේ ලබා ගන්න සාම්පල් වලින්. ඒ වගේම අපට පුළුවනි කිසියම් බෙහෙතකට රෝගියෙකු දක්වන අහිතකර ප්‍රතිචාරයක් තිබෙනවා නම් ඒ බෙහෙත වහාම නවත්වලා වෙනත් බෙහෙතක් ලබා දෙන්න… මේ ක්‍රමයේ වාසි බොහොමයක් තිබෙනවා. නමුත් පෞද්ගලික රෝහල්වල මේ දේ කරන්න බැහැ… ගීතිකා ද එතැනට පැමිණ සිටි නිසා හෙදියගේ විස්තරයට තම දැනුමද එක් කළා.

::::::::::::::::::::::::::::::::::::::::::::::::::::::::::::::::::::::::::::::::::::::::::::::::::

ඔන්න අහුවුනා වැඩේ…. ජේසන්ගේ මුව රැඳී තිබුණේ ජයග්‍රහණයක් මුසු සිනා රැල්ලකි…

මොන වැඩේද ?

ලේ සාම්පල් වල වෙනස අහු වුනා…..

මේ තියෙන්නෙ සම්මුඛ පරීක්‍ෂණය දවසෙ ගත්ත ලේ සාම්පලය….. කිසිම ආගන්තුක ද්‍රව්‍යයක් නෑ… හරිද ?

හරි…

මේ තියෙන්නෙ අනතුර වුන දවසෙම ගනිපු සාම්පලය….. වැඩි වෙනසක් නෑනෙ….

කෝ බලන්න……….. මයික් විමසිල්ලෙන් බැලුවා…….

මේ තියෙන්නෙ අනතුරෙන් දවස් තුනකට පස්සෙ ගනිපු සාම්පලේ…… මෙන්න මෙතැනයි වෙනස තියෙන්නෙ…. ඔන්න දැන් සාම්පලේ තත්ත්‍වය සාමාන්‍ය ගණනට පත් වෙනවා……..

මේ තියෙන්නෙ අනිත් සාම්පල්…. දැන් පේනවනෙ…. මේ හැම එකක්ම ටික ටික සාමාන්‍ය ගණනට හැම අගයක්ම එනවා… මෙන්න මෙතැනයි ප්‍රශ්නය තියෙන්නෙ…. කොහොමද මෙයා මෙච්චර ලේ පිරිසිදුව තියා ගන්නෙ කියන එක…..

විශේෂයෙන් බෙහෙතක් ගන්නවා නම්, ඒක ලේ සාම්පල් එකේ පෙන්වන්න ඕන නේද ? මයික් ඇසුවෙ ජේසන්ගෙ නොනවතින කියැවිල්ලට තිතක් තබමින්….

ඔව්… නමුත් එහෙම දෙයක් පෙන්වන්නෙත් නෑ… එක්කෝ මෙයා අර පාවිච්චි කරන තෙල් සාම්පලයෙ හරි නැතිනම් අර Milk Thistle පැලෑටියෙන් ලබා ගන්න දෙයක් හරි, එහෙමත් නැතිනම් මේ දෙකෙන්ම ලැබෙන ගුණයක් මත තමයි මේ මෙයා ලේ පිරිසිදුව තියා ගන්නෙ…

ඉතිං ඒක නීති විරෝධී නැහැනෙ….. ඒ නිසා අපට මුකුත් කරන්න බැහැ නේද ?

ඇත්ත… නමුත් මේක හොඳ සොයාගැනීමක් වෙන්න පුළුවන්…. බලන්න පිළිකා රෝගීන් කොච්චර කීමොතෙරපි (Chemotherapy) නිසා දුක් විඳිනවද ? ඒ මිනිස්සුන්ගෙ ලේ පිරිසිදු කරගන්න මෙන්න මේ වගේ ක්‍රමයක් හොයා ගන්න පුළුවන් නම්, කොච්චර සෙතක් වෙන්න පුළුවන්ද ?

එහෙනම් අපි එයාගෙන් කෙළින්ම ඇහුව නං මේ ගැන අහගන්න තිබුණනෙ… මෙච්චර වටේ යන්නෙ නැතුව ?

කෙළින්ම අහන්න ? එතකොට එයා දන්නවනෙ අපි හොරෙන් එයා ගැන හොයලා බැලුවා කියලා ! මොළයක් නැද්ද ?

 

රට කැළඹූ තෙලේ ගුණාගුණ

සත්ත්‍වයා ස්වභාවයෙන්ම කලබලවන සුළුය. දෙල් කොළයකට වැටුන බෙලි ගෙඩියක් නිසා ලෝකය පෙරලෙනවා යැයි කැලේ කඩාගෙන දිවූ හාවාගේ කතාව ඔබට අමතක නැතැයි සිතමි. තෙල් නැවක වූ තත්ත්‍වයෙන් බාල තෙල් තොගයක් වූ නිසා එය ආපසු හරවා යැවූ බවට සැලවූ ප්‍රවෘත්තියත් සමගම කලබල වූ අපේ ඇත්තන් කළ අලකලංචිය නිසා පසුගිය සතියේම සිදු වූ කලබැගෑනිය ඔබට අමතක වූයේ අයවැය පිළිබඳ අවධානය යොමු වූ නිසා බව හොඳින්ම අප සැවොම දනිමු. ඒ හේතුව නිසා බොහෝ ඉන්ධන පිරවුම්හල් අසල සැතපුම් ගණන් දිග පෝලිම්ද, ඒ හා ආශ්‍රිත විවිධ සමාජ ජාල කතිකාවන්, පින්තූර සහ බොහෝ නිර්මාණශීලී අදහස් ගොන්නක් සමාජයට එකතු වීමක් ද සිදු වුනා.

2013 වසරේදීත් බාල තෙල් පිළිබඳ ප්‍රශ්නය පැණ නැගුනා. එවිට තත්ත්‍වයෙන් බාල පැට්‍රෝල් වෙළඳපොලට නිකුත් කිරීම නිසා මෝටර් රථ බොහොමයක එන්ජින් ක්‍රියාවිරහිත වන තත්ත්‍වයට පත් වූවා. තෙල්වල තත්ත්‍වය යනු කුමක්ද ? එසේත් නැතිනම් ද්‍රව ඉන්ධන යනු කුමක්දැයි මේ ලිපිය කියවන බහුතරයක් දෙනාට එතරම් දැනුමක් නැත් වෙන්නට පුළුවනි.

අප භාවිතා කරන බොහොමයක් ඉන්ධන අයත් වන්නේ ෆොසිල ඉන්ධන යන කාණ්ඩයට, එය අවුරුදු දහස් ගණනක් තිස්සේ  ස්වභාවයෙන් සිදු වන නිර්වායුමය දිරාපත්වීමට භාජනය වන සත්ත්‍ව සහ ශාක කොටස්වලින් සැදුන දෙයක්. සමහරවිට මෙම සත්ත්‍ව සහ ශාක කොටස්වල වයස අවුරුදු මිලියන 650 ඉක්මවනවා. මේ ක්‍රියාවලිය ඉතා සෙමින් සිදු වන්නක්. එසේ වුවත්, ෆොසිල ඉන්ධන කැණීම සහ ලබා ගැනීම මහා පරිමාණයෙන් සිදු වන්නක්, ඒ නිසා ඉන්ධන වර්ග ඉතා ඉක්මනින්ම අවසන් විය හැකියි. මේ ෆොසිල ඉන්ධනවල දිරාපත්වීම නිසාම ඒවා ඉතා ඉහළ කාබන් ප්‍රතිශතයක් තිබෙනවා. ෆොසිල ඉන්ධනවලට පෙට්‍රෝලියම්, ගල් අඟුරු සහ ස්වභාවික ජීව වායු යන දෑ අයත් වෙනවා. මේ අනුව එය තනි කාබන් පරමාණුවක් ඇති මෙතේන් වායුවේ සිට තාර, ගල් අඟුරු දක්වා විශාල පරාසයක සංයෝග ප්‍රමාණයක් තැනීමට දායක වෙනවා..

ෆොසිල ඉන්ධන තැනෙන්නේ මියගිය ශාක සහ සත්ත්‍ව කොටස් අවුරුදු මිලියන ගණනක් තිස්සේ පොළව තුළ තාපයට සහ පීඩනයට හසුවෙමින් සිදුවන නිර්වායු ප්‍රතික්‍රියාවකින්. මෙය විද්‍යාගාර තත්ත්‍ව යටතේ තවමත් ප්‍රතිනිර්මාණය කිරීමට කිසිවකු සමත් වී නැහැ. මේ ෆොසිල ඉන්ධන සියල්ලම යොදා ගැනෙන්නේ බලශක්ති නිෂ්පාදනයට. එයට අමතරව පිරිපහදුවෙන් ලැබෙන වෙනත් සංයෝග රසායනික කර්මාන්තවලට භාවිතා වනවා. ලෝකයේ දැනට බලශක්ති ජනනයෙන් සියයට 80කටම තවමත් දායක වන්නේ ෆොසිල ඉන්ධන දහනයයි. දැන් දැන් සූර්ය බලශක්තිය සහ සුළං බලය උපයෝගී කර ගත්තද, මේ ප්‍රතිශතයට අභියෝග කිරීමට තවමත් අන් කිසිදු බලශක්ති ප්‍රභවයක් සමත් වී නැහැ. අවසානයට ලෝකයේ බලශක්ති ශක්‍යතාවය ගණන් බැලීම සිදු කර ඇත්තේ 2005 වසරේදීයි. ඒ අනුව ලෝකය සතුව දැනට ගල් අඟුරු ටොන් බිලියන 905 ක්, තෙල් බැරල් බිලියන 1120-1317 අතර ප්‍රමාණයක් සහ ස්වභාවික ජීව වායු බැරල් බිලියන 1160 කට ආසන්න ප්‍රමාණයක් ඇති බව සොයාගෙන තිබෙනවා. එසේ වුවත්, දිනපතා නිෂ්පාදනය නම් විශ්මය දනවනසුළුයි. මේ නිසාම නුදුරු අනාගතයේදී ඉන්ධන අර්බුධයක් ඇතිවිය හැකි බව බලශක්ති විද්‍යාඥයින් නිතර නිතර අනතුරු හඟවා තිබුණා. දිනෙක ලොවපුරා නිපදවෙන ගල් අඟුරු නිෂ්පාදනය මෙට්‍රික් ටොන් මිලියන දහසයකට අධිකයි, එය තෙල් බැරල් මිලියන පනස් දෙකකට සමානයි. එසේම ද්‍රවතෙල් බැරල් මිලියන අසූහාරදාහක් නිපදවෙන අතර ජීව වායු බැරල් බිලියන දහනවයක නිෂ්පාදනයක් දිනපතා ලොව පුරාම සිදු වනවා. මේ දත්තයන් මෙසේ වුවත්, 2005 න් පසුව බොහෝ ඉන්ධන සම්පත් ලොව පුරා සොයාගෙන තිබෙනවා. ඇමරිකා එක්සත් ජනපදයේ සහ උත්තරාර්ධගෝලයේ ධ්‍රැව ආසන්නයේ ඇති ඉන්ධන ප්‍රමාණය කෙතෙක්දැයි තවමත් ගණන් බලා නැහැ. ඒ අනුව ලෝකය පුරා තවත් වසර 200 කට ද්‍රව ඉන්ධනත්, වසර 500 කට සරිලන ප්‍රමාණයකට ජීව වායු සංචිත සහ තවත් වසර 2000 කට සරිලන ලෙස ගල් අඟුරුත් ඇතිබවට විද්‍යාඥයින් අනාවැකි පළකර සිටිනවා. විද්‍යාඥයින් විසින් පසුගිය සතියේ ලොව දැනට සොයාගත් විශාලතම පීට් (Peat) තැන්පතුව මධ්‍යම අප්‍රිිකාවේ කොංගෝ වනාන්තරයෙන් සොයාගත්තා. එංගලන්තය තරම් විශාල එය කාබන් මෙට්‍රික් ටොන් බිලියන 30 ක්, එනම් මුළු ලෝකයේම අවුරුදු 3 ක් පුරා පිටවන කාබන් ප්‍රමාණයට සමාන ප්‍රමාණයක්.

මේ සියල්ල පවතින්නේ මැදපෙරදිග කලාපයෙන් බැහැර නිසා දැන් දැන් මැදපෙරදිග රටවල් සිය අනාගත අභියෝගයන්ට මුහුණ දීමට විකල්ප බලශක්ති ප්‍රභව කරා යොමුවෙමින් පවතිනවා. මේ හේතුව නිසාම ඒවා වැඩි වැඩියෙන් සූර්ය බලශක්ති බලාගාර පිහිටුවීම සහ කෘත්‍රිම බුද්ධිය භාවිතා කර බලශක්ති පරිභෝජනය කාර්යක්‍ෂම කිරීමට පියවරගෙන තිබෙනවා. ඒ අනුව බොහෝ රටවල් වසර 2030 වනවිට ඉන්ධන භාවිතයෙන් ධාවනය වන මෝටර් රථ තම රටවලින් ඉවත් කිරීමට සහ හරිත බලශක්ති ප්‍රභව ඇසුරින් බලශක්තිය ජනනය කිරීමට පෙළඹීම සිදුවෙමින් පවතිනවා. ලංකාවේද මේ ප්‍රවණතාවය අනුව 2040 වනවිට ඉන්ධනවලින් ධාවනය වන මෝටර් රථ ධාවනයෙන් ඉවත් කිරීමට යෝජනා වීම සහ සූර්ය බලශක්තිය ජනනයට වැඩිපුර අවධානය යොමුකිරීම අයවැය මගින් යෝජනා කිරීම පරිසරයට ආදරය කරන අපගේ සතුට දනවන කාරණයක්.

ඉන්ධන භාවිතා කිරීම නිසා සිදුවන පරිසර හානිය අතිමහත්, ෆොසිල ඉන්ධනවල කාබන් ප්‍රතිශතය ඉහළ නිසා, දැවෙන සෑම කාබන් පරමාණුවකම අවසාන ප්‍රතිඵලය වන්නේ කාබන් ඩයොක්සයිඩ්. ඉන්ධන සොයාගෙන සිදුවූ කාර්මික විප්ලවයට පෙර සියයට 0.0298 (298 ppm) ව තිබූ වායුගෝලීය කාබන් ඩයොක්සයිඩ් ප්‍රතිශතය මේ වනවිට 0.0410 (410 ppm)දක්වා ඉහළ යාම ම මිනිසුන් පරිසරයට කර ඇති හානිය මොනවට කියාපෑමක්. මේ වනවිට චීනයේ සුවිසල් නගර, ඉන්දියාවේ නවදිල්ලි නුවර ආදී ප්‍රදේශ වායු දූෂණය නිසා හදිසි තත්ත්‍වයන් ප්‍රකාශ කිරීම දක්වා දුරදිග ගොසින්. ඒ අනුව නගරවලට ඇතුළුවන වාහන ප්‍රමාණය සීමා කර තිබෙනවා. ලංකාවේද මහනුවර මේ තත්ත්‍වය දැන් දැන් දකින්නට පුළුවනි. මහනුවර බොහෝ දෙනාට ශ්වසන ආබාධ ඇතිවී ඇත්තේ වාහන දුම් ඒ ප්‍රදේශයේ දිගුකලක් රැඳීපැවතීම නිසයි. කොළඹ අහස පවා උදෑසන අඳුරු ස්වභාවයක් ගන්නේ වාහන දුම නිසා පිටවන සංයෝග ඉහළ අහසේ රැඳී තිබීම නිසායි.

අප වාහනවලට භාවිතා කරන පෙට්‍රෝල් සහ ඩීසල් ලබා ගන්නේ බොරතෙල් පිරිපහදුව මගින්. බොරතෙල් රත් කර, භාගික ආසවනය නම් ක්‍රියාවලියට භාජනය කර බොරතෙල්වල ඇති විවිධ සංඝඨක වෙන්කරගනු ලබනවා. ඒ අනුව තාපාංකය අඩු ප්‍රොපේන්, බියුටේන් වැනි වායූන් ඉක්මනින් පිටවන අතර සිසිල් කිරීම මගින් ඒවා එකතුකරගනු ලබනවා. රසායනික කර්මාන්තවලට භාවිතා කරන නැෆ්තා නම් පොදු රසානික සංඝඨක නිකුත් වන්නේ වායුන්ට වඩා තරමක ඉහළ උෂ්ණත්‍වයකදීයි. ඉන් අනතුරුව ගුවන්යානා ඉන්ධන, ඩීසල්, පෙට්‍රෝලියම් ඉන්ධන සහ නැව්, විදුලි ජනන යන්ත්‍රවලට භාවිතා කරන ඉන්ධන ලබා ගන්නවා. බිටුමන් සහ තාර ආදිය අවසාන ඉතිරිවන කොටස ලෙස පිරිපහදුවෙන් ඉවත් කර ගැනීමෙන් සංඝඨක වෙන් කිරීම අවසාන කරගන්නවා.  මෙය සරළව විස්තර කළද, මෙහි ප්‍රායෝගික ක්‍රියාවලිය ඉතා සංකීරණයි. මෙයට නිසි උෂ්ණත්‍වය මෙන්ම පීඩනයද ප්‍රශස්තව පවත්වාගත යුතුයි. සුළු වෙනස්වීමක් වුවත් පිරිපහදුවෙන් පිටවන සංඝඨකවල තත්ත්‍වයට බලපාන නිසා මෙය ඉතාමත් සීරුවෙන් කළයුතු, එමෙන්ම නිරතුරුවම විමර්ශනයට ලක් කලයුතු ක්‍රියාවලියක්. එසේම පිරිපහදුවක් අක්‍රීය වූ පසු නැවත යථාතත්‍වයට ගෙන ඒමට කල්ගත වන්නේ මේ නිසයි.

මෙසේ පිරිපහදු කරන ලද විවිධ සංඝඨක වෙන වෙනම තත්ත්‍ව පරීක්‍ෂණවලට භාජනය කරන්නේ ඒ ඒ අදාල පිරිවිතරයන් සැපිරීම අනිවාර්යයෙන්ම සිදුවිය යුතු නිසා. ගුවන්යානාවකට යොදන ඉන්ධන බාල තත්ත්‍වයක පැවතියහොත් සිදුවිය හැකි හානිය අතිමහත්, එසේම මෝටර් රථවලට යොදන ඉන්ධන පවා බාල තත්ත්‍වයක පැවතිය හොත් එහි එන්ජින් සියල්ල හානි වී යා හැකියි. මේ නිසා මේ ඉන්ධන වර්ග ඉතා දැඩි තත්ත්‍ව පරීක්‍ෂණවලට භාජනය වනවා පමණක් නොවෙයි ඒ පිළිබඳ දැඩිව විමර්ෂණය ද කෙරෙනවා. මේ තත්ත්‍ව පරීක්‍ෂණ භෞතිකමය ලක්‍ෂණ, තාපගතිලක්‍ෂණ, ගලායාම සහ ස්ථායී බව, සහ රසායනික ලක්‍ෂණ යන ප්‍රධාන කාරණාවලට ඇතුලත් පරීක්‍ෂණ රාශියක් ඇතුලත්. මෙම පරීක්‍ෂණ වන්නේ, සංයුතිය, පිරිසිදුබව, ඝණත්‍වය, මිශ්‍රවීමේ හැකියාව සහ වෙනත් ඉන්ධන වර්ග සමග ගැලපීම, එන්ජින්වලට විශවීම, සහ තාප ස්ථායීභාවය ප්‍රධානයි. මෙයට අමතරව තවත් පරීක්‍ෂණ රාශියක් සිදු කරනවා. එසේම විවිධාකාර ඉන්ධන වර්ග පරීක්‍ෂණයට භාජනය වන්නේ විවිධාකාර තත්ත්‍ව යටතේදීයි. බොරතෙල්, ග්‍රීස් වර්ග, ගුවන්යානා ඉන්ධන, හයිඩ්‍රොකාබන, සහ වෙනත් ඉන්ධන වර්ග මෙසේ විවිධාංගීකරණයට ලක්ව පර්යේෂණ වලට භාජනය වනවා.

2013 වසරේ බාල ඉන්ධන නිකුත් කිරීම නිසා වාහන එන්ජින්වලට හානි පැමිණුන අය මේ කරුණේ බරපතලබව හොඳින්ම දන්නවා ඇති. මේ හේතුව නිසා කිසිදු ඉන්ධන තොගයක් දැඩි තත්ත්‍ව පරීක්‍ෂාවකින් තොරව නිකුත් කිරීම හෝ භාර ගැනීම සිදු නොකළ යුතුයි. මෙවර සිදු වූයේ එයයි.

ඔක්ටේන් අංකය

ඔබ දන්නවා කිසියම් ඉන්ධනයක් විවෘත වාතයේදී දහනය වනවිට කෙතරම් ඉක්මනින් ගිණිගන්නවාද කියා. ඒවා ඒ තරම් ගිණිගන්නාසුළුයි. මේ ඉන්ධන ඉතා කුඩා කුටීරයක් තුළ දැඩි තෙරපීමකට භාජනය කළහොත් එය කෙතරම් භයානකදැයි ඔබට වටහාගැනීමට පුළුවනි. වාහනයක එන්ජිම තුළදී සිදු වන්නේ මෙයයි. වාහනයේ ඉන්ධන ටැංකිය තුළ සිට එන ඉන්ධන, වාතය සමග කිසියම් අනුපාතයකට මිශ්‍ර වී, එන්ජිමේ පිස්ටනය තුළට වායුමය තත්ත්‍වයෙන් මුදාහැරෙනවා. තෙරපීම නිසා එය තුළ වූ පෙට්‍රල් රත් වනවා. වාහනයක එන්ජිම තුළ බලශක්ති ජනනය සිදු වන්නේ පිස්ටන් තුළට යැවූ මෙම ඉන්ධන තෙරපීමකට ලක් කර ස්පාක් ප්ලග් මගින් පිපිරීමකට භාජනය කිරීම මගින්. එම තෙරපුම නිසා සිදුවන පිස්ටනය පිටුපසට පැනීම වාහනයේ Crank Shaft එක මගින් බලය බවට පත් කර වාහනයේ ධාවනය සිදු කරනවා. පෙට්‍රල් වල ඇති විවිධ සංඝඨකවල ජ්වලනාංකය හෝ ස්ඵෝඨනාංකය  විවිධාකාරයි. ඒ නිසා මෙහිදී සිදුවන තෙරපීම නිසා සමහර අවස්ථාවලදී ස්පාක් එකක් ඇතිකිරීමට පෙරම ඉන්ධන ස්වයංව පිපිරීමකට (Pre-detonation) ලක් වනවා. ඉහළ ඔක්ටේන් අගයක් ඇති ඉන්ධන ස්ථායීතාවය ඉහල නිසා ස්වයංව සිදුවන ගිණිගැනීම වලකිනවා.

ඔක්ටේන් අගය ගණනය කරනු ලබන්නේ පර්යේෂණ මට්ටමේ වූ පිස්ටනයකට දැමූ පෙට්‍රල්වල ස්වයං පිපිරීමකට ලක්වීමට ලක් නොවී දහනය වීමේ ධාරිතාවය ඔක්ටේන් සහ අයිසො හෙප්ටේන් යන හයිඩ්‍රොකාබන කිසියම් අනුපාතයකට දැවීමෙන් ලැබෙන ස්වයං පිපිරීමකට ලක්වීමට ලක් නොවීමේ ධාරිතාවය හා සමාන කිරීමෙන්. උදාහරණයක් ලෙස මෙම අනුපාතය 95:5 ක් නම්, එය ඔක්ටේන් 95 ලෙස ද, 93:7 ක් නම්, එය ඔක්ටේන් 93 ලෙසද හැඳින්වෙනවා. ඉහළ ඔක්ටේන් අංකයක් ඇති ඉන්ධන වර්ග ඉහළ බලයක් ලබා දෙන්නේ ඒවා පිපිරීම සිදු වන්නේ අදාල ස්පාක් එක ලබා දීම නිසා පමණක් වන නිසා. එවිට එන්ජිම ඉතා මෘදුව ගැස්සීමකින් තොරව බලය ලබා දෙනවා. එන්ජිමේ කාර්යක්‍ෂමතාවය ඉහළ නැංවෙනවා. නමුත් ඉන්ධන ස්වයං පිපිරීමකට ලක්වන විට එන්ජිමේ සුසර කර ඇති කාළයට පෙර බලය ලබා දීම නිසා එන්ජිම ගැස්සීමකට ලක් වනවා. එන්ජිම Knock කරනවා යැයි කියන්නේ මෙන්න මේ තත්ත්‍වයටයි. ඩීසල් එන්ජින්වලට ඔක්ටේන් අගයක් ගණනය කරන්නේ නැහැ.

අපි බොහෝ විට වාහනවලට ඇති ආදරය නිසා වැඩිම ඔක්ටේන් අංකයක් ඇති ඉන්ධන වාහනයට යෙදීමට උත්සාහ කරනවා. නමුත් වාහනයකට යොදන ඉන්ධනවල ඔක්ටේන් අගය තීරණය කරන්නේ එන්ජිමේ සම්පීඩන අනුපාතය (Compression Ratio) අනුවයි. ඉහළ සම්පීඩන අනුපාතයක් ඇති ඉහළ අශ්වබලයක් අවශ්‍ය එන්ජින් වලට ඔක්ටේන් අගය ඉහළ, වැඩි ස්ථායීතාවයක් ඇති ඉන්ධන යෙදීම අවශ්‍යයි. ඒ අනුව ඉහළ එන්ජින් ක්‍රියාකාරීත්‍වයක් (High Performance) ඇති වාහනවලට ඔක්ටේන් 95 වැනි ඉහළ ඔක්ටේන් අගයක් ඇති ඉන්ධන අවශ්‍ය වන අතර සාමාන්‍ය ක්‍රියාකාරිත්‍වයක් ඇති එන්ජින්වලට ඔක්ටේන් 92, 90, 87 වැනි ඉන්ධන යෙදීම ප්‍රමාණවත්. සාමාන්‍ය වාහනයකට ඉහළ ඔක්ටේන් අගයක් ඇති ඉන්ධන යෙදුවා කියා වැඩිපුර බලයක් බලාපොරොත්තු විය නොහැකි බවයි ඇමරිකාවේ මෝටර්රථ හිමියන්ගේ සංගමයේ නිර්දේශ මගින් කියැවෙන්නේ. බොහෝ විට ඔක්ටේන් 95 ඉන්ධන යෙදිය යුත්තේ ටර්බෝ (Turbo or Turbo Charged) එන්ජින් සහිත වාහනවලට පමණයි. අනෙක් සියළුම වාහන ඔක්ටේන් 93 ඉන්ධන මගින් බොහොම මෘදුව ධාවනය කළ හැකියි.  එසේ වුවත්, සමහරවිට වාහනයේ ධාවන තත්ත්‍වය සහ පාරිසරික තත්ත්‍ව අනුව මේ ඔක්ටේන් අවශ්‍යතාවය වෙනස් විය හැකියි. එය නිර්ණය කිරීම අපහසු නම්, කළ යුතු හොඳම දේ වන්නේ වාහනයේ නිර්දේශ ලබාදෙන පොත පරිශීලනය කර ඒ අනුව ඉන්ධන වර්ගය තෝරා ගැනීමයි. අපි බොහෝ දෙනෙකු ගොඩ  වෙදුන්ගේ කීම අසා අනවශ්‍ය මුදල් නාස්තියක් සිදු කරන්නේ වැඩි ඔක්ටේන් අගයක් සහිත ඉන්ධන මගින් වැඩි කාර්යක්‍ෂමතාවයක් සහ වැඩි බලයක් ලබාදෙනවා යැයි සිතා…

ලංකාවේ භාවිතා නොවුනත්, ඇමරිකාවේ දැන් ඉන්ධන වලට සියයට දහයක් එතිල් මධ්‍යසාරය එකතු කරනු ලබනවා. බ්‍රසීලයේ සියයට සියයක් ඉන්ධනවලින් ධාවනය වන වාහන භාවිතයක් නැහැ. දැනට එය 25% ක් එතිල් මධ්‍යසාරය එකතු කළ ඉන්ධන වලින් ධාවනය වන වාහන සහිත රටක් වනවා. එසේ සිදුවී ඇත්තේ බ්‍රසීලයේ ඉන්ධනවලට පැටවෙන බදු ප්‍රමාණය එතනෝල් වලට පැටවෙන බදුවලට වඩා වැඩවීම නිසයි. එසේම උක් කර්මාන්තය නිසා ලෝකයේ විශාලතම එතනෝල් අපනයනකරු වී ඇත්තේද බ්‍රසීලයයි. එතනෝල් භාවිතය නිසා ෆොසිල ඉන්ධන භාවිතය අඩුවනවා. එතනෝල්වල ඔක්ටේන් අගය 100 කි. එය ඉන්ධන හා කවලම් වූ විට ඔක්ටේන් අගය 112 ක් පමණ වන ක්‍රියාකාරීත්‍වයකින් එන්ජිම ක්‍රියා කරවයි. මේ නිසා එන්ජිම ඉතා සුමටව ධාවනය වන අතර ස්වයං පිපිරීම් අවම කරවයි.  මේ නිසා NASCAR වැනි තරඟවලදී එතනෝල් මිශ්‍ර පෙට්‍රල් වර්ග රේස් කාර් සඳහා භාවිතා කරයි.

අප හොඳින් සිතාබලා කටයුතු කරනවානම්, පාවිච්චි කරන ඉන්ධන වර්ගය කුමක් වුවත්, පදවන වාහනය කුමක් වුවත්, ඉන්ධන පිරිමැසීම කළ හැකියි. මෑතකදී සිදු වූ අලකලංචියේදී ඉන්ධන අරපිරිමැස්මෙන් භාවිතා කරන්නැයි කළ ඉල්ලීම බොහෝ දෙනෙකු අවඥාසහගතව සැලකූවේ මෙම තත්ත්‍වය නොදන්නා නිසා වන්නට පුළුවන්. නමුත් තම වාහනය සහ ධාවන රටාව නිසි ලෙස අවබෝධ කරගෙන සිටින කෙනෙකුට ඉන්ධන ලීටර කිහිපයක් ඉතිරිකරගැනීම අරුමයක් නොවෙයි.

වාහනයක ඉන්ධන භාවිතාව සිදු වන්නේ එන්ජිම ක්‍රියාකරන ආකාරය අනුවයි. එන්ජිම වැඩි බලයකින් ධාවනය වනවිට වැඩි ඉන්ධන ප්‍රමාණයක් අවශ්‍යයි. අප බොහෝ දෙනෙකු සිතා සිටින්නේ අපි ධාවනය කරන්නේ රේස් කාර් කියායි. ඒ අනුව ඉතා කුඩා දුරක් පවා දැඩි වේගයෙන් ධාවනය කර අනවශ්‍ය ලෙස තිරිංග තද කරනවා. මේ නිසා ඉන්ධන දහනය අධික වීම වගේම තිරිංග ගෙවීමද අධික වනවා. ඉන්ධන ඉතිරිකිරීමේ මූලිකම අභ්‍යාසය වන්නේ ඉවසීම සහ ඇක්සලරේටරය මත බලය යොදන ආකාරයයි. දෙවනුව වාහනයේ අමතර බර ඉවත් කළ යුතුයි. ලංකාවේ බොහෝ දෙනෙකු වාහන පදවන්නේ තනිවම, නමුත් වාහනයේ පිටුපස පවුලේ සියළුම දෙනාට අවශ්‍ය තරම් භාණ්ඩ නිතරම දක්නට පුළුවනි. මේ නිසා අනවශ්‍ය බර ඉවත් කිරීම, සහ වහලයේ අමතර උපාංග සවි කර ඇත්නම් ඉවත් කිරීම නිසා වාහනයේ බර සහ ධාවනයේදී දක්වන ප්‍රතිරෝධය අවම වනවා. එසේම අධික වේගයෙන් ධාවනය කිරීම නිසා එන්ජිමට වැඩි බලයක් අවශ්‍ය සේම, වාතයේ ප්‍රතිරෝධය වැඩි වීම නිසා අමතර බලයක් යෙදීම සිදු වනවා. මේ නිසා ප්‍රශස්ත වේගයකින් ධාවනය කිරීම සුදුසුයි. වාහනය අධිවේගී මාර්ගයක ධාවනය වනවා නම්, වේගය ඉබේ පාලනය වන Cruise Control වෙත භාර දීම ඉතා සුදුසුයි. මේ අංගය වාහනයේ එන්ජිම පාලනය කරන පරිඝණකය සමග බද්ධ වන නිසා වාහනය ප්‍රශස්ත මට්ටමින් ධාවනය කර අවශ්‍ය ධාවන තත්ත්‍වය ලබා දෙනවා. එසේම වාහනය නිසි නඩත්තුව අත්‍යවශ්‍යමයි. නිසි කලට සිදු කරන තෙල් මාරුකිරීම් සහ ස්පාක් ප්ලග්වල නඩත්තුව මගින් ප්‍රශස්ත ඉන්ධන දහනයක් පවත්වාගෙන යා හැකියි. වාහනයේ වායු පෙරණ සහ තෙල් පෙරණ (Air  & Oil Filters) නිසි ලෙස පිරිසිදු කර තබාගැනීම මගින් එන්ජිමට යෙදෙන වාතය නිසි ලෙස ලැබෙනවා. එසේම නිසි තෙල් මාරුව නිසා කාර්යක්‍ෂමතාවය ඉහළ යනවා. එය ඉන්ධන දහනයේ කාර්යක්‍ෂමතාවයට ඉතා වැදගත්. එසේම වාහනයේ ටයර්වල නිසි පීඩනය අත්‍යවශ්‍යයි. එවිට රෝද මාර්ගය හා ගැටෙන ප්‍රමාණය වෙනස් වනවා. අඩු වායු පීඩනයක ඇති රෝද මාර්ගය සමග ගැටෙන වර්ගපලය නිසි පීඩනයක් ඇති රෝදවල වර්ගඵලයට වඩා වැඩියි, මේ නිසා අනවශ්‍ය ප්‍රතිරෝධයක් ඇතිවනවා. එවිට වැඩිපුර ඉන්ධන දහනයක් ඇතිවනවා.

අපි බොහෝ දෙනෙකු වාහනයේ වායුසමන යන්ත්‍රය උත්තරධ්‍රැවයේ උෂ්ණත්‍වය දක්වා අඩු කරනවා. මෙසේ කිරීමේදී වාහනයේ ඉන්ධන දහනය වැඩිවනවා. සාමාන්‍යයෙන් ලංකාවේ වායුසමන යන්ත්‍ර සෙල්සියස් අංශක 25-27 අතර තබාගැනීම ප්‍රශස්ත මට්ටමක්. මක්නිසාද යත්, පිටත උෂ්ණත්‍වය 30-32 අතර ඇතිනිසා වාහනයෙන් පිටතට පැමිණීමේදී සිදුවන වෙනස අවම කරගත හැකියි. මෙය වාහනයේ මෙන්ම ශරීරයේද සෞඛ්‍යයට ඉතා ගුණදායකයි. එසේම සමහරු වායුසමන යන්ත්‍රය ක්‍රියාවිරහිත කර වාහනයේ වීදුරු විවෘතකරගෙන ගමන් කරන්නේ ඉන්ධන ඉතිරිකිරීමටයි. නමුත් සිදුවන්නේ එහි අනෙක් පැත්තයි. වාහනයක වීදුරු විවෘත කරගෙන ගමන් කරද්දී සිදුවන ප්‍රතිරෝධය නිසා වැයවන ඉන්ධන ප්‍රමාණය, වායුසමන යන්ත්‍රයක් ක්‍රියාකරවීමේදී වැය වන ඉන්ධන ප්‍රමාණයට වඩා වැඩියි, එසේම දූවිලි ආදිය වාහනය තුළට පැමිණීම නිසා, වාහනයේ තත්ත්‍වය ඉතා ඉක්මනින් පහල යාමට පුළුවනි. මේ නිසා ඉන්ධන ඉතිරිකිරීමේ අභිප්‍රායෙන් වායුසමන යන්ත්‍ර ක්‍රියාවිරහිත කර වීදුරු විවෘත කරගෙන යනවා නම්, ඒ අණුවන ක්‍රියාව වහා නැවැත්විය යුතුයි.

වඩාත්ම වැදගත් කාරණය වන්නේ අපේ ඉවසීමයි. අප බොහෝ දෙනා පොලිස් නිලධාරීන් හෝ සංඥා එළි නොමැති මංසන්ධිවලදී හැසිරෙන්නේ උන්මත්තකයන් විලසින්. අන් සියල්ලන්ටම පෙර තමන්ගේ වාහනය මංසන්ධියෙන් ධාවනය කර ගැනීම විශාල කටයුත්තක් සේ සිතා සෙමෙන් සෙමෙන් ඉදිරියට ධාවනය කරනවා. මෙවිට සිදුවන තදබදය නිසා තමන්ගේ පමණක් නොවයි සියල්ලන්ගේම ඉන්ධන කාර්යක්‍ෂමතාවය අඩුවනවා පමණක් නොවෙයි ගමනට ගතවන කාළයද වැඩිවනවා. එවිට අනියමාර්ථයෙන් ඉන්ධන දහනය වැඩිවනවා. බොහෝ විට අනුන් ගැනද සළකා, තදබදය අවම වන ලෙස අනුන්ටද පාර අයිතියැයි සිතා කටයුතු කිරීමෙන් ඉන්ධන පරිභෝජනය රටක් හැටියට වුවත් අවම කරගත හැකියි. අප බොහෝ දෙනෙකු දවසෙන් පැය හතරකට අධික කාලයක් ගත කරන්නේ මාර්ගයේ, මෙම කාළය එක්කෝ පවුලේ අය සමග සතුටින් ගත කිරීමට හෝ වෙනත් ඵලදායී කටයුත්තකට යෙදිය හැකියි. නමුත්, අපි අපේම වැරදි පිළිවෙත් නිසා, ඒකක පුද්ගලයෙකු වශයෙන් හෝ එක්ව රටක් හැටියට කාර්යක්‍ෂම විය හැකි කාළයක් නිකරුණේ මාර්ගය මත ගතකරනවා. දිනකට පැය හතරක් පාරට වැය කරන අපි අවුරුද්දකට උපරිම වැඩකරන දින 262 කදී කෙතරම් පැය ගණනක් මාර්ගයට වැය කරනවාදැයි සිතන්න. එය ඔබ සේවය කරන අවුරුදු ගණනින් (උදා: 40) වැඩි කල විට (එනම් 1048 x 40 = 41920) ඔබේ ජීවිතයෙන් දින 1746 ක් එසේත් නැතිනම් අවුරුදු පහකට ආසන්න කාළයක් මහපාරටම දිය වනවා. මේ වැයවන්නේ ඔබේ ජීවිතයේ කිසියම් හෝ ඵලදායී වැඩකට ගතකළ හැකි කාළයයි.

ඉන්ධන යනු කෙතරම් බලවත් දෙයක්දැයි පසුගිය සතියක සිදු වූ සිදුවීම නිසා ඔබට හොඳින් වැටහෙනවා ඇති. මේ නිසාම මැදපෙරදිග සිදුවූ සහ සිදුවෙමින් පවතින බල අරගලය අපට පැහැදිලිවම දැකිය හැකියි. කෙසේ වුවත් ඉන්ධන නිසා සිදුවන පරිසර හානිය අන් සියල්ලන්ටම වඩා බලවත්. සියළුම වාහන නිෂ්පාදකයන් හරිත බලශක්ති ප්‍රභව වෙත යොමු වන්නේ මේ හේතුව නිසයි. බොහෝ රටවල් 2030 පසුවනවිට සිය මෝටර් රථ සියල්ල විදුලියෙන් ධාවනය වන මෝටර් රථ බවට පත් කිරීමට තීරණය කර තිබනෙවා. මෙවර අය වැයෙන්ද එය යෝජනා වූ නමුත්, සියල්ලම ප්‍රතික්‍ෂේප කරන මිනිසුන් සිටින රටක එම යෝජනාවත් අවඥාවෙන් බලන පිරිසක් සිටිනවා. අවම වශයෙන් එවැනි යෝජනාවක් ලැබීම හෝ අගය කළ යුතුයි. එය දීර්ඝකාලීන සැලැස්මකින්, ජාතික ප්‍රතිපත්තියක් සේ සළකා, ආණ්ඩු මාරු වන විට වෙනස් නොවන්නක් ලෙස සැකසිය යුතුයි.

 

ඉන්ධන දහනය අවම කිරීම අපි අපේ දරුවන්ට අනාගත ලෝකය පිරිසිදු ලෝකයක් ලෙස භාර කිරීමේ මූලික කටයුත්ත සේ සළකන්නට පුළුවන්. ඉතින්, අපි ආත්මාර්ථකාමී නොවී, අනාගතය ගැන සිතා ඉන්ධන කාර්යක්‍ෂමව, අරපිරිමැස්මෙන් භාවිතා කරමු.

පිටස්තරයා 17

විශ්වට දැන් සෑහෙන සනීපයි… බොහොම උනන්දුවෙන් ව්‍යායාම කරනවා… ඉක්මනටම ගෙදර යන්න ඕන වෙලා වගේ…. විශ්ව බැලීමට පැමිණි සුමනසේකර යුවලට වෛද්‍ය ගීතිකා ගුණසේකර සිනාමුසු මුහුණින් පැවසුවාය…

ඩොක්ටගෙ අත්ගුණේ තමයි…. අපේ පුතා හොඳට බලාගත්ත නිසාම එයාට ඉක්මනින්ම සනීප වුනා… තව කොච්චර කාළයක් විතර යයිද සම්පූර්ණයෙන්ම සනීප වෙන්න ?

දැන් නම් සියයට අනූවක්ම හොඳයි… අනතුර සිදු වුනාට පස්සේ අපි හිතපු තරම් විශ්වගේ මනස කැළඹිලා නැහැ.. මානසිකත්‍වය නම් ඉක්මනටම යථා තත්ත්‍වයට පැමිණියා… නමුත් කකුලේ අස්ථියක් බිඳී ඇති නිසා තමයි මෙච්චර කාළයක් ගත වෙන්නෙ පුනරුත්ථාපනයට… අපි විශ්වට තවම පාදයට සම්පූර්ණ බර දරන්න දෙන්නෙ නැහැ.. මොකද කියනවා නම් කකුලෙ අස්ථි සවි වෙන්න තව ටික කලක් ගතවෙන නිසා… අපි තව සතියකින් පමණ තමයි විශ්වගෙ අළුත් වෛද්‍ය වාර්තා ලබා ගන්නෙ.. ඒ අනුව තමයි කියන්න වෙන්නෙ මොකද්ද තත්ත්‍වය කියලා….

ඉතිං ඩොක්ට, විශ්වට තනියම වැඩ කර ගන්න තව කොච්චර විතර කාළයක් යාවිද ? සුමනසේකර මහත්මියගෙ කුතුහලය වැඩි කමටම දැඩිව ප්‍රශ්න කෙරුණා.

කලබල වෙන්න දෙයක් නැහැ.. විශ්වට තව සතියක් වගේ යනකොට කිහිළිකරු ආධාරයෙන් තනිවම ඇවිදින්න පුළුවන් වේවි. කොහොමත් ඔබ දෙදෙනාත් විශ්වගේ මිතුරියත් ඉන්නවනේ විශ්වගේ වැඩ කටයුතු බලා ගන්න….

ඒ වුනත් ඩොක්ට ඒ ළමයටත් වැඩ නෙ… කොහොමත් එයා ආවයි කියලා මම හිතන්නෙ නැහැ විශ්වගේ වැඩකටයුතු එයා අතින් කෙරේවි කියලා.. ඒ ළමයා විශ්වගේ වැඩපොලේ යාළුවෙක් විතරනෙ..

වෛද්‍යවරියගේ මුවඟ ඇඳුන සිනාරැල්ලේ අරුත කුමක්දැයි වටහා ගැනීමට තරම් අවධානයක් සුමනසේකර මහත්මියට නොතිබුණත්, සුමනසේකර මහතා යමක් අවබෝධ කරගත්තාක් මෙන් හිස සලා මඳ සිනාවක් පෑවේය.

ඩොක්ට ඇමරිකාවට ඇවිත් ගොඩක් කල්ද ? අවසන සුමනසේකර මහතා වෛද්‍ය ගීතිකාගේ පෞද්ගලික තොරතුරු දැනගැනීමේ අටියෙන් විමසුවේය.

ඔව්.. දැනට අවුරුදු නවයක්  පමණ වෙනවා. මම මුලින්ම ආවෙ ආචාර්ය උපාධිය කරන්නයි. නමුත් මුලින් කරන්න හිටි අංශය වෙනස් කරලා  වොල්ටර් රීඩ් එකට බැඳුනා භෞත චිකිත්සක පර්යේෂණ කරන්න, සහ වෛද්‍ය සේවාව කරන්න.. මේ වගේ රෝහලක එවැනි පර්යේෂණ කරන එක තරමක් ලේසියි… අපට ඉගෙන ගන්න පුළුවන් වෙනවා වගේම මේ රටටත් බොහොම ලොකු සේවයක් වෙනවා… ඒ නිසා මම මේකට කැමතියි..

ඒ වුනාට මෙතැන වැඩිපුර යන්නෙ සොල්දාදුවො නේද ?

ඔව්.. යුද්ධයෙන් අතපය කැඩිලා එන සොල්දාදුවෝ ඔක්කොම වගේ ප්‍රතිකාර ලබන්නේ මෙතැන.. ඒ අයගේ අවශ්‍යතා විවිධයි. ඒ නිසා ඒ අයගෙ විවධාකාර ගැටළු වලට අපේ පර්යේෂණ හරහා පිළිතුරු සොයන එක සහ ඒ සියල්ල වාර්තා කරන එක තමයි මගේ පර්යේෂණය.. ඒ නිසා අනාගතයේ ඇතිවන ගැටළු වලට අළුතෙන් පර්යේෂණ කරන්න අවශ්‍ය වෙන්නෙ නැහැ.. එක් එක් ගැටළුවට වෙන වෙනම විසඳුම් සියල්ලම අපි ලේඛණගත කරලයි තියෙන්නෙ… වෙන එකක් තියා නියපොත්තක් ගැලවුනත්, ඒකටත් වෙනම සැකසුන විසඳුමක් තිබෙනවා. ඒ තරම් මේ ස්ථානය ක්‍රමාණුකූලයි. ඒ නිසාම තමයි විශ්වගේ පුනරුත්ථාපනය මේ තරම් ඉක්මන් වුනේ..

මට තියෙන ප්‍රශ්නය ඇයි විශ්ව වගේ කෙනෙක් මෙතැන ප්‍රතිකාර ගන්නෙ ? එයා හමුදාවට සම්බන්ධ කෙනෙක් නෙවෙයි නේද ? වෛද්‍ය ගීතිකා ඇසුවෙ තමන්ටත් මේ සිදුවීම තේරුම් ගන්න බැරි නිසා.

අපිත් හරියටම දන්නෙ නැහැ ඩොක්ට.. එයා වැඩ කරන ආයතනය නම් හමුදාවට සම්බන්ධයි ලු… ඒ නිසා වෙන්න ඇති.. ඩොක්ට විශ්ව එක්ක පෞද්ගලික තොරතුරු කතා කරන්නෙ නැද්ද ?

නැහැ…. මම මේ සතියෙම කළේ විශ්වගේ මනස යථා තත්ත්‍වයට ගෙන එන එකයි.. මේ වෙනතෙක් මම අවම වශයෙන් පවුලෙ තොරතුරුවත් ඇහුවෙ නැහැ. ඒක මානසික සමබරතාවයට බාධාවක්.. දැන් විශ්ව සෑහෙන දුරට මානසිකව ශක්තිමත්… අපි මේ සතියෙ කරන අභ්‍යාස අනුව මම ඒ පැත්තට යොමු වෙනවා.. ඒ වගේම එයාට වාහන පදවන්න බයක් තිබෙනවාද කියන එකත් දැනගන්න වෙනවා.. මොකද කියනවා නම් එයාට සිහිය නැති වුනේ වාහනයක් පදවමින් සිටින අවස්ථාවෙ නිසා, ආයෙම වාහනයක් පදවන්න ගියොත් එයාට තිගැස්මක් වගේ එන්න පුළුවනි. ඒ නිසා අපි ඒ පැත්තෙනුත් මානසිකව පුනරුත්ථාපනය කරන්න වෙනවා.

:::::::::::::::::::::::::::::::::::::::::::::::::::::::::::::::::::::

අපට හොඳ වෙලාවට මේ එපාට්මන්ට් එක ළඟම එකක් ලැබුණෙ. එෆ් බී අයි ඒජන්ත ජේසන්  සිය සගයා වූ මයික්ට පැවසුවේ සතුටිනි.

ඔව්. එතකොට අපට වෑන් අස්සෙ කර වෙන්න ඕන නැහැ.. ඔක්කොම උපකරණ ටික මේ ගෙදරම හයි කරලා අල්ලපු ගෙදර සිද්ධ වෙන දේවල් බලා ගන්න බැරියෑ. අපේ නිවාස ප්‍රශ්නෙත් ඒත් එක්කම විසඳෙනවා..

ඒ වුනාට කොච්චර කාලෙකටද දන්නෙ නැහැනෙ… එක්කෝ මිනිහව අල්ලගන්න වෙනවා… නැතිනම් අතාරින්න වෙනවා.. මේ දෙකෙන් එකක් සිද්ධ වෙන්න වැඩි කාළයක් යන්නෙ නැහැ…

අපට දැන් කරන්න තියෙන්නෙ ඔක්කොම උපකරණ ටික හයි කරලා මිනිහා ගෙදර එන්න ඉස්සරවෙලා ඒ ඔක්කෝම ටෙස්ට් කරන එකයි… එතකොට මිනිහා ගෙදර ආවම ඔක්කෝම ටික පටිගත කරගන්න පුළුවනි.

ගවනර්ස් කෝනර් නිවාස සංකීර්ණයේ හත්වන තට්ටුවේ වෙන් කරගත් නිවාස ඒකකය වෙත සිය බඩුභාණ්ඩ සහ විදුලි උපකරණ රැගෙන යන අතර ජේසන් සහ මයික් දෙදෙනා කතා කළේ තමන්ගේ ඉලක්කය පිළිබඳ රහස් විමර්ෂණය කවදා නිම වේද යන්නය.. තවමත් කෙළවරක් නොපෙනෙන මේ විමර්ෂණය එක්කෝ සඵල කටයුත්තක්ද, නැතහොත් නිශ්ඵල කටයුත්තක්ද යන්න කිසිවෙකු දැන සිටියේ නැත. තමන් සැලසුම් කළ අනතුර අනපේක්‍ෂිත ලෙස සැමගේම සැලසුම් වෙනස් කළ නිසා තමන්ට නැවතත් වැරැද්දක් සිදු කිරීමේ අවකාශයක් නොමැති බව දෙදෙනාම දැන සිටියහ. කෙතරම් පුරුදු පුහුණු වී සිටියත් සැලසුමක සරළ වෙනසක් ජීවිතයක ඉරණම වෙනස් කළ අයුරු දෙදෙනාටම තමන්ගේ කාර්යයේ අවදානම නැවත නැවතත් සිතා බැලීමට මතක් කර දුනි. ඒ නිසාම සිය කාර්යයන් සහ සැලසුම් දෙතුන් වතාවක් නොව ඊටත් වඩා වැඩි වාර ගණනක් නැවත නැවතත් සැලසුම් කර ක්‍රියාවට නැංවීමට දෙදෙනාම කතා කර ගත්හ.

ඒ අනුව මුලින්ම ගවනර්ස් කෝනර් නිවාස සංකීර්ණයේ වූ විශ්වගේ නිවසට යාබද නිවස වෙන්කරවා ගැනීමට ඔවුහු කටයුතු කළහ. ඒ නිසාම විශ්වගේ නිවසේ සවි කළ ඉතා සූක්‍ෂම කැමරා සහ මයික්‍රෆෝන වලින් ලැබෙන සංඥා කිසිදු බාධාවකින් තොරව පටිගත කිරීමේ හැකියාව ඔවුනට ලැබේ. විශ්ව නිවසේ නැති නිසාම සහ විශ්වගේ නිවසේ දැනට වාසය කරන්නේ විශ්වගේ මාමා සහ නැන්දා වන සුමනසේකර යුවල නිසා සිය පටිගත කිරීමේ කටයුතුවල විශ්වාසනීය භාවය මැන ගැනීමටද එය උපයෝගී වන බව දෙදෙනාම දැනහුන්හ.. මේ නිසා ඉක්මනින්ම නිවසට පැමිණ සිය උපකරණ සවි කර ඒවායේ ක්‍රියාකාරීත්‍වය සහතික කර ගැනීම දෙදෙනාගේම අභිප්‍රාය වී තිබිණ..

:::::::::::::::::::::::::::::::::::::::::::::::::::::::::::::::

සෙනෙටර්ස් ක්ලබ් ආපනශාලාව අමුත්තන්ගෙන් පිරී පැවතුනි.. සෑම අවස්ථාවකම එය ඉහල පැලැන්තියේ අමුත්තන්, සෙනෙට් සභිකයින්, ආණ්ඩුකාරවරුන්, ආදී දේශපාලනඥයින්ද, ඒ අයට සම්බන්ධ ඉහළ තනතුරු දරන නිලධාරීන් මෙන්ම ඇමරිකානු රහස් ඔත්තු සේවයේ නිලධාරීන්, දේශපාලනිකයින්ගේ ආරක්‍ෂක භටයින්, ඔත්තුකරුවන්, ආදී විවිධාකාර පුද්ගලයින්ගේ හමුවීම් සිදු කෙරෙන ස්ථානයක් බවට සෙනෙටර්ස් ක්ලබ් ප්‍රසිද්ධව පැවතියා පමණක් නොව ඒ නිසාම එහි ආරක්‍ෂාවද ඉතා තදින් පැවතිණ… සාමාන්‍ය මිනිසෙකුට මේ ස්ථානයට යා හැක්කේ එක්කෝ උසස් පුද්ගලයෙක් ගේ ආරාධනාවක් හෝ එවැනි පුද්ගලයෙක් කැටුව පමණි. ආරක්‍ෂක අංශයේම පිරිසක් විසින් පවත්වාගෙන යන මෙය නිරන්තරයෙන් ඇමරිකාවේ ඔත්තුසේවා හා සම්බන්ධව පවතින ස්ථානයකි.

ආපන ශාලාවේ රථගාලට සිය රථය ඇතුළු කරන විටම කිසියම් පුද්ගලයෙක් පැමිණ සිය රථය නතර කරන ලෙස මොලීට සන් කළාය.

රථය නතර කර එයින් බැසගත් මොලී සිය හැඳුනුම්පත ඔහු වෙත දිගු කළාය… මොලී වෙත මඳ සිනහවක් පෑ ඔහු සිය නවීනතම ජංගම පරිඝණකයේ විවරයක් හරහා එය වරක් ඇදගෙන ගොස් කිසියම් අංක කිහිපයක් ඇතුලත් කළේය…

ඔබ එනතුරු ඔහු මඟ බලාගෙනයි ඉන්නෙ… ඉක්මනටම යන්න….

සිය ඥාතියා නොදන්නා ආරක්‍ෂක අංශයේ කෙනෙකු වේදැයි කල්පනා කරමින්ම මොලී සිය අත්බෑගයෙන් ගත් කුඩා කණ්නාඩියෙන් බලා සියල්ල නිසි ලෙස පවතින බව සහතික කරගෙන සෙනෙටර්ස් ක්ලබ් අවන්හලේ දොර හැරගෙන එයට ඇතුළු වූවාය….

:::::::::::::::::::::::::::::::::::::::::::::::::::::::::::::::

දැන් කොහොමද කකුල ? වෛද්‍ය ගීතිකා ගුණසේකර විශ්ව සමඟ රෝහල් උද්‍යානයේ සෙමෙන් ඇවිදින අතරතුර ඇසුවාය….. රෝහල් උද්‍යානයේ විවිදාකාර ආබාධවලට ලක් වූ සොල්දාදුවන් සිය පුනරුත්ථාපන වෛද්‍යවරු සහ උපස්ථායකයන් සමඟින් ව්‍යායාම කිරීම මෙහි සුලභ දසුනකි.

දැන් නම් සෑහෙන හොඳයි…. ගොඩක්ම බර දෙනකොට පොඩ්ඩක් රිදෙනවා… ඒ හැරෙන්න වෙන අමාරුවක් නැහැ… කොහොමත් මම ෆුට්බෝල් ගහන්න යන්නෙ නෑනෙ… ඒ නිසා මේ ගාණට බේරුණා ඇති..

ඇත්තටම විශ්වට මොකද හිතෙන්නෙ අනතුර ගැන… ? දැන් ඉතින් බය එහෙම අඩු වෙලා නෙ තියෙන්නෙ… කියන්න පුළුවන් නම් කියන්න……..

කියන්න බැරි කමක් නෑ ඩොක්ට…. මට එහෙම ප්‍රශ්නයක් නෑ… නමුත්, මට හිතා ගන්න බැහැ අනතුර වුනේ කොහොමද කියලා….. මොකද කියනවා නම් මම ගේට්ටුවෙන් පාරට කාර් එක දාලා ටික වෙලාවක් යනකොට තමයි මේ ලොකු ට්‍රක් එක මගේ පස්සෙන් එන්න ගත්තෙ…. මම ඒකට ඉඩ දුන්නත්, එයා නෙවෙයි මාව පසු කරලා ගියේ…. ඒ පුද්ගලයා කවුද කියලා බලන්න මම පිටුපස බලන කණ්නාඩියෙන් බලද්දිම තමයි එකපාරට ඒකේ වේගය වැඩි වුනේ… මම එතකොටම අනිත් ලේන් එකට කාර් එක දානකොටම තමයි මගේ පැත්තෙන් ඇවිත් වාහනේ හැප්පුනේ… හැප්පුන වේගයට ඒ ට්‍රක් එක පෙරළුනා… ඒත් එක්කම ඉදිරිපස වායු බැග් එක පුපුරලා විවෘත වුනා… ඒ කම්පනයට තමයි මගේ සිහිය නැති වුනේ…

ඔයා දවස් ගණනාවක් සිහිය නැතිව හිටියා… හැමෝටම හරිම පුදුමයි ඔයා අද මේ තත්ත්‍වයෙන් ඉන්න එක ගැන… බොහෝ දෙනා බලාපොරොත්තු වුනේ නැහැ මෙච්චර ඉක්මනින් සිහිය ඒවි කියලා…. මම හිතන්නෙ අද අපට ගොඩක් දේවල් කතා කරන්න හොඳ දවසක්….

ඇය පසෙක වූ බංකුවක වාඩි වෙන අතරම විශ්වට ද ඉඳගන්නා මෙන් සන් කළාය…..

කොහොමද දැන් පපුව ?

මගේ පපුව ඉතිං කවදත් හොඳයි නෙ …. විශ්ව සිනාසෙමින් පැවසුවේය….

කාලෙකින් මම ඔයාගෙ මේ වෙනස දැක්කෙ….. ඒක බොහොම හොඳ ප්‍රවණතාවයක්…. විශ්වගෙ මාමයි නැන්දයි බොහොම වද වෙනවා විශ්ව ගැන….. ඒ දෙන්නා ලංකාවෙ ඉඳලම මෙහේ ආවෙ ඔයා වෙනුවෙන්මයි…

ඔව් ඩොක්ට….. මම ඒ ගැන හොඳටම දන්නවා…..

මට ඩොක්ට කියන්න ඕන නෑ … ගීතිකා කියන්න… මේක ඇමරිකාව…..

හොඳයි ගීතිකා… අම්මයි තාත්තයි නැතිවුන දා ඉඳලා මට අම්මයි තාත්තයි වුනේ ලොකු මාමයි ලොකු නැන්දයි… ඒ දෙන්නට ළමයි නැති නිසා මං ගැන වද වෙනවා හැම තිස්සෙම..

අම්මයි තාත්තයි නැතිවුනේ කොහොමද ?

මගේ තාත්තා එක්සත් ජාතීන්ගේ සංවිධානයේ සාම උපදේශකවරයෙක් වෙලා හිටියෙ…. රාජකාරියෙ යෙදිලා නිවාඩුවක් අවසාන කරලා එන කොට ලෙබනනයෙදි වෙච්ච අනතුරකින් අම්මයි තාත්තයි නංගියි තුන්දෙනාම මියගියා… දැන් ඒක සිදු වෙලා සෑහෙන කලක්…. ඉස්සර නම් මට ඒ කම්පනය තදින්ම දැනුනා…. දැන් නම් තනිවම ජීවත් වෙන්න පුරුදු වෙලා එච්චරම දුකක් නෑ…..

මට තේරෙනවා… මට අම්මයි තාත්තයි දෙන්නමත් ලංකාවෙ ඉඳලා මේ තනියම මෙහාට වෙලා ඉන්නකොට දැනෙන තනිකම…. ඔයාට ඒක කොහොම දැනෙනවද කියලා මට හිතා ගන්න පුළුවන්…. ඉතිං මොලී ඉන්නවනේ ඔයාගෙ තනියට….

මොලී මගේ මිතුරියක් විතරයි… අපි අතරෙ ඊට වඩා සම්බන්ධයක් නෑ…. මොලී හම්බවෙලා මාසයක්වත් නැහැ…

ඒ වුනාට ඔයා දැඩි සත්කාර ඒකකයෙ ඉන්න දවස් හැම එකකම මොලී ඔයාව බලන්න ආවා කියලා ඩොක්ට මට කිවුවා… සිහිය ආපු වෙලාවෙ ඉක්මනටම ආවෙ එයා… සාමාන්‍ය මිතුරියක් නම් එහෙම විශේෂත්‍වයක් දක්වන්නෙ නැහැ නේද ?

ඔව්… මටත් තේරෙනවා මොලී මට කිසියම් විශේෂතාවයක් දක්වනවා කියලා…. නමුත් මට තවම එහෙම ලොකු විශේෂත්‍වයක් දැනෙන්නෙ නැහැ… මම දන්නෙ නැහැ ඒ මම ගැහැණු ළමයෙක් සමීපව ආශ්‍රය කළේ නැති නිසාද කියලා…

නැහැ… ඒ නිසා නෙවෙයි… මානසිකව තවම ඔයා සූදානම් නැහැ ඒ තත්ත්‍වයට එන්න…. මම හිතන්නෙ ඔයා තනිව හැදුන නිසා ඔයාගෙ මනස තවම තනිකමින් ඉවත් වෙන්න කැමැත්තක් නැහැ… නැතිනම් ඔයා කැමති නැහැ සම්බන්ධතාවයක් නිසා ඔයාගෙ පෞද්ගලිකත්‍වයට හානි පැමිණෙනවට… ඔයාට පෙම්වතියක් ඉඳලම නැද්ද කවදාවත් ? මම මේ අහන්නෙ මානසික වෛද්‍යවරියකගෙ කෝණයෙන්… වරදවා වටහා ගන්න එපා…

 

තිරිහන් වන්න ක්‍රමයක් මෙන්න…

උපන්දා සිට නවත්වන්න බැරි එකම දේ නම් වයසට යාමයි. ඒ වුනත්, විවිධාකාර පුද්ගලයන් වයසට යන වේගය එකිනෙකාට වෙනස්. සමහරුන් කෙතරම් වයසට ගියත් තරුණ පාටයි, තරුණ ජවයකින් වැඩ කරනවා. තවත් සමහරු වයසට වඩා මහළු පෙණුමයි. වැඩත් හිතන පතන ආකාරයත් බොහොම වයසක පුද්ගලයෙක් වගේ. තවත් සමහරු රූපලාවණ්‍ය ආලේපන මගින්, ප්ලාස්ටික් සැත්කම් මගින්, හෝ වෙනත් ඖෂධ මගින් තරුණ පෙනුම රැකගන්න මහා උත්සාහයක යෙදෙනවා. තවත් සමහරු ආහාර පාලනය මගින්, පෝෂ්‍යදායී ආහාර ගැනීම මගින් වයසට යාම පාලනය කිරීමට උත්සාහ කරනවා.

ඒ වගේම සත්ත්‍ව ලෝකයේ ආයු කාලයත් විවිධාකාරයි. ඉබ්බෙක් අවුරුදු 200 ක් පමණ ජීවත් වෙද්දි තවත් සතෙකුගේ ආයු කාළය දවස් දෙකක් පමණ වෙනවා. මේ හැම සතාම උපත – විපත අතරේ තමන්ගේ ජීවිතය ගැටගසා ගන්න තරඟයක යෙදෙනවා. බැක්ටීරියා සහ සරළ සත්ත්‍වයන් අමරණීයයි. සමහර ශාක අවුරුදු සියගණනක් හෙමින් හෙමින් වැඩෙනවා – ඒවා අමරණීයයි. තවත් සමහර ශාක කුඩා කාළයක් තුළ වැඩිලා ඊලඟ පරම්පරාවත් බිහි කරනවා, නැතිනම් මොටෙයියන් බිහිකර තමන්ගේ ජාන ඉදිරියට ගෙන යනවා.  මිනිසුන් බුද්ධියෙන් ඉහළ නිසාම මේ දේවල් පාලනය කරලා ස්වභාව ධර්මයේ නියමයන් වෙනස් කරන්න උත්සාහ කරනවා. මේ මොනවා වුනත් කවුරු මොනවා කළත්, නවත්වන්න බැරි එකම දේ වයසට යාමයි.

වසර බිලියන 3.7 කට පමණ පෙර ජීවය ඇති වූ කාළයේ ඒක සෛලික විභජනය මගින් බැක්ටීරියා, ප්‍රෝකැරියෝට ජීවීන් ආදිය සිය දරු පරම්පරාව බිහි කරද්දී ඔවුන් සරළවම අනන්ත කාළයක් ජීවත් වුනා – තවමත් ජීවත් වෙනවා. නමුත් සත්ත්‍වයා පරිණාමය වෙමින් පැමිණ වසර බිලියනයකට පමණ පෙර දිලීර වර්ගවල ලිංගික ප්‍රජනනය ඇරඹූ විට සහ වසර මිලියන 320 කට පමණ පෙර බීජ නිෂ්පාදනය ඇරඹුන විට සත්ත්‍වයාගේ අමරණීයත්‍වය අහිමි වුනා. මක් නිසාද යත්, තමන්ගේ ජාන ඊලඟ පරම්පරාවට ඒ ආකරයෙන්ම සම්ප්‍රේෂණය වීම අවශ්‍යතාවයක් නොවුන නිසා. කෙසේ වුවත් සරළ සෛලවල අමරණීයත්‍වය පිළිබඳ මතය තරමක් විවේචනයකට ලක් වූයේ ඊ කෝලයි සෛල බෙදීමේදී හඳුනාගතහැකි ලෙස වෙනත් සෛලවලට බෙදීම සිදු වීම නිසායි. මෙය මීට පෙර සරළ සත්ත්‍වයන්ගෙන්  නිරීක්‍ෂණය කර තිබුණේ නැහැ.

මහා භද්‍රකල්පය මුල කල්ප ලක්‍ෂයක් ආයුස තිබුණු මිනිසා, කකුසඳ බුදුන්ගේ සමයේ අවුරුදු 40000 ක් ජීවත් වුනාලු. ගෞතම බුද්ධ කාලයේ මිනිසකුගේ ආයු කාළය වසර 120 ක් යැයි පැවසෙනවා. විද්‍යාත්මක දත්තවලට අනුව නුදුරු අනාගතයේ වෛද්‍ය විද්‍යාවේ සහ තාක්‍ෂණයේ බල මහිමයේ මිනිසකුගේ උපරිම ආයු කාළය වසර 115 ක් බවට පත් කළ හැකියි. මේ වනවිට වාර්තා වූ වැඩිම ආයු කාළයක් විඳි පුද්ගලයා වන්නේ ප්‍රංශ ජාතික කාන්තාවක් වූ Jeanne Louise Calment. ඇය අවුරුදු 122 ක් සහ දින 164 ක් ජීවත්ව 1997 දී මියගියා.

මිනිසුන් වයසට යාම කාළයත් සමග සිදුවන භෞතික, මානසික සහ සමාජයීය වෙනස්කම් ලෙස සරළව හැඳින්විය හැකියි. ඉතා කඩිසර ළමා සහ තරුණ කාළයක් ඇති අපි, මැදිවිය එළැඹෙන විට අපේ ප්‍රතික්‍රියා කාළය සහ යම් ක්‍රියාකාරකමක් නිසා වැයවන ශක්තිය නැවත යථා තත්ත්‍වයට ගෙන ඒමට යන කාළය (Recovery Time) ක්‍රමයෙන් අඩු වෙනවා. මෙය අපේ ශරීරයේම ඇති සෛලවල සිදුවන වයසට යාම නිසා සිදුවන්නක්.  සාමාන්‍යයෙන් විද්‍යාගාර තත්ත්‍ව යටතේ මිනිස් සෛලයක් බෙදී යා හැක්කේ පනස් වතාවක් පමණයි. ඉන් පසු එම සෛලය මිය යනවා. ලොව පුරා දිනකට මිනිසුන් 150,000 ක් පමණ ස්වභාවිකව මිය යද්දී, එයින් 2/3 ක් පමණ මිය යන්නේ වයසට යාම නිසා.

විද්‍යාව කෙතරම් දියුණු වුනත්, වයසට යාම පිළිබඳ නිසි හේතුව මෙය යැයි කීමට තවමත් කිසිම කෙනෙකු සමත් වී නැහැ. දැනට පිළිගෙන ඇති මතයන් වන්නේ සෛල සහ DNA වලට සිදුවන හානි නිසා වයසට යාම සිදු වන බවයි. එහිදී සිදු වන්නේ විවිධ සාධක මත ජාන වැඩිපුර සක්‍රීය වීම හෝ අක්‍රිය වීම නිසා ඒවා සෛලවල සහ පටකවල ක්‍රියාකාරීත්‍වය අඩාල වීම සහ මානසික ක්‍රියාකාරීත්‍වය වෙනස් වීම නිසා වයසට යෑම සිදු වන බවයි.

සෛල සහ පටක වයසට යාම නිසා පිටතට දැනෙන ලක්‍ෂණ රාශියක් තිබෙනවා.

කුඩා කාළයේ දරුවන්ට කිලෝ හර්ට්ස් 20 ට වඩා තියුණු ශබ්ධ ඇසීම සාමාන්‍ය දෙයක්, නමුත් වැඩිහිටි වත්ම, මේ තියුණු ශ්‍රවණ ශක්තිය නොමැති වී යනවා. එසේම වයස විසි ගණන්වලදී ඥාණාත්මක ශක්තිය එසේත් නැතිනම් නව යමක් ඉක්මනින් ඉගෙන ගැනීමේ ශක්තිය හීන වනවා. මේ නිසා වයසට යත්ම අධ්‍යාපනයට යෙදිය යුතු ආයාසය වැඩි වනවා. එය සමාජයීය හෝ වෙනත් ප්‍රශ්න නිසා සිත එකඟ කර ගැනීමේ අපහසුතාවයන් නිසා පමණක් නොව, වයසට යාම නිසාත් සිදුවනවා. සමේ පිටත ස්ථර ආලෝකයට නිරාවරණය වැඩි වීම නිසා සම වසයට යාම ඉක්මන් වන්නේත් යෞවන විය ඉක්මවාගෙන යනවිටයි. ස්ත්‍රීන්ගේ දරුවන් බිහි කිරීමේ සඵලතාවය වයස 25න් පසු අඩුවන බව විද්‍යාත්මකව සොයාගෙන තිබෙනවා.  බොහෝ දෙනෙකුට වයස 35 වනවිටම හතලිස් ඇඳිරිය හැදෙන්නේ ඇසේ කාචයේ වූ α-crystallin ප්‍රමාණය අඩු වීම නිසා සිදුවන කාචය ඝණ වීම හේතුවෙන්. හොඳින් වැඩෙමින් පවතින හිසකෙස් ගැලවී යාමට පටන් ගන්නේත් සුදු වීමට පටන් ගන්නේත් වයසටයාම හේතුවෙන්. තට්ටය පෑදීම සියයට පණහක් පමණ පිරිමින්ටත්, සියයට විසිපහක් පමණ කාන්තාවන්ටත් දැකිය හැකි තත්ත්‍වයක්. එසේම හිසකෙස් සුදු වීමට පාරම්පරික සාධක සහ පාරිසරික සාධකද බලපානවා. කාන්තාවන්ගේ ආර්තවය නැවතීම වසර 45 ත් 55ත් අතරදී සිදු වන්නේ දරුවන් ලැබීමට සිරුර ඒ වනවිට අනුවර්තනය නොවීමේ හේතුවක් ලෙසින්, නමුත් සමහර කාන්තාවන්ට වසට 70 වනවිට වුවත් ආර්තවය සිදු විය හැකියි. වයස 60 පමණ වනවිට අස්ථි පද්ධතිය දුබල වෙමින් ආතරයිටිස් වැනි සංකූලතා ඇති වන්නට පටන් ගන්නවා. එසේම කාන්තාවන්ගේ අස්ථීන්ගේ කැල්සියම් ප්‍රමාණය අඩුවීම නිසා ඔවුන්ගේ අස්ථි කැඩීයාමට ඇති ප්‍රවණතාවයත් ඉතා වැඩියි. වසර 75 වනවිට සියයට පණහක් පමණ දෙනාට ඇසීමේ සහ කතා කිරීමේ දුර්වලතා ඇතිවීමට පටන් ගන්නේ පටක වයසට යාම නිසායි. එසේම කැටරැක්ට් වැනි පෙනීමේ දෝෂ නිසා අවුරුදු 80 පමණ වනවිට පෙනීම දුර්වල වන්නට පටන් ගන්නවා. තරුණ වයසේ කෙතරම් ශක්තිවන්තව සිටියත් අවුරුදු 85 පමණ වනවිට අපි බොහෝ දෙනාගේ චලන හැකියාවන් අඩු වන්නට පටන් ගන්නවා. ඒ වනවිට ජීවිත කාලය පුරාම ක්‍රියා කරමින් තිබූ හෘද පේශිවල ක්‍රියාකාරීත්‍වයද කෙමෙන් කෙමෙන් අඩු වන්නට පටන් ගන්නවා. මෙය හෘදයාබාධ වැනි තත්ත්‍වයනට හේතු වන නිසා බොහෝ දෙනා එක්කෝ මරණයට හෝ ඔත්පල භාවයට පත් වනවා. ශාරීරික වෙනස්කම් මෙසේ වුවත් වසර 65 පමණ වනවිට සිදුවන අමතකවීම්, ආදිය මෙන්ම තරහ යාම ආදී මානසික වෙනස්කම් පවා වයසට යාම නිසා සිදුවන බව සැලකිය හැකියි. මෙයට ඇල්ශයිමර්ස්, පාකින්සන්ස් සහ වෙනත් ස්නායුගත ආබාධ ලොකු දායකත්‍වයක් දක්වනවා.

වයසට යාම පාලනය කිරීමට මෙන්ම රෝග පාලනයටත් ලෝකය සුවිසාල මුදල් කන්දරාවක් වියදම් කරනවා. නමුත් වයසට යාම ඉක්මන් කරන සාධක ගණනාවක් දක්නට ලැබනෙවා. මේවා බොහෝ දුරට එක් එක් පුද්ගලයාගේ ජීවන චර්යාව හා බැඳී පැවතෙන දෙයක්. එයින් මූලිකම දෑ වන්නේ දුම්පානයයි. දුම්පානය නිසා කෙනෙකු දුම් නොබොන ඒ වයසේම කෙනෙකුට වඩා අතිශයින් වයසක පාටක් පෙන්නුම් කරනවා. සර්වසම නිවුන්නු යොදාගෙන කළ පරීක්‍ෂණයකදී දුම් නොබොන නිවුන් පුද්ගලයා දුම් බොන්නාට වඩා අවුරුදු පහක තරුණභාවයක් පෙන්නුම් කරන බව සනාථ වී තිබෙනවා. එසේම අධික මත්පැන් පානය නිසාද ශරීරයේ සෛල වයසට යාම ඉක්මන් කෙරෙනවා. කෙසේ වුවත් වයින් වැනි ප්‍රතිඔක්සිකාරක සංඝඨක අඩංගු මත්පැන් කිසියම් ප්‍රමාණයක් දිනපතා ශරීරගතවීම වයසට යාම පාලනය කරන බවත් සොයාගෙන තිබෙනවා. මෙයට අමතරව මානසික සතුට කෙනෙකුගේ පෙනුම වෙනස් කරන ප්‍රධාන සාධකයක්. තරහ නොගැනීම, නිතරම සතුටින් සිටීම, මානසික නිදහස ආදිය නිසා ශරීරයේ සිදුවන වෙනස්කම් පාලනය කළහැකියි. එයින් කෙනෙකුගේ මානසික වයෝවෘද්ධතාවය අඩුවන අතර එය ශරීරයටද බලපානවා. වයසට යාමට අකැමැති කෙනෙකු දිනපතා සුව නින්දක් ලබාගත යුතුමයි. නින්ද යනු අපේ දවසේ ගෙවී ගිය සෛල, මානසික විඩාව සුව කරන්නට ලබාදෙන විරාමයයි. මෙය නිසි ආකාරයට ලබා නොගතහොත් ඊලඟ දිනයේදී ක්‍රියාකාරීත්‍වයට සහ ජීවමය ක්‍රියාකාරකම්වලට බලපානවා. මේ නිසා හොඳ නින්දක් අත්‍යවශ්‍යමයි. ඒ හා සමානවම ඔබ ගන්නා ආහාර වේලත් වැදගත්. ඔබ මස් සහිත ආහාර වැඩිපුර ගන්නේ නම් ඔබේ ශරීරයේ මුක්ත ඛණ්ඩ නොහොත් නිදහස් ඉලෙක්ට්‍රෝණ සහිත සංයෝග තැනීමේ හැකියාව වැඩියි. මේ නිදහස් ඉලෙක්ට්‍රෝණ සහිත සංයෝග ඔබේ සෛලවල වූ විවිධ සංයෝග සහ සෛලීය ද්‍රව්‍ය සමඟ ප්‍රතික්‍රිියා කරනවා. එවිට ඒවා විකෘති වී සෛලවලට හානි පැමිණෙනවා පමණක් නොවෙයි පිළිකා වැනි දෑ සෑදීමටත් මූලික වනවා. මේ නිසා හැකිතාක් මෙම නිදහස් ඉලෙක්ට්‍රෝණ නසන ආහාර ගැනීම වැදගත්. එයට පෙර සඳහන් කළ රතු වයින් ඉතාමත් ගුණදායකයි. එමෙන්ම සීනි හෝ කාබෝහයිඩ්‍රේට භාවිතයත් අවම කිරීම වැදගත්. කාබෝහයිඩ්‍රේට සහ සීනි ශරීරය තුළ විඛණ්ඩනය වී අවසාන ඵලය වන්නේ ග්ලූකෝස් සහ ඒ හා ආශ්‍රිත සරළ සීනි වර්ගයි. මෙය වැඩවීම ශරීරයට හානිදායකයි. අවසාන ප්‍රතිඵලය වන්නේ දියවැඩියාවයි. දියවැඩියාව යනු නිහඬ මාරයෙක්. එය අධික රුධිර පීඩනය, වකුගඩු ආබාධ ආදිය වෙත නිරතුරුව අතවනනවා. මේ නිසා සීනි හා සීනි එකතු කරන ආහාර අවම කිරීම කාටත් ගුණදායකයි.  එසේම විවිධාකාර පැණිබීම වර්ග, සොසේජස් සහ මීට් බෝල්ස් වැනි සකසන ලද මස්වර්ග ආදිය බොහෝ ලෙඩරෝගවලට අතවනන සාධකයි. හැකිතරම් කෘත්‍රිම දෑ සහ රසායනික ද්‍රව්‍ය අඩංගු ආහාර අවම කිරීම දීර්ඝකාලීන දිවියකට අඩිතාලමයි.

අපි කවුරුත් ජීවත් වන්නේ සංකීර්ණ ලෝකයකයි. අපි හැම දෙනාම එකිනෙකාට කුමක් හෝ ආකාරයකින් බැඳී පවතිනවා. ලෝකයේ ලොකුම ධනපතියා සිට ලොකුම දුප්පතා හෝ අවාසනාවන්තයා තමන්ට ආවේණික ප්‍රශ්න ගොඩක් මැද ජීවත් වෙනවා. මේ ප්‍රශ්න බැරෑරුම්ව නොසිතා, ආතතිය අවම ආකාරයට ජීවිතය සකසා ගතහොත් මානසිකවද ඔබ සැහැල්ලුවට පත් වනවා. අපට ලැබෙන ප්‍රශ්න දෙවැදෑරුම් වෙනවා. ඒ තමන්ට පාලනය කළ හැකි දෑ සහ පාලනය කළ නොහැකි දෑ.. අපි බොහෝ දෙනා වද වෙන්නේ අපේ ප්‍රශ්නවලට වඩා අනුන්ගේ හෝ අනුන් විසින් අපට පැටවූ ප්‍රශ්න නිසා. පාලනය කළ හැකි දෑ පිළිබඳ සිත යොමුකර ඒවාට ප්‍රමුඛස්ථානය ලබා දී විසඳීමෙන් පසු පාලනය කළ නොහැකි දෑ වෙත සිත යොමු කිරීමෙන් මානසික පීඩනය අවම කළ හැකියි. සියදිවි නසාගැනීම් සියල්ලම වගේ සිදු වන්නේ මානසික සංකූලතා නිසා. මානසික ආතතිය නිසා ශරීරයේ සෛලවලට දැනෙන අපහසුතාවය ඉතා ඉහලයි. ඔබ ආතතියෙන් ඇතිවිට ශ්‍රාවය වන හෝමෝන ශරීරය වයසට යාම ඉක්මන් කරනවා. එය වලක්වාගැනීමට කළ හැකි හොඳම දේ ශරීරයට සතුට දනවන හෝමෝන ශ්‍රාවය කිරීමයි. එ් සඳහා ව්‍යායාම වලින් ලැබෙන උදව්ව අති මහත්. ව්‍යායාම කිරීම නිසා ශරීරයේ අනවශ්‍ය රසායනිකයන් දහඩිය හා මුසුව පිටතට පැමිණීමත්, හෝමෝන සංයුතියේ සමබරතාවය ඇතිවීමත්, මේද සහ අනවශ්‍ය කැලරි දහනය සිදුවීමත් සහ වෙනත් බොහෝ වාසි ලැබීමත් නිසා ශරීරය ප්‍රබෝධමත් වනවා. මෙය නිතැතින්ම ශරීරය තරුණ කිරීමක් වනවා. ව්‍යායාම කිරීමේදී එන්ඩෝෆින් නම් හෝමෝන ශ්‍රාවය වෙනවා. එසේම සතුටු හෝමෝන වන සෙරටොනින් ද සතුට දනවන හැඟීම් පහල කිරීමට දායක වනවා. මේ නිසා ව්‍යායාම කිරීමෙන් ඔබේ ශරීරය පමණක් නොවෙයි සිත ද සුවපත් වනවා.

මෙයට අමතරව බොහෝ දෙනෙකු සිය තරුණකම බලෙන් ලබා ගැනීමට විවිධ බටහිර ඖෂධ සහ ආලේපන ලබා ගන්නවා. මේ නිසා තාවකාලික තරුණබවක් ලැබුණත්, දීර්ඝකාලීනව ඔබ ඉක්මනින් වයසට යැවීමට මේ ඖෂධ හේතු වනවා. දීර්ඝකාලීනව හිරු එලියට නිරාවරණය වීමත් සම වයසට යාමට එක් හේතුවක්. ඝර්ම කලාපයේ වෙසෙන බොහෝ කාන්තාවන් අවුවේ යනවිට කුඩයක් හෝ තොප්පියක් භාවිතා කිරීම ඉතා වැදගත් වනවා. විලාසිතාවට අවුකණ්නාඩි පැළඳ සිටියත්, මුහුණට එයින් ආරක්‍ෂාවක් ලැබෙන්නේ නැහැ, එයින් ආරක්‍ෂා වන්නේ දෑස් පමණයි..

වයසට යාම නතර කළ නොහැක්කක් බව මෑතකදී සිදු කළ ගණනය කිරීම් වලින් පවා සනාථ වුනා. මේ සඳහා ශරීරයේ සෛල ඒකක වශයෙන් සහ සමූහ වශයෙන් ක්‍රියාකරන ආකාරය සළකා බැලුනා.  සෛල වයසට යාමේදී ඒ්වාට සිදුවිය හැක්කේ එක්කෝ ක්‍රියාකාරීත්‍වය අඩපණ වීම, සම්පූර්ණයෙන්ම ක්‍රියාකාරීත්‍වය නතර වීම හෝ නොනවත්වා අධික්‍රියාකාරී වී පිළිකා සෛල බවට පත් වීමයි. පසුගිය ඔක්තෝබර් 30 වනදා පළවූ වාර්තාවකට අනුව මිනිසුන් වයසට යාමේදී ඔවුන් මෙසේ පිළිකා සෛල නිපදවන බව සොයා ගෙන තිබෙනවා. එසේ වුවත්, ඒ සෛල පිළිකා ලක්‍ෂණ පෙන්වන්නේ නැහැ. මේ අනුව සිදුකළ ගණනයකදී සොයා ගත්තේ සෛල පවා “ශක්තිවන්තයා ජයගනී” යන ලක්‍ෂණය පෙන්වමින් දුර්වල සෛල බැහැර කෙරෙන බවයි. එසේ වුවත්, ඉතිරිවන සෛලද කෙමෙන් කෙමන් වයසට යන නිසා කිසිදු දිනෙක වයසට යාම නතර කළ නොහැකි බව නිගමනය කෙරුණා..

කෙසේ වුවත් වයසට යාම පාලනය කිරීම සමහර ආහාර මගින් කළ හැකියි. ලෝකයේ සෞඛ්‍යමත්ම ජාතිය ලෙස ඉතාලිය සහ විශේෂයෙන්ම මොනොකෝ කිරුළු දරා තිබෙනවා. ඔවුන්ගේ සුවිශේෂිත්‍වය වන්නේ මනා මානසික සමබරතාවය, හොඳින් ව්‍යායාම කිරීම,  පවුල් සම්බන්ධතා, අඩු ආතතිය සහ මධ්‍යදරණී පෙදෙස්වලට ආවේණික ආහාර රටාවයි. මෙහිදී ඉතා කුඩා ප්‍රමාණවලින් සමබර එළවලු සහ මාළු බහුල ආහාර වේල් ගැනීම විශේෂයි. දැන් ඉතාලියේ ඉපදෙන දරුවන් බොහෝ දෙනෙකු අවම වශයෙන් අවුරුදු 81 ක් ජීවත් වන බවයි ගණන් බලා ඇත්තේ. එහි දෙවනි ස්ථානය ලබා ඇත්තේ ලෝකයේ ප්‍රීතිමත්ම මිනිසුන් ජීවත්වන රට වන ස්විස්ටර්ලන්තයයි. ඔවුන්ගේද ආහාර රටාව සහ ඉහත කී සියළු හොඳ පුරුදු නිසා ජීවත්වන කාලය දිගු වනවා. ජපානය තෙවනි තැන ලබා ගන්නේද, ඉහත කී කරුණු කාරණා අඩු වැඩි වශයෙන් තබා ගනිමින්. එසේම ඔවුන් සිය ආහාරයට මාළු වර්ග සහ මුහුදු පැලෑටි එකතු කර ගන්නවා. ඔවුන් කළු තේ වෙනුවට ග්‍රීන් තේ බීමට රුසියන්. මේ නිසා ඔවුන්ගේ ශරීර තුළට නිතිපතා ප්‍රතිඔක්සිකාරක එකතු වනවා. මෙය දීර්ඝකාලීන ජීවිතයට උදවුවක්. අයිස්ලන්තය, සිංගප්පූරුව, ඕස්ට්‍රෙිලියාව, ස්පාඥ්ඥය, ස්වීඩනය, නෝර්වේ, නෙදර්ලන්තය, ආදී රටවල්  ද වඩාත්ම සෞඛ්‍යමත් මිනිසුන් ජීවත්වන රටවල් ලැයිස්තුවේ ඉහලින්ම සැලකෙනවා.

මේ සියළු ජාතීන්ගේ දිගු ජීවිත කාළයේ මූලික රහස වන්නේ නිසි ආහාර රටාව, ව්‍යායාම කිරීම, මානසික සමබරතාවය, පවුලේ අය සමග විනෝදවීම, අඩු ආතතිය, ආදී සරළව අනුගමනය කළ හැකි ජීවන රටාවේ වෙනසක් පමණයි. නමුත් අපේ රටේ මේ කිසිදු කරුණක් යහපත් ආකාරයකට නැති වීමම, මිනිසුන් බොහෝ ආත්මාර්ථකාමීවීම, නොනවතින තරඟයක නිරතවීම නිසා සිදුවන ආතතිය සහ මානසික අසංකූලතාවයන්, වස විශ සහිත ආහාර, අධික සීනි, පිටි, සහ මස් භාවිතය වැනි දෑ, අධික වාහන තදබදය සහ ඒ ආශ්‍රිත ආතතිය සහ අධික පරිසර දූෂණය, වායු දූෂණය, වැනි මිනිසා විසින්ම තනා ගත් පාරිසරික සාධක නිසා අපේ ජනතාව දිනෙන් දින සෞඛ්‍යය අතින් අගතියට යනවා විනා කිසිදු දිනෙක සෞඛ්‍යමත් ජාතියක් වන්නේ නැහැ. මේ නිසාම රජයට ජනතාවගේ සෞඛ්‍ය වෙනුවෙන් වැය කිරීමට සිදුවන මුදල අතිමහත්, එමෙන්ම ජාතියක් රෝගී වනවිට ඒ රටෙහි ඵලදායීතාවය සහ සේවාවල කාර්යක්‍ෂමතාවය ඉතා දැඩි ලෙස පහලට යනවා. එවිට රටෙහි ආර්ථිකය දුර්වල වෙනවා.

සෞඛ්‍ය සම්පන්න රටකට කළ හැකි දෑ අති විශාලයි. ජාතීන් වශයෙන් ඇණකොටා ගනිමින් එකිනෙකා වඳ කිරීමට යත්න දරන කාලයේ සියළු දෙනා එක්ව රටක් වශයෙන් ජයගැනීමට උත්සාහ කිරීම සැමට උසස් දිවිපෙවෙතක් හිමිකරදීමට සමත් වේවි. රජයක් වශයෙන් අපට ලබා දිය හැක්කේ අඩු මිලට ඖෂධ සහ සෞඛ්‍ය සේවාවන් පමණයි. අන් සියල්ල අපි විසින් අපටම ලබාදිය යුතු සේවාවන්. නිවසේ කුඩා එළවලු පාත්තියකින් නෙලා ගන්නා සෞඛ්‍යාරක්‍ෂිතයි කියා තමන්ටම සහතික විය හැකි නැවුම් එළවලු සහිත ආහාර වේලක් ඔබේ සෞඛ්‍යය යහපත් කරවනු ඇති. නිවසේ කුණු කොම්පෝස්ට් කිරීමෙන් එයට අවශ්‍ය පෝෂණය ලබා ගත හැකියි. එවිට පරිසරයට කුණු එකතුවීමත් අවම වනවා. එම එලවලු පාත්තියේ ඔබේ කාලය ගත කිරීමෙන් මානසික සුවයක්, සුළු ව්‍යායාමයක් ලැබෙනු ඇති. ඔබේ පවුලේ අය එයට එකතු කර ගැනීමෙන්, පවුලේ එකට ගත කරන කාළය, මානසික බැඳීම ඇතිවනු ඇති… ආගමානුකූල වීම, භාවනාවට සිත යොමු කිරීම ආදිය නිසා ඇතිවන මානසික ප්‍රබලතාවයත් මිනිසා තිරිහන් කිරීමට සමත්.  මේ සියල්ල එකට එකතු වූ කල ඔබේ ජීවිතය තව දිනකින් හෝ දිගු වනු ඇති… තිරිහන් වීමේ සරළ රහස එයයි.

ඔබට දීර්ඝායුෂ !

පිටස්තරයා 16

මේ වාර්තාව නම් සෑහෙන සංකීර්ණයි…..

ඒ මොකද එහෙම කියන්නෙ…. ඔයාම නෙ කිවුවෙ මේ වාර්තාව පැහැදිලි කරලා දෙන එක සුළු දෙයක් කියලා.

මම කිවුවා තමයි… ඒ වුනාට මේක හිතුවට වඩා සංකීර්ණයි… මේකෙ සංඝඨක කිහිපයක් මම වෙන් කරලා හඳුනා ගත්තා… නමුත්, මේකෙ සමහර වෙලාවට එකම සංඝඨකය විවිධ ප්‍රමාණ වලින් එක් එක් තෙල් වර්ගයේ තිබෙන්න පුළුවන්. මේ නිසා එක් එක් තෙල් වර්ගයට ආවේණික සංඝඨක වලින් තෙල් වර්ගය හඳුනා ගන්නවා විනා ඒවායේ ප්‍රතිශතයෙන් නම් කොහොමටවත් හඳුනාගන්න බැහැ.. උදාහරණයක් වශයෙන් පයිනීන් කියන සංඝඨකය අඩංගු වෙන්නෙ ටර්පන්ටයින් කියන තෙල් වර්ගයෙ.. ඒ නිසා අපට පුළුවනි මේ මිශ්‍රණයේ ටර්පන්ටයින් තිබෙන බව සහතික කරන්න.. සින්ජිබරීන් තියෙන්නෙ ඉඟුරු වල.. ඒ නිසා ඉඟුරුත් මේ මිශ්‍රණයේ අන්තර්ගතයි. එපමණක් නොවෙයි මස්ටර්ඩ් (අබ) පවා මේ මිශ්‍රණයේ තියෙනවා… මම කිසිම අවස්ථාවක දැකලා නැහැ මේ වගේ සංකීර්ණ මිශ්‍රණයක්.

සයන්ටිස්ට් රාහුල් ගුප්තා… ඔබ කියන්නෙ ඔබටත් මේ මිශ්‍රණයේ තියෙන සංඝඨක වෙන් වෙන්ව හඳුනා ගන්න බැහැ කියලද ?

ඔව්…. මට සමහරක් සංඝඨක හඳුනාගත්තත් සියල්ල හඳුනාගන්න අමාරුයි.. නමුත්, මේ සොයා ගත් දේ වලින් මට නිගමනය කරන්න පුළුවන් මේ මිශ්‍රණය යොදාගෙන තිබෙන්නෙ කිසියම් පිරිසිදුකාරකයක් විදියට බව.

ඒ වගේම ඔබ ගෙන ආපු පැලය අපි පරීක්‍ෂාවට ලක් කළා… ඒ පැළය කුඩා කාළයේ කුමක්ද කියා හඳුනාගන්න අමාරු වුනත්, එය Sylibum වර්ගයක් වන Milk Thistle නම් පැලෑටිය බවට හඳුනාගත්තා. එය සාමාන්‍යයෙන් ඇමරිකානු මහාද්වීපයේ වැඩෙන පැලෑටියක් නොවෙයි. නමුත් එය ඇට මගින් පැල කරගන්න පුළුවනි. එය වැඩෙන්නෙ මධ්‍යධරණී ප්‍රදේශ, උතුරු අප්‍රිකාවෙ සහ මැදපෙරදිග ප්‍රදේශ ආශ්‍රිතව. මේ පැලෑටිය අධික ඖෂධීය වටිනාකමක් තිබෙන පැලෑටියක්.

මොකද්ද ඒකෙ ඖෂධීය වටිනාකම ?

මේක විෂ හරණ පැලෑටියක් විදියට පුරාණ කාළයේ සිටම භාවිතා කරලා තිබෙනවා. මේ පැලෑටියේ ඇති සිලිමරින් කියන සංයෝගයේ ගුණ පිළිබඳ ඉතා දිගු කාළයක සිට පර්යේෂණ කෙරිලා තිබෙනවා. ඒ අනුව අක්මාවේ සිදුවන රුධිර පිරිපහදුවේදී ශරීරයේ ඇති සියළුම විෂ ද්‍රව්‍ය ඉවත් කිරීමේ හැකියාවක් ඇති බව සොයාගෙන තිබෙනවා. විශේෂයෙන්ම මත්ද්‍රව්‍ය සහ ඖෂධ වැනි දේ වල ඇති අහිතකර රසායනික ද්‍රව්‍ය නිස්සාරණය කර ශරීරයෙන් ඉවත් කිරීම මගින් අක්මාවේ කාර්යක්‍ෂමතාවය වැඩි කරනවා. අක්මාව නිරෝගීව තබා ගන්නවා. මේ නිසා රුධිරය ඉතාමත් පිරිසිදු තත්ත්‍වයක පවත්වාගෙන යාමට මේ පැලෑටිය භාවිතයට ගන්න කෙනෙකුට හැකි වෙනවා. මේ සංසිද්ධිය අද ඊයෙ සොයාගත්  දෙයක් නොවෙයි. ඈත අතීතයේ රෝම සහ ග්‍රීක ජාතිකයන් පවා මේ පැලෑටිය සහ ඇට විෂහරණය හඳහා යොදාගෙන ඇති බව සඳහන්… ඒ නිසා මම හිතන්නෙත් මේ පුද්ගලයා තමන්ගෙ ශරීරයේ ඇති විෂද්‍රව්‍ය හෝ රසායනික ද්‍රව්‍ය ඉවත් කරගන්න මේ පැලෑටියෙ නිස්සාරකයක් හෝ ඇටවලින් ලබා ගත් කුඩක් භාවිතා කරන්න ඇති කියලා මම හිතනවා. ඒ වගේම පෙරදිග වෛද්‍ය විද්‍යාවෙදි සමහර වෙලාවට පිළිකා ප්‍රතිකාර සඳහාත් මේ පැලෑටිය යොදා ගන්නවා කියලා වාර්තා වෙනවා. රාහුල් ගුප්තා විසින් එෆ්බීඅයි ඒජන්තවරු දෙදෙනාට එම පැලෑටිය පිළිබඳ දිගු විස්තරයක් ගෙන හැර පෑවේය.

ආ…. ඒක තමයි මෙයාගෙ රුධිර පරීක්‍ෂාවෙදි කිසිම දෙයක් අපට අහු වුනේ නැත්තෙ… රුධිර වාර්තාවෙ අඩංගු වෙන්නෙ බොහොම පිරිසිදු රුධිරය ඇති පුද්ගලයෙක් කියලයි.. සියල්ල අවසන ජේසන් කටහඬ අවදි කළේය.

සමහරවිට මෙයා මත්ද්‍රව්‍ය පාවිච්චි කරලා ඒ බව සඟවන්න මේක පාවිච්චි කළා වෙන්න බැරිද ? ඒ මයික්…

එහෙම වෙන්නත් පුළුවන්. නමුත් දැන් ආයෙම රුධිර පරීක්‍ෂාවක් නොකෙරෙන නිසා ඇයි දැනුත් ඒවා පාවිච්චි කරන්නෙ ? රාහුල්ගෙ තර්කයත් වැදගත්…

අපට මේ දේ දැනගන්න කරන්න පුළුවන් එකම දෙයයි. මෙයාගෙ අනතුර වුන වෙලාවෙ ලබාගත් රුධිර සාම්පලය විශ්ලේෂණය කරලා බැලුවොත් මෙයා මත්ද්‍රව්‍ය භාවිතා කරනවද කියලා හොයා ගන්න පුළුවනි. අපි ඔහුගෙ නිවස පරීක්‍ෂා කළ වෙලාවෙ නම් අපට කිසිම මත්ද්‍රව්‍යයක් හෝ සිරින්ජයක්වත් හමු වුනේ නැහැ… ඒ නිසා මත්ද්‍රව්‍ය ගන්නවාද කියන සැකය ඒ තරම් තහවුරු වෙන්නෙ නැහැ.

කෝකටත් අපි වෛද්‍ය වාර්තාව අරගෙනම බලමු….. සයන්ටිස්ට් රාහුල් ගුප්තා…. බොහොම ස්තූතියි ඔබේ විශේෂඥතාවය මේ කාර්යයට ලබා දුන්නාට…. අපේ වාර්තාවෙ ඔබ ගැන විශේෂ සඳහනක් කරනවාමයි මේ සිද්ධියට උපකාර කළාට….

::::::::::::::::::::::::::::::::::::::::::::::::::::::::::::::::::::::

සතියක් ගත වෙද්දී විශ්ව කෙමෙන් කෙමෙන් සුවය ලබන්නට විය. හදිසි සත්කාර ඒකකයෙන් ඉවතට ගනු ලැබූ විශ්වට ආදර සත්කාර ද නොඅඩුව ලැබුණි… සිය මාමණ්ඩිය සහ ලොකු නැන්දාගෙන් මෙන්ම මොලී ද නිතිපතා පැමිණ විශ්වගේ සැප දුක් සොයා බැලීම නිසා විශ්ව ඉක්මනින්ම සුවය ලැබුවේය…. විශ්වට සිහිය ආ පසු පිරිත් සජ්ඣායනය කිරීම නතර වුවත්, අත්ථදස්සි හිමියෝ ද විටින් විට රෝහලට පැමිණ විශ්ව හා බොහෝ දේ සාකච්ඡා කරනු පෙණුනි. මේ අතර විශ්වගේ පාදය යථා තත්ත්‍වයට ගෙන ඒම පිණිස කායික ප්‍රතිකාර ක්‍රම අවශ්‍ය බවට සහ මානසික ප්‍රතිකාර අවශ්‍ය බවට වෛද්‍යවරුන් විසින් නියම කිරීම  නිසා විශ්ව හමුදා රෝහලේ පුනරුත්ථාපන අංශය වෙත මාරු කර යැවීමට ද සූදානමක් තිබුණි.

මොලී… ඔයා විශ්වගෙ පෙම්වතියද ? දිනක් මොලී සමඟ කතා බහේ නියැලී හුන් සුමනසේකර මහතා එක්වරම මොලීගෙන් විමසීය.

නැහැ… ඇයි එහෙම ඇහුවෙ ?

නැහැ… මම නිකමටයි ඇහුවෙ… මෙච්චර කාලයක් විශ්ව අසනීප වෙලා ඉඳිත්දි දිගටම විශ්ව බලන්න, එයාගෙ ගැන හැම නිතරම හොයා බලන්න වැඩියෙන්ම ආවෙ ඔයා විතරයි… මෙච්චර කාලයකට විශ්වට ගෑණු ළමයෙක් කියලා ලංවෙලා හරි හිටියෙ ඔයා විතරයි… ඒකයි මම ඇහුවෙ… වෙන කාරණයක් නිසා නොවෙයි… සුමනසේකර මහතා සන්සුන්ව උත්තර දුන්නේය…

මම විශ්වගෙ පෙම්වතිය නොවෙයි… නමුත් අනතුර සිදු වෙන්න පෙර  සතියක පමණ වෙලේ ඉඳලා අපි දෙන්නා එකටමයි වැඩ කළේ.. ඒ නිසා ගොඩක් මිතුරු වුනා…

ඇත්තම කියනවා නමු නම් ඔයා විශ්ව බලන්න එනවට මගේ එච්චර කැමැත්තක් මුලින් තිබුණෙ නැහැ.. නමුත් මට තේරුම් ගියා ඔයා විශ්ව ගැන සෑහෙන වද වෙනවා කියලා… මොලී… විශ්ව කියන්නෙ අපට බොහොම සුවිශේෂ දරුවෙක්… විශ්ව අපි හැමෝටම සම්පතක්. විශ්වගෙ පවුලෙ අය අකාලයේ මිය ගියත්, විශ්වගෙ තාත්තා නිතරම මට කිවුවෙ ඒ අය නැති කාලෙක විශ්ව හොඳින් බලාගන්න කියලා… මට හිතෙන විදියට විශ්වගෙ තාත්තා දැනගෙන හිටියා එයාගෙ ජීවිතය කෙටියි කියලා… විශ්වට අවුරුදු 16 වෙනකොටම තමයි විශ්වගෙ තාත්තා විශ්වට එයාගෙ සේසතම ලියලා දුන්නෙ. නංගිටත් අයිතියක් තියලා. නමුත් ඒ හැමෝම විශ්ව දාලා ගියා… දැන් එයාට ඉන්නෙ අපි විතරයි. අපි විශ්ව අපේම දරුවෙක් වගේ බලාගන්නෙ ඒ නිසයි… මම බලාපොරොත්තු වෙනවා ඔයාගෙ හිතේ විශ්ව ගැන අදහසක් තිබෙනවා නම් ඒක ස්ථිර අදහසක් වේවි කියලා… මොකද විශ්ව කියන්නෙ මේ ලෝකෙ තනි වුන දරුවෙක්… අපි නැති කාලෙක විශ්වට කවුරුවත් නැහැ… අන්න ඒ නිසා අපි බොහොම කල්පනාකාරී වෙනවා විශ්වගෙ අනාගතය ගැන…

මම දන්නවා මිස්ටර් සුමනසේකර, විශ්ව කියන්නෙ වෙනත් අයට වඩා බොහොම වෙනස් විදියට හිතන කෙනෙක් කියලා මම දන්නවා.. ඒ වගේම හරිම හොඳ කෙනෙක්. මාත් සමඟ සතියකටත් වඩා එකට වැඩ කරද්දි මට තේරුණ දෙයක් තමයි එයා කිසිම අසංවර ගතියක් නැති බොහොම තැන්පත් කෙනෙක් කියන දේ… මම දන්නෙ නැහැ විශ්ව මට මොන විදියකට සළකනවද කියන එක… නමුත් මම කියන්න ඕන මම විශ්වට බොහොම කැමතියි.. අපි ගැන අපේ අනාගතය  ඉදිරියේදී විසඳයි…

ඒ කතා බහ අවසන් වූයේ වාට්ටුව භාර වෛද්‍යවරයා තවත් වෛද්‍යවරියක් සමඟ සුමනසේකර මහතා සහ මොලී කතාකරමින් හුන් තැනට පැමිණීම නිසාවෙන්..

මිස්ටර් සුමනසේකර, මේ ඉන්නේ අපේ රෝහලේ පුනරුත්ථාපන අංශයේ වෛද්‍යවරියක්. ඔබත් විශ්වත්  ශ්‍රී ලාංකික සම්භවයක් ඇති නිසා අපි තීරණය කළා ශ්‍රී ලාංකික සම්භවයක් ඇති වෛද්‍යවරයෙක්ම විශ්වගේ පුනරුත්ථාපන කටයුතු සඳහා යොදවන්න. ඒක මානසිකවත් විශ්වට සහ ඔබ සියළු දෙනාට පහසුවක් වෙන නිසාම.. ඊට අමතරව මේ ඉන්න වෛද්‍ය ගීතිකා ගුණසේකර මානසික වෛද්‍ය විද්‍යාවත් ප්‍රගුණ කළ අයෙක්, ඒ නිසා විශ්වගේ මානසික පුනරුත්ථාපනයත් කායික පුනරුත්ථාපනයත් යන දෙකම එකතැනින් සිදු කර ගන්න පුළුවනි. අපි හෙට විශ්වව පුනරුත්ථාපන මධ්‍යස්ථානයට ගෙනයනවා… ඉන් පසුව නම් මේ වගේ නිතර ඔහුව බලන්න එන්න බැරි වේවි. මොකද දවස පුරාවටම තරමක දැඩි පුනරුත්ථාපනයක් කෙරෙන නිසා ඒ සියල්ල ක්‍රමාණුකූලව සිදු විය යුතුයි. දවසකට එක වතාවක් පමණක් ඥාතීන් බලන්න අවසර ලැබෙනවා. ඔහුගේ මානසික පුනරුත්ථාපනයට අදාල අභ්‍යාස කෙරෙන නිසා බාහිර මානසික හේතූන් අවම කරන්න අපි කටයුතු කර තිබෙනවා. ඒ නිසා ඔබලා පුනරුත්ථාපන වෛද්‍ය කාර්යමණ්ඩලය නියම කරන වෙලාවක් ඇතුලත පමණක් පැමිණිය යුතුයි.

හොඳමයි ඩොක්ට, කොහොමත් මට දවල් වෙලාවෙ නම් වැඩිය එන්න ලැබෙන්නෙ නැහැ… මට බොහෝ විට එන්න ලැබෙන්නෙ සේවය අවසානයේ සවස පහ පසු වුනාට පස්සෙයි…  මොලී සිය කණස්සල්ල මුසු හැඟීම් වෛද්‍යවරයා වෙත හැරපෑවාය.

මට තේරෙනවා මොලී… නමුත්, මට මේ සැලසුම් වෙනස් කරන්න බැහැ.. මොකද මේ වෛද්‍යවරු ඒ ඒ රෝගියාට නිසි සැලසුම් සකස් කරලා තිබෙන නිසා… ඔබට පුළුවන් දවස් කිහිපයකට වතාවක් ඇවිත් විශ්ව බලලා යන්න..

ඔව් මොලී .. අපි එහෙම කරමු… අපිත් තව සති කිහිපයක් මෙහේ ඉන්න නිසා විශ්වගේ පුනරුත්ථාපන කටයුතු ඉක්මනින් කරගනිමු.. හොඳ වුනාට පස්සෙ අපි එයාව ගෙදර එක්කරගෙන ගිහින් ඉතිරිය බලමු… සුමනසේකර මහතා ද වෛද්‍යවරයාගේ අදහසට එකඟත්වය පළ කළේය…

මෙතෙක් වෙලා නිහඬව සිටි වෛද්‍ය ගුණසේකර මෙනෙවිය සිය කටහඬ අවදි කළාය……..

විශ්ව පුනරුත්ථාපන මධ්‍යස්ථානයට ඇතුලත් කර සතියක් ගත වූ නමුත් මොලීට විශ්ව බැලීමට යාමට හැකි වූයේ බදාදා දිනයකදී පමණි. පර්යේෂණාගාරයේ අධික රාජකාරි කන්දරාවත්, විශ්ව එකතුව හා ඇරඹීමට සැලසුම්කරගෙන තිබූ පර්යේෂණයේ මූලික කටයුතු තනිවම කරගෙන යාමට සිදු වීමත් නිසා මොලීට ඉහටත් උඩින් රාජකාරි පැවරී තිබිණ. විශ්ව ප්‍රකෘති තත්ත්‍වයට පැමිණීම නිසා පර්යේෂණාගාරයේ සියල්ලන්ම තරමක සතුටින් පසු වූහ. ආචාර්ය නීල් ෆියු මෙන්ම ආචාර්ය ඩෙනිස් ලිපර්ඩ් ද පැමිණ මොලීගෙන් විශ්ව ගැන තොරතුරු විමසීම නිසා මෙගන් පසු වූයේ තරමක අමනාපයෙනි.

මොකද මේ දවස්වල විශ්ව බලන්න කවුරුවත් ගියේ නැත්තෙ ? වෙනදා හැමදාම ගිය කට්ටියට යන්න එපා වෙලාද ? දහවල් කෑම වෙලාවේ කෑම කාමරයේදී මෙගන් උපහාසයට මෙන් ඇසුවාය.

මේ දවස්වල විශ්ව පුනරුත්ථාපන මධ්‍යස්ථානයෙ නවත්වලා ඉන්නෙ. එයාගෙ කකුල ශක්තිමත් කරන ව්‍යායාම ආදිය කරවනවා.. සමහරවිට තවත් සතියකින් විතර ගෙදර යන්න පුළුවන් වේවි. එයා ගෙදර එක්කගෙන ගියාම තමයි ඉතින් වැඩිපුර උදව් ඕන වෙන්නෙ.. දැන් නම් ඉතිං හැම දේටම උදවුවට කට්ටිය ඉන්න නිසා ප්‍රශ්නයක් නැහැ… මොලී සැමට ඇසෙන්නට පැවසුවාය.

ඒ සමඟම මොලීගේ දුරකථනයට කෙටි පණිවුඩයක් ලැබීමෙන් ඇය තරමක් චකිතයකට පත් විය.

මට පොඩ්ඩක් එළියට යන්න වෙලා තිබෙනවා… මම ගිහින් එන්නම්….

මොකද්ද හදිස්සිය…. බිල් එසේ ඇසුවේ ඔහුගේ පෞද්ගලික ක්‍රියාකලාපය කුමක් වුවත් අනුන්ට උදවු කිරීමට නිතරම සැදී පැහැදී සිටින නිසාය.

නැහැ බිල්.. ප්‍රශ්නයක් නෙවෙයි. මගේ මාමා කෙනක් වොෂිංටන් වලට ඇවිත්, මාව බලන්න ඕන කියලා එන්න කියලා තියෙන්නෙ… මම ඉක්මනට ගිහින් එන්නම්…

මොලී ඉක්මනින්ම සිය රථයට නැගී, නගරයේ අති සුඛෝපභෝගී ආපන ශාලාවක් වන සෙනෙටර්ස් ක්ලබ් බලා රිය ධාවනය කළාය.

 

පිටස්තරයා – 15

පසුදා සවස්වනතුරු මොලීට තිබුණේ කණස්සල්ල මුසු නොයිවසිල්ලකි….. තමා සිහිනෙකින්වත් නොපැතූ අභව්‍ය සිදුවීම් වැලක් තම දෑස් ඉදිරිපිට දිගහැරෙමින් පවතින බව පමණක් ඇයට හැඟී ගොස් තිබුණි. තම රැකියාවේ හැටියට බොහෝ පිරිමින් ආශ්‍රය කර තිබුණද, මීට වඩා හැඟුම්බර අවස්ථාවලට මුහුණ දී තිබුණද, මේ සිදුවීම් ගොන්න තම ජීවිතයේ ලැබූ අත්දැකීම් සියල්ලට වඩා වෙනස් බව ඇයට හැඟෙමින් පැවතුනි. සේවා ස්ථානයද කිසිම කෙනෙකු විහිළුවක්වත් නොකරන තත්ත්‍වයකට පත්ව තිබුණි.  වෙනදා අන් අයට විහිළු කරන බිල් පවා තමන්ගේ පාඩුවේ සිය කටයුතු කරගෙන යනු දකින්ට ලැබුණි…

මේ අතර හදිසියේම සිය ප්‍රධානියාගෙන් මොලීට ලැබුණේ වහාම පැමිණ ඔහු හමුවන ලෙසයි…

සුවිශාල අනතුරක සේයාවක් ඇගේ සිතේ නලියන්නට විය….

ඇය විද්‍යාගාර ප්‍රධානී නීල් ෆියු හමුවන්නට ගියාය….

:::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::

කොහොමද ? ගමන් මහන්සිය හොඳටම ඇති නේද ?

තානාපති කාර්යාලයේ නිලධාරී ගීතාංජන ලංකාතිලක මහතා විසින්  වොෂිංටන් ඩලස් ගුවන්තොටුපලේ මගී පර්යන්තයේදී සුමනසේකර යුවල පිළිගනිමින් විමසුවේය…

මහන්සියි කියලා මොනවා කරන්නද මහත්මයා…. මේ ගමන එන්න එපායෑ…

මම ගීතාංජන ලංකාතිලක… අඳුන්වාදෙන්නත් බැරි වුනා..

බොහොම සන්තෝෂයි අඳුනා ගන්න ලැබීම ගැන…. මම විශ්වගෙ ලොකු මාමා… සුමනසේකර… මේ මගේ බිරිඳ නීලා…

ඔව්, පන්සලේ ලොකු හාමුදුරුවො මට ඔබ දෙපළ ගැනම හොඳ හැඳින්වීමක් කළා… අත්ථදස්සි හාමුදුරුවොත් සෑහෙන විස්තර මට කිවුවා.. මේ දවස් දෙක තුනම අත්ථදස්සි හාමුදුරුවො මට කතා කරලා කිවුවේ ඔබ දෙපළගෙ නවාතැන්, කෑම බීම කටයුතු සම්පාදනය කරන ආකාරය.. අපි දැන් යන්නෙ තානාපති කාර්යාලයේම සේවය කරන කෙනෙකුගෙ නිවසකට.. එහේ තමයි අපි ඔබ දෙපලට නවාතැන් පහසුකම් දෙන්න යොදාගෙන තිබෙන්නෙ.. එහි ඉන්නෙත් ඒ දෙපළ පමණයි.. ඒ නිසා වැඩි කරදරයක් නෑ.. ගමන් පහසුකම් සඳහා තානාපති කාර්යාලයෙන් වාහනයක් ලැබෙනවා රියැදුරෙක් සමඟම… විශ්වගෙ තාත්තා එක්සත් ජාතීන්ගෙ සංවිධානයේ සේවය කළ නිසා අපට මේ පිළිබඳ විශේෂ පහසුකම් ලැබී තිබෙනවා… ඒ වගේම ඔහු අපේ තානාපති කෙනෙකුව සිටි නිසා ඒ පහසුව තවත් වැඩියි… කිසිම දේකට බය වෙන්න එපා.. සියල්ල සූදානම්…

අනේ පුතා බොහොම ස්තූතියි මේ කරන උදවු වලට…. අපි කීයටවත් බලාපොරොත්තු වුනේ නැහැ මේ වගේ සත්කාරයක්… ලොකු හාමුදුරුවො කිවුවා අපට නවාතැන් පහසුකම් සකසලා තියෙන්නෙ කියලා… මම දැනං හිටියෙ එච්චරයි…

අපට විශ්ව බලන්න යන්න පුළුවන් කීයටද ?

ආ… ඒක ගැන කතා කරන්නයි මම හිටියෙ… අපි මේ බෑග් තියලා පොඩ්ඩක් පිළිවෙලක් වෙලා හවස හයට පමණ යමු රෝහලට…. ඔබ නැවතී ඉන්න අදහස් කරන යාපා මහත්මයාගෙ නිවසේ වැඩි දුරක් නැහැ… රෝහලට…

අනේ ලොකු දෙයක්… මට ඉක්මනින්ම සුදුපුතා බලාගන්න ඕන… නීලා සුමනසේකර මහත්මිය නෙතට නැඟුන කඳුලක් පිසදමමින් පැවසුවාය.

බය වෙන්න එපා මිසිස් සුමනසේකර… විශ්ව නවත්වලා තියෙන්නෙ ඇමරිකාවෙ තියෙන හොඳම හමුදා රෝහලක… මේකේ තියෙන්නෙ ලෝකයේ හොඳම පහසුකම්. ඒ වගේම මේ රෝහලට ඇමෙරිකාවේ තිබෙන අනෙක් ප්‍රධාන රෝහල් සියල්ලම සමඟ සබඳතා තිබෙනවා.. ඒ නිසා විශ්ව වෙනුවෙන් කරන්න පුළුවන් සියළුම දේ ඒ රෝහලෙන් කෙරෙනවා. එච්චරක් නෙවෙයි විශ්වගේ සේවා ස්ථානයෙනුත් මේ ගැන හොඳට හොයා බලනවා.. කිසිම දේකින් අඩුවක් වෙන්න ඉඩක් නෑ..

ඒ සංවාද අතරතුර ඔවුහු යාපා මහතාගේ නිවස කරා පැමිණ තිබුණි. ආගන්තුක සත්කාර වලින් සහ තේ පානයෙන් අනතුරුව නැවතත් මඟට පිලිපන්නේ විශ්ව බැලීම සඳහා රෝහලට යාමටය.

::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::

මේ මිනිස්සුන්ට හරියට වාහනයක්වත් හප්පන්න බැරි ද ? බලනවා අර මිනිහා දැන් ජීවත් වෙයිද මැරෙයිද කියලා කවුද දන්නෙ ? හොඳ වෙලාවට අපි මැදිහත් වෙලා මේක වැහුවා… කවුරුහරි දැනගත්තා නං අපි මේකට සම්බන්ධයි කියලා මොන වගේ තත්ත්‍වයක්ද ඇතිවෙන්නෙ ?

ඔවුන් තිදෙනාම කිසිදු වචනයක් නොදොඩා නිහඬව ජනරාල් වෙලිංටන් දෙස බලා සිටියා පමණි.

තමුසෙලාට කවදාවත් හරියට වැඩක් කරගන්න බැරි හැටි ? එක පාරක් තාප සංවේදක කැමරාවෙන් ගත්ත වීඩියෝ හරියට කර ගත්තෙ නෑ… දැන් ඒ මදිවට මේ මිනිහා හප්පලා ඒ මිනිහා ජීවිතයත් මරණයත් අතර සටනක.. කවුද දන්නෙ තමුසෙලා හයි කරපු කැමරා ටිකයි  ශබ්ධ රෙකෝඩ් කරන උපකරණයි ටිකත් කාටහරි අහුවෙයිද කියලා… ඒක අන්තිමට  හොයාගෙන ගිහින් ඒවා හයි කළේ එෆ් බී අයි එක කියලා දැනගත්තාම තවත් ලෙඩක්… ඇත්තෙන්ම තමුසෙලා මේ වැඩේට සුදුසුද ?

ජෙනරාල් වෙලිංටන්… අපි හිතුවෙ නැති විදියට තමයි වාහනේ හැප්පිලා තියෙන්නෙ…. අපි සැලසුම් කළේ පිටුපසින් හප්පලා පොඩි හානියක් කරලා ඔහුව නිරීක්‍ෂණය කරන්න… නමුත් හිතුවෙ නැති විදියට වාහනයෙ පැත්තක හැපිලා ඔහුගේ පෙනහැල්ල සිදුරු වෙලා තියෙනවා… මේ නිසා තමයි වැඩේ බරපතල වුනේ… ජෙනී අවසානයේ කටහඬ අවදි කළාය..

ජෙනී… මම ඔයාව මේ වැඩේට දැම්මෙ මීට වඩා සූක්‍ෂම විදියට එයාට ලංවෙලා තොරතුරු ලබා ගන්න… නමුත් මම බලාපොරොත්තු තියාගෙන හිටි ආකාරයට ඒක වුනේ නැහැ… ඔයාත් මාව අසතුටට පත් කරනවා… මේ දෙන්නට වැඩිය ඔයා සූක්‍ෂම වෙන්න ඕන… මට ආයෙම ඔය තුන්දෙනාට කතා කරන්න ඉඩ තියන්න එපා.. මට මෙයාව යථා තත්ත්‍වයට ආවට පස්සෙ ගන්න ඕන තොරතුරු ටික අරගෙන දෙන්න…. මේකට මමත් දැන් අතදාපු නිසා මේකෙ කෙළවරක් දකින්න ඕන…. මෙයා අපට වැදගත් වෙන්නෙ බොහොමයක් හේතු මත… දැන් යන්න පුළුවන්……..

:::::::::::::::::::::::::::::::::::::::::::::::::::::::::::::::::::::::::::::::::::

සුමනසේකර යුවල විශ්ව බැලීමට රෝහල් කාමරයට යන විටත් අත්ථදස්සි හිමියන් විසින් පිරිත් සජ්ඣායනය අරඹා තිබුණි. සුමනසේකර යුවල පැමිණි බව දුටු අත්ථදස්සි හිමියෝ පිරිත් සජ්ඣායනය මඳකට නතර කර සුමනසේකර මහතාට හිසින් සන් කළ සේක. සුමනසේකර මහතා ද අත්ථදස්සි හිමියන් අසළ සිටගෙන පිරිත් සජ්ඣායනය කරන්නට විය… සුමනසේකර මැතිණිය සෙමෙන් සෙමෙන් විශ්වගේ ඇඳ අසළට ගොස් ඔහු දෙස බලා සිටින්නට වූවාය…. ඈ සෙමෙන් විශ්වගේ අතක් පිරිමදින්නට විය…

සුපුරුදු පරිදි පිරිත් සජ්ඣායනය වන අවස්ථාවේ වෙනස් වන මොළයේ සංඥා සටහන අද දිනද වෙනස් වූ නමුත්, සුමනසේකර මහතාගේ පිරිත් සජ්ඣායනය ඇරඹෙත්ම නැවතත් ව්‍යාකූල වන්නට විය… වාට්ටුව භාර වෛද්‍යවරයා ද මේ සිදුවීම නිරීක්‍ෂණය කරමින් සිටියේය… සුමනසේකර මහත්මිය විශ්වගේ අත පිරිමදින විට සියල්ලන් පුදුමයට පත් කරමින්  විශ්වගේ ඇඟිලි සෙමෙන් සෙමෙන් ඇගේ අත ග්‍රහණය කර ගන්නට විය.. පිරිත් කියමින් සිටි ස්වාමීන් වහන්සේගේ මුවඟ මඳහසක් නැඟෙන්නට විය.. සුමනසේකර මහතා දොහොත් මුදුන් දී පිරිත් සජ්ඣායනය කරමින් සිය සිත දැඩි ඒකාග්‍රතාවයකට ගෙන ආවේය….

අවසන, සියල්ල නිසල විය… විශ්වගේ මොළයෙන් ලැබෙන සංඥා නැවතත් සරළ වන්නට විය.. පෙර පැවති ව්‍යාකූලභාවය අඩුවෙමින් තිබිණ… පිරිත් සජ්ඣායනය අවසානයේ සුමනසේකර මහතා සෙමෙන් ගොස්  විශ්වගේ හිසේ ඉලෙක්ට්‍රෝඩ සවිකර නොතිබූ නළල දෑස් පියාගෙන පිරිමදින්නට විය… විශ්වගේ මුවින් සුළු කෙඳිරියක් පිටවිය…. තවමත් ඔහු ග්‍රහණය කරගෙන තිබූ සුමනසේකර මහත්මියගේ අත අතහැරී නැත….. සැවොම බලාපොරොත්තු වූ ඒ මොහොත උදාවිය.. විශ්ව…….. කෙමෙන් දෑස් විවර කළේය….

:::::::::::::::::::::::::::::::::::::::::::::::::::::::::::::::::::::::::::::::::::::

සිය ප්‍රධානියාගෙන් ලැබූ අවවාද සහ ඉදිරි සැලසුම් පිළිබඳ කල්පනා කරමින් සිටි මොලී, සිය දුරකථනයට කෙටි පණිවුඩයක් ලැබුණ බවට ලැබුණ සංඥාවෙන් කල්පනා දැහැණින් බිඳුනාය. ඇය සිය දුරකථනයේ රහස් කේතය ඇතුලත් කර පණිවුඩය කියවා බැලුවාය…

සවස සිදු වූ කතාවේ තවත් පරිඡේදයක්දෝ යි සිතමින් මොලී කෙටි පණිවුඩය විවෘත කළාය…

විශ්වට සිහිය ඇවිත්…. දැන්ම යන්න….. සියල්ල සූදානම්…..

ඒ සිය ඉහළම ප්‍රධානියාගෙනි. ඉල්ලීම ඉවත හළ නොහැක. වහාම ඇඳ පැළඳගත් මොලී සිය රථයට නැඟී හමුදා රෝහල කරා ඉගිල්ලුනාය… වේලාව සවස හත පහු වූවා පමණි… 16වන මාවතේ ගමන් කළ ඇයට එතරම් මාර්ග තදබදයක් නොමැති වුවත් වේලාව ගතවන්නේ සෙමින් බව සිතුනි… ඇය සිය රථයේ වේගය වැඩි කර විස්කොන්සින් මාවතට හැරවීම සඳහා අතුරු මාවතකට හැරවූවා පමණි…. පිටුපසින් පැමිණි පොලිස් මාර්ග නිරීක්‍ෂණ රථයක සංඥා එළි දැගේ රථය එල්ල කරගෙන දැල්වෙන්නට විය…

ශිහ්… මේ වෙලාවෙම ?

ඇයට කළ හැකි කිසිත් නොහැක… ඇය සිදු කලේ වැරැද්දක් බව ඇයට හැඟුණි… මාර්ගයේ වේග සීමාවට වඩා පැයට සැතපුම් 15 කට වැඩියෙන් ඇය ධාවනය කර ඇති බව ඇයට දැනුනි… මීටත් වඩා හදිසි අවස්ථාවල මීට වඩා භයානක අවස්ථාවන්හි රථ ධාවනය කිරීමට පළපුරුද්දක් ඇති ඇයට මේ සිදුවීම අදහාගත නොහැකි විය.. කෙසේ වෙතත් කළ හැක්කක් නොමැත… සිය රථයට පිටුපසින් පොලිස් රථය නැවැත්වූ නිලධාරියා මොලීගේ රථයේ දොර අසල සිටගත්තේය. ඇය සිය රථයේ වීදුරුව පහත් කර තමා සතු වූ ඉහළම සේවා හැඳුනුම්පත නිලධාරියාට පෙන්වූවාය..

ඇයි මිස්… හදිසියක්ද ?

ඔව්.. ඉක්මනින්ම වෝල්ටර් රීඩ් හමුදා රෝහලට යන්න ඕන… ඒකයි මම මේ ඉක්මනින් යන්නෙ… දැන්ම ගියේ නැතිනම් මට අවශ්‍ය බොහෝ දේවල් නැති වෙන්න පුළුවන්….

මිස් දන්නවනේ වෙච්ච වැරැද්ද…. පොලිස් නිලධාරියා ඇය අතින් සිදු වූ වැරැද්ද පැහැදිළි කරදෙන්නට  විය.. ඉන්පසු සිය රථයට ගොස් එම හැඳුනුම්පතේ වූ අංකය සිය පරිඝණකයට ඇතුලත් කර ඒ හැඳුනුම්පතේ වූ විස්තර සහතික කර ගත්තේය.

මහත්මයා… මට දැන් යන්න ඕන… ඔබ දන්නවා මම ඉන්න තත්ත්‍වය… මට ඉක්මනටම යන්න ඕන… නැතිනම් මට ප්‍රධානියාට දන්වන්න වේවි..

හරි මිස්…  ඉක්මනට යන්න…  නමුත් පරිස්සමින්….

අනෙක් වැරදිකරුවනට නීතිය අකුරටම ක්‍රියාත්මක කළත්, මේ තරුණියට සිය ගමනාන්තයට ඉක්මනින් ළඟාවීමට ඉඩ දිය යුතු බව පොලිස් නිලධාරියා වටහාගත්තේය.

බොහොම ස්තූතියි…..

ඇය නැවතත් සිය රථය පණගන්වාගෙන වෝල්ටර් රීඩ් හමුදා රෝහල වෙත ධාවනය කළාය… මේ අවස්ථාවේ හැටියට එසේ ඉක්මනින්ම පොලිස් නිලධාරියාගෙන් ගැලවී යාමට හැකිවීම ගැන ඇය බොහෝ සතුටු වූවාය. දැනටමත් පරක්කු වැඩිය… විශ්වගේ ඥාතීන් ද රෝහලට පැමිණ සිටිය හැකි බව ඇයට මතක් වූවාය…. රෝහල් ගේට්ටුව වෙත ලඟා වූ ඇය සිය සේවා හැඳුනුම්පත ආරක්‍ෂක අංශයට ලබා දුන්නාය.. ඒ දෙස දෙවරක් බැලූ හමුදා නිලධාරියා ගේට්ටුව විවර කර දුන්නේ වෙනදා නොමැති වෙනසක් මුහුණේ දරාගෙනය…. වෙනදා ශාන්ත දාන්තව රෝහලට පැමිණෙන මේ තරුණිය අද බොහෝ වෙනස්වී ඇත… කළබලයෙන් නමුත් කිසියම් අරමුණක් කරා යන බවක් ඔහුට පෙණුනි..

රෝහල් පරිශ්‍රයේ වාහනය නතර කළ ඇය විශ්වගේ කාමරය කරා ඇවිද්දා නොව දිවුවාය… ඇයට අවශ්‍ය වූයේ ඉක්මනින්ම විශ්ව බලා ගන්නටය.. විශ්වගේ මානසික තත්ත්‍වය කුමක්දැයි නිශ්චිතව දැන ගැනීමටය.. විශ්ව ඒ තරම්ම ඇයට වටී…. ඈ වටා සිටි සියල්ලන්ටම වටී… ඈ සිය සිතිවිලි එකලස් කර ගත්තාය… තමා මෙතෙක් කල් අන් අය වෙත පෑ ඒ මෘදු සිනාව, සුමුදු බව, අදත් පෙන්විය යුතු බව ඇයට සිහි වූවාය… ඇය වහා අසළ වූ කාන්තා වැසිකිලියකට ඇතුළු වී තමන්ගේ ස්වභාවය කුමනාකාර දැයි පිරික්සා බැලුවාය…

සියල්ල ඒ ලෙසම සිදු වේවි… ඈ තමාටම මුමුණා ගත්තාය.

ඇය සෙමින් සෙමින් විශ්ව සිටි කාමරය වෙත පියමැන්නාය….

මේ තරම් ඉක්මනට කොහොමද ඔයා මේක දැනගත්තෙ ? තානාපති කාර්යාලයේ ගීතාංජන ලංකාතිලක මහතා මොලී හැඳිනගෙන  දුර සිටම විමසුවා.

මට කෙටි පණිවුඩයක් ලැබුණා මගේ ප්‍රධානියාගෙන්… මම හිතන්නෙ ප්‍රධාන වෛද්‍යවරයා ඔහුට දැනුම් දෙන්න ඇති.

විශ්වට දැන් පැයකට විතර ඉස්සර සිහිය ආවා.. තවමත් වෛද්‍යවරු පරීක්‍ෂා කරලා බලනවා කොහොමද කියලා… ඊට පස්සෙ ඔයාට පුළුවන් වේවි එයාව බලන්න…

අපි හැමෝම හුඟක් බලාපොරොත්තු වුන දෙයක්… අපි හැමෝටම සතුටුයි විශ්වට ඉක්මනින්ම සිහිය ආපු එක ගැන… අපේ හැම දෙනාම සෑහෙන කණගාටුවෙන් හිටියෙ….

මේ ඉන්නෙ විශ්වගෙ මාමයි නැන්දයි… ලංකාතිලක මහතා මොලීට සුමනසේකර යුවල හඳුන්වා දුන්නේය.

සන්තෝෂයි අඳුනා ගන්න ලැබීම ගැන…. මම මොලී… විශ්ව එක්ක එකට වැඩ කරන්නෙ….

නීලකාන්ති සුමනසේකර මහත්මිය මොලී දෙස විමසුම් සහගත බැල්මක් හෙළුවාය… මොලී ඇය හා සිනාසුනාය…

සුමනසේකර මහත්මිය ඈ හා සිනාසුනත්, සුමනසේකර මහතාගේ මුහුණේ කිසිදු හැඟීමක් නොවීය…..

අද හවස මම ආවා මෙගන් එක්ක… එතකොටත් විශ්වට සිහිය තිබුණෙ නැහැ… ඩොක්ට කිවුවා විශ්වගෙ ඥාතීන් ආවම කම්පන ප්‍රතිකාරය ලබා දෙන්න බලාපොරොත්තු වෙනවා කියලා.. විශ්වට සිහිය ආවෙ ඒකෙන් පස්සෙද ? ඇය අපහසුතාවය මඟහරවාගනිමින් විමසුවාය.

නැහැ නැහැ…. මම හිතන්නෙ  නම් මේ දෙන්නා ආවා කියලා විශ්වට තේරිලා… මේ දෙන්නා ආපු ගමන් ඇස් ඇරියා… කවුරු හරි නෑ කෙනෙක් එනකල් ඉඳලා තියෙන්නෙ… ලංකාතිලක මහතා විහිළුවක් කර ඒ අවස්ථාව සැමට පහසු කිරීමට සරළ උත්සාහයක් ගත්තේය.

ඒක හරිම පුදුමයි නෙ… කිසිම බෙහෙතක් නැතිව ?

විශ්වට ලැබෙන්න ඕන හොඳම බෙහෙත ලැබුණා මොලී… එයාට හැමදාම ඒ බව දැනුනා… ඒක අදත් දැනෙන්න ඇති… සුමනසේකර මහත්මිය සෙමෙන් පැවසුවාය….

මමත් හිතන්නෙ එහෙමයි… පිරිත් සජ්ඣායනය වෙලාවෙ නම් වෙනසක් පෙන්වුවා… නමුත් සිහිය එන පාටක් තිබුණෙ නැහැ…. අපි හැමෝම දැනගෙන හිටියා පිරිත් වලින් විශ්වට ලොකු සෙතක් වෙනවා කියලා.. ඒත් කොයි තරම් දුරට ඒක වෙනවද කියලා කාටවත් නිනවුවක් තිබුණෙ නැහැ… මොනවා වුනත් සිහිය ආපු එක ලොකු දෙයක්… මොලී නැවතත් පැවසුවාය….

අපි බලමු… තව ගොඩක් පරීක්‍ෂණ කරන්න වෙයි…

ඒ කතාබහ මොහොතකට නතර වූයේ විශේෂඥ වෛද්‍යවරයා සුමනසේකර යුවලට කාමරය තුළට පැමිණෙන ලෙස කළ ඇරයුමත් සමඟිනි. ඔහුට අවශ්‍ය වූයේ විශ්ව දන්නා හඳුනන මුහුණු වෙත දක්වන ප්‍රතිකාරය අනුව දිගුකාලීන මතකයේ ප්‍රතිස්ථාපනය කෙතෙක් දුරට සිදු වී ඇත්දැයි යන්න ගුණාත්මකව සොයා ගැනීමය.

සුමනසේකර යුවල සෙමෙන් ගොස් විශ්වගේ ඇඳ දෙපස සිටියහ. ඔහුගේ දෑස් කඳුලින් තෙත් විය… මුවේ සිහින් සිනාවක් මතු කරන්නට තැත් කිරීමක් පෙණුනි. නීලකාන්ති සුමනසේකර මහත්මිය සතුටු කඳුලක් හෙළුවාය. වෛද්‍ය විද්‍යාත්මක දැනුමක් නැතත්, ඔහු තමා හඳුනාගත් බව ඇයට දැනුනි…

මමත් යන්නද ? මොලී නොයිවසිල්ලෙන් මෙන් විශේෂඥ වෛද්‍යවරයාගෙන් විමසුවාය…

යන්න… ගිහින් බලන්න එයාගෙ කෙටි කාලීන මතකය කොහොමද කියලා… වෛද්‍යවරයා ඇය දිරිමත් කළාය….

ඇඳ අසළට ගිය මොලී විශ්වගේ මුහුණට එබී බලා සිනාසුනාය…….